اندرا گاندھی نیشنل سینٹر فار دی آرٹس (آئی جی این سی اے) نے اپنے کلا ندھی ڈویژن کے ذریعے 29 دسمبر 2025 کو آئی جی این سی اے کے سمویت آڈیٹوریم  میں ڈاکٹر کپلا وتسیاین میموریل لیکچر کا اہتمام کیا جس کا عنوان ‘‘آتم بودھ سے وشو بودھ’’ (خود شناسی سے عالمی بیداری تک) تھا ۔

گجرات ساہتیہ اکیڈمی کے چیئرمین آئی اے ایس (ریٹائرڈ) ڈاکٹر بھاگیش واسودیو جھا  نے یہ یادگاری لیکچر پیش کیا۔  اس اجلاس کی صدارت آئی جی این سی اے ٹرسٹ کے صدر جناب رام بہادر رائے نے کی ۔  آئی جی این سی اے  کے ممبر سکریٹری ڈاکٹر سچدانند جوشی  نے استقبالیہ کلمات پیش کیے، جبکہ کلا ندھی ڈویژن کے ڈین اور صدر پروفیسر (ڈاکٹر) رمیش چندر گور نے پروگرام کا تعارف پیش کیا۔

آئی جی این سی اے کی بانی ممبر سکریٹری ڈاکٹر کپلا وتسیاین  ہندوستانی آرٹ، ثقافت اور روحانی فکر کی ممتاز اسکالر اور پدم وبھوشن اعزاز یافتہ تھیں ۔  ان کی یاد میں، آئی جی این سی اے ہر سال ڈاکٹر کپلا وتسیاین میموریل لیکچر کا اہتمام کرتا ہے۔

لیکچر سے پہلے، آئی جی این سی اے کے درشنم I اور II گیلریوں میں ’ابھیویکتی: ایک ویژنری کے والٹ سے لوم کے تاثرات‘ کی نمائش کا افتتاح کیا گیا۔  ڈاکٹر کپلا وتسیاین کے ذاتی ٹیکسٹائل کلیکشن سے تیار کردہ اس نمائش کو ٹیکسٹائل آرکائیوسٹ اور محقق محترمہ ساریکا اگروال نے ترتیب دیا ہے۔  اس نمائش میں ٹیکسٹائل کو یاد، ثقافتی تسلسل اور زندہ تجربے کو آگے لے جانے والے کے طور پر اجاگر کیا گیا ہے اور یہ 7 جنوری 2026 تک حاضرین کے لیے کھلی ہے۔

یہ یادگاری لیکچر دیتے ہوئے ڈاکٹر بھاگیش واسودیو جھا نے کہاکہ عصری عالمی بحران بنیادی طور پر ایک شناخت کا بحران ہے جو بڑے پیمانے پر انسانیت کو متاثر کر رہا ہے۔  فرانسس فوکویاما، سیموئل ہنٹنگٹن اور شنکراچاریہ جیسے مفکروں کا حوالہ دیتے ہوئے انہوں نے کہا کہ جدید نظریات وقت کے پابند ہیں، جبکہ ہندوستانی فکر پائیدار ہے ۔  اسرائیل-حماس جنگ اور روس-یوکرین تنازعہ سمیت عالمی تنازعات کا حوالہ دیتے ہوئے انہوں نے زور دے کر کہا کہ شناخت کے سوالات تمام تنازعات کی جڑ ہیں ۔

انہوں نے وزیر اعظم جناب نریندر مودی کی آتم نربھر بھارت کی اپیل کو ہندوستانی خود آگاہی کا جدید اظہار قرار دیا۔  ٹیکنالوجی کے کثرت استعمال کے اس  دور میں، انہوں نے خبردار کیا کہ سب سے بڑا خطرہ ذہنی عدم توازن ہے، جس کا علاج صرف ٹیکنالوجی میں نہیں بلکہ خود آگاہی میں ہے۔

بھگود گیتا اور اپنشدوں کا حوالہ دیتے ہوئے، ڈاکٹر جھا نے ہندوستانی شعور کے بنیادی اصولوں کے طور پر ‘‘آہم برہماسمی’’ اور ‘‘تتوم آسی’’ کے اعلانات پر روشنی ڈالی جو افراد کو انا ، خوف اور حسد سے آزاد کرتے ہیں۔  انہوں نے اس بات پر زور دیا کہ خود آگاہی محض علم نہیں بلکہ زندہ تجربہ ہے۔  شنکراچاریہ کی سادھنا چتوشتیا-سمجھ بوجھ، علیحدگی، خوبیوں کی پرداخت اور آزادی کی خواہش-کو خود شناسی کا ایک منظم راستہ قرار دیا گیا تھا۔  انہوں نے مزید واضح کیا کہ موکش نجات کے بجائے خوف ، انا اور لگاؤ سے آزادی کی علامت ہے۔

ہندوستانی عالمی نظریے کی وضاحت کرتے ہوئے، انہوں نے کہا کہ موت کو اختتام کے طور پر نہیں بلکہ شعور کے مسلسل سفر کے طور پر دیکھا جاتا ہے، جو اپنشدوں اور زندہ روایات کے ذریعے برقرار رہتا ہے۔  گواہ کے رویے پر زور دیتے ہوئے، انہوں نے کہا کہ خود بینی کی صلاحیت خود آگاہی کے آغاز کی نشاندہی کرتی ہے۔  بھگود گیتا میں بیان کردہ کائناتی شکل کا حوالہ دیتے ہوئے ، انہوں نےکہا کہ ہندوستانی عالمی بیداری خود کے اور دوسرے کے درمیان تقسیم کو ختم کرتی ہے۔  ’’سروے بھاونتو سکھینہ‘‘ کو ہندوستان کے عالمی نظریے کی بنیاد قرار دیتے ہوئے، انہوں نے زور دے کر کہا کہ ہندوستان کا وژن سبھی کے لیے فائدہ مند ہے۔  انہوں نے یہ کہتے ہوئے اپنی بات ختم کی کہ دریاؤں ، فطرت اور زمین کے لیے بطور ماں احترام ہندوستان کے عالمی وژن کی عکاسی کرتا ہے اور یہ کہ خود آگاہی سے عالمی بیداری تک کا سفر عصری عالمی چیلنجوں سے نمٹنے میں ہندوستان کا بامعنی تعاون ہے۔

اپنے استقبالیہ کلمات میں ڈاکٹر سچچدانند جوشی نے ڈاکٹر کپلا وتسیاین کی آئی جی این سی اے کے ساتھ گہری وابستگی اور ادارے پر ان کے مستقل اعتماد کو یاد کیا۔  انہوں نے بتایا کہ عہدہ سنبھالنے کے بعد اور چیئرپرسن جناب رام بہادر رائے کی رہنمائی میں، ان کے ساتھ ایک براہ راست مکالمہ ہوا ، جس سے باہمی اعتماد اور رہنمائی کی روایت کو فروغ ملا۔  انہوں نے کہا کہ یہ تسلسل اور احترام آئی جی این سی اے کی ثقافتی اخلاقیات کی عکاسی کرتا ہے۔

ابھیوکتی ٹیکسٹائل نمائش کا حوالہ دیتے ہوئے ڈاکٹر جوشی نے کہا کہ ٹیکسٹائل محض مادی اشیاء نہیں بلکہ یادداشت، جذبات اور روایت کے کیریئر ہیں۔  انہوں نے کہا کہ کپلا وتسیاین کا ٹیکسٹائل کلیکشن داستانوں اور زندہ تجربات کو ظاہر کرتا ہے اور اس اعتماد کا اظہار کیا کہ میموریل لیکچر اور نمائش سامعین کو ایک نیا دانشورانہ تجربہ فراہم کرے گی۔

اس موقع پر خطاب کرتے ہوئے پروفیسر (ڈاکٹر) رمیش چندر گوڑ نے کہا کہ ڈاکٹر کپلا وتسیاین میموریل لیکچر ایک جاری علمی روایت کے حصے کے طور پر باقاعدگی سے منعقد کیا جاتا رہا ہے۔  انہوں نے اسکالرز کے ذاتی کلیکشن کو محفوظ رکھنے اور انہیں عوام کے لیے قابل رسائی بنانے کے لیے آئی جی این سی اے کے عزم کا اعادہ کیا۔  اس تناظر میں، انہوں نے ایک کیٹلاگ کے ساتھ ابھیوکتی نمائش کو اس ادارہ جاتی کوشش کی توسیع قرار دیا۔

اس بات پر زور دیتے ہوئے کہ ٹیکسٹائل انسانی تہذیب کا لازمی حصہ رہا ہےجو ثقافتی، سماجی اور اقتصادی بیانیے پیش کرتا ہے، انہوں نے کہا کہ ہندوستان کی ٹیکسٹائل روایات اس کی تہذیبی اخلاقیات کا ایک شاندار ذخیرہ ہیں۔  انہوں نے اس اعتماد کا اظہار کیا کہ یادگاری لیکچر اور نمائش سے تحقیق، مباحثے اور ثقافتی مکالمے کے لیے نئی راہیں کھل جائیں گی۔

’ابھیوکتی‘ کا تصور ایک خراج تحسین، عکاسی اور عمل کی اپیل کے طور پر پیش کیا گیا ہے، جو ڈاکٹر کپلا وتسیاین کے ٹیکسٹائل کلیکشن کا جشن مناتا ہے۔  یہ مجموعہ ان کی بہتر حساسیت، ہندوستان کی ثقافتی روایات کے ساتھ گہری وابستگی اور ورثے کے تحفظ میں یقین کی عکاسی کرتا ہے۔  ان کی جسمانی غیر موجودگی میں، یہ مجموعہ ایک خزانہ اور ایک ذمہ داری بھی ہے، جو آنے والی نسلوں کو ایک ایسے بابصیرت شخصیت کے ساتھ جڑنے کے موقع فراہم کرتا ہے جس نے روایت اور مستقبل پر مبنی ہندوستان کے ثقافتی مباحثے کے خد و خال طے کیے۔

اس تقریب میں اسکالرز، محققین اور ثقافتی شائقین نے سرگرمی سے شرکت کی۔

**********

UR-4027

(ش ح۔  ک ح۔ج ا )

(रिलीज़ आईडी: 2209741) आगंतुक पटल : 5