اٹھارہ فروری 2026 کو سنچار بھون، نئی دہلی میں بھارت کے مواصلات اور شمال مشرقی خطہ کی ترقّی کے مرکزی وزیر، جناب جیوتیرادتیہ ایم۔ سندھیا، اور سویڈن کی نائب وزیرِ اعظم و وزیر برائے توانائی، کاروبار اور صنعت، محترمہ ایبا بُش کے درمیان ایک دوطرفہ میٹنگ منعقد ہوئی۔اس میٹنگ میں جاری تعاون کا جائزہ لیا گیا اور ٹیلی مواصلات اور ڈیجیٹل تبدیلی کے شعبوں میں اشتراک کے نئے امکانات پر غور کیا گیا۔ مذاکرات میں سویڈن کی جانب سے پائیداری، سب کی شمولیت والی کاروباری ترقی اور عالمی سطح پر ماحولیاتی قیادت کے تسلسل پر زور کو بھی نمایاں طور پر زیرِ بحث لایا گیا۔

دونوں فریقوں نے اس امر کی توثیق کی کہ ڈیجیٹل اور ٹیلی مواصلات کے شعبے میں تعاون، بھارت–سویڈن اسٹریٹجک شراکت داری کا ایک بنیادی ستون ہے۔ یہ تعاون آئندہ نسل کی رابطہ کاری، محفوظ ڈیجیٹل ڈھانچے، اختراع پر مبنی ترقی اور پائیداری سے متعلق مشترکہ ترجیحات کی عکاسی کرتا ہے۔ اس بات پر بھی زور دیا گیا کہ ڈیجیٹل تبدیلی کا عمل سب کی شمولیت والا، معاشی طور پر قابلِ عمل اور صاف توانائی کی منتقلی کے اہداف سے ہم آہنگ ہونا چاہیے۔

دونوں فریقوں نے ڈیجیٹل ٹیکنالوجیوں اور معیشت سے متعلق بھارت–سویڈن مشترکہ ورکنگ گروپ (جے ڈبلیو جی) کو سراہا، جو منظم پالیسی اور تکنیکی اشتراک کے لیے مرکزی ادارہ جاتی میکنزم کی حیثیت رکھتا ہے۔ فریقین نے عملدرآمد پر مبنی نتائج کو آگے بڑھانے کے لیے اسٹاک ہوم میں جے ڈبلیو جی کے تیسرے اجلاس کے جلد انعقاد کی خواہش کا اظہار بھی کیا۔

مذاکرات میں صحت، زراعت، اسمارٹ شہر اور دیہی رابطہ کاری سمیت مختلف شعبوں میں 5جی اور 5جی-ایڈوانسڈ کے عملی استعمالات کے دائرۂ کار کو وسعت دینے پر توجہ مرکوز کی گئی۔ سویڈن کی نائب وزیرِ اعظم نے پائیداری کو کاروباری ترقی کے ساتھ مربوط کرنے کی اہمیت اجاگر کرتے ہوئے اس بات پر زور دیا کہ ماحولیاتی اقدام سب کی شمولیت والا، معاشی طور پر قابلِ عمل اور اختراع پر مبنی ہونا چاہیے۔ سویڈش فریق نے دنیا میں تیز ترین 5جی نفاذ کے حوالے سے بھارت کی کامیابی کو سراہا اور اس بات کا جائزہ لیا کہ سویڈن، بشمول کمپنی ایرکسن، بھارت میں رسائی اور رابطہ کاری کو مزید بہتر بنانے میں کس طرح کردار ادا کر سکتے ہیں۔ دونوں جانب نے اس امر کو تسلیم کیا کہ سویڈن کے مضبوط تحقیقی و صنعتی اختراعی نظام کو بھارت کے وسیع پیمانے پر نفاذ اور کم لاگت پر مبنی اختراعی ماڈل کے ساتھ یکجا کر کے عالمی سطح پر قابلِ توسیع حل تیار کیے جا سکتے ہیں، خصوصاً عالمِ جنوب کے تناظر میں۔

معزز وزیر جناب جیوتیرادتیہ ایم۔ سندھیا نے بھارت کی ڈیجیٹل ترقی کی داستان بیان کرتے ہوئے کہا کہ آج بھارت میں 1.23 ارب سے زائد ٹیلی کام صارفین اور تقریباً ایک ارب انٹرنیٹ صارفین موجود ہیں، جبکہ چار ٹیلی کام آپریٹرز ایک بڑی حد تک مارکیٹ پر مبنی نظام میں خدمات فراہم کر رہے ہیں۔ 4جی کوریج ملک کی 98.5 فیصد آبادی تک پھیل چکی ہے اور جون 2026 تک تمام دیہات میں ہمہ گیر 4 جی رسائی کا ہدف مقرر کیا گیا ہے۔ بھارت نے تقریباً 5.5 ارب امریکی ڈالر کی سرمایہ کاری کے ساتھ 21 ماہ میں دنیا کا تیز ترین 5جی نفاذ مکمل کیا۔ تقریباً 16.9 ارب امریکی ڈالر کے سرکاری سرمائے سے دنیا کے بڑے ڈیجیٹل براڈبینڈ نیٹ ورکس میں سے ایک کے تحت ہر گرام پنچایت کو منسلک کیا جا رہا ہے۔ سرکاری ادارے بھارت سنچار نگم لمیٹیڈ (بی ایس این ایل) کے کردار کو بھی اجاگر کیا گیا، جس نے مقامی سطح پر تیار کردہ 4جی اسٹیک تشکیل دیا ہے اور 9 کروڑ 30 لاکھ سے زائد صارفین کو خدمات فراہم کر رہا ہے۔ اس کے ساتھ ٹیلی کام ٹاورز میں قابلِ تجدید توانائی کے استعمال میں اضافہ اور 2030 تک صاف توانائی کی منتقلی کے ہدف سمیت پائیداری اقدامات کا بھی ذکر کیا گیا۔

بھارت کے ڈیجیٹل عوامی بنیادی ڈھانچہ ماڈل — جو آدھار، یو پی آئی اور ڈیجی لاکر پر مبنی ہے — کو ایک شمولیتی اور قابلِ توسیع فریم ورک کے طور پر پیش کیا گیا، جو محفوظ ڈیجیٹل حکمرانی اور معاشی شمولیت کو ممکن بناتا ہے۔ اس بات پر زور دیا گیا کہ شمولیت بھارت کی رابطہ کاری حکمتِ عملی کا مرکزی عنصر ہے اور ڈیجیٹل بنیادی ڈھانچہ دراصل وہ ’’غیر مرئی شاہراہ‘‘ ہے جو معاشی ترقی کے اگلے مرحلے کو مہمیز دے رہی ہے۔

بھارت اور سویڈن نے چھٹی نسل کی مواصلاتی ٹیکنالوجی (6جی) کی تحقیق، فریکوئنسی بینڈز کی ہم آہنگی اور بین الاقوامی معیار سازی کے عمل میں مربوط شرکت پر بھی ابتدائی سطح پر تعاون پر تبادلۂ خیال کیا، بالخصوص بین الاقوامی ٹیلی مواصلاتی یونین اور تیسری نسل کے شراکت داری پراجیکٹ جیسے اداروں کے تناظر میں۔ بھارت نے بھارت 6جی اتحاد کے قیام کو اجاگر کیا، جس کا ہدف عالمی سطح پر 6جی پیٹنٹس میں کم از کم 10 فیصد حصہ ڈالنا ہے، اور جس میں صنعت کی نمایاں شمولیت، بشمول ایرکسن، شامل ہے۔ بھارتی فریق نے مشترکہ 6جی تحقیق، ایک ٹیرا ہرٹز ٹیسٹ پلیٹ فارمز اور نوری ریشہ (آپٹیکل فائبر) ٹیسٹ پلیٹ فارمز کے قیام میں تعاون کی تجویز بھی پیش کی۔ فریقین نے آئندہ نسل کے نیٹ ورکس کی ترقی میں باہم مطابقت رکھنے والے، کھلے اور محفوظ ڈھانچوں کی اہمیت پر زور دیا۔

کھلے ریڈیو رسائی نیٹ ورک، نیٹ ورک کی جدید کاری اور قابلِ اعتماد رسدی زنجیروں میں تعاون کو باہمی دلچسپی کا اہم شعبہ قرار دیا گیا۔ دونوں فریقوں نے متنوع اور مضبوط ٹیلی کمیونی کیشن ماحولیاتی نظام کی ضرورت پر زور دیا، جس میں خدمات فراہم کرنے والے ادارے، اصل ساز و سامان تیار کرنے والے ادارے، نئی ابھرتی کمپنیاں اور تحقیقی ادارے شامل ہوں۔ تعاون کے پانچ وسیع ستونوں کی نشاندہی کی گئی، جن میں 5جی کے عملی استعمالات، 6جی اشتراک اور جدید آزمائشی پلیٹ فارمز، کھلا ریڈیو رسائی نیٹ ورک، کوانٹم ٹیکنالوجی اور صنعت و جامعات کی شراکت داری شامل ہیں۔ ہر ستون کے تحت منظم عملی منصوبہ بندی اور متعلقہ فریقین کی نشاندہی، نیز باقاعدہ جائزہ جاتی نظام کے قیام پر بھی اتفاق کیا گیا۔

ابھرتے ہوئے شعبوں، بشمول کوانٹم مواصلات، بعد از کوانٹم رمز نگاری اور محفوظ نیٹ ورک ڈھانچوں، پر بھی تبادلۂ خیال ہوا، جو اہم ڈیجیٹل بنیادی ڈھانچے کو مستقبل کے تقاضوں سے ہم آہنگ بنانے کی پیش بینانہ حکمتِ عملی کی عکاسی کرتا ہے۔ سائبر تحفظ، ٹیلی کمیونی کیشن دھوکہ دہی کے تدارک اور خطرہ پر مبنی ضابطہ جاتی فریم ورک پر منظم ادارہ جاتی مکالمے — جن میں اسٹاک ہوم میں جاری سائبر تحفظ مذاکرات بھی شامل ہیں — کو بھی ترجیحی شعبہ قرار دیا گیا۔

 بھارتی فریق نے بین الاقوامی ٹیلی کمیونی کیشن یونین کے ریڈیو کمیونی کیشن بیورو کے ڈائریکٹر کے عہدے کے لیے محترمہ ایم۔ ریوَتھی کی امیدواری کی حمایت کے سلسلے میں سویڈن سے تعاون کی درخواست کی۔ اس کے ساتھ ہی 2027–2030 کی مدت کے لیے آئی ٹی یو کونسل میں بھارت کے دوبارہ انتخاب اور 2030 میں آئی ٹی یو کی مکمل اختیاراتی کانفرنس کی میزبانی سے متعلق بھارت کی تجویز کی بھی حمایت چاہی گئی۔ اس موقع پر عالمی ٹیلی کمیونی کیشن معیار کاری اسمبلی کی کامیاب میزبانی کا حوالہ دیتے ہوئے کثیرالجہتی سطح پر تعمیری شمولیت کے لیے بھارت کے عزم کا اعادہ کیا گیا۔

دونوں فریقوں نے مشترکہ ورکنگ گروپ کے فریم ورک اور اعلیٰ سطحی مکالماتی نظام کے تحت مسلسل رابطے کے ذریعے قابلِ اعتماد نیٹ ورکس، مضبوط رسدی زنجیروں اور سب کی شمولیت والے ڈیجیٹل ماحولیاتی نظام کی تعمیر کے عزم کی توثیق کی۔

Tweet Link: https://x.com/jm_scindia/status/2024031796598300725?s=46&t=NaAnVWL-57urtP3cCRvaCg

Follow DoT Handles for more: - X - https://x.com/DoT_India Insta- https://www.instagram.com/department_of_telecom?igsh=MXUxbHFjd3llZTU0YQ== Fb - https://www.facebook.com/DoTIndia Youtube: https://youtube.com/@departmentoftelecom?si=DALnhYkt89U5jAaa

****

ش ح ۔   م    د۔  م  ص

(U :2663    )

(ریلیز آئی ڈی: 2229879) وزیٹر کاؤنٹر : 10