پورے ملک میں آم کی کاشت دو سالہ (متبادل) پھل آوری کے مسئلے سے متاثر نہیں ہے۔ یہ مسئلہ شمالی بھارت کے بعض علاقوں میں پایا جاتا ہے جبکہ جنوبی بھارت میں اس کے اثرات نسبتاً کم ہیں۔ آم میں دو سالہ پھل آوری سے متعلق سائنسی مطالعات — اس کے اسباب اور علاقائی اثرات سمیت — آئی سی اے آر کے اداروں جیسے آئی سی اے آر-انڈین ایگریکلچرل ریسرچ انسٹی ٹیوٹ، نئی دہلی؛ آئی سی اے آر-انڈین انسٹی ٹیوٹ آف ہارٹیکلچرل ریسرچ، بنگلورو اور آئی سی اے آر-سنٹرل انسٹی ٹیوٹ فار سب ٹراپیکل ہارٹیکلچر، لکھنؤ میں کیے گئے ہیں۔ مطالعات سے ظاہر ہوتا ہے کہ دسہری، لنگڑا، چوسا، فزلی اور الفانسو جیسی اقسام میں دو سالہ پھل آوری کا رجحان نمایاں ہے۔ اس کی بنیادی وجوہات میں جینیاتی عوامل سے متاثر موروثی جسمانی خصوصیات، نائٹروجن اور کاربن کے ذخائر، پھول بننے کے ہارمونل کنٹرول، موسمی عوامل، زرعی طریقہ کار اور فصل کا بوجھ شامل ہیں۔

آم میں دو سالہ پھل آوری کے مسئلے سے نمٹنے کے لیے آئی سی اے آر کی جانب سے متعدد اقدامات کیے گئے ہیں۔ ان میں افزائش نسل کے ذریعے باقاعدہ پھل دینے والی اقسام اور ہائبرڈ کی تیاری اور فروغ شامل ہے، جیسے امر پالی، ملیکا، پوسا ارونیما، پوسا لالیما، پوسا پرتیبھا، پوسا شریشٹھ، پوسا منوہری، ارکا سپربھات، اودھ ابھیان، سی آئی ایس ایچ-ارونیکا، سی آئی ایس ایچ-امبیکا، اودھ سمردھی، نیلم، طوطا پری، بنگن پلی اور سون پری وغیرہ۔ ان اقسام/ہائبرڈ کا معیاری پودا جاتی مواد آئی سی اے آر کے اداروں اور رجسٹرڈ نرسریوں کے ذریعے کسانوں تک پہنچایا جاتا ہے۔ مربوط باغبانی ترقی مشن (ایم آئی ڈی ایچ) کے تحت بیماری سے پاک معیاری پودا جاتی مواد کی تیاری کے لیے کلین پلانٹ پروگرام بھی شروع کیا گیا ہے۔ دیگر اقدامات میں بہتر باغبانی نظم و نسق کے طریقوں کی تیاری اور ترویج شامل ہے، جیسے کینوپی مینجمنٹ، ہائی ڈینسٹی پودا کاری، متوازن غذائی اجزا اور آبپاشی کا انتظام، موسمیاتی لحاظ سے لچکدار ٹیکنالوجی مثلاً باقاعدہ پھول آوری کے لیے کٹائی کے ساتھ نینو فلورین کا استعمال اور اگلے سیزن میں پھل آوری کی معاونت کے لیے نئی شاخوں کی افزائش۔

زراعت اور کسانوں کی بہبود کے وزیر مملکت جناب رام ناتھ ٹھاکر نے آج لوک سبھا میں ایک تحریری جواب میں یہ معلومات فراہم کی۔

                                               **************

ش ح۔ ف ش ع

10-02-2026

                                                                                                                                       U: 2083

 

(ریلیز آئی ڈی: 2226117) وزیٹر کاؤنٹر : 3