ہندوستانی فوج نے آج نئی دہلی کے مانیکشا سینٹر میں "وار گیمنگ اور سمولیشن کے ذریعے فوجی فیصلہ سازی میں بہتری – علم اور صنعت کے فرق کو ختم کرنا" کے موضوع پر ایک قومی سیمینار کا انعقاد کیا۔وار گیمنگ ڈیولپمنٹ مرکز (ڈبلیو اے آر ڈی ای سی) کے زیر اہتمام منعقدہ اس سیمینار نے اسٹریٹجک مکالمے کے لیے ایک اہم پلیٹ فارم مہیا کیا، جس میں ہندوستان کے وار گیمنگ ایکو سسٹم کے تمام اہم شراکت داروں نے شرکت کی۔ ان میں سینئر فوجی قائدین، ماہرینِ تعلیم، اسٹریٹجک مفکرین اور ٹیکنالوجی کی صنعت کے ماہرین شامل تھے۔

سیمینار کا افتتاح لیفٹیننٹ جنرل دیویندر شرما، جنرل آفیسر کمانڈنگ اِن چیف، آرمی تربیتی کمانڈ نے کیا۔ اپنے کلیدی خطاب میں انہوں نے زور دیا کہ وارگیمنگ محض ایک رسمی یا طریقہ کار پر مبنی مشق نہیں بلکہ فیصلہ سازی کو تیز کرنے، مفروضات کی توثیق کرنے اور موافق و لچکدار سوچ کو فروغ دینے کا ایک اسٹریٹجک ذریعہ ہے۔ انہوں نے ادارہ جاتی منصوبہ بندی کے عمل میں سمولیشن پر مبنی تجزیے کو شامل کرنے کی ناگزیر ضرورت پر روشنی ڈالی تاکہ آپریشنل تیاری، فیصلہ سازی میں برتری اور متحرک عملی چیلنجوں سے مؤثر انداز میں نمٹنے کی صلاحیت کو مضبوط بنایا جا سکے۔ خطاب میں دفاعی شعبے میں آتم نربھرتا پر بڑھتے ہوئے زور کی بھی عکاسی ہوئی اور اس بات کو اجاگر کیا گیا کہ ہندوستان کی فوج جدید صلاحیتوں کی مقامی سطح پر ڈیزائننگ، تیاری اور تعیناتی کے لیے پُرعزم ہے۔

سیمینار میں عملی، تعلیمی اور صنعتی زاویوں سے جامع اور گہرائی پر مبنی مباحث ہوئے۔ عسکری نقطۂ نظر سے کثیر جہتی سمولیشن کے مؤثر استعمال، وارگیمنگ کو بنیادی پیشہ ورانہ مہارت کے طور پر ادارہ جاتی حیثیت دینے اور رفتار، ابہام اور تکنیکی تغیرات سے بھرپور پیچیدہ آپریشنل ماحول کے لیے کمانڈروں کو تیار کرنے پر توجہ مرکوز کی گئی۔

تعلیمی نقطۂ نظر سے جامعات اور تحقیقی اداروں کے کردار کو نمایاں کیا گیا، جو انسانی وسائل کی ترقی، مصنوعی ذہانت، ڈیٹا تجزیے، رویہ جاتی علوم اور سسٹمز انجینئرنگ میں بین الشعبہ جاتی تحقیق کو فروغ دے سکتے ہیں، نیز عملی ماہرین اور تعلیمی حلقوں کے درمیان اشتراک کے ذریعے وارگیمنگ کے طریقہ کار کو مزید بہتر بنا سکتے ہیں۔

صنعتی نقطۂ نظر سے فوجی۔سول شراکت داری، مشترکہ ترقی کے فریم ورک اور ابھرتی ہوئی ٹیکنالوجیز جیسے مصنوعی ذہانت، مشین لرننگ، بڑے ڈیٹا تجزیے، ورچوئل حقیقت اور آگمینٹڈ حقیقت کو آپریشنل طور پر مؤثر سمولیشن ماحول میں ضم کرنے پر زور دیا گیا۔ ساتھ منعقدہ نمائش میں جدید سمولیشن پلیٹ فارمز اور اختراعی تکنیکی حل پیش کیے گئے، جس سے ہندوستان کے وارگیمنگ ایکو سسٹم کے اشتراکی وژن کو تقویت ملی۔

سیمینار کے دوران وارڈیک کی جانب سے تیار کردہ تین مقامی سافٹ ویئر ایپلی کیشنز بھی جاری کی گئیں: آٹو ایویلیوایشن میپ مارکنگ ٹول؛ کومبیٹ ڈسیژن ریزولوشن – ورژن 9؛ اور آٹومیٹڈ انٹیلی جنس پریپریشن آف دی بیٹل فیلڈ۔ یہ ایپلی کیشنز تکنیکی خود انحصاری کی جانب ایک اہم سنگِ میل ہیں اور مختلف سطحوں پر کمانڈروں کے لیے منظم فیصلہ معاون فریم ورک فراہم کرتی ہیں۔

اختتامی اجلاس سے لیفٹیننٹ جنرل زوبن اے منوالا، ڈپٹی چیف آف انٹیگریٹڈ ڈیفنس اسٹاف (ڈاکٹرائن، آرگنائزیشن اینڈ ٹریننگ) نے خطاب کیا۔ انہوں نے نظریاتی جدت، تجزیاتی جائزے اور قیادت کی تربیت کے لیے خود کفیل اور مستقبل سے ہم آہنگ وارگیمنگ ایکو سسٹم کی اہمیت پر زور دیا۔ انہوں نے کہا کہ ایسا نظام پیشگی منصوبہ بندی کی صلاحیتوں کو فروغ دینے، کثیر جہتی آپریشنل چیلنجوں کے لیے کمانڈروں کو تیار کرنے اور عسکری فکر و تکنیکی جدت میں بھارت کو صفِ اول میں رکھنے کے لیے ناگزیر ہے۔

سیمینار نے اس عزم کا اعادہ کیا کہ ہندوستان کی فوج مادی جدید کاری کے ساتھ فکری تیاری کو بھی یکساں اہمیت دیتی ہے۔ مسلح افواج، اکیڈمیا اور صنعت کو ایک مشترکہ پلیٹ فارم پر یکجا کر کے ایک مضبوط، خود کفیل اور مستقبل سے ہم آہنگ وارگیمنگ ایکو سسٹم کی بنیاد کو مستحکم کیا گیا، جو آپریشنل صلاحیت میں اضافے اور قومی سلامتی کے تحفظ کی سمت ایک اہم پیش رفت ہے۔ اس تقریب نے سمولیشن پر مبنی تربیت، تجزیاتی جائزے اور فیصلہ معاون آلات کی اسٹریٹجک اہمیت کو اجاگر کیا اور تکنیکی خود مختاری کے ساتھ اشتراکی اختراع کو فروغ دینے کے عزم کو نمایاں کیا۔

************

ش ح ۔   م  د ۔  م  ص

(U :2801    )

(ریلیز آئی ڈی: 2230964) وزیٹر کاؤنٹر : 7