انڈیا اے آئی امپیکٹ سمٹ 2026 کے تیسرے دن، یہ جائزہ لینے کے لیے کہ مصنوعی ذہانت کو عوامی نظاموں میں کس طرح محفوظ، جواب دہ اور جامع انداز میں شامل کیا جا سکتا ہے، ’’ڈیجیٹل پبلک انفراسٹرکچر (ڈی پی آئی) کے اندر محفوظ اور ذمہ دارانہ  اے آئی کی حکم رانی‘‘ کے موضوع پر سیشن میں عالمی رہ نماؤں اور ماہرین کو یکجا کیا گیا ۔

جیسے جیسے ڈیجیٹل عوامی انفراسٹرکچر صحت، تعلیم، سماجی تحفظ اور عوامی انتظامیہ میں خدمات کی فراہمی کی بنیاد بن رہا ہے، اس سیشن میں اس بات پر زور دیا گیا کہ ان فریم ورکس میں شامل اے آئی سسٹمز فیصلہ سازی، وسائل کی تقسیم اور حقوق کے وسیع پیمانے پر استعمال کو تشکیل دیتے ہیں۔ ایسے سیاق و سباق میں، اعتماد، قانونی حیثیت اور جواب دہی کو تکنیکی اضافے کے بجائے حکم رانی کے بنیادی اصولوں کے طور پر پیش کیا گیا۔

جمہوریہ ایسٹونیا کے صدر آلار کارس نے ڈیجیٹل پبلک انفراسٹرکچر میں بھارت کی قیادت کی ستائش کی اور کہا کہ یہ ٹیکنالوجی، گورننس اور شمولیت پر عالمی گفتگو کو تشکیل دے رہی ہے۔ جدید ریاستی صلاحیت میں ڈی پی آئی کے ساختی کردار پر زور دیتے ہوئے، ایسٹونیا کے صدر جناب الار کاریس نے کہا: ’’ڈیجیٹل عوامی انفراسٹرکچر اب صرف خدمات کی فراہمی کے لیے تکنیکی ریڑھ کی ہڈی نہیں رہا؛ یہ جدید ریاستوں کے کام کرنے کے طریقے کی بنیاد ہے۔ جب اے آئی ان نظاموں میں شامل ہو جائے، تو الگورتھمک شفافیت اور انسانی نگرانی اختیاری اضافہ نہیں ہوتیں؛ یہ عوامی اعتماد اور قانونی حیثیت کے لیے لازمی شرائط ہیں۔‘‘

عوامی اداروں کی ذمہ داری کو اجاگر کرتے ہوئے، ریاستی سیکرٹری اور وفاقی دفتر برائے مواصلات، سوئٹزرلینڈ کے سربراہ عزت مآب برنارڈ میسن نے کہا: ’’بین الاقوامی تعاون اور صلاحیت سازی دنیا بھر میں اچھی حکم رانی کے لیے مصنوعی ذہانت کے استعمال کے لیے لازمی اجزا ہیں۔ ممالک کے درمیان اچھے طریقے شیئر کرنا ایک دوسرے کو سیکھنے اور ترقی کرنے میں مدد دے گا۔ انڈیا اے آئی سمٹ اس بات کی اہمیت کو ظاہر کرتا ہے کہ اے آئی گورننس پر جامع عالمی جنوب کی گفتگو کو بلانے کی اہمیت کیا ہے۔ ڈیجیٹل عوامی انفراسٹرکچر کو انسانی حقوق، جواب دہی، شمولیت اور شفافیت کے اعلیٰ ترین معیار کی عکاسی کرنی چاہیے۔ عوامی حکام اے آئی کے ذریعے کیے گئے یا حمایت یافتہ فیصلوں کے ذمہ دار رہتے ہیں، چاہے نظام نجی فریقین کے ذریعے تیار کیے یا چلائے جائیں۔ جواب دہی کے بغیر اعتماد برقرار نہیں رہ سکتا۔‘‘

مزید برآں، ڈیزائن کے تحت حفاظتی اقدامات کی ضرورت پر زور دیتے ہوئے، عزت مآب ٹوریماس ویلیس، نائب وزیر لیتھوانیا نے کہا، ’’ذمہ دار انہ مصنوعی ذہانت مضبوط عوامی شعبے کی بنیادوں سے شروع ہوتی ہے۔ ڈیجیٹل عوامی انفراسٹرکچر میں اے آئی کو کبھی بھی نگرانی یا امتیاز کا آلہ نہیں بننا چاہیے؛ ٹیکنالوجی کو لوگوں کی خدمت کرنی چاہیے، نہ کہ اس کے برعکس، اور شمولیت کو نظام میں ڈیزائن کے ذریعے شامل کرنا چاہیے۔‘‘

ڈی پی آئی میں حکم رانی کو جمہوری جواز کا مرکز قرار دیتے ہوئے، نیدرلینڈز کی وزارت خارجہ میں مصنوعی ذہانت کے سفیر ایٹ لارج عزت مآب ہیری ویرویج نے کہا: ’’ڈیجیٹل عوامی انفراسٹرکچر میں مصنوعی ذہانت کی حکم رانی عوامی اعتماد اور جمہوری جواز کے بارے میں ہے۔ انسانی حقوق، شفافیت، جواب دہی اور شمولیت اختیاری اضافے نہیں ہیں؛ یہ بنیادی ڈیزائن کے اصول ہیں، اور کارکردگی کبھی بھی وقار اور انصاف کی قیمت پر نہیں آتی۔‘‘

وفد کے سربراہان کے خطابات کے بعد، ایک پینل مباحثے نے عملی حکم رانی کے طریقہ کار، لائف سائیکل جواب دہی اور گلوبل ساؤتھ کی تعیناتیوں سے حاصل ہونے والے اسباق کا جائزہ لے کر گفتگو کو گہرا کیا۔ بحث کا مرکز حقوق کا احترام کرنے والے اور انسان مرکز حکم رانی کے فریم ورکس پر تھا، جن میں الگورتھمک شفافیت، اثرات کے جائزے، شکایات کے ازالے کے طریقہ کار اور شراکتی ڈیزائن کے عمل شامل تھے۔ مقررین نے زور دے کر کہا کہ گورننس کی ناکامیاں اکثر تعیناتی سے بہت پہلے شروع ہو جاتی ہیں، ادارہ جاتی ڈیزائن اور سیاسی فیصلہ سازی کی سطح پر، جس کی وجہ سے ابتدائی مرحلے کی جواب دہی ضروری ہے۔

پینل میں پرتیک واگڑے، ہیڈ، پروگرامز اینڈ پارٹنرشپس، ٹیک گلوبل انسٹیٹیوٹ ؛ خوان کارلوس لارا، ایگزیکٹو ڈائریکٹر ڈیریچوس ڈیجیٹلس؛ الیگزینڈریا والڈن، گوگل میں عالمی سربراہ برائے انسانی حقوق؛ اور نورمن شولز، ڈپٹی ہیڈ آف یونٹ، اے آئی اور ڈیجیٹل ٹیکنالوجیز ان فارن پالیسی، فیڈرل فارن آفس، جرمنی شامل تھے ۔

یورپ اور گلوبل ساؤتھ کے تجربات کی بنیاد پر، اجلاس نے نتیجہ اخذ کیا کہ جامع عالمی فورمز اور مشترکہ معیارات یہ یقینی بنانے کے لیے ضروری ہیں کہ ڈیجیٹل عوامی انفراسٹرکچر میں شامل اے آئی جمہوری جواب دہی کو مضبوط کرے، انسانی حقوق کا تحفظ کرے اور وسیع پیمانے پر ٹھوس عوامی قدر فراہم کرے۔ جب ممالک اے آئی کے انضمام کو عوامی نظاموں میں وسعت دے رہے ہیں۔تبالہ خیال  سے اس بات کا اعادہ کیا گیا کہ ذمہ دار حکم رانی کو تکنیکی صلاحیت کے ساتھ ساتھ ترقی کرنی چاہیے، جس میں لوگوں، حقوق اور اعتماد کو ڈیجیٹل تبدیلی کے مرکز میں رکھنا چاہیے۔

***

(ش ح – ع ا)

U. No. 2659

(ریلیز آئی ڈی: 2229897) وزیٹر کاؤنٹر : 7