ಕೇಂದ್ರ ಹೊಸ ಮತ್ತು ನವೀಕರಿಸಬಹುದಾದ ಇಂಧನ ಸಚಿವರಾದ ಶ್ರೀ ಪ್ರಲ್ಹಾದ್ ಜೋಶಿ ಅವರು ಇಂದು ಚಲನಶೀಲತೆ ವಲಯದಲ್ಲಿ ಹೈಡ್ರೋಜನ್ ಬಳಕೆಗಾಗಿ ಕ್ಷೇತ್ರ ಪ್ರಯೋಗಗಳ ಪೈಲಟ್ ಯೋಜನೆಗೆ ಚಾಲನೆ ನೀಡಿದರು, ಇದು ಭಾರತದ ಶುದ್ಧ ಇಂಧನ ಪ್ರಗತಿಯಲ್ಲಿ ಪ್ರಮುಖ ಮೈಲಿಗಲ್ಲು ಎಂದರು.

ಭಾರತದ ಇಂಧನ ವ್ಯವಸ್ಥೆಗೆ ಹಸಿರು ಹೈಡ್ರೋಜನ್ ಭವಿಷ್ಯದ ಇಂಧನವಾಗಿದೆ

ಜಾಗತಿಕವಾಗಿ ಭವಿಷ್ಯದ ಇಂಧನ ವ್ಯವಸ್ಥೆಗಳ ಬೆನ್ನೆಲುಬಾಗಿ ಹಸಿರು ಹೈಡ್ರೋಜನ್ ಹೊರಹೊಮ್ಮುತ್ತಿದೆ ಎಂದು ಸಚಿವರು ಒತ್ತಿ ಹೇಳಿದರು. ಟೊಯೋಟಾದ ಮಿರಾಯ್‌ ಹೈಡ್ರೋಜನ್ ಇಂಧನ ಕೋಶ ವಿದ್ಯುತ್ ವಾಹನ (ಎಫ್‌ ಸಿ ಇ ವಿ) ವನ್ನು ನೈಜ-ಪ್ರಪಂಚದ ಪರೀಕ್ಷೆಗಾಗಿ ಎನ್‌ ಐ ಎಸ್‌ ಇ ಗೆ ಹಸ್ತಾಂತರಿಸುವುದ ಜೊತೆಗೆ, ಈ ಸಹಯೋಗವು ಭಾರತದ ಶುದ್ಧ ಇಂಧನ ಪರಿವರ್ತನೆಯನ್ನು ಮುನ್ನಡೆಸಲು ನಾವೀನ್ಯತೆ, ಉದ್ಯಮ ಪರಿಣತಿ ಮತ್ತು ವೈಜ್ಞಾನಿಕ ನಿಖರತೆಯನ್ನು ತರುತ್ತದೆ ಎಂದು ಅವರು ಹೇಳಿದರು. ಇಂತಹ ಸಹಯೋಗಗಳು "ಇಂಧನ ಸ್ವಾವಲಂಬನೆ"ಯನ್ನು ಬಲಪಡಿಸುತ್ತವೆ, ನವೀನ ಕಡಿಮೆ-ಹೊರಸೂಸುವಿಕೆ ಸಾರಿಗೆ ಪರಿಹಾರಗಳನ್ನು ಉತ್ತೇಜಿಸುತ್ತವೆ ಮತ್ತು ಭಾರತದ ಪಂಚಾಮೃತ ಹವಾಮಾನ ಬದ್ಧತೆಗಳಿಗೆ ಅನುಗುಣವಾಗಿವೆ, ಮುಂಬರುವ ದಶಕಗಳಲ್ಲಿ ಹಸಿರು ಹೈಡ್ರೋಜನ್ ಭಾರತದ ಇಂಧನ ಆರ್ಥಿಕತೆಯನ್ನು ಮುನ್ನಡೆಸುತ್ತದೆ ಎಂಬ ಸರ್ಕಾರದ ವಿಶ್ವಾಸವನ್ನು ದೃಢಪಡಿಸುತ್ತವೆ ಎಂದು ಅವರು ಹೇಳಿದರು.

ಟೊಯೋಟಾದ 'ಮಿರಾಯ್' ಇಂಧನ ಕೋಶ ವಿದ್ಯುತ್ ವಾಹನ (ಎಫ್‌ ಸಿ ಇ ವಿ) ಬಿಡುಗಡೆಯನ್ನು "ಸುಸ್ಥಿರ ಚಲನಶೀಲತೆಯಲ್ಲಿ ಹೊಸ ಅಧ್ಯಾಯ" ಎಂದು ಬಣ್ಣಿಸಿದ ಸಚಿವರು, ಜಪಾನೀಸ್ ಭಾಷೆಯಲ್ಲಿ "ಭವಿಷ್ಯ" ಎಂಬ ಅರ್ಥವನ್ನು ನೀಡುವ ಮಿರಾಯ್ ಎಂಬ ಹೆಸರು ಭಾರತದ ಸ್ವಚ್ಛ, ಹಸಿರು ಮತ್ತು ಸುಸ್ಥಿರ ಚಲನಶೀಲ ಪರಿಸರ ವ್ಯವಸ್ಥೆಯ ಆಕಾಂಕ್ಷೆಯನ್ನು ಸಂಕೇತಿಸುತ್ತದೆ ಎಂದು ಹೇಳಿದರು.‌

ಭಾರತದ ಪರಿಸ್ಥಿತಿಗಳಲ್ಲಿ ಎನ್‌ ಐ ಎಸ್‌ ಇ (ನ್ಯಾಷನಲ್ ಇನ್‌ಸ್ಟಿಟ್ಯೂಟ್ ಫಾರ್ ಸೋಲಾರ್ ಎನರ್ಜಿ) ವ್ಯಾಪಕವಾದ ನೈಜ-ಪ್ರಪಂಚದ ಮೌಲ್ಯಮಾಪನವನ್ನು ನಡೆಸುತ್ತದೆ

ಈ ಒಪ್ಪಂದದ ಅಡಿಯಲ್ಲಿ, ಎನ್‌ ಐ ಎಸ್‌ ಇ ಭಾರತದ ವೈವಿಧ್ಯಮಯ ರಸ್ತೆ ಪರಿಸ್ಥಿತಿಗಳಲ್ಲಿ, ಶಾಖ, ಧೂಳು, ಸಂಚಾರ ದಟ್ಟಣೆ ಮತ್ತು ವೈವಿಧ್ಯಮಯ ಭೂಪ್ರದೇಶ ಸೇರಿದಂತೆ ಎಫ್‌ ಸಿ ಇ ವಿ ಮಿರಾಯ್‌ ನ ವ್ಯಾಪಕವಾದ ಮೌಲ್ಯಮಾಪನಗಳನ್ನು ನಡೆಸಲಿದೆ. ಮುಂದಿನ ಎರಡು ವರ್ಷಗಳ ಕಾಲ ನಡೆಯುವ ಈ ಪರೀಕ್ಷೆಯು ದೇಶಾದ್ಯಂತ ಹೈಡ್ರೋಜನ್ ಚಲನಶೀಲತೆಯನ್ನು ವಿಸ್ತರಿಸಲು ನಿರ್ಣಾಯಕ ಮಾಹಿತಿಯನ್ನು ಒದಗಿಸುತ್ತದೆ ಮತ್ತು ಉದ್ಯಮ, ಶೈಕ್ಷಣಿಕ ಮತ್ತು ನೀತಿ ನಿರೂಪಕರಲ್ಲಿ ಅರಿವು, ವಿಶ್ವಾಸ ಮತ್ತು ತಾಂತ್ರಿಕ ಸಾಮರ್ಥ್ಯವನ್ನು ಹೆಚ್ಚಿಸುತ್ತದೆ ಎಂದು ಸಚಿವರು ಹೇಳಿದರು. ಹೈಡ್ರೋಜನ್ ಇಂಧನ ಕೋಶ ವಾಹನಗಳು ಸ್ವಚ್ಛ, ಶಾಂತ ಮತ್ತು ಮಾಲಿನ್ಯ-ಮುಕ್ತವಾಗಿದ್ದು, ನೀರನ್ನು ಮಾತ್ರ ಹೊರಸೂಸುತ್ತವೆ ಮತ್ತು ಇಂಧನ ಕೋಶ ತಂತ್ರಜ್ಞಾನವು ವಿಶ್ವಾದ್ಯಂತ ಕಾರುಗಳು, ಬಸ್ಸುಗಳು, ಟ್ರಕ್‌ ಗಳು, ರೈಲುಗಳು, ಹಡಗುಗಳು ಮತ್ತು ಸ್ಥಾಯಿ ವಿದ್ಯುತ್ ವ್ಯವಸ್ಥೆಗಳಿಗೆ ಶಕ್ತಿ ತುಂಬುತ್ತಿದೆ ಎಂದು ಅವರು ವಿವರಿಸಿದರು.

ಹೈಡ್ರೋಜನ್ ವಾಹನವನ್ನು ಸ್ವತಃ ಚಾಲನೆ ಮಾಡುವ ಮೂಲಕ, ಹೈಡ್ರೋಜನ್ ಚಲನಶೀಲತೆ ಭಾರತೀಯ ಪರಿಸ್ಥಿತಿಗಳಿಗೆ ಸಿದ್ಧವಾಗಿದೆ ಮತ್ತು ಪರಿಪೂರ್ಣವಾಗಿದೆ ಎಂಬ ಸ್ಪಷ್ಟ ಸಂದೇಶವನ್ನು ಕಳುಹಿಸಲು ಬಯಸುತ್ತೇನೆ ಎಂದು ಶ್ರೀ ಜೋಶಿ ಹೇಳಿದರು. ಟೊಯೋಟಾ ಕಿರ್ಲೋಸ್ಕರ್ ಮೋಟಾರ್ (ಟಿಕೆಎಂ) ನ ಇಂಗಾಲದ ತಟಸ್ಥತೆಯ ಬದ್ಧತೆಯನ್ನು ಶ್ಲಾಘಿಸಿದರು ಮತ್ತು ಭಾರತದ ಶುದ್ಧ ಇಂಧನ ಮಹತ್ವಾಕಾಂಕ್ಷೆಗಳನ್ನು ಮುನ್ನಡೆಸುವಲ್ಲಿ ಅದರ ನಾಯಕತ್ವಕ್ಕಾಗಿ ನೈಸ್ ಅನ್ನು ಶ್ಲಾಘಿಸಿದರು. "ಈ ವಾಹನದೊಂದಿಗೆ, ನಾವು ಕೇವಲ ಒಂದು ಒಪ್ಪಂದಕ್ಕೆ ಚಾಲನೆ ನೀಡುತ್ತಿಲ್ಲ, ಬದಲಾಗಿ ಸ್ವಚ್ಛ ಮತ್ತು ಸುಸ್ಥಿರ ಭವಿಷ್ಯಕ್ಕಾಗಿ ವಿಶ್ವಾಸ, ಸಹಕಾರ ಮತ್ತು ಬದ್ಧತೆಗೆ ಚಾಲನೆ ನೀಡುತ್ತಿದ್ದೇವೆ" ಎಂದು ಸಚಿವರು ಹೇಳಿದರು.

ಈ ಸಂದರ್ಭದಲ್ಲಿ ಮಾತನಾಡಿದ ಹೊಸ ಮತ್ತು ನವೀಕರಿಸಬಹುದಾದ ಇಂಧನ ಖಾತೆ ರಾಜ್ಯ ಸಚಿವ ಶ್ರೀ ಶ್ರೀಪಾದ ಯೆಸ್ಸೋ ನಾಯಕ್, ಈ ಉಪಕ್ರಮವು ಭಾರತದ ಸ್ವಚ್ಛ, ಹಸಿರು ಮತ್ತು ಸ್ವಾವಲಂಬಿ ಇಂಧನ ಭವಿಷ್ಯದತ್ತ ಒಂದು ಪ್ರಮುಖ ಹೆಜ್ಜೆಯಾಗಿದೆ ಎಂದು ಹೇಳಿದರು. ಪ್ರಧಾನಮಂತ್ರಿ ಶ್ರೀ ನರೇಂದ್ರ ಮೋದಿಯವರ ನೇತೃತ್ವದಲ್ಲಿ, ಭಾರತವು ಜನವರಿ 2023 ರಲ್ಲಿ ರಾಷ್ಟ್ರೀಯ ಹಸಿರು ಹೈಡ್ರೋಜನ್ ಮಿಷನ್ ಅನ್ನು ಪ್ರಾರಂಭಿಸುವುದು ಸೇರಿದಂತೆ ಇಂಧನ ಪರಿವರ್ತನೆಯಲ್ಲಿ ಅಭೂತಪೂರ್ವ ಪ್ರಗತಿಯನ್ನು ಸಾಧಿಸಿದೆ ಎಂದು ಅವರು ಹೇಳಿದರು. ಟೊಯೋಟಾ ಮಿರಾಯ್‌ ನಂತಹ ಇಂಧನ ಕೋಶ ವಿದ್ಯುತ್ ವಾಹನ (ಎಫ್‌ ಸಿ ಇ ವಿ) ತಂತ್ರಜ್ಞಾನದ ನೈಜ-ಪ್ರಪಂಚದ ಪರೀಕ್ಷೆಯು ನೀತಿಯಿಂದ ಪ್ರಯೋಗದ ಕಡೆಗೆ ಮತ್ತು ನಂತರ ಹೈಡ್ರೋಜನ್ ಆಧಾರಿತ ಚಲನಶೀಲ ಪರಿಹಾರಗಳ ವಾಣಿಜ್ಯೀಕರಣದ ಕಡೆಗೆ ಭಾರತದ ತ್ವರಿತ ಪ್ರಗತಿಯನ್ನು ಪ್ರದರ್ಶಿಸುತ್ತದೆ ಎಂದು ಸಚಿವರು ಒತ್ತಿ ಹೇಳಿದರು.

ರಾಷ್ಟ್ರೀಯ ಹಸಿರು ಹೈಡ್ರೋಜನ್ ಮಿಷನ್ ಅಡಿಯಲ್ಲಿ ಹೈಡ್ರೋಜನ್ ತಂತ್ರಜ್ಞಾನವನ್ನು ಮುಂದುವರಿಸುವಲ್ಲಿ ಉದ್ಯಮ, ಸಂಶೋಧನಾ ಸಂಸ್ಥೆಗಳು ಮತ್ತು ಸರ್ಕಾರದ ನಡುವಿನ ಬಲವಾದ ಪಾಲುದಾರಿಕೆಯನ್ನು ಶ್ರೀ ನಾಯಕ್ ಶ್ಲಾಘಿಸಿದರು ಮತ್ತು ಭಾರತದ ರಸ್ತೆ ಮತ್ತು ಹವಾಮಾನ ಪರಿಸ್ಥಿತಿಗಳಲ್ಲಿ ಮಿರಾಯ್ ವಾಹನದ ನೈಸ್ ಮೌಲ್ಯಮಾಪನವು ಭವಿಷ್ಯದ ದೊಡ್ಡ ಪ್ರಮಾಣದ ವಿಸ್ತರಣೆಗೆ ಅಗತ್ಯ ಮಾಹಿತಿಯನ್ನು ಒದಗಿಸುತ್ತದೆ ಎಂದು ಒತ್ತಿ ಹೇಳಿದರು. ಈ ಪೈಲಟ್ ಯೋಜನೆಯು ದೇಶಾದ್ಯಂತ ಹೈಡ್ರೋಜನ್ ಆಧಾರಿತ ಸ್ವಚ್ಛ ಸಾರಿಗೆಯನ್ನು ಅಳವಡಿಸಿಕೊಳ್ಳಲು, ಗಾಳಿಯ ಗುಣಮಟ್ಟ ಮತ್ತು ಸುಸ್ಥಿರ ಅಭಿವೃದ್ಧಿಯನ್ನು ಸುಧಾರಿಸಲು ಕೊಡುಗೆ ನೀಡುತ್ತದೆ ಎಂದು ಅವರು ವಿಶ್ವಾಸ ವ್ಯಕ್ತಪಡಿಸಿದರು. ಭಾರತದ ಶುದ್ಧ ಇಂಧನ ಪರಿಸರ ವ್ಯವಸ್ಥೆಯ ಮೇಲೆ ನಿರಂತರ ವಿಶ್ವಾಸ ಹೊಂದಿದ್ದಕ್ಕಾಗಿ ಟೊಯೋಟಾ ಕಿರ್ಲೋಸ್ಕರ್ ಮೋಟಾರ್ ಅನ್ನು ಸಚಿವರು ಅಭಿನಂದಿಸಿದರು ಮತ್ತು ಈ ಪ್ರಮುಖ ಜವಾಬ್ದಾರಿಯನ್ನು ವಹಿಸಿಕೊಂಡಿದ್ದಕ್ಕಾಗಿ ನೈಸ್ ಅನ್ನು ಶ್ಲಾಘಿಸಿದರು ಮತ್ತು ಈ ಉಪಕ್ರಮದ ಯಶಸ್ವಿ ಅನುಷ್ಠಾನಕ್ಕಾಗಿ ಶುಭಾಶಯಗಳನ್ನು ತಿಳಿಸಿದರು.

"ರಾಷ್ಟ್ರೀಯ ಸೌರಶಕ್ತಿ ಸಂಸ್ಥೆ (ಎನ್‌ ಐ ಎಸ್‌ ಇ) ಜೊತೆಗಿನ ಈ ಪಾಲುದಾರಿಕೆ ಮತ್ತು 'ಟೊಯೋಟಾ ಮಿರಾಯ್' ಅನ್ನು ಪರೀಕ್ಷೆ ಮತ್ತು ಪ್ರಯೋಗಗಳಿಗಾಗಿ ಹಸ್ತಾಂತರಿಸುತ್ತಿರುವುದು ಭಾರತದ ಹಸಿರು ಹೈಡ್ರೋಜನ್ ಮಿಷನ್ ಅನ್ನು ಬೆಂಬಲಿಸುವ ಮತ್ತು ಹಸಿರು ಮತ್ತು ಸ್ಥಳೀಯ ಇಂಧನ ಮೂಲಗಳಿಂದ ನಡೆಸಲ್ಪಡುವ ಭವಿಷ್ಯದ ಚಲನಶೀಲತೆಯತ್ತ ದೇಶವನ್ನು ಸಾಗಿಸುವ ನಮ್ಮ ಬದ್ಧತೆಯನ್ನು ಪುನರುಚ್ಚರಿಸುತ್ತದೆ" ಎಂದು ಟೊಯೋಟಾ ಕಿರ್ಲೋಸ್ಕರ್ ಮೋಟಾರ್‌ ನ ಕಾರ್ಪೊರೇಟ್ ವ್ಯವಹಾರಗಳು ಮತ್ತು ಆಡಳಿತದ ದೇಶದ ಮುಖ್ಯಸ್ಥ ಮತ್ತು ಕಾರ್ಯನಿರ್ವಾಹಕ ಉಪಾಧ್ಯಕ್ಷ ಶ್ರೀ ವಿಕ್ರಮ್ ಗುಲಾಟಿ ಹೇಳಿದರು. "ಹೈಡ್ರೋಜನ್ ಇಂಧನ-ಕೋಶ ತಂತ್ರಜ್ಞಾನವು ಇತರ ಸುಸ್ಥಿರ ಸಾರ್ವಜನಿಕ ತಂತ್ರಜ್ಞಾನಗಳೊಂದಿಗೆ ಸೇರಿ ಭಾರತವು ತನ್ನ ನಿವ್ವಳ-ಶೂನ್ಯ ಬದ್ಧತೆ ಮತ್ತು ಇಂಧನ ಸ್ವಾತಂತ್ರ್ಯ ಗುರಿಗಳನ್ನು ಸಾಧಿಸಲು ಸಹಾಯ ಮಾಡುವಲ್ಲಿ ಪ್ರಮುಖ ಪಾತ್ರ ವಹಿಸುತ್ತದೆ ಎಂದು ನಮಗೆ ವಿಶ್ವಾಸವಿದೆ" ಎಂದು ಅವರು ಹೇಳಿದರು. ಈ ಕಾರ್ಯಕ್ರಮದಲ್ಲಿ ಎಂ ಎನ್‌ ಆರ್‌ ಇ ಕಾರ್ಯದರ್ಶಿ ಶ್ರೀ ಸಂತೋಷ್ ಕುಮಾರ್ ಸಾರಂಗಿ, ರಾಷ್ಟ್ರೀಯ ಸೌರಶಕ್ತಿ ಸಂಸ್ಥೆಯ ಮಹಾನಿರ್ದೇಶಕ ಡಾ. ಮೊಹಮ್ಮದ್ ರಿಹಾನ್ ಮತ್ತು ರಾಷ್ಟ್ರೀಯ ಹಸಿರು ಹೈಡ್ರೋಜನ್ ಮಿಷನ್‌ ನ ಮಿಷನ್ ನಿರ್ದೇಶಕ ಶ್ರೀ ಅಭಯ್ ಬಕ್ರೆ ಉಪಸ್ಥಿತರಿದ್ದರು.

ಕಾರ್ಯಕ್ರಮದ ನಂತರ, ಶ್ರೀ ಜೋಶಿ ಇಂದು ಸಂಸತ್ತಿನವರೆಗೆ ವಾಹನವನ್ನು ಚಾಲನೆ ಮಾಡಿದರು ಮತ್ತು ಹಸಿರು ಕಟ್ಟಡವಾಗಿ ವಿನ್ಯಾಸಗೊಳಿಸಲಾದ ಹೊಸ ಸಂಸತ್ತಿನ ಕಟ್ಟಡವು ಮುಂದುವರಿದ ಹೈಡ್ರೋಜನ್ ಚಲನಶೀಲತೆಯನ್ನು ಪ್ರದರ್ಶಿಸಲು ಸೂಕ್ತ ಸ್ಥಳವಾಗಿದೆ ಎಂದು ಹೇಳಿದರು.

ಟೊಯೋಟಾ ಮಿರಾಯ್‌ ಬಗ್ಗೆ

ಎರಡನೇ ತಲೆಮಾರಿನ ಹೈಡ್ರೋಜನ್ ಇಂಧನ ಕೋಶ ವಿದ್ಯುತ್ ವಾಹನ (ಎಫ್‌ ಸಿ ಇ ವಿ) ಟೊಯೋಟಾ ಮಿರಾಯ್, ಜಲಜನಕ ಮತ್ತು ಆಮ್ಲಜನಕದ ನಡುವಿನ ರಾಸಾಯನಿಕ ಕ್ರಿಯೆಯ ಮೂಲಕ ವಿದ್ಯುತ್ ಉತ್ಪಾದಿಸುತ್ತದೆ, ಇದರಲ್ಲಿ ಕೇವಲ ನೀರಿನ ಆವಿ ಉಪ-ಉತ್ಪನ್ನವಾಗಿರುತ್ತದೆ. ಸರಿಸುಮಾರು 650 ಕಿ.ಮೀ ಚಾಲನಾ ವ್ಯಾಪ್ತಿ ಮತ್ತು ಐದು ನಿಮಿಷಗಳಿಗಿಂತ ಕಡಿಮೆ ಇಂಧನ ತುಂಬುವ ಸಮಯದೊಂದಿಗೆ, ಇದು ವಿಶ್ವದ ಅತ್ಯಂತ ಮುಂದುವರಿದ ಮತ್ತು ಪರಿಣಾಮಕಾರಿ ಶೂನ್ಯ-ಹೊರಸೂಸುವಿಕೆ ಸಂಚಾರ ಪರಿಹಾರಗಳಲ್ಲಿ ಒಂದಾಗಿದೆ.

 

*****

(रिलीज़ आईडी: 2202310) आगंतुक पटल : 10