ہندوستان کے کھیلوں کے ماحولیاتی نظام کو مضبوط بنانے کی سمت اہم اقدام کرتے ہوئے، نوجوانوں کے امور اور کھیلوں کی وزیر مملکت، محترمہ رکشا کھڈسے نے اسپورٹس اتھاریٹی آف انڈیا، چھترپتی سمبھاجی نگر کے نیشنل سینٹر آف ایکسیلنس (این سی او ای) میں کھیلو انڈیا ملٹی پرپز ہال کے سنگ بنیاد رکھنے کی تقریب میں شرکت کی۔

اس موقع پر آئی سی آئی سی آئی فاؤنڈیشن کی جانب سے کارپوریٹ سماجی ذمہ داری (سی ایس آر) اقدام کے تحت عطیہ کیے گئے اعلیٰ کارکردگی والے اسپورٹس سائنس کے آلات کا افتتاح کیا گیا اور اسے کھلاڑیوں کے لیے وقف کیا گیا۔ یہ نو تعمیر شدہ ملٹی پرپز ہال کھیلو انڈیا مشن کے تحت کھلاڑیوں کی تربیت، فٹنس اور صلاحیت سازی کے لیے جدید بنیادی ڈھانچہ فراہم کرے گا۔

اجتماع سے خطاب کرتے ہوئے محترمہ رکشا کھڈسے نے کہا کہ کھیلو انڈیا مشن دیہی سطح پر عالمی معیار کی سہولیات تیار کر رہا ہے اور کھیلوں کا ایک مضبوط ماحولیاتی نظام بنا رہا ہے۔ انہوں نے اس بات پر زور دیا کہ سی ایس آر شراکت داری جدید سہولیات اور سائنسی تربیتی نظام کو مضبوط بنانے میں تیزی سے اہم کردار ادا کر رہی ہے، جس سے قومی اور بین الاقوامی مقابلوں کے لیے کھلاڑیوں کی تیاری میں براہ راست بہتری آتی ہے۔

اس تقریب میں آئی سی آئی سی آئی بینک کے زونل ہیڈ جناب ابھیجیت سنگھ پوار، مراٹھواڑہ اسمال انڈسٹریز اینڈ ایگریکلچر ایسوسی ایشن (ایم اے ایس ایس آئی اے) کے صدر جناب ارجن گائیکواڑ اور اسپورٹس اتھارٹی آف انڈیا کی ڈپٹی ڈائریکٹر ڈاکٹر مونیکا گھُگے، ایس اے آئی اور دیگر اسٹیک ہولڈرز کے سینئر عہدیداروں کے ساتھ موجود تھے۔

اسپورٹس اتھارٹی آف انڈیا اور آئی سی آئی سی آئی فاؤنڈیشن کے درمیان تعاون حکومتی اقدامات اور کھیلوں کی ترقی میں کارپوریٹ شراکت کے درمیان بڑھتے ہوئے ہم آہنگی کی عکاسی کرتا ہے۔ اس طرح کی شراکت داریوں سے اعلیٰ کارکردگی کے پروگراموں کو تقویت دینے اور خطے میں نوجوان کھلاڑیوں کے لیے مزید مواقع پیدا کرنے کی امید ہے۔

کھیلو انڈیا مشن ہندوستان کو کھیلوں میں عالمی لیڈر بنانے کی کوششوں کو تیز کرنے کے لیے بنیادی ڈھانچے کی ترقی، مہارت کی ترقی اور سائنس پر مبنی نظام پر توجہ مرکوز کرتا ہے۔

۔۔۔۔۔۔۔۔۔۔۔

 

ش ح۔ک ا۔ ن م۔

U-1931

(ریلیز آئی ڈی: 2225313) وزیٹر کاؤنٹر : 6