مرکزی وزیر برائے ماحولیات، جنگلات اور موسمیاتی تبدیلی، جناب بھو پیندریادو نے آج بھوپال میں نیشنل بورڈ برائے جنگلی حیات کی قائمہ کمیٹی کے 89ویں اجلاس کی صدارت کی۔

اجلاس کے دوران قائمہ کمیٹی نے جنگلی حیات کے تحفظ اور ترقیاتی منصوبوں سے متعلق تجاویز پر غور کیا، جو محفوظ علاقوں، وائلڈ لائف سینکچریز، ٹائیگر ریزروز اور ایکو حساس زونز کے اندر یا اطراف میں واقع ہیں۔ یہ جائزہ وائلڈ لائف (تحفظ) ایکٹ 1972 کی دفعات کے مطابق لیا گیا۔ تجاویز کا معائنہ ماحولیاتی حساسیت، قانونی تقاضوں اور مقررہ تخفیفی اقدامات کو مدنظر رکھتے ہوئے کیا گیا۔

کمیٹی نے مواصلاتی بنیادی ڈھانچے، آپٹیکل فائبر کیبلز، بجلی کی ترسیلی لائنوں، سڑکوں کے منصوبوں، پینے کے پانی کی فراہمی، تھرمل پاور، دفاع، آبپاشی اور دیگر بنیادی ڈھانچے جیسے مختلف شعبوں سے متعلق 58 نئی تجاویز پر غور کیا۔

کمیٹی نے اہم پالیسی امور پر بھی تبادلہ خیال کیا، جن میں دریائے چمبل میں آبی حیات مثلاً ڈولفنز اور گھڑیال وغیرہ کے تحفظ کے لیے ماحولیاتی بہاؤ (ای فلو) برقرار رکھنے کی ماحولیاتی اہمیت؛ ٹائیگر ریزروز کے اندر واقع دیہات کے سماجی، معاشی اور ماحولیاتی پہلوؤں کی صورتِ حال؛ جنگلی حیات کے نظم و نسق کے لیے چراگاہوں کی اہمیت؛ اور انسان اور تیندوے کے باہمی تعامل سے پیدا ہونے والے موجودہ چیلنجز سے نمٹنے کی حکمتِ عملیاں شامل ہیں۔

اجلاس میں اس بات پر بھی زور دیا گیا کہ تحفظِ جنگلی حیات کی پالیسیوں کو مضبوط تحقیق اور بین شعبہ جاتی ہم آہنگی کی بنیاد فراہم کرنے کے لیے جنگلی حیات کے ادارۂ ہند، ہندوستانی کونسل برائے جنگلاتی تحقیق و تعلیم اور مرکزی آبی کمیشن جیسے سائنسی اور تکنیکی اداروں کی شمولیت یقینی بنائی جائے۔

نیشنل بورڈ برائے جنگلی حیات کی قائمہ کمیٹی وائلڈ لائف (تحفظ) ایکٹ 1972 کے تحت قائم ایک قانونی ادارہ ہے، جسے جنگلی حیات اور جنگلات کے تحفظ سے متعلق امور پر حکومت کو مشورہ دینے کا اختیار حاصل ہے۔ یہ کمیٹی اس امر کو بھی یقینی بناتی ہے کہ محفوظ علاقوں کے اندر اور اطراف میں ترقیاتی سرگرمیاں پائیدار اور متوازن انداز میں انجام دی جائیں۔

            ***

ش ح۔م م۔ش ب ن

U-3257                        

(ریلیز آئی ڈی: 2234450) وزیٹر کاؤنٹر : 25