اہم نکات

• ہندوستان نے تمام شعبوں میں محفوظ، قابلِ اعتماد اور جامع مصنوعی ذہانت (اے آئی) پر مبنی اختراع کو ممکن بنانے کے لیے سات نکاتی اصولوں پر مشتمل اے آئی گورننس فریم ورک اختیار کیا ہے۔
• ان رہنما خطوط میں نئے قومی اداروں کے قیام کی تجویز دی گئی ہے، جن میں اے آئی گورننس گروپ، ٹیکنالوجی و پالیسی ماہر کمیٹی اور اے آئی سیفٹی انسٹی ٹیوٹ شامل ہیں۔
• اے آئی گورننس کے یہ رہنما خطوط خلل انگیز اختراع کو ترجیح دیتے ہیں اور مصنوعی ذہانت کو جامع ترقی، مسابقت اور ترقی یافتہ ہندوستان 2047 کے وژن کے حصول کے لیے ایک اہم محرک کے طور پر پیش کرتے ہیں۔

تعارف

مصنوعی ذہانت پانچویں صنعتی انقلاب میں ایک کلیدی محرک کے طور پر ابھر کر سامنے آئی ہے، اور ہندوستان نے اس ضمن میں ایک واضح اور ہمہ گیر وژن پیش کیا ہے: ملکی ضروریات کے مطابق ایک مکمل اے آئی اسٹیک کی تشکیل۔

ہندوستان کی اے آئی حکمتِ عملی محض تکنیکی صلاحیتوں تک محدود نہیں، بلکہ یہ جمہوریت سازی، پیمانے اور شمولیت کے اصولوں پر مبنی ہے۔ اس کا مقصد یہ یقینی بنانا ہے کہ مصنوعی ذہانت چند مخصوص کمپنیوں یا مقامات تک محدود نہ رہے بلکہ زراعت، صحت کی دیکھ بھال، تعلیم، گورننس، مینوفیکچرنگ اور آب و ہوا سے متعلق اقدامات تک وسیع پیمانے پر پھیل سکے۔

“اے آئی فار آل” کے تصور پر توجہ مرکوز کرتے ہوئے، ہندوستان خود مختار صلاحیت کو کھلی اختراع (اوپن اننو یشن )کے ساتھ ہم آہنگ کرنا چاہتا ہے۔ اس کے لیے عوامی ڈیجیٹل بنیادی ڈھانچے، مقامی ماڈلز کی تیاری اور کم لاگت کمپیوٹنگ سے فائدہ اٹھاتے ہوئے پیداواری صلاحیت اور جامع ترقی کو فروغ دینے کا ہدف رکھا گیا ہے۔

یہ نقطۂ نظر مصنوعی ذہانت کی پیش رفت کو 2047 تک(وکست بھارت) ترقی یافتہ ہندوستان کے وسیع قومی عزم (وژن )کے ساتھ جوڑتا ہے اور اے آئی کو معاشی تبدیلی، سماجی پائیداری اور اسٹریٹجک خود مختاری کے لیے ایک اہم محرک کے طور پر پیش کرتا ہے۔

ہندوستان کی کامیابیاں اس “پہلے ۔ نفاذ(ڈپلائیمنٹ فرسٹ)” فلسفے کی واضح عکاسی کرتی ہیں۔ انڈیا اے آئی مشن کے تحت 38,000 سے زائد جی پی یوز کو سبسڈی یافتہ نیشنل کمپیوٹ سہولت کے ذریعے شامل کیا گیا ہے۔ اے آئی کوش اب 9,500 سے زیادہ ڈیٹا سیٹس اور 273 شعبہ جاتی ماڈلز کی میزبانی کر رہا ہے، جس سے مقامی ماڈلز کی ترقی کو مضبوط تقویت مل رہی ہے۔

نیشنل سپر کمپیوٹنگ مشن کے تحت اے آئی آر اے ڈبلیو اے ٹی اور پرم سدھی–اے آئی سمیت 40 سے زائد پیٹا فلاپ سسٹمز کا آغاز کیا جا چکا ہے۔

صلاحیت سازی کے محاذ پر، انڈیا اے آئی اور فیوچر اسکلز انیشی ایٹو کے ذریعے 500 پی ایچ ڈی اسکالرز، 5,000 پوسٹ گریجویٹ طلبہ اور 8,000 انڈر گریجویٹ طلبہ کی معاونت کی جا رہی ہے، جبکہ ریاستوں میں قائم 570 اے آئی ڈیٹا لیبز اور 27 انڈیا اے آئی لیبز نچلی سطح پر اختراع کو فروغ دے رہی ہیں۔ اس وقت ملک کے تقریباً 90 فیصد اسٹارٹ اپس کسی نہ کسی صورت میں مصنوعی ذہانت کو اپنے نظام میں ضم کر چکے ہیں، جو ہندوستان کے اختراعی ماحولیاتی نظام میں اے آئی کے گہرے انضمام کی عکاسی کرتا ہے۔

اے آئی امپیکٹ سمٹ 2026 میں جاری کیے جانے والے انڈیا اے آئی گورننس گائیڈ لائنز ان کامیابیوں کو مستحکم کرنے کے لیے ایک اہم سنگِ میل کی حیثیت رکھتے ہیں۔ سات رہنما اصولوں پر مبنی یہ فریم ورک اصولی، تکنیکی اور قانونی نقطۂ نظر اپناتا ہے۔ اے آئی گورننس گروپ، ٹیکنالوجی و پالیسی ماہر کمیٹی اور اے آئی سیفٹی انسٹی ٹیوٹ جیسے نئے اداروں کے قیام کے ذریعے، ہندوستان ایک ہمہ گیر سرکاری ماڈل کو ادارہ جاتی شکل دے رہا ہے جو اختراع اور تحفظات کے درمیان متوازن ہم آہنگی پیدا کرتا ہے۔ یہ رہنما خطوط نہ صرف اے آئی کو اپنانے اور صلاحیت سازی میں بلکہ عالمی سطح پر ذمہ دار، جامع اور قابلِ اعتماد اے آئی گورننس میں بھی قیادت کے لیے ہندوستان کے عزائم کو تقویت دیتے ہیں۔

ہندوستان کا اے آئی گورننس فلسفہ

ہندوستان مصنوعی ذہانت کی تبدیلی لانے والی صلاحیت کو جامع ترقی اور عالمی مسابقت کے لیے بروئے کار لانا چاہتا ہے، جبکہ اس سے افراد اور معاشرے کو درپیش ممکنہ خطرات سے مؤثر انداز میں نمٹنے کا بھی خواہاں ہے۔

اسی مقصد کے تحت، الیکٹرانکس و انفارمیشن ٹیکنالوجی کی وزارت (ایم ای آئی ٹی وائی) نے جولائی 2025 میں ہندوستان میں اے آئی گورننس کے لیے ایک جامع فریم ورک تیار کرنے کی غرض سے ایک ڈرافٹنگ کمیٹی تشکیل دی۔ اس کمیٹی کو موجودہ قوانین سے استفادہ کرنے، عالمی پیش رفت کا جائزہ لینے، دستیاب تحقیقی و پالیسی ادب کا مطالعہ کرنے اور عوامی مشاورت کے ذریعے موزوں حکمرانی کے رہنما خطوط تیار کرنے کی ذمہ داری سونپی گئی۔

کمیٹی نے اپنی بات چیت اور مشاورت کی بنیاد پر اے آئی گورننس فریم ورک کو چار حصوں میں پیش کیا ہے۔ پہلا حصہ ان سات ستونوں کا خاکہ پیش کرتا ہے جو ہندوستان کے اے آئی گورننس فلسفے کی اساس ہیں۔ دوسرے حصے میں مخصوص مسائل کا تفصیلی جائزہ لیتے ہوئے عملی تجاویز پیش کی گئی ہیں۔ تیسرا حصہ ایک جامع ایکشن پلان کی وضاحت کرتا ہے، جبکہ چوتھا حصہ صنعت سے وابستہ فریقین اور ریگولیٹرز کے لیے ایسی عملی رہنما ہدایات فراہم کرتا ہے جن کے ذریعے تجاویز کو مسلسل اور ذمہ دارانہ انداز میں نافذ کیا جا سکے۔

حصہ اول: کلیدی اصول

اے آئی گورننس فریم ورک کے بنیادی اصولوں کو نہایت احتیاط اور دوراندیشی کے ساتھ مرتب کیا گیا ہے تاکہ بین القطاعی اطلاق اور ٹیکنالوجی کی غیر جانب داری کو یقینی بنایا جا سکے، جس سے مختلف استعمالی صورتوں اور ٹیکنالوجی کی ترقی کے متنوع مراحل کو سہارا مل سکے۔ یہ اصول مجموعی طور پر ذمہ دار مصنوعی ذہانت کی ترقی اور تعیناتی( نفاذ) کے لیے ایک لچکدار، مضبوط اور مستقبل کے لیے تیار بنیاد فراہم کرتے ہیں۔

 

یہ سات اصول مل کر ایک مضبوط اور متوازن اے آئی گورننس فریم ورک تشکیل دیتے ہیں جو اعتماد، مساوات اور جواب دہی کو برقرار رکھتے ہوئے اختراع کو ممکن بناتا ہے۔ یہ اصول عوام پر مرکوز، جامع اور مستقبل کے لیے تیار اے آئی ماحولیاتی نظام کے قیام کے لیے ہندوستان کے پختہ عزم کی عکاسی کرتے ہیں۔

تکنیکی ترقی کو سماجی اقدار اور ترقیاتی ترجیحات کے ساتھ ہم آہنگ کرتے ہوئے، یہ فریم ورک بڑے پیمانے پر ذمہ دار مصنوعی ذہانت کے فروغ اور اپنانے کے لیے ایک مضبوط اور پائیدار بنیاد فراہم کرتا ہے۔

حصہ دوم: اہم مسائل اور تجاویز

سات اصولوں/فارمولوں کو بطور رہنمائی استعمال کرتے ہوئے، کمیٹی نے اے آئی گورننس کے لیے ایک ایسے راستے کی سفارش کی ہے جو اختراع، اپنانے اور سائنسی ترقی کو فروغ دینے کے ساتھ ساتھ افراد اور برادریوں کو درپیش ممکنہ خطرات میں کمی کے اقدامات کو بھی مضبوط بنائے۔

موثر حکمرانی میں صرف ضابطہ کاری ہی شامل نہیں ہوتی بلکہ پالیسی میں شمولیت کے دیگر طریقے بھی اس کا حصہ ہوتے ہیں، جن میں صلاحیت سازی، بنیادی ڈھانچے کی ترقی اور ادارہ جاتی تشکیل شامل ہیں۔ اسی تناظر میں، کمیٹی نے چھ اہم سفارشات پیش کی ہیں۔

1۔بنیادی ڈھانچہ

ہندوستان کا اے آئی گورننس فریم ورک اختراع کو فروغ دینے  اور اسے  بڑے پیمانے پر اپناتے  ہوئے معاشرے کو لاحق خطرات کو کم کرنے کی کوشش کرتا ہے۔ انڈیا اے آئی مشن کے تحت بنیادی ڈھانچے کو مضبوط بنانے میں نمایاں پیش رفت ہوئی ہے، جس میں کمپیوٹ اور ڈیٹا سیٹس تک بہتر رسائی، بنیادی ماڈلز کی ترقی، اے آئی ایپلی کیشنز کی تعیناتی(نفاذ)، ڈیجیٹل پبلک انفراسٹرکچر (ڈی پی آئی)، بہتر ڈیٹا شیئرنگ، اور حفاظتی جانچ شامل ہیں۔ اس رفتار کو برقرار رکھنے کے لیے، توسیع پذیر بنیادی ڈھانچے میں مسلسل سرمایہ کاری، کمپیوٹ اور ڈیٹا تک مساوی رسائی، اور مضبوط ادارہ جاتی صلاحیت کی ضرورت ہوگی۔

ڈیجیٹل پبلک انفراسٹرکچر کیا ہے؟

ڈیجیٹل پبلک انفراسٹرکچر (ڈی پی آئی) ایک ایسا بنیادی ڈیجیٹل نظام ہے جو قابلِ رسائی، محفوظ اور باہمی طور پر قابلِ عمل ہوتا ہے اور اہم عوامی خدمات کی فراہمی میں معاون ثابت ہوتا ہے۔
اس کی نمایاں مثالوں میں آدھار، یو پی آئی، ڈیجی لاکر، گورنمنٹ ای-مارکیٹ پلیس، اُمنگ اور پی ایم گتی شکتی شامل ہیں۔

2۔ صلاحیت سازی

ہندوستان نے مصنوعی ذہانت کی صلاحیت سازی کے لیے متعدد اقدامات کا آغاز کیا ہے، جن میں انڈیا اے آئی فیوچر اسکلز، فیوچر اسکلز پرائم اور اعلیٰ تعلیم سے متعلق پروگرامز شامل ہیں۔ یہ اقدامات اے آئی کے لیے تیار افرادی قوت کی ایک مضبوط بنیاد فراہم کرتے ہیں۔

جیسے جیسے مصنوعی ذہانت کے استعمال میں تیزی آ رہی ہے، ان کوششوں کو مزید وسعت دینا جامع ترقی اور زیادہ سے زیادہ شمولیت کے تقاضوں کو پورا کرنے میں مددگار ثابت ہوگا۔
چھوٹے کاروباروں اور عام شہریوں میں مصنوعی ذہانت سے متعلق آگاہی اور عملی تجربے کو فروغ دینے کے ساتھ ساتھ، سرکاری شعبے میں تکنیکی صلاحیت کو مضبوط کرنا موثر خریداری، رسک مینجمنٹ اور مصنوعی ذہانت کے نظاموں کی ذمہ دارانہ تعیناتی(نفاذ) کے لیے نہایت اہم ہے۔

3۔پالیسی اور ضابطے

اے آئی گورننس کے نقطۂ نظر کا مقصد اختراع، اپنانے اور تکنیکی ترقی کو فروغ دینا ہے، جبکہ اس امر کو بھی یقینی بنانا ہے کہ اے آئی ویلیو چین کے دوران افراد اور معاشرے کو لاحق ممکنہ خطرات کو کم سے کم رکھا جائے۔

موجودہ قانونی فریم ورک—جس میں آئینی دفعات، قوانین، قواعد و ضوابط اور مختلف شعبوں سے متعلق رہنما خطوط شامل ہیں، مثلاً انفارمیشن ٹیکنالوجی، ڈیٹا پروٹیکشن، دانشورانہ املاک، مقابلہ، میڈیا، روزگار، صارفین کا تحفظ اور فوجداری قانون—کے جائزے سے یہ واضح ہوتا ہے کہ اے آئی سے وابستہ متعدد خطرات کو موجودہ قوانین کے دائرۂ کار میں مؤثر طور پر حل کیا جا سکتا ہے۔

اس کے ساتھ ساتھ، اے آئی نظاموں سے متعلق ممکنہ ریگولیٹری خلا کی نشاندہی کے لیے متعلقہ قوانین کا جامع اور فوری جائزہ نہایت ضروری ہے۔ ان میں خاص طور پر اے آئی ویلیو چین میں درجہ بندی اور ذمہ داری کے مسائل، اے آئی کی تیاری میں ڈیٹا پروٹیکشن اصولوں کا اطلاق، جنریٹو اے آئی کے غلط استعمال، مواد کی تصدیق اور اصلیت سے متعلق چیلنجز، اے آئی کی تربیت میں کاپی رائٹ شدہ مواد کا استعمال اور حساس شعبوں میں سیکٹر سے متعلق خطرات شامل ہیں۔

اگرچہ ان میں سے بعض مسائل پر پہلے ہی بین وزارتی مشاورت، ضابطہ سازی اور ماہر کمیٹیوں کے ذریعے کام کیا جا رہا ہے، تاہم مصنوعی ذہانت کی تیز رفتار ترقی—بالخصوص بڑھتی ہوئی خود مختار نظاموں کے تناظر میں—ریگولیٹری فریم ورک کے لیے بروقت، مسلسل اور مستقبل کے لیے تیار رہنے کے حوالے سے سنجیدہ چیلنجز پیدا کر رہی ہے۔

4۔خطرے کو کم کرنا

پالیسی اور ریگولیٹری اصولوں کو عملی تحفظات میں تبدیل کرنے کے لیے خطرے کو کم کرنا ناگزیر ہے تاکہ مصنوعی ذہانت کے نظام کے سبب پیدا ہونے والے نقصانات کو روکا یا کم کیا جا سکے۔ چونکہ اے آئی نظام احتمالات پر مبنی، پیداواری، انکولی اور ایجنٹ کی حیثیت رکھتے ہیں، یہ لوگوں، بازاروں اور معاشرے کے لیے نئے خطرات پیدا کر سکتے ہیں یا موجودہ خطرات کو بڑھا سکتے ہیں۔ ان خطرات میں اے آئی سے چلنے والی غلط معلومات کا غلط استعمال، سائبر حملے، غیر درست یا غیر نمائندہ ڈیٹا کے نتیجے میں تعصب اور امتیازی سلوک، ذاتی ڈیٹا کے استعمال میں شفافیت کی کمی، بازار کے ارتکاز اور جغرافیائی سیاسی اتار چڑھاؤ سے وابستہ منظم خطرات، اے آئی نظاموں پر کنٹرول کا نقصان، اور قومی سلامتی و اہم بنیادی ڈھانچے کے لیے خطرات شامل ہیں۔

کمزور اور حاشیہ نشین طبقات کو ان نقصانات کا غیر متناسب طور پر زیادہ سامنا کرنا پڑتا ہے—بالخصوص بچے اور خواتین، جو استحصالی سفارشاتی نظاموں اور اے آئی سے تیار کردہ ڈیپ فیکس کے زیادہ شکار بنتے ہیں۔ اگرچہ اے آئی خطرات کی درجہ بندی اور جانچ کے لیے عالمی اور ملکی سطح پر کوششیں جاری ہیں، تاہم ہندوستان کو حقیقی دنیا میں پیش آنے والے نقصانات کے تجرباتی شواہد پر مبنی ایک سیاق و سباق سے ہم آہنگ، جامع خطرہ تشخیصی فریم ورک کی ضرورت ہے۔

اے آئی سے متعلق واقعات کو منظم طریقے سے جمع، تجزیہ اور سیکھنے کے لیے ایک مربوط نظام قائم ہونے سے پالیسی سازوں، ریگولیٹرز اور اداروں کو نئے اور ابھرتے ہوئے خطرات کا بروقت اندازہ لگانے، مناسب حفاظتی اقدامات تیار کرنے اور تمام شعبوں میں جواب دہی کو یقینی بنانے میں مؤثر مدد ملے گی۔

5 : جوابدہی

جوابدہی اے آئی گورننس کی ریڑھ کی ہڈی ہے، تاہم اس کو مؤثر طور پر یقینی بنانا ایک مشکل چیلنج ہے۔ اگرچہ اے آئی سے وابستہ متعدد خطرات کو موجودہ قوانین کے تحت حل کیا جا سکتا ہے، لیکن ان قوانین کی مؤثریت کا دار و مدار پہلے سے واضح تعین اور بروقت نفاذ پر ہوتا ہے۔

فرموں کے لیے تعمیل کو یقینی بنانے کی خاطر مناسب ترغیبات اور دباؤ درکار ہوتے ہیں، جبکہ ریگولیٹرز کو تنظیمی طریقۂ کار اور اے آئی ویلیو چین کی گہری سمجھ بوجھ کی ضرورت ہوتی ہے۔ موجودہ رضاکارانہ فریم ورکس میں قانونی نفاذ کی کمی ہے، اور اس حوالے سے بھی کوئی واضح اتفاقِ رائے موجود نہیں کہ ڈویلپرز، تعینات کرنے والے اداروں اور اختتامی صارفین پر ذمہ داری کس طرح عائد کی جائے۔

اکثر صارفین کے پاس شکایات کے ازالے کے لیے آسان اور مؤثر طریقۂ کار دستیاب نہیں ہوتا، جبکہ اے آئی نظاموں کے ڈیزائن، ڈیٹا کے بہاؤ اور تنظیمی فیصلہ سازی میں شفافیت بھی محدود رہتی ہے۔ مزید برآں، اے آئی نظاموں کی ممکنہ اور موافقت پذیر نوعیت غیر متوقع نتائج پیدا کر سکتی ہے، جس کے لیے ایسے گورننس نقطۂ نظر کی ضرورت ہے جو ذمہ دارانہ اختراع کے لیے گنجائش فراہم کرتے ہوئے موثر نفاذ کے ساتھ توازن قائم کرے۔

6:ادارے

ہندوستان کے اے آئی گورننس فریم ورک کو ہم آہنگی پیدا کرنے اور اثرات کو مستحکم کرنے کے لیے ایک مربوط “پوری حکومت” کے نقطۂ نظر سے نمایاں فائدہ حاصل ہو سکتا ہے۔ اس وقت ذمہ داریاں متعدد اداروں میں تقسیم ہیں، جو بین شعبہ جاتی ہم آہنگی اور اسٹریٹجک صف بندی کو بہتر بنانے کے مواقع فراہم کرتی ہیں۔

ایک مستقل بین ایجنسی میکانزم کے قیام سے قومی اے آئی حکمتِ عملی کی نگرانی، ابھرتے ہوئے خطرات کا بروقت اندازہ، عمل درآمد کے لیے رہنمائی اور ذمہ دارانہ اختراع کے فروغ میں مؤثر مدد مل سکتی ہے۔ اگرچہ ایم ای آئی ٹی وائی، سی ای آر ٹی-اِن اور آر بی آئی جیسے ادارے شعبہ جاتی سطح پر مخصوص کردار ادا کرتے ہیں، تاہم اے آئی پالیسی، سلامتی اور اخلاقیات سے متعلق تکنیکی مہارت کا قریبی انضمام خطرات کی تشخیص، رہنما خطوط کی تیاری اور صنعت کے ساتھ باخبر اور مؤثر مشغولیت کو ممکن بنائے گا۔

یہ ہم آہنگی نہ صرف داخلی نظم و نسق کو مضبوط کرے گی بلکہ ہندوستان کی ملکی اور بین الاقوامی اسٹریٹجک ترجیحات کے ساتھ اے آئی گورننس کی بہتر مطابقت بھی یقینی بنائے گی۔

مکمل حکومت کا نقطہ نظر

ایک مربوط فریم ورک جس کے تحت تمام متعلقہ وزارتیں، شعبہ جاتی ریگولیٹرز، معیاری ادارے اور سرکاری ادارے اے آئی پالیسی کی تشکیل، نفاذ اور نگرانی کے لیے مل کر کام کرتے ہیں۔ یہ نقطۂ نظر اسٹریٹجک صف بندی کو یقینی بناتا ہے، نقل (دہرے پن) سے بچاتا ہے اور تمام شعبوں میں موثر ہم آہنگی کو فروغ دیتا ہے۔

حصہ سوم: ایکشن پلان

ایکشن پلان اے آئی گورننس کو ادارہ جاتی حیثیت دینے، خطرات میں کمی اور تمام شعبوں میں اس کے مسلسل نفاذ کے لیے ایک مرحلہ وار روڈ میپ فراہم کرتا ہے۔ یہ قلیل مدتی ترجیحات کو درمیانی اور طویل مدتی اصلاحات کے ساتھ ہم آہنگ کرتا ہے، تاکہ گورننس کے اصولوں کو ذمہ دار، قابلِ توسیع اور جامع نتائج میں ڈھالا جا سکے، اور ساتھ ہی تکنیکی پیش رفت اور ابھرتے ہوئے خطرات کے تقاضوں کا بروقت اور مؤثر جواب دیا جا سکے۔

اے آئی گورننس کے رہنما خطوط اس مقصد سے ترتیب دیے گئے ہیں کہ وہ اداروں کو مضبوط بنانے، خطرات کا مؤثر نظم و نسق اور ذمہ دار مصنوعی ذہانت کے اپنانے میں معاون ثابت ہوں، اور ساتھ ہی تمام شعبوں میں اختراع، اعتماد اور جواب دہی کو فروغ دے کر عملی اثرات مرتب کریں۔

قلیل مدت میں، مربوط ادارے، ہندوستان کے سیاق و سباق سے ہم آہنگ رسک فریم ورک، واقعات کی رپورٹنگ کے طریقۂ کار، رضاکارانہ تعمیل اور عوامی آگاہی کے اقدامات اعتماد اور حکمرانی کی صلاحیتوں کو مستحکم کریں گے۔
درمیانی مدت میں، مشترکہ معیارات، ریگولیٹری سینڈ باکسز، تازہ اور ہم آہنگ قوانین اور ڈیجیٹل پبلک انفراسٹرکچر (ڈی پی آئی) کا انضمام محفوظ اختراع اور آسان تعمیل کی حمایت کریں گے۔
طویل مدت میں، ہندوستان ایک متوازن، فرتیلے اور مستقبل کے لیے تیار اے آئی گورننس ایکو سسٹم کی تشکیل کرے گا، جس میں مضبوط جواب دہی، ابھرتے ہوئے خطرات کے مقابلے میں لچک اور ذمہ دار اے آئی گورننس میں عالمی قیادت کو مزید فروغ حاصل ہوگا۔

یہ تمام نتائج مل کر اس امر کو یقینی بنائیں گے کہ ہندوستان کا اے آئی ماحولیاتی نظام اختراعی، جامع اور لچکدار رہے، اور معاشرتی مفادات کے تحفظ کے ساتھ ساتھ تکنیکی پیش رفت کو بھی آگے بڑھاتا رہے۔

حصہ چہارم: صنعت اور ریگولیٹرز کے لیے عملی رہنما خطوط

اے آئی گورننس فریم ورک کو مسلسل اور ذمہ دارانہ انداز میں نافذ کرنے کے لیے، کمیٹی نے اے آئی نظاموں کی تیاری یا نفاذ میں شامل صنعتی فریقین کے لیے عملی رہنمائی فراہم کی ہے، نیز سرکاری اداروں اور شعبہ جاتی ریگولیٹرز کے ذریعے پالیسی سازی اور نفاذ کے لیے واضح اصول متعین کیے ہیں۔

ان رہنما خطوط کا مقصد اختراع اور اپنانے کی حوصلہ افزائی کرنا ہے، جبکہ اس بات کو یقینی بنایا جائے کہ خطرات کو درست تناسب اور مناسب سیاق و سباق میں مؤثر طریقے سے نمٹایا جائے۔

 

ان عملی رہنما خطوط کا مقصد ہندوستان میں مصنوعی ذہانت کے نظاموں کی مسلسل، قانونی اور ذمہ دارانہ ترقی اور نفاذ کی  معاونت فراہم کرنا ہے۔ صنعت کے لیے واضح توقعات متعین کرکے اور اسی کے مطابق ریگولیٹرز کے ذریعے پالیسی اقدامات کی رہنمائی کرتے ہوئے، ان رہنما خطوط کا ہدف تمام شعبوں میں اختراع اور اپنانے کو ممکن بنانا ہے، ساتھ ہی اعتماد، جواب دہی اور موثر رسک مینجمنٹ کو مضبوط کرنا ہے۔

نتیجہ

انڈیا اے آئی گورننس کے رہنما خطوط ایک عملی، متوازن اور فرتیلے فریم ورک کی پیشکش کرتے ہیں، جو ملک میں محفوظ، قابلِ اعتماد اور ذمہ دارانہ مصنوعی ذہانت کی ترقی اور اپنانے کو فروغ دیتا ہے۔ سات رہنما اصولوں—اعتماد پر مبنی بنیاد، عوام کو مقدم رکھنا، تحمل سے بالاتر اختراع، انصاف اور مساوات، جواب دہی، ڈیزائن کے ذریعے فہم، اور حفاظت، لچک و پائیداری—پر قائم یہ فریم ورک اس بات کو یقینی بناتا ہے کہ مصنوعی ذہانت جامع ترقی، اقتصادی پیش رفت اور عالمی مسابقت کے لیے ایک مؤثر محرک کے طور پر کام کرے، جبکہ ٹھوس اور شواہد پر مبنی حل کے ذریعے افراد اور معاشرے کو درپیش خطرات سے مؤثر انداز میں نمٹا جائے۔

مربوط ادارہ جاتی قیادت کے تحت—جس میں الیکٹرانکس و انفارمیشن ٹیکنالوجی کی وزارت بطور نوڈل وزارت، اسٹریٹجک ہم آہنگی کے لیے اے آئی گورننس گروپ، ماہر مشاورت کے لیے ٹیکنالوجی و پالیسی ماہر کمیٹی، تکنیکی توثیق اور حفاظتی تحقیق کے لیے اے آئی سیفٹی انسٹی ٹیوٹ، اور ڈومین مخصوص نفاذ کے لیے شعبہ جاتی ریگولیٹرز شامل ہیں—یہ فریم ورک اختراع کو فروغ دینے، عوامی اعتماد قائم کرنے اور عالمی اے آئی ماحولیاتی نظام میں ہندوستان کو ایک ذمہ دار قائد کے طور پر مستحکم کرنے کے لیے ترتیب دیا گیا ہے۔

اس منظم اور مستقبل بین ڈھانچے کے ذریعے ہندوستان کا مقصد “اے آئی فار آل” کے وژن کو عملی جامہ پہنانا ہے، تاکہ 2047 تک (وکست بھارت )ترقی یافتہ ہندوستان کی قومی امنگوں میں مصنوعی ذہانت کی تبدیلی لانے والی صلاحیت کلیدی کردار ادا کرے، اور اس کے فوائد محفوظ، جامع اور پائیدار انداز میں ہر شہری تک پہنچ سکیں۔

حوالہ جات

پریس انفارمیشن بیورو :

• https://static.pib.gov.in/WriteReadData/specificdocs/documents/2025/nov/doc2025115685601.pdf
• https://www.pib.gov.in/PressReleasePage.aspx?PRID=2216895&lang=1&reg=3&utm
• https://www.pib.gov.in/PressReleasePage.aspx?PRID=2225069&reg=3&lang=2

 

اردو پی ڈی ایف

***

UR-2485

(ش ح۔اس ک  )

(ریلیز آئی ڈی: 2228424) وزیٹر کاؤنٹر : 14