مواصلات اور شمال مشرقی خطے کی ترقی کے مرکزی وزیر جناب جیوتیرادتیہ ایم۔ سندھیا نے آج سنچار بھون میں مختلف ڈاک حلقوں کی نمائندگی کرنے والے 30 ڈاک معاونین اور چھانٹی معاونین کے ساتھ ایک تبادلۂ خیال نشست منعقد کی۔ اس اجلاس میں محکمۂ ڈاک کے اعلیٰ افسران بھی شریک تھے، جن میں سیکریٹری (ڈاک) اور ڈائریکٹر جنرل (ڈاک) شامل تھے۔

(جناب جیوتیرادتیہ ایم۔ سندھیا اور سیکریٹری (ڈاک) سنچار بھون، نئی دہلی میں ڈاک اور چھانٹی معاونین سے تبادلۂ خیال کرتے ہوئے)

تبادلۂ خیال کے دوران وزیر موصوف نے ڈاک معاونین اور چھانٹی معاونین کو محکمۂ ڈاک کی ’’ریڑھ کی ہڈی‘‘ قرار دیتے ہوئے ملک بھر میں آخری مرحلے تک رابطہ یقینی بنانے اور شہری مرکز خدمات کی فراہمی میں ان کے کلیدی کردار کو سراہا۔ انہوں نے کہا کہ سابقہ ملاقاتوں میں پیش کی گئی متعدد تعمیری تجاویز پر عمل درآمد کیا جا چکا ہے، جبکہ دیگر تجاویز محکمہ کی جانب سے زیرِ غور ہیں۔

گفتگو میں اہم عملیاتی اور تکنیکی پہلوؤں پر توجہ مرکوز کی گئی، جن میں ڈاک گھر بچت بینک کی جدید کاری، معلوماتی ٹیکنالوجی 2.0 کے تحت نظام کی بہتری، ڈیجیٹل بینکاری خدمات اور ڈاک زندگی بیمہ/دیہی ڈاک زندگی بیمہ کے طریقۂ کار کو آسان بنانا، دیہی ڈاک گھروں میں بنیادی ڈھانچے کی مضبوطی، پارسل اور نگرانی کے نظام کو مؤثر بنانا، صارف مرکوز اصلاحات، اور نئی نسل کے ڈاک گھروں کی توسیع شامل ہیں۔

(آندھرا پردیش حلقہ سے تعلق رکھنے والے ڈاک معاون جناب جے۔ رام موہن ریڈی کی جانب سے وزیر موصوف کو ایک پینٹنگ پیش کی گئی)

(ڈاک اور چھانٹی معاونین کا وزیر کے ساتھ تبادلۂ خیال)

تبادلۂ خیال کے دوران وزیر موصوف نے جولائی 2025 میں ڈاک اور چھانٹی معاونین کے ساتھ اپنی سابقہ ملاقات کا بھی ذکر کیا اور بتایا کہ اس وقت پیش کی گئی متعدد تعمیری تجاویز پر عمل درآمد کیا جا چکا ہے۔ انہوں نے نشاندہی کی کہ ریلوے میل سروس کی تنظیمِ نو اور مربوط پارسل مراکز کے قیام جیسے اصلاحی اقدامات، نیز دستی آلات کے ذریعے اسکیننگ کے عمل کو مؤثر بنانے کے اقدامات، عملے کی آرا کی بنیاد پر آگے بڑھائے گئے۔ انہوں نے یہ بھی بتایا کہ مارکیٹنگ کے شعبے کو مضبوط بنانے کے لیے مارکیٹنگ افسران کی مؤثر تعیناتی اور انڈیا پوسٹ پیمنٹس بینک کے اشتراک سے بازار سے منسلک بیمہ مصنوعات متعارف کرانے کے امکانات پر بھی غور کیا جا رہا ہے۔ انہوں نے زور دیا کہ زمینی سطح سے ملنے والی آرا محکمہ کی اصلاحاتی حکمتِ عملی کو تشکیل دینے میں اہم کردار ادا کر رہی ہے۔

مسلسل بہتری کی اہمیت پر زور دیتے ہوئے وزیر نے کہا کہ بدلتے ہوئے حالات اور ترقی کے تقاضوں سے ہم آہنگ رہنے کے لیے تکنیکی اور اخلاقی دونوں سطحوں پر مسلسل بہتری ضروری ہے۔ انہوں نے ملازمین کو ہر ذمہ داری میں جواب دہی اور وابستگی برقرار رکھنے کی ترغیب دی اور کہا کہ ہر کام اخلاص، دیانت اور جوش و جذبے کے ساتھ انجام دیا جانا چاہیے۔

یہ تبادلۂ خیال نشست صفِ اوّل کے عملے کے لیے ایک مؤثر پلیٹ فارم ثابت ہوئی، جہاں انہوں نے زمینی تجربات اور تجاویز پیش کیں۔ اجلاس ایک حوصلہ افزا پیغام کے ساتھ اختتام پذیر ہوا، جس نے ملازمین کے اعتماد کو مزید مضبوط کیا اور محکمۂ ڈاک کے اجتماعی عزم کی توثیق کی: ’’ہم بہترین ہیں، اور ہم مزید بہتر بنتے رہیں گے۔‘‘

سوشل میڈیا پوسٹ: https://x.com/JM_Scindia/status/2024825237825822940?s=20

******

ش ح۔ ش ا ر۔ ول

Uno-2822

(ریلیز آئی ڈی: 2230978) وزیٹر کاؤنٹر : 9