தலைமுறை தலைமுறையாக, இந்தியக் குடும்பங்கள் வங்கிக் கணக்குகளைத் தொடங்குவது, காப்பீட்டு பாலிசிகளை வாங்குவது, பரஸ்பர நிதிகளில் முதலீடு செய்வது, பங்குகளிலிருந்து ஈவுத்தொகையைப் பெறுவது மற்றும் ஓய்வூதியத்திற்காகப் பணத்தைச் சேமித்து வைப்பது போன்றவற்றின் மூலம் கவனமாகச் சேமித்து வந்துள்ளன. இந்தக் குடும்பங்கள், பெரும்பாலும் குழந்தைகளின் கல்வியைப் பாதுகாக்கவும், சுகாதாரத் தேவைகளுக்கு ஆதரவளிக்கவும், முதுமையில் கண்ணியத்தை உறுதி செய்யவும், நம்பிக்கை மற்றும் பொறுப்புடன் இந்த நிதி முடிவுகளை எடுக்கின்றன.

இருப்பினும், காலப்போக்கில், கடினமாக உழைத்துச் சேமித்த இந்தச் சேமிப்பின் கணிசமான பகுதி உரிமை கோரப்படாமல் உள்ளது. அந்தப் பணம் காணாமல் போகவில்லை, தவறாகவும் பயன்படுத்தப்படவில்லை. அது ஒழுங்குபடுத்தப்பட்ட நிதி நிறுவனங்களில் பாதுகாப்பாக உள்ளது; ஆனால் விழிப்புணர்வு இல்லாமை, காலாவதியான பதிவுகள், வசிப்பிடத்தில் ஏற்பட்ட மாற்றங்கள் அல்லது ஆவணங்கள் இல்லாதது போன்ற காரணங்களால் அதன் உண்மையான உரிமையாளர்களிடம் போய்ச் சேராமல் உள்ளது. பல சந்தர்ப்பங்களில், இதுபோன்ற பணம்  இருப்பதே குடும்பங்களுக்குத் தெரிவதில்லை.

'உங்கள் பணம், உங்கள் உரிமை' என்பது, மறக்கப்பட்ட இந்த நிதிச் சொத்துக்களுடன் குடிமக்களை மீண்டும் இணைப்பதற்கும், தனிநபர்கள் மற்றும் குடும்பங்களுக்குச் சொந்தமான பணம் இறுதியில் அவர்களிடமே சென்றடைவதை உறுதி செய்வதற்கும் மேற்கொள்ளப்படும் ஒரு நாடு தழுவிய முயற்சியாகும்.

நிதி நிறுவனங்களில் உள்ள பணம், கணக்கு வைத்திருப்பவர் அல்லது அவர்களின் சட்டப்பூர்வ வாரிசுகளால் நீண்ட காலத்திற்கு உரிமை கோரப்படாதபோது, உரிமை கோரப்படாத நிதிச் சொத்துக்கள் உருவாகின்றன.

பெரும்பாலான சந்தர்ப்பங்களில், வேலைக்காக இடம்பெயர்தல், தொடர்பு விவரங்களில் மாற்றங்கள், பழைய வங்கிக் கணக்குகளை மூடுதல் அல்லது குடும்ப உறுப்பினர்கள் மற்றும் சட்டப்பூர்வ வாரிசுகளிடையே தகவல் பற்றாக்குறை போன்ற வழக்கமான வாழ்க்கை நிகழ்வுகளால் சொத்துக்கள் உரிமை கோரப்படாதவையாக மாறக்கூடும்.

மேலும் விவரங்களுக்கு இந்த ஆங்கிலச் செய்திக்குறிப்பைக் காணவும் https://www.pib.gov.in/PressReleasePage.aspx?PRID=2208730&reg=3&lang=1             

***

AD/PKV/SE