انڈین آرمی اور انڈین ایئر فورس کے ڈاکٹروں پر مشتمل ایک انتہائی ماہر امراض چشم کی ٹیم نے 24 فروری 2026 کو گورکھپور، اتر پردیش کے 12 ایئرفورس ہاسپٹل میں منعقدہ میگا ایڈوانسڈ سرجیکل آئی کیمپ کے پہلے دن 100 سے زائد سرجریاں انجام دیں۔ ان سرجریوں میں جدید موتیا بند آپریشن، کم سے کم چیرا لگا کر گلوکوما کی سرجری اور پیچیدہ ریٹینا کے طریقہ علاج شامل تھے۔ بریگیڈیئر (ڈاکٹر) سنجے کمار مشرا، ماہر چشم اور کنسلٹنٹ و سربراہ شعبہ امراض چشم، آرمی ہاسپٹل (ریسرچ اینڈ ریفرل) کی قیادت میں ٹیم نے عالمی معیار کے طبی آلات استعمال کیے، جنہیں اس علاقے تک انڈین ایئرفورس کے ایک طیارے کے ذریعے فضائی راستے سے پہنچایا گیا تھا۔

سابق فوجیوں، موجودہ سروس اہلکاروں کے اہلِ خانہ اور مستحق شہریوں کے لیے جامع طبی اسکریننگ کا عمل جاری ہے اور آئندہ دنوں میں بھی بڑی تعداد میں مریضوں کی آمد متوقع ہے۔ کیمپ کی افتتاحی تقریب میں ڈائریکٹر جنرل آرمڈ فورسز میڈیکل سروسز، سرجن وائس ایڈمائرل آرتی سرین اور ڈائریکٹر جنرل میڈیکل سروسز (ایئر)، ایئر مارشل سندیپ تھریجا نے شرکت کی۔ کیمپ کے دوران 300 سے زائد سرجریاں شیڈول کی گئی ہیں اور یہ کیمپ 27 فروری 2026 کو اختتام پذیر ہوگا۔

یہ کیمپ فوج کی دوہری شناخت کی توثیق کرتا ہے — ایک طرف سرحدوں کا مضبوط محافظ اور دوسری جانب سماجی استحکام کا ہمدرد معمار۔ طبی مہارت کی روایت کو آگے بڑھاتے ہوئے، اس منتخب ٹیم نے اس سے قبل بھی چھ کامیاب کیمپ مختلف خطوں میں منعقد کیے ہیں، جن میں ہمالیہ کے دامن سے لے کر جموں اور کچھ کے دور دراز سرحدی دیہات شامل ہیں۔ یہ کیمپ معیاری صحت کی سہولیات کو دور دراز علاقوں تک پہنچائے جانے کے حکومت کے عزم کو اجاگر کرتے ہیں۔

                                   ******

                                                                                                  
ش ح۔ ف ش ع 

U: 3004

(ریلیز آئی ڈی: 2232404) وزیٹر کاؤنٹر : 9