یونین پبلک سروس کمیشن (یو پی ایس سی) نے سول سروسز امتحان (سی ایس ای) 2026 اور انڈین فاریسٹ سروس امتحان (آئی ایف او ایس) 2026 کے لئے تکنیکی اقدامات کا ایک سلسلہ شروع کیا ہے ، جس میں امیدواروں کی رسائی کو بڑھانے اور امتحان کی سیکورٹی کو مضبوط بنانے پر توجہ دی گئی ہے ۔  2026 کے نوٹیفکیشن میں سول سروسز امتحان کے تحت کل 933 آسامیوں اور انڈین فاریسٹ سروس امتحان کے تحت 80 آسامیوں کا اعلان کیا گیا ہے ۔

کارکردگی ، شفافیت اور امیدواروں کی سہولت کو بہتر بنانے کی اپنی جاری کوششوں کے تحت کمیشن نے درخواستیں جمع کرانے اور امتحانات کے انعقاد کے لیے ایک نیا آن لائن ایپلی کیشن پورٹل متعارف کرایا ہے ۔  پھر سے ڈیزائن کیے گئے پورٹل کا مقصد امیدواروں کے لیے درخواست کے تجربے کو آسان بناتے ہوئے امتحان کے عمل کے مختلف مراحل میں سالمیت کو تقویت دینا ہے ۔

مخصوص سطح کی معذوریت والے افراد(پی ڈبلیو بی ڈی) کی مدد کرنے کے مقصد سے ایک اہم اصلاح میں یو پی ایس سی نے اپنے امتحانی مرکز کے الاٹمنٹ فریم ورک میں تبدیلی کی ہے ۔  نظر ثانی شدہ طریقہ کار کے تحت ، پی ڈبلیو بی ڈی امیدواروں کے لیے امتحانی مرکز کی گنجائش پر کوئی حد نہیں ہوگی ۔  ابتدائی طور پر  ہر مرکز کی موجودہ صلاحیت کو پی ڈبلیو بی ڈی اور غیر پی ڈبلیو بی ڈی امیدوار دونوں استعمال کریں گے ۔  تاہم ، ایک بار جب کوئی مرکز  کی گنجائش پوری ہوجائے گی ، تو یہ اب غیر پی ڈبلیو بی ڈی امیدواروں کے انتخاب کے لیے دستیاب نہیں ہوگا ، جبکہ پی ڈبلیو بی ڈی امیدواروں کے پاس اسی مرکز کا انتخاب کرنے کا اختیار برقرار رہے گا ۔  جہاں بھی ضرورت پڑے گی، اضافی گنجائش پیدا کی جائے گی تاکہ یہ یقینی بنایا جا سکے کہ کسی بھی پی ڈبلیو بی ڈی امیدوار کو ان کے ترجیحی امتحانی مرکز سے محروم نہ رکھا جائے ۔

اس اقدام کے پیچھے استدلال کی وضاحت کرتے ہوئے یو پی ایس سی کے چیئرمین ڈاکٹر اجے کمار نے کہا کہ ’گزشتہ پانچ برسوں کے دوران امتحانی مراکز کے اعداد و شمار کے تجزیے سے پتہ چلا ہے کہ دہلی ، کٹک ، پٹنہ اور لکھنؤ سمیت کچھ مراکز درخواستوں کی زیادہ تعداد کی وجہ سے بہت ابتدائی مرحلے میں پوری گنجائش تک پہنچ جاتے ہیں ، جس سے پی ڈبلیو بی ڈی امیدواروں کے لیے مشکلات پیدا ہوتی ہیں ۔  انہوں نے کہا کہ نظر ثانی شدہ طریقہ کار کے ساتھ، ہر پی ڈبلیو بی ڈی امیدوار کو ان کے ترجیحی امتحانی مرکز کی یقین دہانی کرائی جائے گی ، جس سے یو پی ایس سی امتحانات میں شرکت کے دوران زیادہ آسانی اور سہولت کو یقینی بنایا جائے گا ۔

کمیشن نے زیادہ مانگ والے مقامات پر دباؤ کو کم کرنے کے لیے اپنے امتحانی مراکز کے نیٹ ورک  میں بھی توسیع دی ہے ۔  میرٹھ کو دہلی-این سی آر میں بھیڑ کو کم کرنے کے لیے شامل کیا گیا ہے، لکھنؤ کے ارد گرد دباؤ کو کم کرنے کے لیے کانپور اور کٹک کے نزدیک سینٹر کی مدد کے لیے بھونیشور کو  شامل کیا گیاہے۔  ان تینوں مراکز کوپریلیمنری( ابتدائی) امتحان کے لیے شامل کیا گیا ہے ، جس سے ابتدائی مراکز کی کل تعداد 80 سے بڑھ کر 83 ہو گئی ہے ۔  مینز امتحان کے لیے بھوبنیشور ، سری نگر اور امپھال کے اضافے کے ساتھ مراکز کی تعداد 24 سے بڑھا کر 27 کر دی گئی ہے ۔

اپنے مرکز کی منصوبہ بندی کے عمل کو مزید مضبوط کرتے ہوئے ، تجدید شدہ ایپلی کیشن پورٹل میں اب امتحانی مرکز کی ترجیحات سے متعلق ایک نئی خصوصیت شامل ہے ۔  مطلع کردہ امتحانی مراکز میں سے انتخاب کرنے کے علاوہ ، امیدواروں سے کہا جائے گا کہ وہ ڈراپ ڈاؤن لسٹ کے ذریعے ترجیحی قریبی شہروں کی نشاندہی کریں ۔  یہ ڈیٹا امیدواروں کی ترجیحات کے سروے کے طور پر کام کرے گا اور جہاں ممکن ہو وہاں نئے امتحانی مراکز کی تشکیل کے لیے مقامات کی نشاندہی کرنے کے لیے استعمال کیا جا سکتا ہے ۔

پورٹل میں امتحان کے عمل کی مجموعی سیکورٹی کو بڑھانے کے لیے تصویر کی تصدیق اور چہرے کی شناخت پر مبنی ٹیکنالوجی کی پہل کو بھی شامل کیا گیا ہے ۔  یہ اقدام امتحان کے مختلف مراحل میں شناخت کی تصدیق کو مضبوط کرتا ہے ، جو ایک زیادہ مضبوط اور شفاف نظام میں معاون ہے ۔

کمیشن کے نقطہ نظر پر زور دیتے ہوئے ، ڈاکٹر اجے کمار نےذکر کیا کہ‘‘کمیشن نے امیدواروں کی سہولت اور شرکت میں آسانی کو بڑھانے پر توجہ کے ساتھ ساتھ ایک آزادانہ ، منصفانہ ، جامع اور قابل رسائی امتحان کے عمل کو یقینی بنانے کے لیے جدید ترین ٹیکنالوجی کے استعمال کو اپنایا ہے ، اس بات کو یقینی بناتے ہوئے کہ انتخاب سختی سے میرٹ کی بنیاد پر کیا جائے’’ ۔

یہ اقدامات یو پی ایس سی کی صد سالہ تقریبات کا حصہ ہیں اور انصاف پسندی ، شفافیت اور دیانتداری کے اعلی ترین معیارات کو برقرار رکھتے ہوئے عصری ضروریات کے مطابق اپنے عمل کو تیار کرنے کے لیے کمیشن کی مسلسل کوششوں کی عکاسی کرتے ہیں ۔

*****

ش ح- م ش-اش ق

U.No. 1740

(ریلیز آئی ڈی: 2223978) وزیٹر کاؤنٹر : 8