وزارتِ کارپوریٹ امور کے تحت انڈین انسٹی ٹیوٹ آف کارپوریٹ افیئرز (آئی آئی سی اے) نے انڈین اکنامک سروس (آئی ای ایس) اور انڈین ٹریڈ سروس (آئی ٹی ایس) کے 21 افسران کے لیے کمپنیز ایکٹ، مسابقتی قانون، اور انسولیونسی اینڈ بینکرپسی کوڈ پر ایک خصوصی تربیتی پروگرام کا انعقاد کیا۔ یہ پروگرام 02 تا 06 فروری 2026 تک آئی ایم ٹی، مانیسَر میں واقع آئی آئی سی اے کیمپس میں منعقد ہوا، جس کا مقصد افسران کی کارپوریٹ ریگولیٹری فریم ورک اور گورننس طریقۂ کار سے متعلق فہم کو مضبوط بنانا تھا۔

اس پروگرام کا مقصد افسر تربیت یافتگان کو کمپنیز ایکٹ، مسابقتی قانون، کارپوریٹ فنانس اور انسولیونسی قانون جیسے کلیدی شعبوں سے روشناس کرانا تھا، تاکہ نصاب کو ان کے پیشہ ورانہ کردار اور ذمہ داریوں کے مطابق ہم آہنگ کیا جا سکے۔ یہ اقدام کارپوریٹ امور کی حکمرانی سے متعلق عملی تجربہ فراہم کرنے کے ساتھ ساتھ افسران کے ریگولیٹری اور پالیسی نقطۂ نظر کو بہتر بنانے کے لیے ترتیب دیا گیا تھا۔

اس پروگرام کے ذریعے افسران نے کمپنی کے امور کے انتظام؛ کمپیٹیشن کمیشن آف انڈیا (سی سی آئی) کے اختیارات، فرائض اور تفتیشی طریقۂ کار؛ اکنامکس اور قانون سازی؛ ایک ابھرتے ہوئے اقتصادی قانون کے طور پر انسولیونسی اینڈ بینکرپسی کوڈ (آئی بی سی)؛ ریگولیٹری گورننس؛ مسابقت مخالف معاہدات؛ بالادستی کے غلط استعمال؛ کارپوریٹ فنانس؛ قرض اور ڈیفالٹ؛ ڈیٹا پر مبنی فیصلہ سازی؛ مسودہ نویسی اور قانون سازی کی نیت؛ کارپوریٹ انسولیونسی ریزولوشن پروسیس (سی آئی آر پی)؛ ریگولیٹری طریقۂ کار؛ اور نیشنل کمپنی لا ٹریبونل (این سی ایل ٹی) اور نیشنل کمپنی لا اپیلیٹ ٹریبونل (این سی ایل اے ٹی) کے کردار کے بارے میں گہرے ادراک حاصل کیے۔

تربیتی ماہرین میں جن ممتاز شخصیات نے شرکت کی، ان میں جناب سدھاکر شکلا، سابق رکن، انسولیونسی اینڈ بینکرپسی بورڈ آف انڈیا (آئی بی بی آئی) اور سربراہ، سینٹر فار انسولیونسی اینڈ بینکرپسی، آئی آئی سی اے؛ جناب گیانیشور کمار سنگھ، ڈائریکٹر جنرل اور چیف ایگزیکٹو آفیسر، آئی آئی سی اے؛ جناب دھنندرا کمار، سابق چیئرپرسن، سی سی آئی؛ جناب جی۔ پی۔ مدان، بانی، مدان لا آفسز؛ جناب سمیر گاندھی، پارٹنر، ایکسیوم فائیو لا چیمبرز؛ ڈاکٹر ایم۔ ایس۔ ساہو، سابق چیئرپرسن، آئی بی بی آئی؛ ڈاکٹر آگسٹین پیٹر، سابق رکن، سی سی آئی؛ ڈاکٹر پیلا نارائن راؤ، ایسوسی ایٹ پروفیسر، اسکول آف کارپوریٹ لا اینڈ کمپیٹیشن لا، آئی آئی سی اے؛ جناب جی۔ آر۔ بھاٹیا، پارٹنر، لتھرا اینڈ لتھرا؛ ڈاکٹر نوین سیروہی، ایسوسی ایٹ پروفیسر، اسکول آف فنانس اینڈ مینجمنٹ، آئی آئی سی اے؛ ڈاکٹر دیبجیوَتی رائے چودھری، منیجنگ ڈائریکٹر، نیشنل ای-گورننس سروسز لمیٹڈ (این ای ایس ایل)؛ ڈاکٹر مکولیتا وجیاورگیہ، سابق ہول ٹائم ممبر، آئی بی بی آئی؛ محترمہ پوجا بھری، انسولیونسی پروفیشنل؛ جناب وکرم کمار، سینئر پارٹنر، انکارپ ایڈوائزری؛ اور جناب آلوک سریواستو، سابق لاء سیکریٹری اور سابق رکن، این سی ایل اے ٹی شامل تھے۔

اس پروگرام کا باقاعدہ افتتاح جناب گیانیشور کمار سنگھ، ڈائریکٹر جنرل اور چیف ایگزیکٹو آفیسر، آئی آئی سی اے نے کیا۔ اپنے خطبۂ افتتاحیہ میں انہوں نے کہا کہ وزارتِ کارپوریٹ امور ملک کے سب سے بڑے ریگولیٹری ڈھانچوں میں سے ایک کی نگرانی کرتی ہے، جس میں انسولیونسی اینڈ بینکرپسی بورڈ آف انڈیا (آئی بی بی آئی)، کمپیٹیشن کمیشن آف انڈیا (سی سی آئی)، نیشنل فنانشل رپورٹنگ اتھارٹی (این ایف آر اے)، انسٹی ٹیوٹ آف چارٹرڈ اکاؤنٹنٹس آف انڈیا (آئی سی اے آئی)، انسٹی ٹیوٹ آف کمپنی سیکریٹریز آف انڈیا (آئی سی ایس آئی) اور کاسٹ اینڈ مینجمنٹ اکاؤنٹنٹس (سی ایم اے) شامل ہیں۔ اعتماد پر مبنی ریگولیشن کے تصور کو اجاگر کرتے ہوئے انہوں نے افسران کی حوصلہ افزائی کی کہ وہ پروگرام کے دوران کارپوریٹ امور کے مخصوص شعبوں کو بطور پروجیکٹ موضوع منتخب کریں۔

پروگرام کے آغاز میں جناب سدھاکر شکلا نے ہندوستان میں کاروبار میں آسانی کے تین اہم ستونوں پر روشنی ڈالی—داخلے کی آزادی، کام کرنے کی آزادی، اور اخراج کی آزادی۔ انہوں نے کارپوریٹ پائیداری کے لیے ان کی اہمیت کو اجاگر کرتے ہوئے انہیں کمپنیز ایکٹ، 2013؛ کمپیٹیشن ایکٹ، 2002؛ اور انسولیونسی اینڈ بینکرپسی کوڈ، 2016 سے جوڑا۔

افتتاحی اجلاس کو مزید تقویت جناب دھنندرا کمار، ریٹائرڈ آئی اے ایس افسر، حکومتِ ہند کے سابق سیکریٹری، اور کمپیٹیشن کمیشن آف انڈیا کے پہلے چیئرپرسن کے خطاب سے ملی۔ انہوں نے مونوپولیز اینڈ ریسٹرکٹو ٹریڈ پریکٹسز ایکٹ (ایم آر ٹی پی ایکٹ) سے جدید مسابقتی ریگولیٹری نظام تک ہندوستانی مسابقتی قانون کے ارتقا کا جائزہ پیش کیا اور اپنے طویل انتظامی تجربے سے ادارہ سازی سے متعلق قیمتی بصیرتیں فراہم کیں۔ شرکاء کے ساتھ ان کا تبادلۂ خیال اجلاس کو نہایت بامعنی اور فکری طور پر متحرک بنانے والا ثابت ہوا۔

تکنیکی اجلاس میں جناب جی۔ پی۔ مدان نے کارپوریٹ قانون کے بنیادی اصولوں، گورننس ڈھانچوں، اور ڈائریکٹرز کی ذمہ داریوں پر تفصیل سے روشنی ڈالی، اور قانونی دفعات کو عملی کارپوریٹ طریقۂ کار سے مربوط کیا۔

اس کے بعد معروف مسابقتی قانون کے ماہر جناب سمیر گاندھی نے ایک بصیرت افروز نشست پیش کی، جس میں انہوں نے ہندوستان میں مسابقتی قانون کی ترقی پر جامع گفتگو کی۔ دو دہائیوں سے زائد تجربے، بشمول سی سی آئی کے وکیل کے طور پر خدمات اور اہم اینٹی ٹرسٹ مقدمات میں شمولیت کی بنیاد پر، انہوں نے شرکاء کو ریگولیٹری ارتقا پر ایک نادر عملی نقطۂ نظر فراہم کیا۔

پروگرام کا اختتام ڈاکٹر پیلا نارائن راؤ، ایسوسی ایٹ پروفیسر، اسکول آف کارپوریٹ لا اینڈ کمپیٹیشن لا، آئی آئی سی اے کی جانب سے پیش کردہ شکریہ کے کلمات کے ساتھ ہوا۔

***

UR-1617

(ش ح۔اس ک  )

(ریلیز آئی ڈی: 2223374) وزیٹر کاؤنٹر : 7