ಸಾಂಖ್ಯಿಕ ಮತ್ತು ಕಾರ್ಯಕ್ರಮ ಅನುಷ್ಠಾನ ಸಚಿವಾಲಯವು (MoSPI), ₹150 ಕೋಟಿ ಮತ್ತು ಅದಕ್ಕಿಂತ ಹೆಚ್ಚಿನ ಮೌಲ್ಯದ ಕೇಂದ್ರ ವಲಯದ ಮೂಲಸೌಕರ್ಯ ಯೋಜನೆಗಳ ಕಡ್ಡಾಯ ಮೇಲ್ವಿಚಾರಣೆಗಾಗಿ, ಹಿಂದಿನ OCMS-2006 (ಆನ್‌ಲೈನ್ ಕಂಪ್ಯೂಟರೀಕೃತ ಮಾನಿಟರಿಂಗ್ ಸಿಸ್ಟಮ್) ಬದಲಿಗೆ PAIMANA (Project Assessment, Infrastructure Monitoring & Analytics for Nation-building) ಎಂಬ ಹೊಸ ವೆಬ್ ಆಧಾರಿತ ಪೋರ್ಟಲ್ ಅನ್ನು ಕಾರ್ಯಾಗತಗೊಳಿಸಿದೆ. "ಒಂದು ದತ್ತಾಂಶ, ಒಂದು ನಮೂದು" ತತ್ವಕ್ಕೆ ಅನುಗುಣವಾಗಿ, PAIMANA ಅನ್ನು ಎಪಿಐಗಳ ಮೂಲಕ ಡಿಪಿಐಐಟಿಯ ಸಮಗ್ರ ಯೋಜನಾ ಮೇಲ್ವಿಚಾರಣಾ ಪೋರ್ಟಲ್ (IPMP/IIG-PMG) ನೊಂದಿಗೆ ಸಂಯೋಜಿಸಲಾಗಿದೆ. ಇದು ಐಪಿಎಂಪಿಯಲ್ಲಿ ಕೇಂದ್ರ ಸಚಿವಾಲಯಗಳು/ಇಲಾಖೆಗಳು ವರದಿ ಮಾಡಿದ ಮಾಹಿತಿಯ ದತ್ತಾಂಶವು ಸ್ವಯಂಚಾಲಿತವಾಗಿ ಬರುವಂತೆ ಮಾಡುತ್ತದೆ. ಈ ಸಂಯೋಜನೆಯು ಹಸ್ತಚಾಲಿತ ದತ್ತಾಂಶ ನಮೂದನ್ನು ಗಣನೀಯವಾಗಿ ಕಡಿಮೆ ಮಾಡಿದೆ, PAIMANA ದಲ್ಲಿನ ಸುಮಾರು 60 ಪ್ರತಿಶತ ಯೋಜನೆಗಳು ಸ್ವಯಂಚಾಲಿತವಾಗಿ ನವೀಕರಿಸಲ್ಪಡುತ್ತಿವೆ, ಇದು ಭಾರತ ಸರ್ಕಾರದ ಗುಣಮಟ್ಟದ ಮತ್ತು ದಕ್ಷ ಮೂಲಸೌಕರ್ಯ ಯೋಜನಾ ಮೇಲ್ವಿಚಾರಣೆಗೆ ಕೊಡುಗೆ ನೀಡುತ್ತದೆ.

PAIMANA ಪೋರ್ಟಲ್ ಮೂಲಸೌಕರ್ಯ ಯೋಜನೆಗಳ ಕೇಂದ್ರೀಕೃತ ರಾಷ್ಟ್ರೀಯ ಭಂಡಾರವಾಗಿ ಕಾರ್ಯನಿರ್ವಹಿಸುತ್ತದೆ, ವೆಬ್-ಚಾಲಿತ ವಿಶ್ಲೇಷಣಾತ್ಮಕ ವರದಿಗಳನ್ನು ಸಕ್ರಿಯಗೊಳಿಸುತ್ತದೆ ಮತ್ತು ದತ್ತಾಂಶ ನಿಖರತೆ ಹಾಗೂ ಕಾರ್ಯಾಚರಣೆಯ ದಕ್ಷತೆಯನ್ನು ಹೆಚ್ಚಿಸುತ್ತದೆ. ಪೋರ್ಟಲ್‌ ನ ಪ್ರಮುಖ ವೈಶಿಷ್ಟ್ಯಗಳಲ್ಲಿ ಸುಧಾರಿತ ದತ್ತಾಂಶ ವಿಶ್ಲೇಷಣೆ, ಪಾತ್ರ-ಆಧಾರಿತ ಬಳಕೆದಾರ ಪ್ರವೇಶ, ಸಂವಾದಾತ್ಮಕ ಡ್ಯಾಶ್‌ಬೋರ್ಡ್‌ ಗಳು, ವರದಿ ಮತ್ತು ಪ್ರಶ್ನೆ ಮಾಡ್ಯೂಲ್‌ ಗಳು ಮತ್ತು ದತ್ತಾಂಶ ಅಂತರಗಳ ಗುರುತಿಸುವಿಕೆಗಾಗಿ ಪರಿಶೀಲನಾ ಪ್ರಕರಣಗಳು ಸೇರಿವೆ, ಇದರಿಂದಾಗಿ ಸುಧಾರಿತ ದತ್ತಾಂಶ ಗುಣಮಟ್ಟ ಮತ್ತು ತಿಳುವಳಿಕೆಯುಳ್ಳ ನಿರ್ಧಾರ ತೆಗೆದುಕೊಳ್ಳುವಿಕೆಯನ್ನು ಇದು ಬೆಂಬಲಿಸುತ್ತದೆ. PAIMANA ಕಾರ್ಯಾಚರಣೆಯನ್ನು 20 ಕ್ಕೂ ಹೆಚ್ಚು ಕೇಂದ್ರ ಸಚಿವಾಲಯಗಳು/ಇಲಾಖೆಗಳು, ಡಿಇಎ ಮತ್ತು ಡಿಪಿಐಐಟಿಯೊಂದಿಗೆ ವ್ಯಾಪಕ ಸಮನ್ವಯದೊಂದಿಗೆ ಕೈಗೊಳ್ಳಲಾಗಿದೆ, ಇದು ಯೋಜನಾ ಮ್ಯಾಪಿಂಗ್, ದತ್ತಾಂಶ ವಲಸೆ, ವಿಶ್ಲೇಷಣೆ ಮತ್ತು ಮೌಲ್ಯೀಕರಣವನ್ನು ಒಳಗೊಂಡಿದೆ.

ಪೋರ್ಟಲ್ ಅಳವಡಿಸಿಕೊಂಡ ನಂತರ, ಐಪಿಎಂಪಿ ಡೇಟಾಬೇಸ್‌ ನ ಸಮಗ್ರ ದತ್ತಾಂಶ ಶುದ್ಧೀಕರಣ ಪ್ರಕ್ರಿಯೆ ನಡೆಯುತ್ತಿದೆ, ಜೊತೆಗೆ ಹೆಚ್ಚಿನ ಪಾಲುದಾರರನ್ನು ಸೇರಿಸಿಕೊಳ್ಳಲು ಮತ್ತು ಹಳೆಯ ಹಾಗೂ ಹೊಸದಾಗಿ ಮಂಜೂರಾದ ಯೋಜನೆಗಳನ್ನು ಸೇರಿಸಲು ನಿರಂತರ ಪ್ರಯತ್ನಗಳು ನಡೆಯುತ್ತಿವೆ. ಪ್ರಸ್ತುತ, 1,392 ನಡೆಯುತ್ತಿರುವ ಮೂಲಸೌಕರ್ಯ ಯೋಜನೆಗಳನ್ನು PAIMANA ಪೋರ್ಟಲ್‌ ನಲ್ಲಿ ಸೇರಿಸಲಾಗಿದೆ ಮತ್ತು ಹೆಚ್ಚಿನ ಪಾಲುದಾರರು ಹಾಗೂ ಯೋಜನೆಗಳನ್ನು ಸೇರಿಸುವ ಪ್ರಕ್ರಿಯೆ ಮುಂದುವರೆದಿದೆ.

2. ಮುಖ್ಯಾಂಶಗಳು

• ಡಿಸೆಂಬರ್ 2025 ರ ಹೊತ್ತಿಗೆ, ₹35.10 ಲಕ್ಷ ಕೋಟಿ ಪರಿಷ್ಕೃತ ವೆಚ್ಚದ 1,392 ನಡೆಯುತ್ತಿರುವ ಮೂಲಸೌಕರ್ಯ ಯೋಜನೆಗಳು 17 ಕೇಂದ್ರ ಸಚಿವಾಲಯಗಳು/ಇಲಾಖೆಗಳಾದ್ಯಂತ PAIMANA ಪೋರ್ಟಲ್‌ ನಲ್ಲಿ ವರದಿಯಾಗಿವೆ.
• ಡಿಸೆಂಬರ್ 2025 ರವರೆಗೆ ಈ ಯೋಜನೆಗಳ ಮೇಲೆ ಮಾಡಲಾದ ಒಟ್ಟು ವೆಚ್ಚವು ₹19.01 ಲಕ್ಷ ಕೋಟಿ ಆಗಿದೆ.
• 1,392 ನಡೆಯುತ್ತಿರುವ ಯೋಜನೆಗಳಲ್ಲಿ, 469 (~33%) ಯೋಜನೆಗಳು ಶೇ.80 ಕ್ಕಿಂತ ಹೆಚ್ಚು ಭೌತಿಕ ಪ್ರಗತಿಯನ್ನು ಸಾಧಿಸಿವೆ, ಆದರೆ 221 (~16%) ಯೋಜನೆಗಳು ಶೇ.80 ರಷ್ಟು ಆರ್ಥಿಕ ಪೂರ್ಣಗೊಳಿಸುವಿಕೆಯನ್ನು ದಾಟಿವೆ, ಇದು ಗಣನೀಯ ಪ್ರಮಾಣದ ಯೋಜನೆಗಳು ಅನುಷ್ಠಾನದ ಮುಂದುವರಿದ ಹಂತದಲ್ಲಿವೆ ಎಂಬುದನ್ನು ಪ್ರತಿಫಲಿಸುತ್ತದೆ.
• ಸಾರಿಗೆ ಮತ್ತು ಲಾಜಿಸ್ಟಿಕ್ಸ್ ವಲಯವು (ಡಿಇಎ ನ ಹಾರ್ಮೋನೈಸ್ಡ್ ಮಾಸ್ಟರ್ ಲಿಸ್ಟ್ ಪ್ರಕಾರ) ಅತಿ ಹೆಚ್ಚು ಸಂಖ್ಯೆಯ ನಡೆಯುತ್ತಿರುವ ಯೋಜನೆಗಳನ್ನು (896 ಯೋಜನೆಗಳು) ಹೊಂದಿದ್ದು, ₹17.70 ಲಕ್ಷ ಕೋಟಿ ಪರಿಷ್ಕೃತ ಅಂದಾಜು ವೆಚ್ಚದೊಂದಿಗೆ ಸಂಪರ್ಕ-ಚಾಲಿತ ಮೂಲಸೌಕರ್ಯ ಬೆಳವಣಿಗೆಗೆ ಆದ್ಯತೆ ನೀಡುತ್ತಿದೆ.
• 1,392 ನಡೆಯುತ್ತಿರುವ ಮೂಲಸೌಕರ್ಯ ಯೋಜನೆಗಳಲ್ಲಿ 585 ಬೃಹತ್ ಯೋಜನೆಗಳು (ಯೋಜನಾ ವೆಚ್ಚ ₹1,000 ಕೋಟಿ ಮತ್ತು ಅದಕ್ಕಿಂತ ಹೆಚ್ಚು) ಸೇರಿವೆ, ಇವುಗಳ ಪರಿಷ್ಕೃತ ವೆಚ್ಚ ₹31.44 ಲಕ್ಷ ಕೋಟಿ ಆಗಿದೆ ಮತ್ತು 807 ಪ್ರಮುಖ ಯೋಜನೆಗಳು (ಯೋಜನಾ ವೆಚ್ಚ ₹1,000 ಕೋಟಿಗಿಂತ ಕಡಿಮೆ ಮತ್ತು ₹150 ಕೋಟಿವರೆಗೆ) ₹3.66 ಲಕ್ಷ ಕೋಟಿ ಮೌಲ್ಯದ್ದಾಗಿವೆ.
• ಡಿಸೆಂಬರ್ 2025 ರ ಹೊತ್ತಿಗೆ, ಅನುಷ್ಠಾನದಲ್ಲಿರುವ 1,392 ಯೋಜನೆಗಳ ಮೇಲೆ ಮಾಡಲಾದ ಒಟ್ಟು ವೆಚ್ಚವು ₹19.01 ಲಕ್ಷ ಕೋಟಿ ಆಗಿದೆ, ಇದು ಪರಿಷ್ಕೃತ ಯೋಜನಾ ವೆಚ್ಚದ ಸರಿಸುಮಾರು 54.1 ಪ್ರತಿಶತದಷ್ಟು ಇದೆ.
• ಭೌತಿಕ ಮತ್ತು ಆರ್ಥಿಕ ಪ್ರಗತಿಯು ವಿಶಾಲವಾಗಿ ಒಂದಕ್ಕೊಂದು ಪೂರಕವಾಗಿ ಸಾಗುತ್ತಿವೆ. ಹೆಚ್ಚಿನ ಸಂಖ್ಯೆಯ ಯೋಜನೆಗಳು ಆರಂಭಿಕ (0–20%) ಮತ್ತು ಮುಂದುವರಿದ (81–100%) ಹಂತಗಳಲ್ಲಿವೆ, ಇದು ಹೊಸದಾಗಿ ಪ್ರಾರಂಭಿಸಲಾದ ಯೋಜನೆಗಳ ಪೈಪ್‌ಲೈನ್ ಮತ್ತು ಪೂರ್ಣಗೊಳ್ಳುವ ಹಂತದಲ್ಲಿರುವ ಯೋಜನೆಗಳನ್ನು ಸೂಚಿಸುತ್ತದೆ. ಶೇ.81–100 ರಷ್ಟು ವ್ಯಾಪ್ತಿಯಲ್ಲಿ ಭೌತಿಕ ಪ್ರಗತಿಯು ಆರ್ಥಿಕ ಪ್ರಗತಿಗಿಂತ ಹೆಚ್ಚಿದ್ದರೆ, ಆರಂಭಿಕ ಹಂತಗಳಲ್ಲಿ ಆರ್ಥಿಕ ಪ್ರಗತಿಯು ತುಲನಾತ್ಮಕವಾಗಿ ಹೆಚ್ಚಾಗಿರುತ್ತದೆ, ಇದು ಯೋಜನಾ ಅನುಷ್ಠಾನದ ಆರಂಭಿಕ ವೆಚ್ಚದ ಮಾದರಿಗಳನ್ನು ಪ್ರತಿಫಲಿಸುತ್ತದೆ.

3. ಸಚಿವಾಲಯ/ಇಲಾಖೆವಾರು ಮೂಲಸೌಕರ್ಯ ಯೋಜನೆಗಳ ಪ್ರಗತಿ

• ರಸ್ತೆ ಸಾರಿಗೆ ಮತ್ತು ಹೆದ್ದಾರಿ ಸಚಿವಾಲಯವು ಅತಿ ಹೆಚ್ಚು ಯೋಜನೆಗಳನ್ನು ಹೊಂದಿದ್ದು, 584 ಯೋಜನೆಗಳು (42%) ಮತ್ತು ಒಟ್ಟು ಯೋಜನಾ ವೆಚ್ಚದಲ್ಲಿ ₹5.38 ಲಕ್ಷ ಕೋಟಿ (15%) ಪಾಲನ್ನು ಹೊಂದಿದ್ದು, ರಾಷ್ಟ್ರೀಯ ಮೂಲಸೌಕರ್ಯ ಅಭಿವೃದ್ಧಿಯಲ್ಲಿ ಪ್ರಮುಖ ಪಾತ್ರ ವಹಿಸುತ್ತಿದೆ.
• ರೈಲ್ವೆ ಸಚಿವಾಲಯವು 249 ಯೋಜನೆಗಳನ್ನು (18%) ಅನುಷ್ಠಾನಗೊಳಿಸುತ್ತಿದೆ ಮತ್ತು ₹8.53 ಲಕ್ಷ ಕೋಟಿ (24%) ಯೊಂದಿಗೆ ಒಟ್ಟು ಯೋಜನಾ ವೆಚ್ಚದ ಅತಿದೊಡ್ಡ ಪಾಲನ್ನು ಹೊಂದಿದೆ.
• ಕಲ್ಲಿದ್ದಲು ಸಚಿವಾಲಯವು ₹2.14 ಲಕ್ಷ ಕೋಟಿ (6%) ಒಟ್ಟು ಯೋಜನಾ ವೆಚ್ಚದೊಂದಿಗೆ 123 ಯೋಜನೆಗಳನ್ನು (9%) ಅನುಷ್ಠಾನಗೊಳಿಸುತ್ತಿದೆ.
• ಪೆಟ್ರೋಲಿಯಂ ಮತ್ತು ನೈಸರ್ಗಿಕ ಅನಿಲ ಸಚಿವಾಲಯ, ವಿದ್ಯುತ್ ಸಚಿವಾಲಯ, ವಸತಿ ಮತ್ತು ನಗರ ವ್ಯವಹಾರಗಳ ಸಚಿವಾಲಯ ಮತ್ತು ಜಲಸಂಪನ್ಮೂಲ, ನದಿ ಅಭಿವೃದ್ಧಿ ಮತ್ತು ಗಂಗಾ ಪುನರುಜ್ಜೀವನ ಇಲಾಖೆಯು ಕ್ರಮವಾಗಿ 111, 94, 53 ಮತ್ತು 47 ಯೋಜನೆಗಳನ್ನು ಅನುಷ್ಠಾನಗೊಳಿಸುತ್ತಿವೆ, ಇವುಗಳ ವೆಚ್ಚಗಳು ಕ್ರಮವಾಗಿ ₹5.03 ಲಕ್ಷ ಕೋಟಿ, ₹4.44 ಲಕ್ಷ ಕೋಟಿ, ₹3.73 ಲಕ್ಷ ಕೋಟಿ ಮತ್ತು ₹1.98 ಲಕ್ಷ ಕೋಟಿಗಳಾಗಿವೆ.
• ಉಳಿದ 131 ಯೋಜನೆಗಳು (9%), ಒಟ್ಟು ₹3.90 ಲಕ್ಷ ಕೋಟಿ (11%) ವೆಚ್ಚದೊಂದಿಗೆ ಉನ್ನತ ಶಿಕ್ಷಣ, ನಾಗರಿಕ ವಿಮಾನಯಾನ, ಉಕ್ಕು, ದೂರಸಂಪರ್ಕ, ಕಾರ್ಮಿಕ ಮತ್ತು ಉದ್ಯೋಗ, ಬಂದರುಗಳು, ಹಡಗು ಮತ್ತು ಜಲಮಾರ್ಗಗಳು, ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ, ಗಣಿ, ಡಿಪಿಐಐಟಿ ಮತ್ತು ಕ್ರೀಡೆ ಸೇರಿದಂತೆ ವಿವಿಧ ಸಚಿವಾಲಯಗಳು/ಇಲಾಖೆಗಳಲ್ಲಿ ಹಂಚಿಕೆಯಾಗಿವೆ.(ಅನುಬಂಧ I ನೋಡಿ)

4. ವಲಯವಾರು ಮೂಲಸೌಕರ್ಯ ಯೋಜನೆಗಳ ಪ್ರಗತಿ (ಡಿಇಎಯ ಹಾರ್ಮೋನೈಸ್ಡ್ ಮಾಸ್ಟರ್ ಲಿಸ್ಟ್ ಪ್ರಕಾರ)

• ಸಾರಿಗೆ ಮತ್ತು ಲಾಜಿಸ್ಟಿಕ್ಸ್ ಪ್ರಬಲ ವಲಯವಾಗಿದ್ದು, 896 ಯೋಜನೆಗಳಾದ್ಯಂತ (ಒಟ್ಟು ಯೋಜನೆಗಳ 65%) ಒಟ್ಟು ಪರಿಷ್ಕೃತ ಯೋಜನಾ ವೆಚ್ಚದ ಶೇ.50 (₹17.70 ಲಕ್ಷ ಕೋಟಿ) ಪಾಲನ್ನು ಹೊಂದಿದೆ. ಇದು ಆರ್ಥಿಕ ಏಕೀಕರಣ ಮತ್ತು ಲಾಜಿಸ್ಟಿಕ್ಸ್ ದಕ್ಷತೆಯಲ್ಲಿ ರಸ್ತೆಗಳು ಮತ್ತು ಹೆದ್ದಾರಿಗಳು, ರೈಲ್ವೆ, ವಿಮಾನಯಾನ, ನಗರ ಸಾರ್ವಜನಿಕ ಸಾರಿಗೆ, ಹಡಗು ಮತ್ತು ಒಳನಾಡಿನ ಜಲಮಾರ್ಗಗಳ ಪ್ರಮುಖ ಪಾತ್ರವನ್ನು ಒತ್ತಿಹೇಳುತ್ತದೆ.
• ಇಂಧನ ವಲಯವು 211 ಯೋಜನೆಗಳಾದ್ಯಂತ ಒಟ್ಟು ಪರಿಷ್ಕೃತ ವೆಚ್ಚದ ಶೇ.29 (₹10.00 ಲಕ್ಷ ಕೋಟಿ) ಪಾಲಿನೊಂದಿಗೆ ಎರಡನೇ ಸ್ಥಾನದಲ್ಲಿದೆ, ಇದು ತೈಲ ಮತ್ತು ಅನಿಲ ಮೂಲಸೌಕರ್ಯ, ವಿದ್ಯುತ್ ಉತ್ಪಾದನೆ, ಪ್ರಸರಣ ಮತ್ತು ವಿತರಣಾ ಜಾಲಗಳು ಮತ್ತು ಇಂಧನ ಶೇಖರಣಾ ವ್ಯವಸ್ಥೆಗಳ ಮೇಲಿನ ನಿರಂತರ ಒತ್ತು ನೀಡಿಕೆಯನ್ನು ಪ್ರತಿಫಲಿಸುತ್ತದೆ.
• ಸಂಪರ್ಕ ಮೂಲಸೌಕರ್ಯವು 14 ಯೋಜನೆಗಳಾದ್ಯಂತ ₹2.74 ಲಕ್ಷ ಕೋಟಿ (8%) ಯೋಜನಾ ವೆಚ್ಚದೊಂದಿಗೆ ಡಿಜಿಟಲ್ ಸಂಪರ್ಕವನ್ನು ಬಲಪಡಿಸುವ ಗುರಿಯನ್ನು ಹೊಂದಿದೆ.
• ನೀರು ಮತ್ತು ನೈರ್ಮಲ್ಯ ಯೋಜನೆಗಳು 70 ಯೋಜನೆಗಳಾದ್ಯಂತ ₹2.03 ಲಕ್ಷ ಕೋಟಿ (6%) ಪಾಲನ್ನು ಹೊಂದಿದ್ದು, ಅಗತ್ಯ ನಗರ ಸೇವೆಗಳ ಮೇಲೆ ನಿರಂತರ ಗಮನವನ್ನು ತೋರಿಸುತ್ತವೆ.
• ಸಾಮಾಜಿಕ ಮತ್ತು ವಾಣಿಜ್ಯ ಮೂಲಸೌಕರ್ಯವು 58 ಯೋಜನೆಗಳನ್ನು ಹೊಂದಿದ್ದು, ₹0.72 ಲಕ್ಷ ಕೋಟಿ (2%) ಪರಿಷ್ಕೃತ ಯೋಜನಾ ವೆಚ್ಚದೊಂದಿಗೆ ಶಿಕ್ಷಣ, ಆರೋಗ್ಯ ರಕ್ಷಣೆ, ರಿಯಲ್ ಎಸ್ಟೇಟ್ ಮತ್ತು ಪ್ರವಾಸೋದ್ಯಮ, ಆತಿಥ್ಯ ಮತ್ತು ಕ್ಷೇಮ ಕ್ಷೇತ್ರದಲ್ಲಿ ಆಯ್ದ ಹೂಡಿಕೆಗಳನ್ನು ಪ್ರತಿಫಲಿಸುತ್ತದೆ.
• 'ಇತರ' ವರ್ಗದ ಅಡಿಯಲ್ಲಿ ವರ್ಗೀಕರಿಸಲಾದ ಯೋಜನೆಗಳು 143 ಯೋಜನೆಗಳಾದ್ಯಂತ ₹1.91 ಲಕ್ಷ ಕೋಟಿ (5%) ಆಗಿದ್ದು, ಕಲ್ಲಿದ್ದಲು, ಉಕ್ಕು, ಲೋಹಗಳು ಮತ್ತು ಗಣಿಗಾರಿಕೆಯಂತಹ ವಲಯಗಳಲ್ಲಿನ ವೈವಿಧ್ಯತೆಯನ್ನು ಸೂಚಿಸುತ್ತವೆ. (ಅನುಬಂಧ II ನೋಡಿ)

5. ಪೂರ್ಣಗೊಂಡ ಯೋಜನೆಗಳು ಮತ್ತು ಹೊಸ ಸೇರ್ಪಡೆಗಳು

• ಡಿಸೆಂಬರ್ 2025 ರ ಅವಧಿಯಲ್ಲಿ, ವಿವಿಧ ಕೇಂದ್ರ ಸಚಿವಾಲಯಗಳು ಮತ್ತು ಇಲಾಖೆಗಳಾದ್ಯಂತ 17 ಯೋಜನೆಗಳು ಶೇ.100 ರಷ್ಟು ಭೌತಿಕ ಪ್ರಗತಿಯನ್ನು ವರದಿ ಮಾಡಿವೆ. ಪ್ರಮುಖ ಯೋಜನೆಗಳಲ್ಲಿ ಖುರ್ಜಾ ಸೂಪರ್ ಥರ್ಮಲ್ ಪವರ್ ಪ್ಲಾಂಟ್ (ಒಟ್ಟು ವೆಚ್ಚ ₹12,888 ಕೋಟಿ) ಮತ್ತು ಬಿಕಾನೇರ್ ಸೌರ ವಿದ್ಯುತ್ ಯೋಜನೆ (₹5,523 ಕೋಟಿ) ಸೇರಿವೆ.
• ಡಿಸೆಂಬರ್ 2025 ರ ಅವಧಿಯಲ್ಲಿ, 20 ಯೋಜನೆಗಳು ಅನುಷ್ಠಾನದ ಹಂತಕ್ಕೆ ಪ್ರಗತಿ ಸಾಧಿಸಿವೆ ಮತ್ತು ಹೀಗಾಗಿ PAIMANA ನ ಮೇಲ್ವಿಚಾರಣೆಯ ಅಡಿಯಲ್ಲಿ ತರಲಾಗಿದೆ. ಇವುಗಳಲ್ಲಿ 11 ರೈಲ್ವೆ ಸಚಿವಾಲಯದಿಂದ, ತಲಾ 3 ಕಲ್ಲಿದ್ದಲು ಸಚಿವಾಲಯ ಮತ್ತು ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಸಚಿವಾಲಯದಿಂದ ಮತ್ತು ಉಳಿದ 3 ಯೋಜನೆಗಳು ಇತರ ಸಚಿವಾಲಯಗಳು/ಇಲಾಖೆಗಳಿಂದ ಬಂದಿವೆ.
• ಇವುಗಳಲ್ಲಿ ಪ್ರಮುಖ ರೈಲ್ವೆ ಯೋಜನೆಗಳಾದ ಫರ್ಕಟಿಂಗ್-ನ್ಯೂ ಟಿನ್ಸುಕಿಯಾ ಮಾರ್ಗ (194 ಕಿಮೀ, ₹3,633 ಕೋಟಿ), ಗೊಂಡಿಯಾ-ಡೊಂಗರಗಢ 4ನೇ ಮಾರ್ಗ (84 ಕಿಮೀ, ₹2,222 ಕೋಟಿ), ಮತ್ತು ದೇವಭೂಮಿ ದ್ವಾರಕಾ (ಓಖಾ)-ಕನಲುಸ್ ಜೋಡಿ ಮಾರ್ಗ ಯೋಜನೆ (₹1,456 ಕೋಟಿ) ಸೇರಿವೆ, ಇವುಗಳ ಪೂರ್ಣಗೊಳ್ಳುವ ಸಮಯ 2030 ರವರೆಗೆ ವಿಸ್ತರಿಸಲ್ಪಟ್ಟಿದೆ.
• ಇತರ ಪ್ರಮುಖ ಸೇರ್ಪಡೆಗಳಲ್ಲಿ ವಸತಿ ಮತ್ತು ನಗರ ವ್ಯವಹಾರಗಳ ಸಚಿವಾಲಯದ ಅಡಿಯಲ್ಲಿ ಪುಣೆ ಮೆಟ್ರೋ ಹಂತ-2, ಲೈನ್-4 ಮತ್ತು ಸ್ಪರ್ ಲೈನ್ 4ಎ (₹9,857 ಕೋಟಿ) ಮತ್ತು ನಾಗರಿಕ ವಿಮಾನಯಾನ ಸಚಿವಾಲಯದ ಅಡಿಯಲ್ಲಿ ರಾಜಸ್ಥಾನದ ಕೋಟಾದ ಬುಂಡಿಯಲ್ಲಿ ಗ್ರೀನ್‌ಫೀಲ್ಡ್ ವಿಮಾನ ನಿಲ್ದಾಣ (₹1,507 ಕೋಟಿ) ಸೇರಿವೆ.
• ಈ ಎಲ್ಲಾ ಯೋಜನೆಗಳು 2025 ರಲ್ಲಿ ಮಂಜೂರಾಗಿದ್ದು, ರಾಷ್ಟ್ರೀಯ ಮೂಲಸೌಕರ್ಯ ಮೇಲ್ವಿಚಾರಣಾ ವ್ಯವಸ್ಥೆಯ ವ್ಯಾಪ್ತಿ ಮತ್ತು ಸಮಗ್ರತೆಯನ್ನು ಮತ್ತಷ್ಟು ಬಲಪಡಿಸಿವೆ.

6. ಮುಂದಿನ ಪತ್ರಿಕಾ ಪ್ರಕಟಣೆಯ ದಿನಾಂಕ: ಜನವರಿ 2026 ರ ತಿಂಗಳ ಫ್ಲ್ಯಾಶ್ ವರದಿಯು 25 ಫೆಬ್ರವರಿ 2026 ರಂದು ಬಿಡುಗಡೆಯಾಗಲಿದೆ.

ಗಮನಿಸಿ: ಈ ಪತ್ರಿಕಾ ಪ್ರಕಟಣೆಯು ಕೇಂದ್ರ ವಲಯದ ಮೂಲಸೌಕರ್ಯ ಯೋಜನೆಗಳ (₹150 ಕೋಟಿ ಮತ್ತು ಅದಕ್ಕಿಂತ ಹೆಚ್ಚಿನ) ಮೇಲಿನ ಸಾಂಖ್ಯಿಕ ಮತ್ತು ಕಾರ್ಯಕ್ರಮ ಅನುಷ್ಠಾನ ಸಚಿವಾಲಯದ ಫ್ಲ್ಯಾಶ್ ವರದಿಯ (ಡಿಸೆಂಬರ್ 2025) ಮುಖ್ಯಾಂಶಗಳನ್ನು ಸಂಕ್ಷಿಪ್ತಗೊಳಿಸುತ್ತದೆ, ಇದು https://www.ipm.mospi.gov.in/ ನಲ್ಲಿ ಅಥವಾ ಕ್ಯುಆರ್ ಕೋಡ್ ಮೂಲಕ ಲಭ್ಯವಿದೆ.

ಅನುಬಂಧ I:

ಕೇಂದ್ರ ವಲಯದ ಮೂಲಸೌಕರ್ಯ ಯೋಜನೆಗಳ ಸಚಿವಾಲಯ/ಇಲಾಖೆವಾರು ಪ್ರಗತಿ

ಕ್ರ.ಸಂ.	ಸಚಿವಾಲಯ/ಇಲಾಖೆ	ಯೋಜನೆಗಳ ಸಂಖ್ಯೆ	ಪರಿಷ್ಕೃತ ವೆಚ್ಚ (ಸಾವಿರ ಕೋಟಿ ರೂ.ಗಳಲ್ಲಿ)	ಒಟ್ಟು ವೆಚ್ಚ (ಸಾವಿರ ಕೋಟಿ ರೂ.ಗಳಲ್ಲಿ)
1	ರಸ್ತೆ ಸಾರಿಗೆ ಮತ್ತು ಹೆದ್ದಾರಿ ಸಚಿವಾಲಯ	584	537.8	186.0
2	ರೈಲ್ವೆ ಸಚಿವಾಲಯ	249	852.6	686.2
3	ಕಲ್ಲಿದ್ದಲು ಸಚಿವಾಲಯ	123	214.4	75.9
4	ಪೆಟ್ರೋಲಿಯಂ ಮತ್ತು ನೈಸರ್ಗಿಕ ಅನಿಲ ಸಚಿವಾಲಯ	111	502.6	287.8
5	ವಿದ್ಯುತ್ ಸಚಿವಾಲಯ	94	443.5	184.3
6	ವಸತಿ ಮತ್ತು ನಗರ ವ್ಯವಹಾರಗಳ ಸಚಿವಾಲಯ	53	372.6	207.8
7	ಜಲಸಂಪನ್ಮೂಲ, ನದಿ ಅಭಿವೃದ್ಧಿ ಮತ್ತು ಗಂಗಾ ಪುನರುಜ್ಜೀವನ ಇಲಾಖೆ	47	197.6	142.3
8	ಉನ್ನತ ಶಿಕ್ಷಣ ಇಲಾಖೆ	28	14.3	7.7
9	ನಾಗರಿಕ ವಿಮಾನಯಾನ ಸಚಿವಾಲಯ	25	22.5	9.3
10	ಉಕ್ಕು ಸಚಿವಾಲಯ	20	23.2	8.8
11	ದೂರಸಂಪರ್ಕ ಇಲಾಖೆ	14	274.0	77.2
12	ಕಾರ್ಮಿಕ ಮತ್ತು ಉದ್ಯೋಗ ಸಚಿವಾಲಯ	13	3.5	1.9
13	ಬಂದರುಗಳು, ಹಡಗು ಮತ್ತು ಜಲಮಾರ್ಗಗಳ ಸಚಿವಾಲಯ	13	22.5	13.8
14	ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಸಚಿವಾಲಯ	8	14.5	4.1
15	ಗಣಿ ಸಚಿವಾಲಯ	7	11.0	6.9
16	ಕೈಗಾರಿಕೆ ಮತ್ತು ಆಂತರಿಕ ವ್ಯಾಪಾರ ಉತ್ತೇಜನ ಇಲಾಖೆ (ಡಿಪಿಐಐಟಿ)	2	3.8	0.8
17	ಕ್ರೀಡಾ ಇಲಾಖೆ	1	0.6	0.6
	ಒಟ್ಟು	1392	3510.9	1901.2

 

ಅನುಬಂಧ II:

ಕೇಂದ್ರ ವಲಯದ ಮೂಲಸೌಕರ್ಯ ಯೋಜನೆಗಳ ವಲಯವಾರು ಪ್ರಗತಿ (ಡಿಇಎಯ ಎಚ್‌ ಎಂ ಎಲ್‌ ವರ್ಗೀಕರಣದಂತೆ)

ಕ್ರ.ಸಂ.	ಎಚ್‌ ಎಂ ಎಲ್‌  ವರ್ಗ	ಯೋಜನೆಗಳ ಸಂಖ್ಯೆ	ಪರಿಷ್ಕೃತ ವೆಚ್ಚ (ಸಾವಿರ ಕೋಟಿ ರೂ. ಗಳಲ್ಲಿ)	ಒಟ್ಟು ವೆಚ್ಚ (ಸಾವಿರ ಕೋಟಿ ರೂ.ಗಳಲ್ಲಿ)
1	ಸಾರಿಗೆ ಮತ್ತು ಲಾಜಿಸ್ಟಿಕ್ಸ್	896	1,770.2	1,100.2
2	ಇಂಧನ	211	1,000.2	497.8
3	ನೀರು ಮತ್ತು ನೈರ್ಮಲ್ಯ	70	203.3	146.4
4	ಸಂಪರ್ಕ	14	274.0	77.2
5	ಸಾಮಾಜಿಕ ಮತ್ತು ವಾಣಿಜ್ಯ	58	72.3	15.6
6	ಇತರರು	143	190.9	64.0
	ಒಟ್ಟು	1392	3510.9	1901.2

 

*****

(रिलीज़ आईडी: 2220546) आगंतुक पटल : 9