جناب گنش رام سنگھ کھنٹیا، وزیر مملکت (آزاد چارج) برائے محنت اور ملازمین کی ریاستی انشورنس، حکومت اڈیشہ، نے آج بھوبنیشور میں ریاستوں/مرکز کے زیر انتظام علاقوں  کے محنت و روزگار اور صنعتی سیکرٹریز کی دو روزہ علاقائی کانفرنس کا افتتاح کیا۔

اس موقع پرمرکزی  سیکریٹری، وزارت محنت و روزگار، محترمہ وندنا گورانی، وزارت کے سینئر افسران، اڈیشہ، بہار، جھارکھنڈ، چھتیس گڑھ اور انڈمان و نکوبار جزائر کی ریاستی حکومتیں، ایمپلائز اسٹیٹ انشورنس کارپوریشن (ای ایس آئی سی)، ایمپلائز پروویڈنٹ فنڈ آرگنائزیشن (ای پی ایف او)، مرکزی محنت کمشنروں اور وی وی گیری نیشنل لیبر انسٹی ٹیوٹ (وی سی جی این آئی ) کے عہدے داران بھی موجود تھے۔

 

 

یہ کانفرنس وزارت کی جانب سے ملک کے مختلف علاقوں میں منعقد کی جانے والی پانچ علاقائی کانفرنسوں کی سیریز کی چوتھی کانفرنس تھی، جس میں ریاستوں/ مرکز کے زیر انتظام علاقوں  اور اہم متعلقین کو شامل کیا گیا، جس کا مقصد چار لیبرقوانین کے ہموار نفاذ کو فروغ دینا اور ای ایس آئی سی، ای پی ایف او  اور وزیرِ اعظم ترقی یافتہ بھارت روزگار اسکیم (پی ایم وی بی آر وائی) سے متعلق مسائل پر غور و خوض کرنا تھا۔

اپنے خطاب میں، جناب گنش رام سنگھ کھنٹیا نے مندوبین کا خیرمقدم کیا اور نشان دہی کی کہ ملک ایک اہم مرحلے پر ہے کیونکہ لیبر قوانین  نافذ کیے جا چکے ہیں۔ انہوں نے وزیرِ اعظم  نریندرمودی  کا شکریہ ادا کیا کہ انہوں نے لیبر اصلاحات کو متعارف کرایا اور محنت کی حکمرانی کو مضبوط کرنے کے لیے ایک مستقبل بین فریم ورک فراہم کیا۔ انہوں نے اڈیشہ  میں بروقت نفاذ کے لیے کی جانے والی تیاریوں کا بھی ذکر کیا، جس میں ڈرافٹ رولز کی اشاعت شامل ہے۔

انہوں نے مزید کہا کہ ریاستی حکومت تعمیراتی مزدوروں، غیر منظم مزدوروں اور دیگر ریاستوں کے  مزدوروں کے لیے فلاحی اسکیمیں نافذ کر رہی ہے، جنہیں پارلیمانی اسٹینڈنگ کمیٹی نے بھی تسلیم کیا ہے۔ انہوں نے ملازمت کے خواہشمندوں کے لیے روزگار کے مواقع فراہم کرنے اور تمام مزدوروں کے لیے سماجی انصاف یقینی بنانے کے وسیع مقصد پر زور دیتے ہوئے لیبر قوانین کے مؤثر نفاذ کی اہمیت کو اجاگر کیا اور امید ظاہر کی کہ یہ مباحثے مفید گفتگو اور تجربات کے تبادلے کا باعث بنیں گے تاکہ مزدوروں کی فلاح و بہبود کو مزید مستحکم  کیا جا سکے۔

محترمہ وندنا گورانی، سیکریٹری، وزارت محنت و روزگار نے کانفرنس کے سیاق و سباق کو بیان کرتے ہوئے  لیبر قوانین کو ایک تاریخی اصلاح قرار دیا، جو بھارت کے لیبر فریم ورک کو بدلتی ہوئی قومی اور عالمی اقتصادی حالات کے مطابق ہم آہنگ کرنے کے لیے تیار کی گئی ہے۔ انہوں نے کہا کہ متعدد مرکزی لیبر  قوانین کو چار کوڈز میں یکجا کرنا قواعد و ضوابط کے ڈھانچے کو آسان بناتا ہے، مزدوروں کی فلاح و بہبود کو بہتر بناتا ہے، کاروبار کرنے میں آسانی پیدا کرتا ہے اور روزگار کے مواقع اور اقتصادی ترقی کی حمایت کرتا ہے۔

انہوں نے اجاگر کیا کہ لیبر کوڈز پیچیدگیوں کو کم کرتے ہوئے مزدوروں کے تحفظ کو مضبوط بناتے ہیں، جیسے کہ لازمی تقرر نامے جن میں خدمات کی شرائط و ضوابط واضح ہوں، امتیاز اور استحصال کی ممانعت، شیڈیول شدہ ملازمتوں سے آگے کم از کم اجرت کا عالمگیر نفاذ، سماجی تحفظ کا عالمگیر نفاذ، اور مرکزی حکومت کی جانب سے نوٹیفائی شدہ قانونی فلور اجرت  جس سے کم از کم اجرت کی ریاستی حد طے نہیں کی جا سکتی۔ انہوں نے جرائم کے مجموعی حل  سمیت کام کاج کے بوجھ کو آسان بنانے پر بھی روشنی ڈالی۔

انہوں نے مزید زور دیا کہ مؤثر، شہری اور کاروبار محور نفاذ کو یقینی بنانے کے لیے آئی ٹی پر مبنی نظام جیسے کہ سنگل رجسٹریشن، سنگل لائسنس اور سنگل ریٹرن اہم ہیں، اور ریاستوں/مرکز کے زیر انتظام علاقوں کوقومی سطح پر انضمام کی سہولت فراہم کی گئی ہے۔ انہوں نے اس بات پر بھی زور دیا کہ وی وی جی این ایل آئی لیبر قوانین کے تحت صلاحیت بڑھانے کے پروگراموں کی ایک سیریز چلا رہا ہے اور ریاستوں/مرکز کے زیر انتظام علاقوں سے درخواست کی کہ وہ ماہر ٹرینرز کے طور پر نمائندے مقرر کریں تاکہ ہنر کو  کو مزید وسعت دی جا سکے اور ریاستی سطح پر تربیت کو آسان بنایا جا سکے۔

انہوں نے ریاستوں/مرکز کے زیر انتظام علاقوں سے یہ بھی درخواست کی کہ وہ قواعد کے حتمی مسودے کو جلد مکمل کریں، وزارت کی جانب سے اکثر پوچھے جانے والے سوالات (ایف اے کیو) اور قوانین سے متعلق  ہینڈ بک کا مؤثر استعمال کریں، دکانوں اور اداروں کے قوانین  کے تحت دفعات کے ساتھ کسی بھی تکرار یا اوورلیپ سے گریز کریں،پی ایم وی بی آر وائی ڈیش بورڈ کو فعال طور پر استعمال کریں، اور ریاستی صحت کے مراکز اور پی ایم جے اے وائی کے ساتھ ہم آہنگی کے ذریعے ای ایس آئی سی کی کوریج اور طبی انفراسٹرکچر کو وسعت دینے کے لیے مرکز–ریاست تعاون کو مضبوط کریں۔ انہوں نے ریاستوں سے کہا کہ وہ مثالی آجر کے طور پر کام کریں، یعنی کم از کم اجرت کو یقینی بنائیں، اجرت بروقت ادا کریں اور ریاستی اداروں میں کام کرنے والے مزدوروں اور ملازمین، بشمول کنٹریکٹرز کے ذریعے کام کرنے والے، کو سماجی تحفظ کے فوائد فراہم کریں۔

افتتاحی سیشن کے بعد وزارت اور ریاستوں/مرکز کے زیر انتظام علاقوں کے سینئر افسران کی تفصیلی پیشکشیں ہوئی، جن میں نئے لیبر قوانین کے تحت قواعد کو حتمی شکل دینے کی پیش رفت اور آئی ٹی تیاری کی صورتحال بیان کی گئی۔ اہم پہلوؤں پر جامع بحث کی گئی، جیسے قواعد کے مسودے اور نوٹیفکیشن، مرکزی اور ریاستی سطح پر آئی ٹی نظام کو مضبوط اور اپ گریڈ کرنا تاکہ کوڈز کی دفعات کے مطابق ہو، اور ریاستی آئی ٹی پلیٹ فارمز کو مرکزی ڈیجیٹل فریم ورک کے ساتھ ضم کرنے کے امکانات کا جائزہ لینا شامل تھا۔

یہ کانفرنس، جس میں وزارت اور ریاستوں/مرکز کے زیر انتظام علاقوں کے سینئر افسران نے شرکت کی، قواعد و ضوابط پر غور و خوض، خامیوں اور اختلافی نکات کی نشاندہی، قانونی نوٹیفکیشنز کو تیز کرنا، اور قوانین کے تحت  کے تحت بورڈز، فنڈز اور دیگر ادارہ جاتی نظام قائم کرنے پر تبادلہ خیال کے لیے ایک اہم پلیٹ فارم کا کام کیا۔ اس کے علاوہ ، کانفرنس نے یہ ضرورت اجاگر کی کہ میدان میں کام کرنے والے عملے کی صلاحیت میں اضافہ کیا جائے اور ریاستوں/مرکز کے زیر انتظام علاقوں اور دیگر شراکت داروں  کے درمیان لیبر قوانین  کے مقاصد، ڈھانچے اور نفاذ کے روڈ میپ کے بارے میں بیداری کو فروغ دیا جائے۔

 

******

(ش ح –ع و۔ خ م  )

U. No.2585

(ریلیز آئی ڈی: 2229160) وزیٹر کاؤنٹر : 8