مرکزی وزیر مملکت (آزادانہ چارج) برائے سائنس و ٹیکنالوجی، ارضیات، اور وزیر مملکت برائے وزیراعظم کے دفتر، محکمہ خلاء اور ایٹمی توانائی، ڈاکٹر جیتندر سنگھ نے آج کہا کہ جینیاتی اور نایاب بیماریوں کے علاج میں ابتدائی تشخیص اور سستے علاج دو سب سے بڑے چیلنج ہیں اور بھارت اب سائنسی اور اقتصادی طور پر پیچیدہ صحت کے مسائل سے نمٹنے کے لیے جینومکس، بایوٹیکنالوجی اور احتیاطی صحت کے شعبے میں پوری طرح تیار ہے۔

وزیر موصوف نے حیدرآباد میں ڈی بی ٹی-برک سینٹر برائے ڈی این اے فنگر پرنٹنگ اور ڈایگناسٹکس (سی ڈی ایف ڈی) کے دورے کے دوران یہ بات کہی ۔ جہاں انہوں نے نیشنل اسکل ڈیولپمنٹ سینٹر، سامرتھ کی بنیاد رکھی اور آئی ڈی ای اے – این اے برک – سی ڈی ایف ڈی ٹیکنالوجی انکیوبیٹر کا افتتاح کیا۔

ڈاکٹر جتیندر سنگھ نے کہا کہ گزشتہ دہائیوں کے برعکس ، جب ہندوستان بنیادی طور پر متعدی بیماریوں سے لڑ رہا تھا ، ملک اب ایک مستقبل کے مرحلے میں داخل ہو گیا ہے جہاں مالیکیولر تشخیص ، جینوم سیکوینسنگ اور ذاتی ادویات صحت کی دیکھ بھال کی فراہمی کے لیے مرکز بن رہی ہیں ۔  انہوں نے کہا کہ سی ڈی ایف ڈی جیسے ادارے لیبارٹری ریسرچ کو حقیقی زندگی کے طبی نتائج سے جوڑنے میں اہم کردار ادا کرتے ہیں ۔

حکومت کی پالیسی کی سمت کو اجاگر کرتے ہوئے، وزیر موصوف نے کہا کہ بایوٹیکنالوجی اور صحت کے شعبے کو وزیر اعظم نریندر مودی کی قیادت میں بے مثال ترجیح حاصل ہوئی ہے، جس کا ذکر بارہا لال قلعے سے کیا گیاہے۔ انہوں نے یومِ آزادی کے خطاب کے دوران بایو- ای -3 پالیسی کے اعلان کا ذکر کیا اور اسے ایک محرک قرار دیا جس نے ملک بھر کے سائنسدانوں، اسٹارٹ اپس اور نوجوان اختراع کاروں میں وسیع دلچسپی پیدا کی۔

ڈاکٹر جیتندر سنگھ نے مشاہدہ کیا کہ بھارت جینومکس پر مبنی اقدامات میں تیز رفتار ترقی دیکھ رہا ہے، جن میں بڑے پیمانے پر جینوم سیکوینسنگ، بچوں کی جینیاتی بیماریوں کے پروگرامز اور ہیمافیلیا جیسے شعبوں میں جدید کام شامل ہے۔ انہوں نے کہا کہ یہ کوششیں صحت کے نظام کو ذاتی علاج کے دور کے لیے تیار کر رہی ہیں، جہاں ایک ہی حالت والے مریضوں کو علاج کے مختلف طریقے درکار ہو سکتے ہیں۔

نایاب بیماریوں کے مسئلے کا حوالہ دیتے ہوئے، وزیر موصوف نے کہا کہ 2021 میں بھارت کی پہلی نیشنل پالیسی برائے نایاب بیماریوں کا تعارف حکومتی نقطہ نظر میں ایک اہم تبدیلی کی علامت تھا، جو سائنسی مشاورت کے لیے بصیرت اور کھلے پن کی عکاسی کرتا ہے۔ انہوں نے اس بات پر زور دیا کہ صرف تشخیص کافی نہیں، متاثرہ خاندانوں کے لیے مسلسل علاج کو بھی قابلِ برداشت بنایا جانا چاہیے۔

وزیر موصوف نے حکومت کی جانب سے فروغ  دئے جانے والے مربوط صحت کی دیکھ بھال کے ماڈل کے بارے میں بھی بات کی، جس میں آیوش کی وزارت کے ذریعے روایتی نظاموں کو ادارہ جاتی شکل دینا اور یوگا کو ایک احتیاطی صحت کے آلے کے طور پر عالمی سطح پر تسلیم کرانا شامل ہے۔ انہوں نے کہا کہ جدید دوائی کے ساتھ ویلنس پریکٹسز کا شواہد پر مبنی انضمام طرز زندگی اور میٹابولک بیماریوں کے انتظام میں مثبت نتائج دکھا چکا ہے۔

دورے کے دوران، ڈاکٹر جیتندر سنگھ نے سی ڈی ایف ڈی میں جاری تحقیق اور جدت کی سرگرمیوں کا جائزہ لیا اور جینوم سیکوینسنگ پروگرامز اور عوامی آگاہی کے لیے کی جانے والی کوششوں جیسی پہلوں کی تعریف کی۔ وزیر موصوف نے کہا کہ سائنس کو شہریوں، خاص طور پر نوجوانوں کے لیے قابل فہم زبان میں پہنچانا بایوٹیکنالوجی میں اعتماد اور دلچسپی پیدا کرنے کے لیے ضروری ہے۔

بھارت کی بڑھتی ہوئی بایو اکنامی کو اجاگر کرتے ہوئے ڈاکٹر جیتندر سنگھ نے کہا کہ بایوٹیک اسٹارٹ اپس کی تعداد سالوں میں کئی گنا بڑھ گئی ہے، جبکہ اس شعبے کا معیشت میں حصہ بھی تیز رفتاری سے بڑھا ہے۔ انہوں نے مزید کہا کہ بایوٹیکنالوجی ریسرچ اینڈ انوویشن کونسل (بی آر آئی سی) کے قیام نے اداروں کے درمیان ہم آہنگی کو مضبوط کیا ہے، جس کے نتیجے میں اعلیٰ اثر رکھنے والی تحقیق اور صنعت کے ساتھ تعاون کو فروغ ملا ہے۔

وزیر موصوف نے بھارت کی ویکسینز اور احتیاطی صحت کے شعبے میں قیادت کو بھی اجاگر کیا اور کہا کہ ملکی اختراعات اب قومی سطح پر نافذ کی جا رہی ہیں اور عالمی سطح پر مشترک کی جا رہی ہیں، جو عالمی صحت کی سیکورٹی میں بھارت کے کردار کو مزید مضبوط کرتی ہیں۔

اپنے خطاب کے اختتام پر وزیر موصوف نے کہا کہ بھارت کی تقریباً 70 فیصد آبادی 40 سال سے کم عمر ہے، اس لیے ابتدائی تشخیص اور احتیاط کے ذریعے صحت میں سرمایہ کاری ایک قومی ضرورت ہے۔ انہوں نے سی ڈی ایف ڈی میں کیے جانے والے کام پر اطمینان کا اظہار کیا اور کہا کہ ایسے ادارے صحت مند، مضبوط اور مستقبل کے لیے تیار بھارت کی تعمیر میں بامعنی کردار ادا کر رہے ہیں۔

*********

ش ح۔ش ت ۔م الف

U. No-369

(रिलीज़ आईडी: 2213004) आगंतुक पटल : 10