چھٹا آسیان–بھارت ڈیجیٹل وزراء اجلاس (اے ڈی جی ایم آئی این) آج ورچوئل طور پر منعقد ہوا، جس میں آسیان رکن ممالک اور بھارت کے درمیان ڈیجیٹل شعبے میں تعاون کو مزید گہرا کرنے کے مشترکہ عزم کی توثیق کی گئی۔ اس اجلاس کی مشترکہ صدارت حکومتِ ہند کے محکمۂ ٹیلی مواصلات کے سکریٹری جناب امت اگروال اور ویت نام کے وزیرِ سائنس و ٹیکنالوجی جناب نگوین مانہ ہنگ نے کی۔

 

اے ڈی جی ایم آئی این ٹیلی کام اور ڈیجیٹل وزرا کا ایک سالانہ فورم ہے، جس میں آسیان کے 11 رکن ممالک—برونائی، کمبوڈیا، انڈونیشیا، لاؤ پی ڈی آر، ملائیشیا، میانمار، فلپائنز، سنگاپور، تھائی لینڈ، تیمور لیستے اور ویت نام—کے علاوہ آسیان کے مکالماتی شراکت دار بھی شامل ہوتے ہیں، جن میں آسٹریلیا، کینیڈا، چین، یورپی یونین، بھارت، جاپان، جمہوریہ کوریا، نیوزی لینڈ، روس، برطانیہ اور امریکہ شامل ہیں۔ اجلاس میں علاقائی ڈیجیٹل تعاون کو مضبوط بنانے سے متعلق اہم امور پر غور کیا گیا، جس میں ڈیجیٹل شمولیت اور انضمام پر خصوصی توجہ دی گئی۔

اجلاس میں 10 اکتوبر 2024 کو وینتیان، لاؤ پی ڈی آر میں منعقدہ 21ویں آسیان–بھارت سربراہی اجلاس کے دوران ڈیجیٹل تبدیلی کو آگے بڑھانے سے متعلق آسیان–بھارت مشترکہ اعلامیے کی منظوری کو تسلیم کیا گیا۔ اس اعلامیے کا مقصد ڈیجیٹل پبلک انفراسٹرکچر، فنانشل ٹیکنالوجی، سائبر سیکیورٹی، مصنوعی ذہانت (اے آئی)، صلاحیت سازی اور علم کے تبادلے، نیز پائیدار مالی اعانت اور سرمایہ کاری کے شعبوں میں تعاون کو مضبوط بنانا ہے۔

اجلاس میں صلاحیت سازی کے پروگراموں کے ذریعے آسیان–بھارت 2025 ڈیجیٹل عملی منصوبے کے تحت تعاون کے ساتھ سرگرمیوں کے نفاذ میں ہونے والی پیش رفت کا بھی جائزہ لیا گیا۔ اس کے علاوہ آسیان–بھارت ڈیجیٹل ورک پلان 2026 کا خیر مقدم کیا گیا، جس میں درج ذیل موضوعات شامل ہیں:(i) آئی سی ٹی تربیت/صلاحیت سازی کے پروگرام؛(ii) بھارت–آسیان ریگولیٹرز کانفرنس؛ اور(iii) ٹیلی کام آئی سی ٹی حلوں کی تعیناتی۔مزید برآں، اجلاس میں ایک خصوصی “آسیان–بھارت فنڈ فار ڈیجیٹل فیوچر” کے عملی نفاذ کا بھی خیر مقدم کیا گیا۔

 

اجلاس سے خطاب کرتے ہوئے جناب امت اگروال نے آسیان–بھارت ڈیجیٹل تعاون کے لیے بھارت کے مضبوط عزم کا اعادہ کیا اور “مطابقت پذیر آسیان: کنیکٹیوٹی سے کنیکٹڈ انٹیلی جنس تک” کے موضوع کا خیر مقدم کیا۔ انہوں نے کہا:“ہم نے اجتماعی طور پر ڈیجیٹل خلیج کو کم کرنے، بنیادی ڈھانچے کو مضبوط بنانے اور اس بات کو یقینی بنانے کے لیے کام کیا ہے کہ ڈیجیٹل تبدیلی شمولیت، لچک اور اقتصادی ترقی کی قوت بنے۔”

انہوں نے بھارت کی تیز رفتار ڈیجیٹل تبدیلی کو اجاگر کیا، جس میں تقریباً ہمہ گیر 4G کوریج، دنیا میں سب سے تیز 5G رول آؤٹ، بھارت نیٹ کے ذریعے دیہی براڈبینڈ کنیکٹیویٹی میں توسیع، اور بھارت کا ایک بڑے موبائل مینوفیکچرنگ مرکز کے طور پر ابھرنا شامل ہے۔ مزید برآں، انہوں نے بھارت کے ڈیجیٹل عوامی بنیادی ڈھانچے جیسے آدھار، یو پی آئی اور ڈیجی لاکر کو جامع ترقی اور مؤثر خدمات کی فراہمی کے ثابت شدہ پلیٹ فارمز کے طور پر پیش کیا۔ بھارت نے ٹیلی کام صارفین کے تحفظ اور دھوکہ دہی کی روک تھام کے لیے سنچار ساتھی اقدام کو بھی نمایاں کیا اور آسیان شراکت داروں کے ساتھ بہترین عملی تجربات شیئر کرنے کی پیشکش کی۔

مصنوعی ذہانت کے انقلابی کردار پر زور دیتے ہوئے، بھارت نے اپنی انڈیا اے آئی مشن کا خاکہ پیش کیا، جس میں محفوظ اور قابلِ اعتماد اے آئی پر مضبوط توجہ مرکوز ہے، اور اے آئی میں صلاحیت سازی، معیارات کی تیاری اور عملی استعمال کے معاملات پر آسیان کے ساتھ تعاون کے لیے آمادگی ظاہر کی۔ جناب امت اگروال نے کہا:“جیسے جیسے ہم کنیکٹیوٹی سے انٹیلی جنس کی جانب بڑھ رہے ہیں، مصنوعی ذہانت ایک فیصلہ کن قوت ہوگی۔ بھارت اے آئی کو ایک واضح یقین کے ساتھ اپناتا ہے کہ اختراع کو ذمہ داری، شفافیت اور عوامی اعتماد کے ساتھ ہم آہنگ ہونا چاہیے۔”

اجلاس میں بھارت اور آسیان کے اس مشترکہ وژن کی توثیق کی گئی کہ باہمی ترقی اور علاقائی خوشحالی کے لیے ایک کھلا، محفوظ، جامع اور اختراع پر مبنی ڈیجیٹل ماحولیاتی نظام قائم کیا جائے۔

 

 

 

************

 

ش ح ۔   م  د ۔  م  ص

(U :698    )

 

(रिलीज़ आईडी: 2215452) आगंतुक पटल : 6