حکومتِ ہند ملک کے تمام دیہی گھرانوں کو مقررہ معیار کے مطابق، مناسب مقدار (پچپن لیٹر فی کس فی دن)، محفوظ اور پینے کے قابل نل کے پانی کی باقاعدہ اور طویل مدتی فراہمی کو یقینی بنانے کے لیے پُرعزم ہے۔ اسی مقصد کے تحت حکومتِ ہند نے اگست 2019 میں جل جیون مشن کا آغاز کیا، جسے ریاستوں اور مرکزی زیرِ انتظام علاقوں کے ساتھ شراکت داری میں نافذ کیا جا رہا ہے۔

پینے کا پانی ریاستی موضوع ہے، لہٰذا جل جیون مشن کے تحت شامل منصوبوں سمیت پینے کے پانی کی فراہمی سے متعلق منصوبہ بندی، منظوری، نفاذ، آپریشن اور دیکھ بھال کی ذمہ داری ریاستی اور مرکزی زیرِ انتظام علاقوں کی حکومتوں پر عائد ہوتی ہے۔ حکومتِ ہند ریاستوں کو تکنیکی اور مالی معاونت فراہم کر کے ان کی مدد کرتی ہے۔

جل جیون مشن کے آغاز کے بعد سے ملک میں دیہی گھرانوں کو نل کے پانی کی فراہمی تک رسائی میں نمایاں پیش رفت ہوئی ہے۔ اگست 2019 میں جل جیون مشن کے آغاز کے وقت صرف 3.23 کروڑ (16.72 فیصد) دیہی گھرانوں کے پاس نل کے پانی کے کنکشن موجود تھے۔ اب تک، دستیاب رپورٹوں کے مطابق، جل جیون مشن کے تحت 12.55 کروڑ سے زائد اضافی دیہی گھرانوں کو نل کے پانی کے کنکشن فراہم کیے جا چکے ہیں۔ اس طرح 28 جنوری 2026 تک ملک کے 19.36 کروڑ دیہی گھرانوں میں سے 15.79 کروڑ (81.57 فیصد) سے زائد گھرانوں میں گھریلو سطح پر نل کے پانی کی فراہمی کی اطلاع دی گئی ہے۔

جل جیون مشن کو دسمبر 2028 تک جاری رکھنے کی تجویز اس وقت مرکزی حکومت کے زیرِ غور ہے۔

مشن کے تحت، ریاستوں اور مرکزی زیرِ انتظام علاقوں کو پانی کے ذرائع کے تحفظ اور بحالی کے لیے رہنمائی دی گئی ہے، جن میں مخصوص بورویل ریچارج ڈھانچے، بارش کے پانی کا ذخیرہ، موجودہ آبی ذخائر کی بحالی، گرے واٹر کا دوبارہ استعمال وغیرہ شامل ہیں۔ یہ اقدامات دیگر اسکیموں مثلاً مہاتما گاندھی نیشنل رورل ایمپلائمنٹ گارنٹی اسکیم، انٹیگریٹڈ واٹرشیڈ مینجمنٹ پروگرام، پندرہویں مالیاتی کمیشن کے تحت دیہی مقامی اداروں اور پنچایتی راج اداروں کے لیے مخصوص گرانٹس، ریاستی اسکیموں، کارپوریٹ سماجی ذمہ داری فنڈز وغیرہ کے ساتھ ہم آہنگی میں کیے جا رہے ہیں۔ مزید برآں، پانی کے تحفظ کو نچلی سطح تک عوامی شمولیت کے ذریعے فروغ دینے کے لیے جل شکتی ابھیان: کیچ دی رین مہم 2019 میں ملک کے 256 پانی سے متاثرہ اضلاع میں شروع کی گئی۔ پینے کے پانی کی دستیابی کے لیے پائیدار آبی نظم و نسق کی اہمیت کو تسلیم کرتے ہوئے، سال 2023 میں یہ مہم “پینے کے پانی کے لیے ماخذ کی پائیداری” کے موضوع کے تحت نافذ کی گئی، جبکہ 2024 میں اس کا موضوع “ناری شکتی سے جل شکتی” رہا۔ اسی طرح، جل شکتی ابھیان کو “پانی کے تحفظ کے لیے عوامی اقدام — مضبوط کمیونٹی رابطے کی جانب” کے موضوع کے تحت نافذ کیا جا رہا ہے، جس میں پانی کے تحفظ کے میدان میں کمیونٹی کے کلیدی کردار پر زور دیا گیا ہے۔

مزید برآں، زیرِ زمین پانی کے وسائل کی پائیداری کو یقینی بنانے کے لیے مرکزی زیرِ زمین پانی بورڈ نے چار ریاستوں، یعنی کرناٹک، مدھیہ پردیش، راجستھان اور تمل ناڈو میں ماخذ کی پائیداری سے متعلق ایک پائلٹ منصوبہ شروع کیا۔ اس پائلٹ مطالعے کے دوران بورڈ کے افسران نے مطالعاتی علاقوں کے تمام دیہات کا دورہ کیا، بنیادی زمینی سطح کی معلومات جمع کیں، زیرِ زمین پانی کی طلب اور رسد کے اجزاء کا جائزہ لیا، اور مون سون کے دوران بہاؤ کے دستیاب پانی کا اندازہ لگایا۔ بورڈ نے متعلقہ ریاستی حکومتوں کے افسران کو ماخذ کی پائیداری سے متعلق مداخلتی اقدامات پر تربیت بھی فراہم کی، تاکہ وہ اپنے علاقوں میں اسی نوعیت کے مطالعات انجام دے سکیں۔

حکومت نے جل جیون مشن کے تحت پانی کے تحفظ اور بارش کے پانی کے ذخیرے کے لیے وسیع پیمانے پر کمیونٹی کی قیادت میں اقدامات نافذ کیے ہیں، جن میں زیرِ زمین پانی کی ریچارج اور گرے واٹر کے انتظام جیسے لازمی ماخذ پائیداری کے اجزاء شامل ہیں۔

مرکزی زیرِ زمین پانی بورڈ کمیونٹی سطح پر پانی کے تحفظ اور بارش کے پانی کے ذخیرے کے فروغ سے متعلق مختلف پروگرام منعقد کرتا ہے، جن کی تفصیل درج ذیل ہے:
مرکزی زیرِ زمین پانی بورڈ عوامی رابطہ پروگرام، بڑے پیمانے پر بیداری پروگرام، اور مقامی زیرِ زمین پانی کے مسائل سے متعلق درجۂ دوم اور درجۂ سوم کے پروگرام منعقد کرتا ہے، جن میں مقامی عوام کو بارش کے پانی کے ذخیرے کی تکنیکوں اور آبی ذخیرہ جاتی ڈھانچوں کے تحفظ سے آگاہ کیا جاتا ہے۔
ماخذ کی پائیداری سے متعلق تربیتی پروگرام، زیرِ زمین پانی کے انتظام پر شراکتی نقطۂ نظر کے تحت منعقد کیے جاتے ہیں، جن میں روایتی آبی ذخیرہ جاتی ڈھانچوں کے تحفظ سے متعلق معلومات فراہم کی جاتی ہیں، اور شرکاء کو ان ڈھانچوں کے مشاہدے کے لیے عملی دورے بھی کرائے جاتے ہیں۔
اطلاع، تعلیم اور مواصلات اسکیم کے تحت ہر سال وقتاً فوقتاً تربیت، سیمینار، ورکشاپس، نمائشیں اور تجارتی میلوں جیسے بڑے پیمانے پر بیداری پروگرام ملک کے مختلف حصوں میں منعقد کیے جاتے ہیں، تاکہ بارش کے پانی کے ذخیرے اور زیرِ زمین پانی کی مصنوعی ریچارج کو فروغ دیا جا سکے۔

وزارتِ جل شکتی جل جیون مشن کے تحت دیہی علاقوں میں صاف پانی کے چیلنجز سے نمٹنے کے لیے گھریلو سطح پر فعال نل کنکشنز کی رفتار بڑھا رہی ہے، ٹیکنالوجی پر مبنی پانی کے معیار کی نگرانی (دو ہزار آٹھ سو سے زائد تجربہ گاہیں) نافذ کر رہی ہے، اور 24.8 لاکھ خواتین کو فیلڈ ٹیسٹنگ کٹس کے استعمال کی تربیت فراہم کر چکی ہے۔ اہم اقدامات میں دیہی سطح پر پانی اور صفائی کمیٹیوں کو مضبوط بنانا، اثاثوں کو پردھان منتری گتی شکتی پورٹل پر جیو ٹیگ کرنا، اور ریاستوں و مرکزی زیرِ انتظام علاقوں کے اشتراک سے بارش کے پانی کے ذخیرے اور زیرِ زمین پانی کی ریچارج کے ذریعے ماخذ کی پائیداری پر توجہ مرکوز کرنا شامل ہے۔

یہ معلومات آج لوک سبھا میں وزیرِ مملکت برائے جل شکتی، جناب وی۔ سومنا نے ایک تحریری جواب میں فراہم کیں۔

 

***

UR-1761

(ش ح۔اس ک  )

(ریلیز آئی ڈی: 2224019) وزیٹر کاؤنٹر : 5