اے آئی امپیکٹ سمٹ کے لیے آپ سب کا ایک بار پھرہندوستان میں خیر مقدم کرتے ہوئے مجھے بہت خوشی ہو رہی ہے ۔  مجھے یقین ہے کہ یہ سمٹ انسان پر مرکوز ، حساس عالمی اے آئی ایکو نظام کی تعمیر میں اہم کردار ادا کرے گی ۔

ساتھیو،

 ہم تاریخ پر نظر ڈالیں تو پتہ چلتا ہے کہ انسان نے ہر رکاوٹ کو ایک نئے موقع میں تبدیل کیا ہے ۔ آج ایک بار پھر ایسا ہی موقع ہمارے سامنے آیا ہے ۔ ہمیں مل کر اس رکاوٹ کو انسانیت کے سب سے بڑے موقع میں تبدیل کرنا ہوگا ۔

ساتھیو،

ہندوستان بدھ کی سرزمین ہے اور بھگوان بدھ نے کہا تھاکہ صحیح عمل صحیح تفہیم سے آتا ہے ۔ لہذا یہ بہت ضروری ہے کہ ہم مل کر ایک ایسا روڈ میپ تیار کریں جو اے آئی کے حقیقی اثرات کو ظاہر کرے ، اور حقیقی اثر تب ہی آتا ہے جب ہم صحیح وقت پر ، صحیح ارادے کے ساتھ صحیح فیصلہ لیں ۔

ساتھیو،

کووڈ عالمی وبا کے وقت دنیا نے دیکھا ہے کہ جب ہم ایک دوسرے کے ساتھ کھڑے ہوتے ہیں تو ناممکن بھی ممکن ہو جاتا ہے ۔ ویکسین تیار کرنے سے لے کر سپلائی چین تک ، ڈیٹا شیئر کرنے سے لے کر جانیں بچانے تک ،باہمی تعاون نے حل فراہم کیا ۔ ٹیکنالوجی کس طرح انسانیت کی خدمت کا ذریعہ بن سکتی ہے ، یہ ہم نے ہندوستان میں کووڈ کے دور میں دیکھا ہے ۔ ہمارے ڈیجیٹل ٹیکہ کاری پلیٹ فارم نے کروڑوں لوگوں کو وقت پر ٹیکہ لگانے میں مدد کی ہے ۔ ہمارے یو پی آئی نے اس بات کو یقینی بنایا کہ ان مشکل حالات میں بھی لوگ آسانی سے آن لائن لین دین جاری رکھیں ۔ یو پی آئی نے ہندوستان میں ڈیجیٹل فرق کو ختم کرنے میں بھی بہت بڑا کردار ادا کیا ہے ۔ پچھلے برسوں میں ہندوستان نے ایک متحرک ڈیجیٹل عوامی بنیادی ڈھانچہ تیار کیا ہے ، ہم اسے دنیا کے ساتھ بھی  شیئر کر رہے ہیں، کیونکہ ہمارے لیے ٹیکنالوجی طاقت کا نہیں بلکہ خدمت کا ذریعہ ہے ، طاقت نہیں بلکہ بااختیار بنانا ہے ۔ اے آئی کی سمت بھی ایسی ہونی چاہیے کہ پوری انسانیت کی فلاح و بہبود ہو ۔

ساتھیو،

ماضی میں ، ٹیکنالوجی نے تفریق پیدا کی ، لیکن آج یہ ہمارا مقصد ہونا چاہیے کہ اے آئی ٹیکنالوجی سب کے لیے قابل رسائی ہو ۔ لہذا آج ، جیسا کہ ہم اے آئی کے مستقبل پر تبادلہ خیال کررہے ہیں ، ہمیں عالمی خطہ جنوب کی امنگوں اور ترجیحات کو بھی اے آئی گورننس کے مرکز میں رکھنا چاہیے ۔

جناب عالی ،

دور چاہے کوئی بھی رہا ہو ، اخلاقیات ہمیشہ بحث کے مرکز میں رہی ہے ، فرق صرف اتنا ہے کہ پہلے غیر اخلاقی رویے کا دائرہ بہت چھوٹا ہوتا تھا ، لیکن اے آئی میں اس کا دائرہ لامحدود ، لامتناہی ہے ۔  لہذا ، اے آئی کے لیے ہمیں اخلاقی رویے اور اصولوں کے دائرہ کار کو بھی لامحدود بنانا ہوگا ۔  اے آئی کمپنیوں کے سامنے ایک بہت بڑی ذمہ داری ہے ، منافع کے ساتھ ساتھ مقصد پر بھی توجہ مرکوز ہو ، اس طرح کی اخلاقی وابستگی کی بہت ضرورت ہے ۔  انفرادی سطح پر ، اے آئی ہمارے سیکھنے ، ذہانت اور جذبات کو متاثر کر رہی ہے ۔

جناب عالی،

اے آئی کے اخلاقی استعمال کے لیے میری تین تجاویز ہیں ۔پہلی ڈیٹا کی خودمختاری کا احترام کرتے ہوئے اے آئی کی تربیت کے لیے ڈیٹا فریم ورک بنیں ۔  جیسا کہ اے آئی میں کہا جاتا ہے-گاربیج ان، گاربیج آؤٹ ۔  اگر ڈیٹا محفوظ ، متوازن ، قابل اعتماد نہیں ہوگا ، تو آؤٹ پٹ بھی قابل اعتماد نہیں ہوگا ۔  اس لیے عالمی سطح پر اعتماد والا ڈیٹا فریم ورک ضروری ہے ۔  دوسری -  اے آئی پلیٹ فارمز کو اپنے حفاظتی قوانین کو بہت واضح اور شفاف رکھنا چاہیے ، ہمیں بلیک باکس کے بجائے گلاس باکس نقطہ نظر اپنانےکی ضرورت ہے ، جہاں حفاظتی قوانین دیکھے جا سکیں اور تصدیق کی جا سکے۔ تب جواب دہی بھی واضح ہوگی اور کاروبار میں اخلاقی رویے کو بھی فروغ ملے گا ۔تیسری-اے آئی ریسرچ میں پیپر کلپ مسئلے کی مثال دی  جاتی  ہے ۔  اگر کسی مشین کو صرف پیپر کلپس بنانے کا مقصد دےدیا جائے تو وہ اس کا ایک کام کے لیے دنیا کے تمام وسائل کو داؤپر لگاکر وہی کام کرتی رہے گی ۔  اس لیے اے آئی کو واضح انسانی اقدار اور رہنمائی کی ضرورت ہے ۔  ٹیکنالوجی طاقتور ہے لیکن سمت کا فیصلہ ہمیشہ انسان ہی کرے گا ۔

ساتھیو ،

آرٹیفیشل انٹیلی جنس ، اے آئی کے عالمی سفر میں امنگوں سے بھرپور ہندوستان اے آئی کا بڑا کردار ہے اور اس ذمہ داری کو نبھاتے ہوئے ہندوستان آج بڑے قدم اٹھا رہا ہے ۔  ہمارے اے آئی مشن کے ذریعے ، آج ہندوستان میں 38,000 جی پی یو ہیں ، اور اگلے 6 مہینوں میں ، ہم 24,000 مزید جی پی یو لگانےجا رہے ہیں ۔  ہم اپنے اسٹارٹ اپس کو بہت سستی قیمتوں پر عالمی معیار کی کمپیوٹنگ طاقت فراہم کر رہے ہیں ۔  ہم نے ایک اے آئی کوسٹ بھی بنایا ہے ، جس کے ذریعے 7500 سے زیادہ ڈیٹا سیٹس اور 270 اے آئی ماڈلز کو قومی وسائل کے طور پر شیئر کیا گیا ہے ۔

ساتھیو،

اے آئی کے سلسلے میں ہندوستان کی سمت واضح ہے ، ہندوستان کا خیال واضح ہے ۔  اے آئی تمام انسانیت کی بھلائی کے لیے ایک مشترکہ وسیلہ ہے ۔  ہمیں مل کر ایک ایسا اے آئی مستقبل بنانا ہوگا جو اختراع کو آگے بڑھائے ، شمولیت کو مضبوط کرے اور انسانی اقدار کو فروغ دے کر آگے بڑھے ۔  جب ٹیکنالوجی اور انسانی اعتماد ساتھ ساتھ چلیں گے تو اے آئی کا حقیقی اثر دنیا پر نظر آئے گا ۔

*****

 (ش ح ۔م ع ۔ف ر)

U. No. 2724