ঐহাক্কী নুংশিরবা ইরৈচাশিং,

নমস্কার!

ঐখোয়, ভারতকী মীয়াম্না, য়ুমদা অমসুং মপানগী লৈবাকশিংদা, রিপব্লিক দে অসি থৌনা ফনা পাংথোক্কনি। ঐহাক্না নখোয় পুম্নমকপু মসিগী লৈবাক্কী কুহ্মৈ অসিদা নুংঙাইবা ফোংদোকচরি।

রিপব্লিক দেগী য়াইফরবা তাঞ্জা অসিনা ঐখোয়গী লৈবাক অসিগী মমাংঙৈ, হৌজিক অমসুং তুংলমচৎকী থাক অমসুং মায়কৈদা মমি তাহনবা খুদোংচাবা অমা পীরি। ঐখোয়গী নীংতম ইহৌগী মপাঙ্গলনা ইং ১৯৪৭গী ওগস্ত ১৫দা ঐখোয়গী লৈবাক্কী থাক অসি হোংদোকখি। ভারতনা নীংতম্বা ফংখি। ঐখোয়না ঐখোয়গী নেস্নেল দেস্তিনিগী আর্কিতেক্ত ওইখি।

জনুৱারী ২৬, ১৯৫০দগী হৌরগা ঐখোয়না ঐখোয়গী রিপব্লিক অসিবু ঐখোয়গী কন্সতিত্যুস্নেল আইদিএলশিংগী মায়কৈদা পুখৎলক্লি। নুমিৎ অদুদা ঐখোয়গী সংবিধান অসি মপুং ফানা চৎনহনখি। দেমোক্রেসীগী হৌরকফম ওইরিবা ভারত অসি দোমিনিয়ন সিস্তেমগী চিংনবদগী লাপথোকখি, অমসুং ঐখোয়গী দেমোক্রেসী রিপব্লিক অসি লৈরকখি।

ঐখোয়গী সংবিধান অসি মালেমগী পুৱারীদা খ্বাইদগী চাউবা রিপব্লিক্কী য়ুম্ফম ওইরবা দোক্যুমেন্তনি। ঐখোয়গী সংবিধানদা য়াওরিবা জস্তিস, লিবর্তী, ইক্বেলিতী অমসুং ফ্রেতর্নিতীগী ৱাখল্লোনশিংনা ঐখোয়গী রিপব্লিক অসিবু মশক তাক্লি। সংবিধান শেমখিবশিংনা সংবিধানগী প্রোভিজনশিংগী খুত্থাংদা নেস্নেলিজমগী স্পিরিৎ অমসুং লৈবাক অসিগী অপুনবগীদমক মপাঙ্গল কনবা য়ুম্ফম অমা পীখি।

লোহ পুরুশ, সর্দার বল্লভভাই পতেলনা ঐখোয়গী লৈবাক অসিবু অমত্তা ওইনা পুন্সিনখি। হৌখিবা চহিগী ওক্তোবর ৩১দা, থাগৎনিংঙাই ওইবা লৈবাক অমনা মহাক্কী ১৫০শুবা মপোক কুমওন থৌনা ফনা পাংথোকখি। মহাক্কী ১৫০শুবা জয়ন্তীগা মরী লৈনবা নীংশিং থৌরমশিং পাংথোক্লি। থৌরমশিং অসিনা মীয়ামগী মরক্তা লৈবাক্কী অপুনবা অমসুং চাউথোকচবগী ৱাখল্লোনবু মপাঙ্গল কনখৎহল্লি। অৱাং থংবা অমসুং খা থংবা অমসুং নোংপোক থংবা অমসুং নোংচুপ থংবা, ঐখোয়গী অরিবা মতমগী নাৎকী অমত্তা ওইবগী ফেব্রিক অসি ঐখোয়গী মমা-মপাশিংনা শেমগৎখি। অমত্তা ওইবগী ৱাখল্লোন অসিবু য়োকখৎনবা হোৎনরিবা পুম্নমক থাগৎনিংঙাইনি।

মমাং চহিগী নবেম্বর ৭দগী হৌদুনা ঐখোয়গী লৈবাক্কী ঈশৈ 'বন্দে মাতরম' পুথোকখিবা চহি ১৫০ মপুং ফারকপগী থৌরমশিংসু পাংথোক্লি। ভারত মাতাগী লাইগী মওং-মতৌদা ইকায় খুম্নবা উৎলিবা ঈশৈ অসিনা ভারত মচা খুদিংমক্তা লৈবাক নীংবগী ৱাখল্লোন পোকহল্লি। অচৌবা নেস্নেলিস্ত কবি সুব্রামনিয়া ভারতিনা তমিল লোলদা "বন্দে মাতরাম য়েনবোম" কৌবা ঈশৈ অসি ইখি, মসিগী ৱাহনথোক্তি "বন্দে মাতরাম" হায়বনি, অমসুং মসিনা মীয়াম্বু বন্দে মাতরামগী স্পিরিৎকা হেন্না চাউনা শম্নহনখি। ঈশৈ অসি অতোপ্পা ভারতকী লোলশিংদা হন্দোকপা অসিসু মীয়াম্না পাম্নখি। শ্রী ঔরোবিন্দোনা ঈশৈ অসিবু ইংলিসতা হন্দোকখি। ইকায় খুম্ননীংঙাই ওইরবা বঙ্কিম চন্দ্র চত্তোপাধ্যায়না ইবা 'বন্দে মাতরাম' অসি ঐখোয়গী লৈবাক্কী লাইনিং লাইশোননি।

নুমিৎ নিনিগী মমাংদা, জনুৱারী ২৩দা, নেতাজী সুভাস চন্দ্র বোসকী মপোক কুমওন্দা লৈবাক অসিনা মহাক্কী মফমদা ইকায় খুম্নবা উৎখি। ২০২১দগী হৌনা নেতাজীগী জয়ন্তী অসি 'পরাক্রম দিবস' হায়না পাংথোক্লি। মসিনা মরম ওইদুনা মীয়াম্না, মরু ওইনা নহারোলশিংনা, মহাক্কী পেত্রিওতিজমদগী ইথিল লৌবা ঙমগনি। নেতাজীগী স্লোগান 'জয় হিন্দ' অসি ঐখোয়গী লৈবাক্কী চাউথোকচবনি।

 

 

নুংশিরবা ইরৈবাকচাশিং,

অদোম পুম্নমক্না ঐখোয়গী মঙাল নাইবা রিপব্লিক অসিবু মপাঙ্গল কনখৎহল্লি। ঐখোয়গী আর্মদ ফোর্স অহুমগী থৌনা ফরবা লান্মীশিংনা ঐখোয়গী লমদম অসিবু ঙাক-শেনবদা মতম পুম্নমক্তা চেকশিন্না লৈরি। পুলিস অমসুং সেন্ত্রেল আর্মদ পুলিস ফোর্সেসতা লৈরিবা ঐখোয়গী অচেৎপা মীওইশিংনা মীয়ামগী মনুংগী ঙাকশেলগীদমক লেপ্পা লৈতনা অমসুং থৱায় য়াওনা থবক তৌরি। ঐখোয়গী লৌমীশিংনা মীয়ামগীদমক চিঞ্জাক পুথোক্নবা কন্না হোৎনরি। ঐখোয়গী লৈবাক অসিগী লম্বী শেম্বা অমসুং হৈথোই-শিংথোইরবা নুপীশিংনা হীরম কয়াদা অনৌবা থাকশিং শেমগৎলি। ঐখোয়গী হৈথোই-শিংথোইরবা দোক্তরশিং, নর্সশিং অমসুং হেল্থকেয়র ৱার্কর পুম্নমক্না মীয়ামগী হকশেলগীদমক্তা অখন্নবা মীৎয়েং থম্লি। ঐখোয়গী লৈবাক অসিদা শেল-থুমগী ফিভম ফনা লৈহন্নবা হোৎনবদা ঐখোয়গী অচেৎপা সেনিতেসন ৱার্করশিংনা অচৌবা থৌদাং অমা লৌরি। ঐখোয়গী লাইরিক তাকপীরিবা ওজাশিংনা তুংগী চারোন-শুরোনশিং শেমগৎলি। ঐখোয়গী মালেমগী থাক্কী সাইন্তিস্তশিং অমসুং ইঞ্জিনীয়রশিংনা লৈবাক অসিগী চাউখৎপদা অনৌবা মায়কৈ অমা পীরি। ঐখোয়গী থৌনা ফরবা শিন্মীশিংনা লৈবাক অসিবু অমুক হন্না শেমগৎলি। মখোয়গী হৈ-শিংবা অমসুং থৌদাংগা লোইননা, ঐখোয়গী থাজনিংঙাই ওইরবা নহাশিং অমসুং অঙাংশিংনা ঐখোয়গী লৈবাক্কী চাউরবা তুংলমচৎকী থাজবা অসি মপাঙ্গল কনখৎহল্লি। ঐখোয়গী হৈথোই-শিংথোইরবা আর্তিস্তশিং অমসুং অইবশিংনা ঐখোয়গী মরাং কায়রবা ত্রেদিসনশিংদা মোদর্ন এক্সপ্রেসন পীরি। তোঙান তোঙানবা লমশিংগী এক্সপর্তশিংনা লৈবাক অসিগী মল্তি-ফেসেতেদ দিবেলপমেন্ত লমজিংলি। ঐখোয়গী থৌনা ফরবা ইন্ত্রপ্রিনরশিংনা লৈবাক অসিবু চাউখৎপা অমসুং মশা-মরোমদোম লেপচবা ওইহনবদা চাউনা মতেং পাংলি। খুন্নাইগীদমক্তা ইশাগীদমক্তা কৎথোক্তুনা থবক তৌরিবা মীওইশিং অমসুং ইন্সতিত্যুসনশিংনা মখোয়গী থবকশিংনা মশিং থিঙমদ্রবা মীওই কয়াগী পুন্সিদা মঙাল অমা পীরি। লৈঙাক্কী অমসুং নন-গবর্নমেন্ত সেক্তরদা থবক তৌরিবা মীপুম খুদিংমক্না, মখোয়গী মথৌশিং নিংথিনা অমসুং ইফিসেন্ত ওইনা পাংথোক্তুনা লৈবাক শেমগৎপদা মতেং পাংলি। পব্লিক সর্ভিসতা থাজবা থমদুনা মীয়ামগী মীহুৎশিংনা মীয়ামগী অপাম্বগা চুনবা য়াইফ-থৌরাং অমসুং চাউখৎ-থৌরাংগী পান্দমশিং ফংবদা মতেং পাংলি। অসুম্না, মঙলান খঙলবা অমসুং ৱাখল লৈরবা নাগরিক খুদিংমক্না ঐখোয়গী রিপব্লিক্কী খুমাং চাউশিলহন্নবা হোৎনরি। ঐহাক্না ঐখোয়গী রিপব্লিক অসিবু মপাঙ্গল কনখৎহন্নবা হোৎনরিবা ঐখোয়গী নাগরিক পুম্নমকপু থাগৎপা ফোংদোকচরি। মপান লৈবাক্তা লৈরিবা ভারত মচাশিংনা মালেমগী থাক্তা ঐখোয়গী রিপব্লিক্কী ইমেজদা মগুন লৈহল্লি। ঐনা মখোয়দা ঐগী অখন্নবা থাগৎপা ফোংদোকচরি।

নুংশিরবা ইরৈবাকচাশিং,

ঙসি, জনুৱারীগী ২৫ অসি ঐখোয়গী লৈবাক অসিদা 'নেস্নেল ভোতরস দে' হায়না পাংথোক্লি। ঐখোয়গী অহল ওইরবা নাগরিকশিংনা মখোয়গী মীহুৎশিং খনবগীদমক্তা পুক্নিং থৌগৎনা ভোট থাদখি। বাবাসাহেব দোক্তরনা ভোৎ থাদনবগী হক শীজিন্নবনা রাজনিতীগী ওইবা এজুকেসন ফংহল্লি হায়না ভীমরাও অম্বেদকরনা থাজরম্মি। বাবাসাহেবকী মিৎয়েংগা চুনবা ঐখোয়গী ভোটরশিংনা মখোয়গী রাজনিতীগী ওইবা এৱারনেস উৎলি। নুপীশিংনা ভোৎ থাদবদা শরুক য়াবগী চাং হেনগৎলকপনা ঐখোয়গী রিপব্লিকপু মপাঙ্গল কনবা মওংদা হেনগৎহল্লি।

লৈবাক অমা চাউখৎনবগীদমক নুপীশিংগী থৌনা ফবা অমসুং শক্তি লৈরবা শরুক য়াবা অসি য়াম্না মরু ওই। মখোয়গী হকশেল, এজুকেসন, সেফতী অমসুং ইকোনোমিক এম্পাৱরমেন্তকী মায়কৈদা নেস্নেল ইথিলনা লম কয়াদা নুপীশিংগী শরুক য়াবা হেনগৎহনখ্রে। 'বেতি বচাও, বেতি পরহাও' কেম্পেননা নুপীমচাশিংগী মহৈ তম্বদা পুক্নিং থৌগৎলি। 'প্রধান মন্ত্রী জন ধন য়োজনা'গী মখাদা হৌজিক ফাওবদা বেঙ্ক একাউন্ত করোর ৫৭ হেন্না হাংদোকখ্রে। হায়রিবা একাউন্তশিং অসিগী চাদা ৫৬ রোমদি নুপীশিংনা চল্লি।

ঐখোয়গী নুপীশিংনা ত্রেদিস্নেল স্তেরিওতাইপশিং থুগাইদুনা মাংলোমদা চংশিল্লি। মখোয়না লৈবাক অসিগী অপুনবা চাউখৎ-থৌরাংদা থৌনা লৈনা মতেং পাংলি। সেল্ফ হেল্প গ্রুপশিংগা মরী লৈনবা নুপী করোর ১০ হেনবনা চাউখৎ থৌরাংগী থৌওংবু নৌনা মশক তাক্লি। লৌউ-শিংউদগী হৌরগা স্পেস ফাওবা, মশাগী ওইবা থবক পায়বা অমসুং আর্ম ফোর্সেস ফাওবা লম খুদিংমক্তা নুপীশিংনা মখোয়গী মমীং লৈহল্লি। শান্ন-খোৎনবগী লমদা ঐখোয়গী নুপীমচাশিংনা মালেমগী থাক্তা অনৌবা থাকশিং লিংখৎলি। হৌখিবা চহিগী নবেম্বরদা, ভারতকী নুপীমচাশিংনা আই.সি.সি. ৱিমেন্স ক্রিকেৎ ৱার্ল্দ কপ অমসুং তুংদা ব্লাইন্দ ৱিমেন্স তি.২০ ৱার্ল্দ কপ মায় পাকতুনা শান্ন-খোৎনবগী পুৱারীদা অশেংবা চেপ্তর অমা ইখি। হৌখিবা চহিদা, চেস ৱার্ল্দ কপকী ফাইনেল মেটচ অসি ভারতকী নুপী অনিগী মরক্তা শান্নখি। অসিগুম্বা খুদমশিং অসি স্পোর্তসকী মালেমদা ভারতকী মচানুপীশিংনা পায়খৎলিবা থবকশিংগী খুদম্নি। লৈবাক অসিগী মীয়াম্না মখোয়বু চাউথোকচরি।

পঞ্চায়তী রাজ ইন্সতিত্যুসনশিংদা নুপীগী মীহুৎ মশিং অসি চাদা ৪৬ রোমনি। নুপীশিংগী রাজনিতীগী ওইবা শক্তি হেনগৎহন্নবা পান্দম থম্লিবা 'নারী শক্তি বন্দন আদিনিয়ম' অসিনা নুপীশিংনা লুচিংবা চাউখৎপগী ৱাখল্লোন অসিদা মমাংদা অমুক্তা ওইখিদ্রিবা মপাঙ্গল অমা পীরগনি। বিক্সিত ভারত শেমগৎপদা নারী শক্তিগী থৌদাং অসি য়াম্না মরু ওইগনি। নুপীশিংনা শরুক য়াবা হেনগৎলকপগা লোয়ননা, ঐখোয়গী লৈবাক অসিনা জেন্দর ইক্বেলিতিদা য়ুম্ফম ওইবা ইনক্লুসিব রিপব্লিক্কী খুদম অমা ওইগনি।

ইনক্লুসিব এপ্রোচ অমগা লোইননা, শোত্থরবা সেগমেন্তশিংগী য়াইফনবা অমসুং চাউখৎনবগীদমক স্কিম কয়া অমা পায়খৎলি। হৌখিবা চহিগী নবেম্বর ১৫দা, ঐখোয়গী লৈবাক অসিগী মীয়াম্না ধর্তি আবা ভগবান বির্সা মুন্দাগী মপোক কুমওন্দা মঙাশুবা জনজাতি গৌরব দিবস পাংথোকখি। 'আদি কর্ময়োগী' কেম্পেনগী খুত্থাংদা ত্রাইবেল কম্ম্যুনিতীগী মীশিংগী লুচিংবগী ওইথোকপা য়াবশিং অদু ফগৎহনখ্রে। হৌখিবা চহিশিংদা, লৈবাক অসিগী মীয়ামদা ত্রাইবেল কম্ম্যুনিতীগী শিংথানিংঙাই ওইবা পুৱারী খঙহন্নবা সরকারনা ম্যুজিয়মশিং শাগৎপা য়াওনা খোঙথাং কয়া অমা লৌখৎখ্রে। মখোয়গী য়াইফ-থৌরাং অমসুং চাউখৎ-থৌরাংবু অৱাংবা থাক্তা থম্লি। 'নেস্নেল সিকল সেল এনিমিয়া ইলিমিনেসন মিসন'গী মখাদা হৌজিক ফাওবদা স্ক্রিনিং করোর ৬ হেন্না পাংথোকখ্রে। একলব্য মোদেল রেসিদেন্সিএল স্কুলশিংদা চাউরাক্না মহৈরোই লাখ অমা অমসুং লিশিং মরিরোমনা মহৈ তম্বা ফংলি অমসুং মহৈরোই কয়া অমনা কম্পিতিতিব একজামিনেসনশিংদা অখন্নবা মওংদা থবক তৌরি। হকশেল অমসুং এজুকেসনগী অসিগুম্বা কেম্পেনশিংনা ত্রাইবেল কম্ম্যুনিতীশিংগী মরক্তা ত্রেদিসন অমসুং মোদর্ন দিবেলপমেন্তগী মরক্তা হার্মোনি অমা পুরক্নবা হোৎনরি। 'ধর্তি আবা জনজাতিয়া গ্রাম উতকারশ অভিয়ান' অমসুং 'পি.এম.-জনমান য়োজনা'না পি.ভি.তি.জি. খুন্নাই য়াওনা মপাঙ্গল হাপ্লি।

ঐখোয়গী অন্নদাতাগী লৌমীশিং অসি ঐখোয়গী খুন্নাই অমসুং শেন্মিৎলোনগী য়ুম্ফম্নি। কন্না হোৎনরিবা লৌমীশিংগী মীরোল কয়া অমনা ঐখোয়গী লৈবাক অসিবু চান-থক্নবা শঙ্গোমদা মশা-মরোমদোম লেপচবা ঙমহল্লে। ঐখোয়গী লৌমীশিংনা য়াম্না কন্না হোৎনবনা মরম ওইদুনা ঐখোয়না লৌউ-শিংউগী পোত্থোকশিং মপাল লমদা থাদোকপা ঙম্মী। লৌমী কয়ানা মাই পাকপগী মতিক চাবা খুদম কয়া অমা উৎখ্রে। ঐখোয়গী লৌমীশিংনা মখোয়গী পোত্থোকশিংগীদমক অচুম্বা মমল ফংহনবা, হন্থবা শেন্দোইদা লোন ফংহনবা, ইফেক্টিভ ওইবা ইন্সুরেন্স কভরেজ, অফবা ক্বালিতীগী মরু, ইরিগেসন ফেসিলিতীশিং, পোত্থোক হেনগৎহন্নবা ফর্তিলাইজরশিং, মোদর্ন এগ্রিকলচরগী থবকশিংদা খুদোংচাবা ফংহনবা অমসুং ওর্গানিক ফার্মিংবু পুক্নিং থৌগৎপদা অখন্নবা মীৎয়েং থম্লি। 'পি.এম. কিসান সম্মান নিধি' অসি ঐখোয়গী লৌমীশিংগী থৌদাংবু ইকাই খুম্নবা উৎলি অমসুং মখোয়গী হোৎনরিবশিংবু মপাঙ্গল কনখৎহল্লি।

চহী তরাগী খুজিং কয়াদগী লায়রবা ওইদুনা লাক্লবা ঐখোয়গী মীওই মিলিয়ন কয়া অমা লাইরবদগী লান্থোকখ্রে। মখোয়বু লায়রবগী মফমদা অমুক হন্না তাশিনদনবা হোৎনরি। অন্টোদাইয়াগী ৱাখল্লোনবু মশক তাক্লিবা মালেমগী খ্বাইদগী চাউবা স্কিম ওইরিবা পি.এম. গরীব কল্যান অন্ন য়োজনা অসি মীওই করোর ১৪০ হেনবগী লৈবাক অসিদা কনা অমত্তনা চরা হেল্লোই হায়বা ৱাখল্লোনদা য়ুম্ফম ওইরি। স্কিম অসিনা কান্নবা ফংলবা মীওই করোর ৮১ রোমদা মতেং পাংলি। লাইরবা ইমুংশিংগীদমক মৈ, ঈশিং অমসুং তোইলেৎকী খুদোংচাবশিং য়াওবা পুখ্রি করোর ৪ হেন্না শাদুনা মখোয়দা মগুন লৈবা পুন্সি অমা হিংনবগী অমসুং হেন্না চাউখৎনবগী য়ুম্ফম অমা পীরি। লায়রবশিংগী য়াইফনবা অসিগুম্বা হোৎনরিবশিং অসিনা মহাত্মা গান্ধীগী সরবোদয়গী ৱাখল্লোনবু ময়েক শেংহল্লি।

ঐখোয়গী লৈবাক অসিদা মালেমদা খ্বাইদগী চাউবা নহা ওইরিবা মীশিং লৈ। ঐখোয়গী নহাশিংনা য়াম্না হৈথোই-শিংথোইবা হৈশিংবশিং লৈজবসি ঐখোয়দা অখন্নবা চাউথোকচবা পোকহল্লি। ঐখোয়গী নহা ওইরিবা ইন্ত্রপ্রিনরশিং, শান্নরোইশিং, সাইন্তিস্তশিং অমসুং প্রোফেস্নেলশিংনা লৈবাক অসিদা অনৌবা ইনর্জী পীরি অমসুং মালেমগী থাক্তা মখোয়গী মমীং লৈহল্লি। ঙসিদি, ঐখোয়গী নহা কয়ানা মশাগী থবক পায়খৎতুনা মায় পাকপগী মশক থোকপা খুদম কয়া অমা উৎলি। ঐখোয়গী নহারোলশিং অসি ঐখোয়গী লৈবাক্কী চাউখৎ থৌরাংগী খোঙচৎকী ফ্লেগ বিয়াররশিংনি। মেরা য়ুভা ভারত নৎত্রগা এমৱাই ভারতনা নহা ওইরিবা নাগরিকশিংবু লুচিংবা অমসুং স্কিল দিবেলপমেন্ত য়াওনা হিরম কয়াদা খুদোংচাবশিংগা শম্নহন্নবা তেক্নোলোজীদা য়ুম্ফম ওইবা এক্সপরিয়েন্সেল লর্নিং মেকানিজম অমা পীরি। ঐখোয়গী লৈবাক অসিদা স্তার্ত-অপশিংনা মায় পাকপগী মশক অদু ঐখোয়গী নহা ওইরিবা এন্ত্রিপ্রেন্যুওরশিংনা মরুওইনা পুথোক্লি। নহা ওইরিবা মীরোলগী অপাম্বশিংদা মীৎয়েং থম্লিবা পোলিসীশিং অমসুং প্রোগ্রামশিংগী খুত্থাংদা লৈবাক অসিগী চাউখৎপা অসি খুমাং চাউশিল্লগনি। ঐহাক্না থাজবা থম্লি মদুদি ২০৪৭ ফাওবদা বিক্সিত ভারত শেমগৎপদা নহারোলশিংগী শক্তিনা মরুওইবা থৌদাং লৌগনি।

নুংশিরবা ইরৈবাকচাশিং,

ভারত অসি মালেমগী খ্বাইদগী য়াঙনা চাউখৎলক্লিবা মরুওইবা ইকোনোমী অমনি। মালেমগী ওইবা অপনবা লৈরবসু, ভারতনা লেপ্তনা শেন্মিৎলোন চাউখৎলক্লি। অঙকপা তুংলমচৎতা মালেমগী অহুমশুবা খ্বাইদগী চাউবা ইকোনোমী ওইনবা ঐখোয়না পান্দম থম্লিবা অসি ফংনবগী মায়কৈদা ঐখোয়না চংশিল্লি।

মালেমগী থাক্কী ইনফ্রাস্ত্রকচর শেমগৎপদা শেন থাদদুনা, ঐখোয়না ঐখোয়গী শেন্মিৎলোনগী মপাঙ্গল অসি হেন্না চাউনা অমুক হন্না শেমগৎলি। ঐখোয়গী শেন্মিৎলোনগী তঞ্জা শেম্বগী খোঙচৎ অসিদা, অত্মা-নির্ভরতা অমসুং স্বদেশী অসি ঐখোয়গী লমজিং-লমতাক্লিবা ৱাখল্লোনশিংনি।

নীংতম্বগী মতুংদা লৈবাক্কী শেন্মিৎলোনগী ইন্তিগ্রেসনগীদমক লৌখিবা খ্বাইদগী মরু ওইবা ৱারেপ, জি.এস.তি. জি.এস.তি. সিস্তেম অসি হেন্না ইফেক্তিব ওইহন্নবা লৌখিবা অথুবা মতমদা লৌখিবা ৱারেপশিংনা ঐখোয়গী শেন্মিৎলোনবু হেন্না মপাঙ্গল কনখৎহল্লগনি। লেবর রিফোর্মশিংগী লমদা লেবর কোদ মরি থোকখ্রে। মসিনা ঐখোয়গী শিন্মীশিংদা কান্নবা ফংহনগনি অমসুং ইন্তর্প্রাইজেসকী চাউখৎপা য়াহল্লগনি।

নুংশিরবা ইরৈবাকচাশিং,

ঙল্লিঙৈ মতমদগী, মীওইবনা ঐখোয়গী সিভিলাইজেসন, কলচর অমসুং লাইনিংগী চৎনবীদগী কান্নবা ফংদুনা লাক্লি। অয়ুর্বেদা, য়োগ, অমসুং প্রাণায়াম অসি মালেমগী কম্ম্যুনিতীনা থাগৎপা ফোংদোক্লি অমসুং শিজিন্নরি। শক্নাইরবা মীওই কয়ানা ঐখোয়গী ৱাখল্লোনগী অমসুং খুন্নাইগী অমত্তা ওইবগী ত্রেক অসিবু লেপ্তনা চাউখৎহল্লি। কেরলাদা পোকখিবা শক্নাইরবা কবি, খুন্নাইগী রিফোর্মর অমসুং স্পিরিচুএল আইকোন শ্রী নরায়ণ গুরুনা হায়রম্মি মদুদি কাংলুপ অমসুং লাইনিং-লাইশোলদা য়ুম্ফম ওইবা খেৎনবা লৈতনা, মীওই খুদিংমক্না নুংশিনবগী ৱাখল্লোনগা লোয়ননা হিংমিন্নবা অসি অফবা মফম অমনি। শ্রী নরায়ন গুরুগী ৱাখল্লোন অসিবু মহাক্কী ৱাহৈদা ঐহাক্না ফোঙদোক্নবা হোৎনগনি:

জতি-বেদম মেত-দেৱশাম এদুম-ইলাদে সরভরুম

সোদরা-তভেনা ৱাদুন্না মাত্রুকা-স্তানা মনিতা।

ঙসিগী ভারতনা অনৌবা মশাগী থাজবগা লোয়ননা মাগী শিংথানীংঙাই ওইরবা চৎনবীশিংবু খঙদুনা মাংলোমদা চংশিল্লিবা অসি চাউথোকচনীংঙাইনি। হৌখিবা চহিশিংদা, ঐখোয়গী স্পিরিচুএল ত্রেদিসনগা মরী লৈনবা অশেংবা মফমশিং অসি মীয়ামগী ৱাখল্লোনগা অমুক্কা হন্না শম্নরক্লি।

মতমগী মতুং ইন্না কোলোনিএল মাইন্দসেৎকী অশিবা শরুকশিং মুত্থৎনবা ৱারেপ লৌখ্রে। ভারতকী লৌশিংগী চৎনবী অসি ফিলোসোফি, মেদিসিন, এস্ত্রোনোমী, মেথমেতিক্স, লিতরেচর অমসুং আর্তকী লমশিংদা চাউরবা লিগেসী অমা লৈরি। 'জ্ঞান ভারতম মিসন'গুম্বা থবকশিং অসিনা ভারতকী চৎনবীদা লৈরিবা ক্রিএতিবিতী অসি ঙাক-শেন্দুনা অমসুং শন্দোকপা ঙম্লিবা অসি চাউথোকচনিংঙাইনি। মসিগী মিসন অসিনা ভারতকী মমল য়াম্লবা লাইরিক লাখ কয়াগী মরক্তা লৈরিবা হেরিতেজ অসি হৌজিক মতমগী ওইবা মওংদা মখা তানা চৎথহল্লগনি। ভারতকী লোলশিং অমসুং ভারতকী লৌশিং-গ্যানগী চৎনবীদা মরুওইবা পীদুনা, ঐখোয়না মশা-মরোমদোম লেপচবা ঙম্নবা হোৎনবদা কলচরেল ওইবা য়ুম্ফম অমা পীরি।

হৌজিক্তি ভারতকী সংবিধান অসি নিপানশুবা সেদ্যুলদা য়াওরিবা ভারতকী লোন খুদিংমক্তা ফংলে। ভারতকী লোলশিংদা সংবিধান অসি ইবা অমসুং খঙবা অসিনা মীয়ামগী মরক্তা সংবিধানগী ওইবা নেস্নেলিজম শন্দোক্কনি অমসুং মখোয়গী চাউথোকচবগী ইথিল অদু মপাঙ্গল কনখৎহল্লগনি।

সরকার অমসুং মীয়ামগী মরক্তা লৈরিবা খেন্নবা অসি লেপ্তনা হন্থরক্লি। ম্যুচেল ত্রস্ততা য়ুম্ফম ওইবা অফবা লৈঙাক্লোনদা মরুওইবা পীরি। দরকার লৈতবা কাংলোন কয়া অমা লৌথোকখ্রে, কমপ্লাইএন্সকী মথৌ তাবা কয়া অমা লৌথোকখ্রে, অমসুং মীয়ামদা মতেং পাংনবা পথাপশিং অসি লাইথোকহনখ্রে। তেক্নোলোজীগী খুত্থাংদা কান্নবা ফংলবা মীওইশিং অসি খুদোংচাবশিং অসিগা হকথেংননা শম্নহল্লি। নুংতিগী পুন্সি মহিং ফগৎহন্নবগী পান্দমদা 'ইজ ওফ লিভিং'দা মিৎয়েং থম্লি।

হৌখিবা চহী তরা অসিদা মীয়ামগী শরুক য়াবগী খুত্থাংদা নেস্নেল গোলশিং ফংনবা হোৎনখি। মরু ওইবা নেস্নেল কেম্পেনশিংবু মাস মুভমেন্তশিংদা ওন্থোকখ্রে। খুঙ্গং অমসুং সহর খুদিংগী লোকেল ইন্সতিত্যুসনশিং অসি প্রোগ্রেসিভ ওইবা অহোংবা পুরক্নবা খুৎলাই ওইরে। বিক্সিত ভারত শেমগৎপা অসি নাগরিক খুদিংমক্কী অপুনবা থৌদাংনি। খুন্নাই অসিদা অচৌবা শক্তি লৈ। গবর্নমেন্তনা হোৎনরিবশিং অদুদা খুন্নাইনা অখন্ননা মতেং পাংবদগী রিভোলুস্নরী অহোংবশিং থোক্লকই। খুদম ওইনা, ঐখোয়গী মীয়াম্না দিজিতেল পেমেন্ত সিস্তেম অসি পাক শন্না শিজিন্নরে। ঙসিদি, মালেমগী দিজিতেল ত্রান্সসেক্সনশিংগী তংখাইদগী হেন্না ভারত্তা পাংথোক্লি। অপীকপা দুকানদা পোৎ-চৈশিং য়োনবদগী হৌরগা ওতো রিক্সাদা চৎপদা শেল থাদরকপা ফাওবদা, দিজিতেল পেমেন্ত শীজিন্নবা অসি মালেমগী কম্ম্যুনিতীগীদমক্তা চাউরবা খুদম অমা ওইরক্লি। নাগরিক পুম্নমক্না অতোপ্পা নেস্নেলগী পান্দমশিং অসি ফংনবা চপ মান্নবা মওংদা থৌদাং লৌগনি হায়না ঐনা থাজৈ ।

নুংশিরবা ইরৈবাকচাশিং,

হৌখিবা চহিদা, ঐখোয়গী লৈবাক অসিনা ওপরেসন সিন্দুরগী খুত্থাংদা তেরোরিস্ত ইনফ্রাস্ত্রকচরগী মায়োক্তা প্রিসিজন স্ত্রাইক হৌদোকখি। তেরোরিস্তশিংগী মফমশিং মাংহনখি, অমসুং তেরোরিস্ত কয়া অমা শিখি। দিফেন্সকী লমদা ঐখোয়গী মশা-মরোমদোম লেপচবা অসিনা ওপরেসন সিন্দোরগী পুৱারী ওইরবা মাইপাকপদা মতেং পাংখি।

সিয়াচেন বেজ কেম্পতা, ঐহাক্না ঐখোয়গী থৌনা ফরবা লান্মীশিংবু লৈবাক অসিবু ঙাকথোক্নবা মপুং ফানা শেম-শারিবা অমসুং পুক্নিং থৌগৎলিবা অদু উখি। ঐহাক্না ইন্দিয়ন এয়র ফোর্সকী সুখোই অমসুং রাফেল ফাইতর প্লেনশিংদা পাইবগী খুদোংচাবসু ফংখি। ঐনা এয়র ফোর্সকী লানগী শেম-শারিবা অদু উখি। ঐহাক্না ইন্দিয়ন নেভীগী লমদম অসিদা শাগৎপা এয়রক্রাফ কেরিয়র আই.এন.এস. বিক্রান্তকী অখন্নবা তৌবা ঙম্বশিং অদু উবা ফংখি। ঐহাক্না আই.এন.এস. ভাগশিরগী সবমেরিনদাসু থবক তৌখি। আর্মী, এয়র ফোর্স অমসুং নেভীগী মপাঙ্গলদা য়ুম্ফম ওইদুনা, মীয়াম্না ঐখোয়গী ঙাকশেলগী শেম-শারিবা অসিদা মপুং ফানা থাজবা থম্লি।

ঐহাক্কী নুংশিরবা ইরৈচাশিং,

ঙসিদি অকোয়বগী ফিভম ঙাক-শেন্নবা অসি খ্বাইদগী মরুওই। ভারতনা অকোয়বগী ফিভমগা মরী লৈনবা হীরম কয়াদা মালেমগী মীয়াম্বু লমজিংলিবা অসিদা ঐহাক চাউথোকচৈ। মহৌশাগী ফিভমগা চান্ননা হিংমিন্নবা অসি ভারতকী নাৎকী চৎনবীগী শরুক অমনি। অসিগুম্বা পুন্সি মহিং অসি মালেমগী মীয়ামদা ঐখোয়গী পাউজেলগী য়ুম্ফমনি:  “লাইফস্তাইল ফোর ইনভাইরনমেন্ত” নত্রগা “LiFE” । ইমা পৃথীবিগী মমল য়াম্লবা রিসোর্সশিং অসি তুংগী চারোন-শুরোনগীদমক্তা ফংহন্নবা ঐখোয়না হোৎনগদবনি।

ঐখোয়গী চৎনবীগী মতুং ইন্না, ঐখোয়না মালেম পুম্বদা শান্তি লৈহন্নবগীদমক্তা লাই খুরুমজরি। মীওইবা খুন্নাইগী তুংলমচৎ অসি মালেম পুম্বদা শান্তি লৈরবদি ঙাকশেল ফংগনি। মালেমগী শরুক কয়াদা চয়েৎনবা কয়া লৈরিঙৈদা, ভারতনা মালেমগী শান্তিগী পাউজেল শন্দোক্লি।

নুংশিরবা ইরৈবাকচাশিং,

ভারত ভুমিদা হিংলিবা অসি ঐখোয়গী চাউথোকচবনি। ঐখোয়গী ইমা লৈবাক্কী মতাংদা কবি গুরু রবীন্দ্রনাথ তেগোরনা হায়খি:

অমর দেশর মতি, তোমর পোর থেকাই মথা

মসিগী ৱাহন্থোক্তি:

ঐগী লৈবাক্কী লাইনিংথৌ ওইবা লৈহাও! ঐহাক্না অদোমগী নাকলদা ইকায় খুম্নবা উৎচরি।

ঐহাক্না থাজৈ মদুদি রিপব্লিক দে অসি লৈবাক নীংবগী মপাঙ্গল কনবা ৱাখল্লোন অসিবু হেন্না মপাঙ্গল কনখৎহন্নবা খুদোংচাবা অমনি। ঐখোয় পুম্নমক্না 'নেসন ফার্ষ্ট'গী ৱাখল্লোনগা লোয়ননা থবক তৌমিন্নসি অমসুং ঐখোয়গী রিপব্লিক অসিবু হেন্না শিংথানিংঙাই ওইহল্লসি।

ঐহাক্না অমুক্কা হন্না ময়াম পুম্নমকপু রিপব্লিক দেগী য়াইফ-পাউজেল পীজরি। নহাক্কী পুন্সি অসি নুংঙাইবা, শান্তি, ঙাকশেল অমসুং অপুনবগী মওংদা মপুং ফাহনগনি হায়না ঐহাক্না চেৎনা থাজৈ। ঐহাক্না অদোম পুম্নমক্তা অফবা তুংলমচৎ অমা ওইরসনু হায়জরি।

 

অদোমবু থাগৎচরি!

জয় হিন্দ!

জয় ভারত!

***

(रिलीज़ आईडी: 2219149) आगंतुक पटल : 5