حکومت کسانوں کے لیے قیمتوں کی معلومات کی اہمیت کو تسلیم کرتے ہوئے ملک میں 2000 سے مارکیٹنگ ریسرچ اینڈ انفارمیشن نیٹ ورک (ایم آر آئی این) نافذ کر رہی ہے۔ اس اسکیم کے تحت تیار اور فعال کیا گیا ایگمارک نیٹ پورٹل زرعی پیداوار مارکیٹ کمیٹیوں کو یکجا/منسلک کرتا ہے تاکہ کسانوں کو حقیقی وقت میں قیمتوں کی معلومات فراہم کی جا سکے۔ پورٹل کو نومبر 2025 میں ٹیکنالوجی کے لحاظ سے اپ گریڈ کر کے ”ایگمارک نیٹ 2.0“ بنا دیا گیا ہے۔​ پورٹل کے ساتھ نئی منڈیوں کا انضمام ایک مسلسل جاری عمل ہے۔اب تک ملک بھر میں 4367 منڈیاں ایگ مارک نیٹ پورٹل کے ساتھ منسلک کی جا چکی ہیں تاکہ ریئل ٹائم قیمتوں کی معلومات فراہم کی جا سکے۔ اس سے کسانوں کو مختلف منڈیوں میں قیمتوں کا بروقت موازنہ کرنے میں مدد ملتی ہے۔ براہ راست ریئل ٹائم قیمت اور آمد کی معلومات تک رسائی آسان بنانے کے لیے حکومت نے ”ایگمارک نیٹ 2.0 موبائل ایپ“ بھی لانچ کیا ہے۔ یہ ایپ منڈی کے ڈیٹا کی موقع پر اندراج کو ممکن بناتا ہے اور کسانوں کو موبائل فون پر قیمت و آمد کی معلومات فراہم کرتا ہے تاکہ وہ بہتر مارکیٹنگ فیصلے کر سکیں۔

ای۔نیشنل ایگریکلچر مارکیٹ (e-NAM) ایک طلب پر مبنی اسکیم ہے۔ ای-نام پلیٹ فارم پر نئی منڈیوں کے انضمام/ شمولیت کا عمل ریاستی حکومتوں/ مرکز زیرِ انتظام علاقوں کی جانب سے موصول ہونے والی تجاویز کی بنیاد پر، ان کی طلب اور تیاری کے مطابق، انجام دیا جاتا ہے۔ توسیع کے لیے کوئی مخصوص ہدف مقرر نہیں ہے۔ اب تک 1522 منڈیاں ای-نام پورٹل پر آن بورڈ کی جا چکی ہیں۔

کسانوں کے لیے قیمتوں میں شفافیت بڑھانے کی غرض سے ای-نام، پورٹل اور موبائل ایپ پر تجارت ہونے والی تمام اجناس کی منڈی قیمتیں حقیقی وقت میں دکھاتا ہے۔ آن لائن بولی سے قیمت کا منصفانہ تعین ممکن ہوتا ہے اور کسانوں کو بروقت ادائیگی یقینی بنانے کے لیے ای-ادائیگیوں کی سہولت بھی فراہم کی جاتی ہے۔

ای-نام موبائل ایپلیکیشن کے ذریعے 247 نوٹیفائیڈ اجناس کے لیے موبائل پر مبنی قیمتوں سے متعلق مفت معلوماتی سروس فراہم کی جا رہی ہے۔ یہ ایپ کسانوں کو قریبی ای-نام منڈیوں کی نشاندہی کرنے، رائج/موجودہ قیمتیں دیکھنے اور وہاں تک پہنچنے کے لیے راستے تک رسائی حاصل کرنے میں بھی مدد دیتا ہے۔

زراعت اور کسانوں کی بہبود کے وزیر مملکت جناب رام ناتھ ٹھاکر نے آج لوک سبھا میں ایک سوال کے تحریری جواب میں یہ معلومات فراہم کی۔

********

ش ح۔ ف ش ع

                                                                                                                                       U: 3307

(रिलीज़ आईडी: 2204962) आगंतुक पटल : 6