بھارتی بحریہ کا ممتاز سلا ہوابادبانی جہاز ’آئی این ایس وی کونڈِنیا‘، جو بھارت کی قدیم جہاز سازی اور سمندری سفر کی روایات کو زندہ کرنے کا کام  کررہاہے، 29 دسمبر 2025 کو اپنی پہلی بین الاقوامی سمندری مہم پر روانہ ہوگا۔ یہ جہازگجرات کے پوربندر سے عمان کے مسقط کے لیے روانہ کیا جائے گا اور علامتی طور پر اُن تاریخی بحری راستوں کو دوبارہ طے کرے گا جو ہزاروں برس تک بھارت کو بحرِ ہند کی وسیع دنیا سے جوڑے رکھتے تھے۔

قدیم بھارتی جہازوں کی تصویری جھلکیوں سے متاثر ہو کر تیار کیا گیا آئی این  ایس وی کونڈِنیا مکمل طور پر روایتی طور پر تختوں کو باہم  جوڑنے کی  تکنیک کو بروئے کار لاکر تیار کیا گیا ہے۔ یہ جہاز تاریخ، دستکاری اور جدید بحری مہارت کا ایک نادر امتزاج پیش کرتا ہے۔ جدید جہازوں کے برعکس، اس کے لکڑی کے تختے ناریل کے ریشے (کوائر) کی رسی سے باندھے گئے ہیں اور قدرتی رال سے بند کیے گئے ہیں۔ یہ جہاز سازی کی وہ  روایت ہے جو کبھی بھارت کے ساحلوں اور پورے بحرِ ہند کے خطے میں رائج تھی۔

اسی تکنیک کی بدولت بھارتی ملاح جدید جہاز رانی اور دھات کاری کی ایجاد سے بہت پہلے مغربی ایشیا، افریقہ اور جنوب مشرقی ایشیا تک طویل سمندری سفر کرنے کے قابل ہوئے، جو بھارت کی عظیم بحری وراثت اور عالمی روابط کی روشن مثال ہے۔

(https://www.pib.gov.in/PressReleasePage.aspx?PRID=2130294®=3&lang=2)

یہ منصوبہ وزارتِ ثقافت، بھارتی بحریہ اور ایم/ایس ہوڈی اِنویشنز کے درمیان ایک سہ فریقی مفاہمت نامے(ایم او یو)کے تحت انجام دیا گیا، جو بھارت کے مقامی علمی و فنی ورثے کو ازسرِنو دریافت کرنے اور اسے زندہ کرنے کی کوششوں کا حصہ ہے۔ یہ جہاز روایتی کاریگروں نے ماسٹر شپ رائٹ جناب  بابو شنکرن کی رہنمائی میں تیار کیا، جبکہ بھارتی بحریہ اور تعلیمی اداروں نے اس کی تحقیق، ڈیزائن اور جانچ میں بھرپور تعاون فراہم کیا۔ یہ جہاز مکمل طور پر سمندر کے لیے موزوں ہے اور کھلے سمندر میں سفر کی بھرپور صلاحیت رکھتا ہے۔

اس  جہاز  کا نام مشہور جہاز راں کونڈِنیا کے نام پر رکھا گیا ہے، جن کے بارے میں مانا جاتا ہے کہ انہوں نے قدیم زمانے میں بھارت سے جنوب مشرقی ایشیا تک سمندری سفر کیا تھا۔ یہ جہاز ایک بحری قوم کے طور پر بھارت کے تاریخی کردار اور عظیم سمندری ورثے کی بھرپور عکاسی کرتا ہے۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

 (ش ح ۔  م م ۔ع ن)

U. No. 3813