భారత పురాతన నౌకా నిర్మాణాన్ని, సముద్రయాన సంప్రదాయాలను పునరుజ్జీవింప చేస్తూ రూపొందించిన భారత నౌకా దళంలోని సెయిలింగ్ నౌక ఐఎన్ఎస్‌వీ కౌండిన్య 2025 డిసెంబర్ 29న తన తొలి సముద్రయానాన్ని ప్రారంభించనుంది. గుజరాత్‌లోని పోర్ బందర్ నుంచి మస్కట్, ఒమన్ వరకు ఈ నౌకా యాత్ర కొనసాగుతుంది. అనేక శతాబ్దాలుగా హిందూ మహా సముద్రం‌తో భారత్‌ను అనుసంధానించిన చారిత్రక సముద్రయాన మార్గాలను తిరిగి గుర్తు చేసేలా ఈ యాత్ర కొనసాగుతుంది.

భారతీయ నౌకా నిర్మాణానికి సంబంధించిన పురాతన వర్ణనల నుంచి స్ఫూర్తి పొంది.. పూర్తిగా సంప్రదాయ విధానమైన ‘స్టిచ్డ్-ప్లాంక్’ పద్ధతిలో దీనిని నిర్మించారు. చరిత్ర, చేతి వృత్తి నైపుణ్యం, ఆధునిక నావికా అనుభవాల అరుదైన కలయికను ఐఎన్ఎస్‌వీ కౌండిన్య ప్రతిబింబిస్తుంది. ఆధునిక నౌకల మాదిరిగా కాకుండా.. ఈ నౌకలో చెక్క ఫలకాలను కొబ్బరిపీచుతో తయారుచేసిన తాడు, సహజ రెసిన్లను ఉపయోగించి ఒకదానితో ఒకటి అతికించారు. ఒకప్పుడు భారతీయ తీర ప్రాంతం వెంబడి, హిందూ మహా సముద్ర తీర ప్రాంతంలో విస్తరించిన నౌకా నిర్మాణ సామర్థ్యాన్ని ఇది తెలియజేస్తుంది. ఆధునిక సముద్రయానం, లోహశోధన శాస్త్రం లేని రోజుల్లో పశ్చిమాసియా, ఆఫ్రికా, ఆగ్నేయాసియా కు సుదీర్ఘ సాహసయాత్రలు చేసేలా భారతీయ నావికులకు ఈ సాంకేతికత వీలు కల్పించింది.

(https://www.pib.gov.in/PressReleasePage.aspx?PRID=2130294®=3&lang=2)

దేశీయ విజ్ఞాన వ్యవస్థలను తిరిగి అన్వేషించి, పునరుద్ధరించేందుకు భారత్ చేపడుతున్న చర్యల్లో భాగంగా .. సాంస్కృతిక మంత్రిత్వ శాఖ, భారతీయ నౌకా దళం, హోడీ ఇన్నోవేషన్స్ సంస్థ మధ్య కుదిరిన త్రైపాక్షిక ఒప్పందం ద్వారా ఈ ప్రాజెక్టును చేపట్టారు. నౌకా నిర్మాణంలో నిపుణుడైన శ్రీ బాబూ శంకరన్ మార్గనిర్దేశంలో సంప్రదాయ హస్త కళాకారులు ఈ నౌకను నిర్మించారు. దీనికి అవసరమైన పరిశోధన, నమూనా, పరీక్షల్లో భారతీయ నౌకాదళం, విద్యా సంస్థలు విస్తృతంగా తోడ్పాటునందించాయి. ఈ నౌక సముద్రయానానికి అనుకూలంగా ఉంటుంది.

ఈ నౌకకు ప్రసిద్ధ నావికుడు కౌండిన్య పేరును పెట్టారు. ఈయన ప్రాచీన కాలంలో భారత్ నుంచి ఆగ్నేయాసియాకు ప్రయాణం చేశారని భావిస్తారు. ఈ నౌక సముద్రయాన దేశంగా భారత్ పోషించిన చారిత్రక పాత్రను ప్రతిబింబిస్తుంది.

***