કેન્દ્રીય ગૃહ અને સહકારિતા મંત્રી શ્રી અમિત શાહે આજે ઓડિશાના ભુવનેશ્વરમાં NDDB અને OMFED ના વિકાસ કાર્યોનું ઉદ્ઘાટન અને ઓડિશા સરકારની વિવિધ પરિયોજનાઓનું લોકાર્પણ તથા ખાતમુહૂર્ત કર્યું. કેન્દ્રીય ગૃહ અને સહકારિતા મંત્રીએ ઓડિશાના પારાદીપમાં સલ્ફ્યુરિક એસિડ પ્લાન્ટ-III નું લોકાર્પણ કર્યું અને સહકારિતા વિકાસ ગોષ્ઠિને પણ સંબોધિત કરી. આ પ્રસંગે કેન્દ્રીય મંત્રી શ્રી ધર્મેન્દ્ર પ્રધાન અને ઓડિશાના મુખ્યમંત્રી શ્રી મોહન ચરણ માઝી સહિત અનેક મહાનુભાવો ઉપસ્થિત હતા.

આ પ્રસંગે પોતાના સંબોધનમાં કેન્દ્રીય ગૃહ અને સહકારિતા મંત્રી શ્રી અમિત શાહે કહ્યું કે આજનો દિવસ ઓડિશાના વિકાસ માટે ખૂબ મહત્વપૂર્ણ છે કારણ કે આજે એક જ દિવસમાં 3770 કરોડ રૂપિયાના વિકાસ કાર્યોનું લોકાર્પણ અને ભૂમિપૂજન થયું છે. તેમણે કહ્યું કે આજે પારાદીપમાં ઇફકો (IFFCO) નો સલ્ફ્યુરિક એસિડનો વિશાળ કારખાનો લોકાર્પિત થયો, જેના માધ્યમથી ઇફકો હવે સલ્ફ્યુરિક એસિડના મામલે આત્મનિર્ભર બનશે. તેમણે કહ્યું કે આગામી દિવસોમાં ઇફકો અને ક્રિભકો (KRIBHCO) મળીને સમગ્ર દેશને સલ્ફ્યુરિક એસિડના મામલે આત્મનિર્ભર બનાવશે.

શ્રી અમિત શાહે કહ્યું કે આજે અહીં ગૃહ મંત્રાલયની 3, સહકારિતા મંત્રાલયની 4 અને ઓડિશા સરકારની 173 યોજનાઓનું લોકાર્પણ અને ખાતમુહૂર્ત થયું છે. તેમણે કહ્યું કે ઓડિશા સરકારની 173 યોજનાઓમાંથી 1230 કરોડ રૂપિયાના ખર્ચે 61 યોજનાઓ પૂર્ણ થઈ ગઈ છે અને 2116 કરોડ રૂપિયાના ખર્ચે 112 યોજનાઓનું ખાતમુહૂર્ત થઈ રહ્યું છે. તેમણે કહ્યું કે આજે અહીં ગૃહ મંત્રાલયના બે વિશિષ્ટ પ્રયોજન – ઓડિશામાં નેશનલ ફોરેન્સિક સાયન્સ યુનિવર્સિટીનું ભૂમિપૂજન થયું છે અને એક કામચલાઉ કેમ્પસનું પણ ઉદ્ઘાટન થયું છે. તેમણે કહ્યું કે અહીંથી ઓડિશાના ફોરેન્સિક વિજ્ઞાનના વિદ્યાર્થીઓ માટે ગ્રેજ્યુએટ થતાની સાથે જ પાકી નોકરીવાળા કોર્સના માધ્યમથી ઘણી બધી સંભાવનાઓ ખુલશે, જે દેશની કાયદો અને વ્યવસ્થાને મજબૂતી આપશે.

કેન્દ્રીય ગૃહ અને સહકારિતા મંત્રીએ કહ્યું કે આજે અહીં ત્રણ નવી ન્યાય સંહિતાઓને સામાન્ય નાગરિકો, વકીલો, ન્યાયપાલિકાના સભ્યો અને પોલીસ અધિકારીઓની સમજમાં આવે તેવી સરળ ભાષામાં પ્રદર્શનીનું પણ ઉદ્ઘાટન થઈ રહ્યું છે. તેમણે કહ્યું કે લગભગ 150 વર્ષ પછી પ્રધાનમંત્રી શ્રી નરેન્દ્ર મોદીજીના નેતૃત્વમાં ભારતની સંસદ દ્વારા પસાર થયેલા અને ભારતના લોકોના કાનૂની અધિકારોની રક્ષા માટે પસાર થયેલા કાયદાઓથી હવે દેશ ચાલી રહ્યો છે. તેમણે કહ્યું કે આ કાયદાઓ દ્વારા 2028 પછી કોઈપણ FIR માં ત્રણ વર્ષની અંદર સુપ્રીમ કોર્ટ સુધી ન્યાય મળશે. તેમણે કહ્યું કે આ કાયદાઓ દુનિયાના સૌથી આધુનિક અને વૈજ્ઞાનિક કાયદાઓ છે. શ્રી શાહે કહ્યું કે આ કાયદાઓમાં સાત વર્ષથી વધુ સજાની જોગવાઈવાળા તમામ ગુનાઓમાં FSL ટીમની મુલાકાતને ફરજિયાત કરવામાં આવી છે. તેમણે કહ્યું કે મોદી સરકાર દેશભરમાં ફોરેન્સિક સાયન્સ લેબોરેટરી અને નેશનલ ફોરેન્સિક સાયન્સ યુનિવર્સિટીના કેમ્પસ બનાવી રહી છે.

શ્રી અમિત શાહે કહ્યું કે ઓડિશામાં પણ નવી ન્યાય સંહિતાઓ હેઠળ નોંધાયેલી FIR માં 87 ટકાથી વધુ દોષસિદ્ધિ દર મેળવવામાં આવ્યો છે. તેમણે કહ્યું કે હવે વૈજ્ઞાનિક અભિગમ અને વૈજ્ઞાનિક પુરાવાઓના માધ્યમથી ગુનેગારોને સજા અપાવવાનું કામ થઈ રહ્યું છે. તેમણે કહ્યું કે આજે અહીં NFSU અને CFSL નું પણ ભૂમિપૂજન થયું છે. તેમણે કહ્યું કે આ કેમ્પસ 3 વર્ષમાં સંપૂર્ણ રીતે કાર્યરત થશે, જેમાં 30 અભ્યાસક્રમો ભણાવવામાં આવશે અને લગભગ 2500 વિદ્યાર્થીઓ અહીં શિક્ષણ મેળવશે.

કેન્દ્રીય ગૃહ મંત્રીએ કહ્યું કે ઓડિશા સરકારની પરિયોજનાઓ પણ આજે આગળ વધી છે. તેમણે કહ્યું કે 20 જિલ્લાઓમાં સાયબર ક્રાઈમ અને આર્થિક ગુનાઓની શાખાઓની પણ આજે શરૂઆત થઈ રહી છે. આ ઉપરાંત સહકારિતા ક્ષેત્રના ઘણા કાર્યક્રમો પણ અહીંથી થઈ રહ્યા છે. તેમણે કહ્યું કે ઇન્ડિયન પોટાશ લિમિટેડ (IPL) દ્વારા બદામ્બા સુગર મિલને ફરીથી શરૂ કરવાનું કામ પૂર્ણ થઈ ગયું છે. તેમણે કહ્યું કે ઇન્ડિયન પોટાશ લિમિટેડ (IPL), બંધ પડેલી તમામ ખાંડ મિલોને ભારત સરકારના સહકારિતા મંત્રાલયના સહયોગથી શરૂ કરવા માટે તૈયાર છે.

શ્રી અમિત શાહે કહ્યું કે ઓડિશામાં પાણી પુષ્કળ માત્રામાં ઉપલબ્ધ છે અને અહીં ડેરીની પ્રચુર સંભાવનાઓ છે. તેમણે કહ્યું કે અગાઉની સરકારે રાજ્યમાં સહકારિતા કે ડેરી ક્ષેત્ર માટે કંઈ કર્યું નથી. તેમણે કહ્યું કે ભારત સરકારનું સહકારિતા મંત્રાલય અને ઓડિશા સરકાર મળીને અમૂલની તર્જ પર અહીંની ડેરીઓને સાથે રાખીને દરેક ગામમાં કોઓપરેટિવનો એક મજબૂત આધાર બનાવવાનું કામ કરશે. તેમણે કહ્યું કે ઓડિશા સરકારે ખૂબ ઓછા સમયમાં 3100 રૂપિયા પ્રતિ ક્વિન્ટલના દરે ચોખા ખરીદવાનું પોતાનું વચન પૂરું કર્યું છે. શ્રી શાહે કહ્યું કે સુભદ્રા યોજના હેઠળ એક કરોડ માતાઓ-બહેનોને ફાયદો પહોંચાડવાનું કામ કરવામાં આવ્યું છે. તેમણે કહ્યું કે અમે ડેરીઓના ગઠન માટે એક વિશેષ અભિયાન ચલાવીશું, જેના માધ્યમથી ઓડિશાની ગ્રામીણ જનતા, ખાસ કરીને માતાઓ-બહેનોને સમૃદ્ધ બનાવવાનું કામ કરવામાં આવશે.

કેન્દ્રીય ગૃહ મંત્રીએ કહ્યું કે મુખ્ય વિપક્ષી દળ દેશની રાજનીતિને નકારાત્મક દિશામાં લઈ જવાનો પ્રયાસ કરી રહ્યું છે. તેમણે કહ્યું કે નવી દિલ્હીમાં યોજાયેલી AI સમિટ દરમિયાન મુખ્ય વિપક્ષી પાર્ટીના કાર્યકરોએ કપડાં ઉતારીને ભારતને બદનામ કરવાનો કુત્સિત પ્રયાસ કર્યો, જેની ઘોર નિંદા થવી જોઈએ. તેમણે કહ્યું કે ઓડિશામાં બે દાયકાથી વધુ સમયથી વિકાસ અટકેલો હતો. તેમણે કહ્યું કે ઓડિશાની અગાઉની સરકાર જનાદેશને જનતાની મજબૂરી માનતી હતી. તેમણે કહ્યું કે જનાદેશ જનતા માટે મજબૂરી નથી પરંતુ જનતાનો આશીર્વાદ હોય છે. શ્રી શાહે કહ્યું કે લોકશાહીમાં જેમને સત્તા પ્રાપ્ત થાય છે, તેમનું દાયિત્વ હોય છે કે તેઓ જનતાની અપેક્ષાઓ પર ખરા ઉતરે, તેમના સુખ-દુઃખમાં તેમની સાથે ઊભા રહે અને જનતાની સમૃદ્ધિ, શાંત માહોલ અને રાજ્યના વિકાસ માટે પ્રયત્ન કરે. શ્રી શાહે કહ્યું કે 20 વર્ષ સુધી શાસન કર્યા પછી પણ અગાઉની સરકારે ઓડિશાના વિકાસને ઠપ્પ કરી દીધો હતો. તેમણે કહ્યું કે ઓડિશાની જનતાએ 21 માંથી 20 લોકસભા બેઠકો પ્રધાનમંત્રી મોદીજીને આપી અને ફરીથી એકવાર મોદી સરકાર બનાવી અને ઓડિશામાં પણ પૂર્ણ બહુમતીની અમારી સરકાર બનાવી. તેમણે કહ્યું કે મોદી સરકાર અને ઓડિશા સરકાર સાથે મળીને બે દાયકાની કમીને 5 વર્ષમાં પૂર્ણ કરશે.

શ્રી અમિત શાહે કહ્યું કે મોદી સરકારે આસામ, ત્રિપુરા, ઉત્તરાખંડમાં વિકાસના નવા આયામો કંડાર્યા છે, દરેક વ્યક્તિ સુધી વિકાસને પહોંચાડ્યો છે અને દરેક યોજનાને દરેક નાગરિક સુધી પહોંચાડવાનો પ્રયાસ કર્યો છે. તેમણે કહ્યું કે પ્રધાનમંત્રી મોદીજી સમગ્ર દેશની સમૃદ્ધિ માટે અહર્નિશ પ્રયાસ કરી રહ્યા છે. તેમણે કહ્યું કે 2021 થી લઈને અત્યાર સુધી 6 વર્ષમાં 8 મુક્ત વેપાર કરારો (FTA) કરવામાં આવ્યા છે. તેમણે કહ્યું કે 2021 માં મોરેશિયસ, 2022 માં યુએઈ અને ઓસ્ટ્રેલિયા, 2024 માં EFTA ના ચાર દેશો, 2025 માં યુકે, ઓમાન અને ન્યુઝીલેન્ડ સાથે અને 2026 માં યુરોપિયન સંઘ સાથે FTA કરીને ભારતના વિકાસને ગતિ આપી રહ્યા છે. તેમણે કહ્યું કે ચાલુ નાણાકીય વર્ષના ગત ત્રિમાસિક ગાળામાં 8.2 ટકાનો ગ્રોથ રેટ આવ્યો છે અને આ ત્રિમાસિક ગાળામાં પણ નિશ્ચિતપણે 8 ટકાના ગ્રોથ રેટ સાથે ભારત આગળ વધશે. તેમણે કહ્યું કે ભારત આજે દુનિયાની સૌથી ઝડપી ગતિએ વધતી અર્થવ્યવસ્થા બની ગયું છે અને આ ગતિ હવે અટકશે નહીં.

કેન્દ્રીય ગૃહ અને સહકારિતા મંત્રીએ કહ્યું કે ઓડિશાએ દાયકાઓ સુધી નક્સલવાદનો દંશ સહન કર્યો છે અને તેના પરિણામો ભોગવ્યા છે. તેમણે કહ્યું કે પ્રધાનમંત્રી મોદીજીના નેતૃત્વમાં ભારત સરકારે નક્સલવાદના ખાતમા માટે એક નિર્ણાયક લડાઈ શરૂ કરી હતી. તેમણે વિશ્વાસ વ્યક્ત કર્યો કે 31 માર્ચ, 2026 સુધીમાં દેશ નક્સલવાદથી મુક્ત થઈ જશે. શ્રી શાહે કહ્યું કે નક્સલવાદ-પ્રભાવિત તમામ વિસ્તારોમાં વિકાસને પહોંચાડવા માટે અમે તીવ્ર ગતિથી કામ કરવા માટે સંકલ્પબદ્ધ છીએ. તેમણે કહ્યું કે દરેક તે આદિવાસી જે નક્સલવાદને કારણે વિકાસથી વંચિત રહી ગયો હતો, તેના વિકાસ માટે અમે બમણી ગતિથી કામ કરવા માટે સમર્પિત છીએ. શ્રી શાહે કહ્યું કે શ્રી મોહન ચરણ માઝીજીના નેતૃત્વમાં ઓડિશા સરકાર અને પ્રધાનમંત્રી મોદીજીના નેતૃત્વમાં ભારત સરકાર, ઓડિશાના વિકાસ માટે સંકલ્પબદ્ધ છે.

આ પહેલા, કેન્દ્રીય ગૃહ અને સહકારિતા મંત્રી શ્રી અમિત શાહે આજે ઓડિશાના પારાદીપમાં સલ્ફ્યુરિક એસિડ પ્લાન્ટ-III નું લોકાર્પણ કર્યું અને સહકારિતા વિકાસ ગોષ્ઠિને સંબોધિત કરી. આ પ્રસંગે પોતાના સંબોધનમાં કેન્દ્રીય ગૃહ અને સહકારિતા મંત્રી શ્રી અમિત શાહે કહ્યું કે ઓડિશાની જનતા દ્વારા બનાવવામાં આવેલી ડબલ એન્જિનની સરકાર જલ્દી જ ઓડિશાને વિકસિત રાજ્યોની યાદીમાં સામેલ કરાવશે. તેમણે કહ્યું કે અગાઉની સરકારમાં જનજાતિઓના કલ્યાણ માટે ઓડિશામાં કોઈ યોજના બની નહોતી, દરિયાકિનારાના વિકાસ માટે કોઈ યોજના બની નહોતી અને શહેરોના વિકાસ માટે પણ કોઈ પ્રયાસ કરવામાં આવ્યા નહોતા. તેમણે કહ્યું કે આજે ઓડિશા નવા ભારતના optimism (આશાવાદ), ઓડિશાની originality (મૌલિકતા) અને ઓડિશાની તમામ opportunities (તકો) ને explore કરીને આગળ વધી રહ્યું છે.

શ્રી અમિત શાહે કહ્યું કે આજે જ ઓડિશાની નવી સહકારી નીતિની જાહેરાત કરવામાં આવશે. તેમણે કહ્યું કે અમારી સરકાર આગામી દિવસોમાં ગુજરાતની જેમ ઓડિશાના દરેક ગામમાં ડેરીને પહોંચાડવાનો કાર્યક્રમ શરૂ કરવાની છે. શ્રી શાહે કહ્યું કે મત્સ્યપાલનને પણ સહકારી તાકાત આપીને તેમાં વધારો કરવામાં આવશે, જેનાથી સી-ફૂડ (Sea-Food) નિકાસમાં ઘણો લાભ થવાની સંભાવના છે.

કેન્દ્રીય સહકારિતા મંત્રીએ કહ્યું કે આગામી દિવસોમાં ભારત સરકારનું સહકારિતા મંત્રાલય અને ઓડિશા સરકાર બંને મળીને ઓડિશાના ગ્રામીણ જનજીવનને સમૃદ્ધ કરવાના સંયુક્ત પ્રયાસ કરશે. તેમણે કહ્યું કે આજે ઇફકોની પારાદીપ એકમમાં સલ્ફ્યુરિક એસિડ પ્લાન્ટની ત્રીજી સ્ટ્રીમનું લોકાર્પણ કરવામાં આવ્યું છે. તેમણે કહ્યું કે 2005 માં ઇફકોએ આ પ્લાન્ટને 2577 કરોડ રૂપિયામાં ખરીદ્યો હતો અને તે સમયે તેની ક્ષમતા 7.5 લાખ મેટ્રિક ટન હતી. આજે આ ક્ષમતા વધીને 22 લાખ મેટ્રિક ટન સુધી પહોંચી ગઈ છે. આમાં બ્લેન્ડેડ ખાતરનું ઉત્પાદન લગભગ 15% છે અને સ્વદેશી ડીએપી (DAP) નું ઉત્પાદન 40% છે.

શ્રી અમિત શાહે કહ્યું કે દેશમાં ફર્ટિલાઈઝર બનાવનારા દરેક કારખાના અને કેમિકલ ઉદ્યોગમાં જ્યાં પણ સલ્ફ્યુરિક એસિડની જરૂર હોય, તેનું ઉત્પાદન ઇફકોની પારાદીપ યુનિટમાં થવું જોઈએ. તેમણે કહ્યું કે ઇફકો હવે નેનો યુરિયા, નેનો ડીએપી અને PM-PRANAM (PM Programme for Restoration, Awareness Generation, Nourishment and Amelioration of Mother Earth) યોજનાના માધ્યમથી રાસાયણિક ખાતરોના અત્યધિક ઉપયોગમાં ઘટાડો લાવવાનું આંદોલન ચલાવી રહ્યું છે, જેનાથી આપણી જમીનનું સંરક્ષણ થશે. તેમણે કહ્યું કે ઇફકો આ ક્ષેત્રમાં દુનિયાની સૌથી મોટી કોઓપરેટિવ યુનિટ બની ગઈ છે.

કેન્દ્રીય ગૃહ અને સહકારિતા મંત્રીએ કહ્યું કે ઇફકો જે પણ કમાય છે, તેનો ફાયદો દેશના 5 કરોડ ખેડૂતો સુધી પહોંચે છે અને આ જ ઇફકોની સૌથી મોટી તાકાત છે. શ્રી શાહે કહ્યું કે ઇફકોનું કારખાનું ક્યાંય પણ હોય, તેના માલિક આપણા દેશના 5 કરોડ ખેડૂતો છે. ઇફકોનો 41,000 કરોડ રૂપિયાથી વધુનો ટર્નઓવર, 3800 કરોડ રૂપિયાથી વધુનો નફો અને 28,000 કરોડ રૂપિયાથી વધુની નેટવર્થનો માલિકી હક્ક આપણા 5 કરોડ ખેડૂતોનો છે અને આ જ કોઓપરેટિવનો ચમત્કાર છે.

શ્રી અમિત શાહે કહ્યું કે પ્રધાનમંત્રી શ્રી નરેન્દ્ર મોદીજીના નેતૃત્વમાં ભારત સરકાર અને ઓડિશા સરકાર આગામી દિવસોમાં કોઓપરેટિવ ક્ષેત્રના માધ્યમથી ઓડિશાના ગરીબ ખેડૂતો, ગ્રામીણ જનજીવન અને ખાસ કરીને માતાઓ-બહેનોને આત્મનિર્ભર બનાવવાનું કામ કરશે.

SM/JY/JD