آلودگی پر قابو پانے کے بنیادی ڈھانچے کو مضبوط بنانے اور پائیدار صنعتی ترقی کو فروغ دینے کی سمت میں ایک اہم قدم اٹھاتے ہوئے ماحولیات ، جنگلات اور آب و ہوا میں تبدیلی کی وزارت (ایم او ای ایف سی سی) نے کامن ایفلوئنٹ ٹریٹمنٹ پلانٹس (سی ای ٹی پیز) کو کنٹرول کرنے والے ریگولیٹری فریم ورک کو معقول بنایا ہے۔  اس اصلاح کا مقصد صنعتی کلسٹروں میں سی ای ٹی پیز کے قیام کو تیز کرنا ہے ، نیز اس بات کو یقینی بنانا ہے کہ ماحولیاتی تحفظات اور ریگولیٹری نگرانی پر کوئی سمجھوتہ نہ کیا جائے ۔

سی ای ٹی پی آلودگی کو کم کرنے کی اجتماعی سہولیات ہیں جو صنعتوں کے کلسٹرز ، خاص طور پر چھوٹے اور درمیانے درجے کے کاروباری اداروں کے ذریعہ پیدا ہونے والے صنعتی کچرے ٹریٹ کرتی ہیں جنہیں انفرادی ٹریٹمنٹ کے نظام کے قیام میں تکنیکی یا مالی رکاوٹوں کا سامنا کرنا پڑ سکتا ہے ۔

یہ سہولیات مرکزی ٹریٹمنٹ، سائنسی انتظام اور صنعتی فضلہ کی موثر نگرانی کو فعال کرکے آلودگی کو کم کرنے کے لیے ڈیزائن کی گئی ہیں اور خود آلودگی کے ذرائع نہیں ہیں ۔ آلودگی کی روک تھام کے مرکزی بورڈ (سی پی سی بی) نے سی ای ٹی پیز کو بلیو کیٹیگری آف انڈسٹریز کے تحت ضروری ماحولیاتی خدمات کے طور پر درجہ بند کیا ہے جنہیں ماحولیاتی تحفظ کے لیے فروغ دینے کی ضرورت ہے ۔

اصلاح کی ضرورت

اس وقت ملک میں سی ای ٹی پیز کی تعداد اور صلاحیت صنعتی کلسٹروں کی توسیع سے پیدا ہونے والے اخراج کو سنبھالنے کے لیے درکار مقدار سے کافی کم ہے ۔  سی ای ٹی پیز کے قیام میں تاخیر کے نتیجے میں غیر ٹریٹ شدہ اور کم ٹریٹ شدہ اخراج  ماحولیاتی نظام میں داخل ہوجاتا ہے۔

وزارت کی ماہرین کی کمیٹیوں کی طرف سے تفصیلی جانچ پڑتال کے بعد ، یہ مشاہدہ کیا گیا کہ سی ای ٹی پیز پہلے سے ہی آلودگی پر قابو پانے کے موجودہ قوانین کے تحت جامع ضابطوں کے تابع ہیں ، جن میں کنسینٹ ٹو اسٹیبلش (سی ٹی ای) اور کنسینٹ ٹو آپریٹ (سی ٹی او) وقتا فوقتا معائنہ ، مسلسل آن لائن نگرانی اور قانونی رپورٹنگ کی ضروریات شامل ہیں۔  اس تناظر میں، پہلے سے ماحولیاتی منظوری کی ضرورت کو دوہرا پایا گیا ، جس کے نتیجے میں طریقۂ کار کی پیچیدگی میں اضافہ ہوا اور تاخیر بھی ہوئی۔

لہذا ، وزارت نے سی ای ٹی پیز کو ماحولیاتی تحفظات کے نفاذ اور یکساں رضامندی کے رہنما خطوط کے ساتھ ساتھ سی ای ٹی پی اور اس کے انتظام اور کارروائیوں کے معیارات کو کنٹرول کرنے والے ماحولیاتی (تحفظ) ضوابط کی پابندی کے تابع ماحولیاتی منظوری کی ضرورت سے مستثنی قرار دیا ہے جو یکم ستمبر 2025 کو نافذ ہوا تھا ۔   اس اصلاح کا مقصد سی ای ٹی پیز کی تیزی سے تخلیق میں مدد کرنا ہے، نیزتعمیل کو مضبوط کرنا اور ماحولیاتی نتائج کو بہتر بنانا ہے۔

غیر مرتکز ضابطہ کاری کے ذریعے مضبوط حفاظتی اقدامات

نظرثانی شدہ فریم ورک کے تحت، سی ای ٹی پیز بدستور ریاستی آلودگی کنٹرول بورڈز )ایس پی سی بیز) اور آلودگی کنٹرول کمیٹیوں (پی سی سیز) کے ذریعے سخت ضابطہ جاتی نگرانی میں رہیں گے۔ یہ نگرانی آبی آلودگی (روک تھام و کنٹرول) ایکٹ، 1974 اور فضائی آلودگی (روک تھام و کنٹرول) ایکٹ، 1981 کے تحت عمل میں لائی جائے گی۔

اس اصلاح کے ساتھ اضافی اور مضبوط حفاظتی اقدامات بھی نافذ کیے گئے ہیں، جن میں فضلے کے پانی کی ترسیل صرف بند پائپ لائن نظام کے ذریعے لازمی قرار دینا، ٹریٹ کیے گئے فضلے کے پانی کے زرعی مقاصد کے لیے استعمال پر پابندی اور مسلسل آن لائن نگرانی شامل ہے، جس میں حقیقی وقت میں ڈیٹا کی ترسیل مرکزی آلودگی کنٹرول بورڈ (سی پی سی بی) اور ریاستی آلودگی کنٹرول بورڈز کے سرورز سے منسلک ہوگی۔ یہ اقدامات کچرے کے مقام کا پتہ لگانے کو یقینی بناتے ہیں، غیر قانونی اخراج کو روکتے ہیں اور مسلسل ضابطہ جاتی نگرانی کو ممکن بناتے ہیں، جس کے ذریعے ماحولیاتی اور عوامی صحت کے مفادات کا مکمل تحفظ کیا جاتا ہے۔

ماہرین کی رہنمائی اور مشاورتی عمل

یہ فیصلہ ماہرین کی قیادت میں ایک جامع اور مشاورتی عمل کے بعد کیا گیا ہے۔ مسودہ نوٹیفکیشن کو 60 دن کے لیے عوامی مشاورت کے لیے پیش کیا گیا اور اس دوران موصول ہونے والی تمام اسٹیک ہولڈرز کی آرا اور تجاویز کا بغور جائزہ لے کر حتمی شکل دی گئی۔ نظرثانی شدہ دفعات کا اطلاق آئندہ کے لیے ہوگا۔

ماحولیاتی اور حکمرانی سے متعلق فوائد

سی ای ٹی پیزکے تیز تر قیام کو ممکن بنا کر، توقع ہے کہ اس اصلاح سے ٹریٹمنٹ کی مجموعی صلاحیت میں اضافہ ہوگا، صنعتی کلسٹرز میں ضابطہ جاتی تعمیل بہتر ہوگی اور ٹریٹ شدہ فضلے کے پانی کے منظم صنعتی استعمال کے ذریعے پانی کے تحفظ کو فروغ ملے گا۔ مرکزی سطح پر ٹریٹمنٹ کے نظام سے مؤثر نگرانی اور پیشہ ورانہ آپریشن ممکن ہوگا، جس کے نتیجے میں بہتر ماحولیاتی نتائج حاصل ہوں گے۔

اس اصلاح کے ذریعے حکومت پائیدار ترقی، متناسب ضابطہ کاری اور ماحولیاتی قوانین کی خلاف ورزی کے خلاف زیرو ٹالرنس کے اپنے عزم کا اعادہ کرتی ہے۔ ماحولیات، جنگلات اور آب و ہوا میں تبدیلی  کی وزارت ماحولیاتی معیار اور عوامی صحت کے تحفظ کے لیے پوری طرح پرعزم ہے، ساتھ ہی اس بات کو بھی یقینی بنایا جا رہا ہے کہ ضابطہ جاتی عمل مؤثر، خطرات پر مبنی اور نتائج پر مرکوز ہوں۔

ماحولیاتی اثرات کے تخمینے (ای آئی اے) نوٹیفکیشن، 2006 کے تحت کامن ایفلوئنٹ ٹریٹمنٹ پلانٹس کو ماحولیاتی منظوری سے استثنا

https://egazette.gov.in/(S(xdpf55qwoxtnnwkqvmffeyba))/ViewPDF.aspx

*****

UR-1199

(ش ح۔  ک ح ۔ت ا)

(रिलीज़ आईडी: 2219732) आगंतुक पटल : 8