دفاعی تحقیق و ترقی کی تنظیم (ڈی آر ڈی او) اور راشٹریہ رکشا یونیورسٹی (آر آر یو) کے درمیان  دفاع اور داخلی سلامتی کے لیے تحقیق ، تعلیم ، تربیت اور تکنیکی مدد کے شعبوں میں تعاون کو فروغ دینے کے لیے مفاہمت نامے پر دستخط کیے گئے۔  اس مفاہمت نامے پر ممتاز سائنسدان اور ڈائریکٹر جنرل (پروڈکشن کوآرڈینیشن اینڈ سروسز انٹرایکشن) ڈاکٹر چندریکا کوشِک اور آر آر یو کے وائس چانسلر پروفیسر (ڈاکٹر) بمل این پٹیل نے 22 دسمبر 2025 کو نئی دہلی کے ساؤتھ بلاک میں وزیر دفاع جناب راج ناتھ سنگھ کی موجودگی میں دستخط کیے ۔  اس موقع پر محکمہ دفاع کے تحقیق و ترقی کے سکریٹری اور ڈی آر ڈی او کے چیئرمین ڈاکٹر سمیر وی کامت بھی موجود تھے ۔

اس مفاہمت نامے کا مقصد امرت کال کے دوران آتم نربھر بھارت کے قومی وژن اور مکمل ملک کے نقطہ نظر کے مطابق دفاع اور داخلی سلامتی کی ٹیکنالوجی میں ہندوستان کی خود انحصاری کو مضبوط کرنا ہے ۔  اس سے  قومی سلامتی کی تیاریوں کو بڑھانے اور داخلی سلامتی کے شعبےمیں ہندوستان کی اسٹریٹجک خود مختاری کو تقویت دینے کے لیے ٹیکنالوجی ، علم اور آپریشنل معلومات کو مربوط کرنے کے مشترکہ عزم کی عکاسی ہوتی ہے ۔

راشٹریہ رکشا یونیورسٹی ، وزارت داخلہ اور یونیورسٹی گرانٹس کمیشن (یو جی سی) کے تحت قومی اہمیت کا ایک ادارہ ہے ، جو داخلی سلامتی کے شعبے میں مضبوط تعلیمی ، تربیتی اور منصوبہ سازی کی مہارت رکھتا ہے ۔ملک کی اہم دفاعی تحقیق و ترقی کی تنظیم  ڈی آر ڈی او  مسلح افواج اور سکیورٹی ایجنسیوں کی ضروریات کو پورا کرنے کے لیے جدید ترین مقامی  ساختہ ٹیکنالوجی اور نظام کی سطح کی مہارت فراہم کرتی ہے ۔

مفاہمت نامے کے تحت ، دونوں ادارے مشترکہ تحقیقی منصوبوں ، پی ایچ ڈی اور فیلوشپ پروگراموں اور سکیورٹی فورسز کے لیے خصوصی تربیت اور صلاحیت سازی کے پروگراموں میں تعاون کریں گے ۔  اس تال میل میں ابھرتے ہوئے آپریشنل چیلنجوں ، ٹیکنالوجی کی خلا کا تجزیہ ، مستقبل کی ضروریات کی پیش گوئی ، اور ڈی آر ڈی او کے تیار کردہ نظاموں کی لائف سائیکل مینجمنٹ کا مطالعہ بھی شامل ہوگا جو مرکزی مسلح پولیس دستوں اور وزارت داخلہ کے تحت کام کرنے والی دیگر ایجنسیوں میں نافذ کئے گئے  ہیں ۔

****

ش ح۔م ش ع۔ت ا

3769Uno-