مشرقِ وسطیٰ میں بدلتی ہوئی صورتحال اور بین الاقوامی فضائی آپریشنز پر اس کے ممکنہ اثرات کے پیشِ نظر، معزز وزیر برائے شہری ہوا بازی نے تمام متعلقہ فریقین کے ساتھ تیاریوں اور ردِعمل کے اقدامات کا جامع جائزہ لیا ہے۔

 

اس ضمن میں ویڈیو کانفرنس کے ذریعے ایک اعلیٰ سطحی اجلاس منعقد کیا گیا، جس میں سکریٹری، وزارتِ شہری ہوا بازی اور وزارت کے دیگر سینئر افسران، ایئرپورٹس اتھارٹی آف انڈیا (اے اے آئی)، ڈائریکٹوریٹ جنرل آف سول ایوی ایشن (ڈی جی سی اے)، ایئر لائن آپریٹرز اور ملک بھر کے بڑے ہوائی اڈوں کے منتظمین نے شرکت کی۔ جائزے میں خطے کے بعض حصوں میں جاری متعدد فضائی حدود کی پابندیوں اور نوٹمز  کے پیشِ نظر مسافروں کی حفاظت، آپریشنل تسلسل اور حقیقی وقت میں ہم آہنگی کو یقینی بنانے پر توجہ مرکوز کی گئی۔

بین الاقوامی خدمات انجام دینے والی بھارتی ایئر لائنز کو ہدایت دی گئی ہے کہ وہ متعلقہ حکام کی جانب سے جاری کردہ فضائی حدود سے متعلق مشاورتی ہدایات، نوٹمز اور روٹ پابندیوں کی مسلسل نگرانی کریں۔ ایئر لائنز کو یہ بھی ہدایت کی گئی ہے کہ جہاں ضرورت ہو وہاں پروازوں کی بروقت روٹ تبدیلی یا ڈائیورژن کو عالمی حفاظتی ضوابط اور طے شدہ ہنگامی منصوبہ بندی کے طریقۂ کار کے مطابق یقینی بنایا جائے۔

 

ملک بھر کے ہوائی اڈوں، بالخصوص بڑے بین الاقوامی گیٹ ویز کو ممکنہ پروازوں کی ڈائیورژن، غیر طے شدہ لینڈنگ اور مسافروں کی سہولت سے متعلق ضروریات کو مؤثر انداز میں سنبھالنے کے لیے آپریشنل الرٹ پر رکھا گیا ہے۔ ایئرپورٹس اتھارٹی آف انڈیا اور نجی ہوائی اڈہ آپریٹرز کو ہدایت دی گئی ہے کہ وہ ضرورت کے مطابق گراؤنڈ ہینڈلنگ، پارکنگ بے، مسافروں کی سہولیات، عملے کی لاجسٹکس اور امیگریشن معاونت کے لیے ایئر لائنز کے ساتھ بہتر ہم آہنگی برقرار رکھیں۔

ڈائریکٹوریٹ جنرل آف سول ایوی ایشن کو ہدایت دی گئی ہے کہ وہ ایئر لائنز کے ساتھ قریبی رابطہ رکھے تاکہ حفاظتی ضوابط، عملے کے ڈیوٹی اوقات کی حدود اور آپریشنل ہدایات کی مکمل پابندی یقینی بنائی جا سکے۔ مزید برآں، بدلتی ہوئی فضائی حدود کی صورتحال کا جائزہ لینے اور گھریلو پروازوں کے شیڈول پر ممکنہ اثرات کو کم کرنے کے لیے مسلسل نگرانی کے نظام کو فعال رکھا جائے۔

 

وزارت خارجہ کے ساتھ بھی قریبی رابطہ رکھا جا رہا ہے تاکہ بھارتی ایئر لائنز یا بیرونِ ملک موجود بھارتی شہریوں سے متعلق کسی ہنگامی ضرورت کی صورت میں معلومات کا بروقت تبادلہ اور مؤثر ہم آہنگی یقینی بنائی جا سکے۔

مسافروں کو مشورہ دیا جاتا ہے کہ وہ تازہ ترین سفری معلومات اور شیڈول میں تبدیلیوں کے لیے اپنی متعلقہ ایئر لائنز سے باقاعدہ رابطے میں رہیں۔ ایئر لائنز کو ہدایت دی گئی ہے کہ وہ تاخیر، روٹ تبدیلی یا ڈائیورژن سے متعلق مسافروں کو پیشگی آگاہ کریں تاکہ کسی بھی قسم کی پریشانی کو کم سے کم کیا جا سکے۔

مسافروں اور عملے کی سلامتی اولین ترجیح ہے۔ وزارتِ شہری ہوا بازی صورتحال کی مسلسل نگرانی کر رہی ہے تاکہ فضائی آپریشنز کو محفوظ، منظم اور مؤثر انداز میں جاری رکھا جا سکے۔صورتحال پر مسلسل نظر رکھی جا رہی ہے، اور ضرورت کے مطابق مزید تازہ معلومات فراہم کی جائیں گی۔ 

******

ش ح ۔   م  د ۔  م  ص

(U :3205     )

(ریلیز آئی ڈی: 2234068) وزیٹر کاؤنٹر : 3