سائنس و ٹیکنالوجی و ارضیاتی علوم (آزادانہ چارج) کےمرکزی وزیر مملکت اور وزیر اعظم دفتر ، عملہ، عوامی شکایات، پنشن، جوہری توانائی اور خلائی امورکے وزیرمملکت ڈاکٹر جتیندر سنگھ نے تھرواننت پورم میں ایک پروگرام سے خطاب کیا، جس کا انعقاد انسٹی ٹیوٹ آف انجینئرز اور متعدد این جی اوز نے سابق مرکزی وزیر وی مرلی دھرن کی قیادت میں کیا تھا۔اس پروگرام میں 2036 تک کیرالا کی آئندہ دہائی کی ترقی کے لیے روڈ میپ تیار کرنے اور اسے وسیع تر وژن بھارت کے اہداف سے ہم آہنگ کرنے پر غور کیا گیا۔

ڈاکٹر جتیندر سنگھ نے کہا کہ کیرالا اس وقت ایک اہم موڑ پر کھڑا ہے، جہاں تعلیم، سائنسی رجحان، ساحلی وسائل اور ہنرمند افرادی قوت جیسے اس کے مضبوط پہلوؤں کو تیز اور ہمہ گیر ترقی کے لیے مؤثر انداز میں بروئے کار لایا جا سکتا ہے۔

انہوں نے کہا کہ آنے والی دہائی ایک سنہرا موقع فراہم کرتی ہے کہ کیرالا کی ترقیاتی ترجیحات کو سائنس، ٹیکنالوجی اور  نیلگو معیشت سے متعلق قومی مشنز کے ساتھ مربوط کیا جائے تاکہ ریاست اور ملک دونوں کی مجموعی ترقی کو تقویت مل سکے۔

مرکزی حکومت کے کیرالم کے لیے عزم کا حوالہ دیتے ہوئے وزیرموصوف نے کہا کہ نئے ترقیاتی سیوا تیرتھ میں ہونے والے پہلے کابینہ اجلاس میں، مودی حکومت نے باقاعدہ طور پر ریاست کے نام کو “کیرالا” سے بدل کر “کیرالم” رکھنے کا فیصلہ کیا، جو ریاست کی ثقافتی اور لسانی شناخت کے احترام کی عکاسی کرتا ہے۔ انہوں نے کہا کہ یہ فیصلہ کیرالا کی وراثت اور امنگوں کے تئیں حساسیت کی علامت ہے۔

وزیرموصوف نے مزید کہا کہ متواتر مرکزی بجٹ میں ساحلی بنیادی ڈھانچے کو مضبوط بنانے، ماہی گیری کے شعبے کو فروغ دینے اور کیرالم جیسے بحری ریاستوں میں روزگار کے مواقع بڑھانے کے لیے مخصوص اہتمام کیا گیا ہے۔ ساحلی علاقوں کی ترقی، سمندری وسائل  اور نیلگو معیشت کے اقدامات سمیت ڈیپ اوشیئن مشن  کے لیے مختص فنڈز کیرالا کی طویل ساحلی پٹی اور ماہی گیروں کی کمیونٹی کے لیے نئے ترقیاتی مواقع شروع کرنے کی توقع ہے۔

وزیر موصوف نے کہا کہ کیرالم جیسی ساحلی ریاستیں سائنسی رہنمائی میں سمندری تحقیق اور پائیدار سمندری وسائل کے انتظام سے منفرد فوائد حاصل کرنے کی پوزیشن میں ہیں۔ انہوں نے مزید کہا کہ مرکز اور ریاست کے درمیان مؤثر ہم آہنگی ترقی کی رفتار کو نمایاں طور پر بڑھا سکتی ہے، اور پالیسیوں اور پروگراموں کو زیادہ رفتار اور مؤثر انداز میں آگے بڑھانے کو یقینی بنا سکتی ہے۔

ڈاکٹر جتیندر سنگھ نے کہا کہ اگرچہ کئی مرکزی اسکیمیں مختلف شعبوں میں شہریوں کے فائدے کے لیے بنائی گئی ہیں، ان کا مکمل اثر ان کے بغیر رکاوٹ نفاذ اور حکمرانی کے تمام درجوں میں تعمیری تعاون پر منحصر ہے۔ انہوں نے کہا کہ جب ریاست کی ترقیاتی ترجیحات قومی وژن کے ہم آہنگ ہو جائیں، تو ترقی “ڈبل انجن” کی رفتار حاصل کر سکتی ہے، جس کا حتمی فائدہ عام شہری کو پہنچتا ہے۔

سابق مرکزی وزیروی مرلی دھرن نے اپنے خیالات میں کہا کہ ریاست میں متواتر حکومتوں نے عام شہریوں کی بنیادی ضروریات کو مناسب ترجیح نہیں دی۔ صحت جیسے شعبوں میں خدشات کی طرف اشارہ کرتے ہوئے، انہوں نے کہا کہ خصوصاً اقتصادی طور پر کمزور طبقے کے لیے خدمات میں زیادہ جوابدہی اور فوری ردعمل کی ضرورت ہے۔ انہوں نے کہا کہ اب وقت آ گیا ہے کہ شہریوں میں ایسے حکمرانی ماڈلز کے بارے میں شعور پیدا کیا جائے جو ذمہ داری کو یقینی بنائیں اور ریاست کے طویل مدتی فائدے کے لیے حکومت ہند کے ساتھ قریبی ہم آہنگی برقرار رکھیں۔

ڈاکٹر جتیندر سنگھ نے یقین ظاہر کیا کہ واضح روڈ میپ، جوابدہ حکمرانی اور مربوط کوششوں کے ساتھ، کیرالا تیز رفتار ترقی کی راہ پر گامزن ہو سکتا ہے اور بھارت کو ترقی یافتہ ملک بنانے کے سفر میں نمایاں کردار ادا کر سکتا ہے۔

***

ش ح۔ع ح۔ ن م۔

U-3253

(ریلیز آئی ڈی: 2234435) وزیٹر کاؤنٹر : 18