ഭാരത് മാതാ കി – ജയ്!

ഭാരത് മാതാ കി – ജയ്!

വേദിയിൽ സന്നിഹിതരായ ശ്രീ പ്രഫുൽ പട്ടേൽ, എംപിമാരായ ശ്രീ വിനോദ് സോങ്കർ, സിസ്റ്റർ കലാബെൻ, ജില്ലാ പരിഷത്ത് പ്രസിഡന്റ് നിഷ ഭവാർ ജി, രാകേഷ് സിംഗ് ചൗഹാൻ ജി, വൈദ്യശാസ്ത്ര ലോകത്തെ സഹപ്രവർത്തകർ, മറ്റ് വിശിഷ്ട വ്യക്തികൾ, എന്റെ പ്രിയപ്പെട്ട സഹോദരീ സഹോദരന്മാരേ!  നിങ്ങൾക്ക് സുഖമാണോ? എല്ലാവരും സുഖവും, സന്തോഷവുമായിരിക്കുന്നോ! പുരോഗതി കൈവരിക്കുന്നുണ്ടോ! ഞാൻ ഇവിടെ വരുമ്പോഴെല്ലാം എന്റെ ഹൃദയം സന്തോഷം കൊണ്ട് നിറയുന്നു. ദാമൻ, ദിയു, ദാദ്ര, നാഗർ ഹവേലി എന്നിവയുടെ വികസന യാത്ര കാണുന്നത് എനിക്ക് സന്തോഷകരമാണ്. ഇത്രയും ചെറിയ ഒരു പ്രദേശത്ത് നടക്കുന്ന ആധുനികവും സമഗ്രവുമായ വികസനം ആർക്കും സങ്കൽപ്പിക്കാൻ കഴിയില്ല. ഇപ്പോൾ നമുക്ക് കാണിച്ചുതന്ന ഡോക്യുമെന്ററിയിൽ നമ്മൾ ഇത് കണ്ടതാണ്.

സുഹൃത്തുക്കളേ,

ഈ പ്രദേശത്തിന്റെ ഒരു പ്രധാന സവിശേഷത സിൽവാസ്സ ഇപ്പോൾ മുമ്പത്തെപ്പോലെയല്ല, അത് കോസ്മോപൊളിറ്റൻ ആയി മാറിയിരിക്കുന്നു എന്നതാണ്. സിൽവാസ്സയിൽ താമസിക്കാത്ത ആളുകൾ ഇന്ത്യയുടെ ഒരു കോണിലും ഉണ്ടാകില്ല. നിങ്ങളുടെ വേരുകളെ നിങ്ങൾ സ്നേഹിക്കുന്നു, പക്ഷേ ആധുനികതയെയും നിങ്ങൾ ഒരുപോലെ ഇഷ്ടപ്പെടുന്നു. ഈ കേന്ദ്രഭരണ പ്രദേശത്തിന്റെ ഈ ഗുണം മനസ്സിൽ വെച്ചുകൊണ്ട്, കേന്ദ്ര​ഗവൺമെന്റ് വ്യത്യസ്ത തലങ്ങളിൽ വേഗത്തിൽ പ്രവർത്തിക്കുന്നു. നല്ല നിലവാരമുള്ള അടിസ്ഥാന സൗകര്യങ്ങൾ, നല്ല റോഡുകൾ, നല്ല പാലങ്ങൾ, നല്ല സ്കൂളുകൾ, മികച്ച ജലവിതരണം തുടങ്ങിയവയിൽ കേന്ദ്ര​ഗവൺമെന്റ് വളരെയധികം ഊന്നൽ നൽകുന്നു. കഴിഞ്ഞ അഞ്ച് വർഷത്തിനുള്ളിൽ ഈ സൗകര്യങ്ങളെല്ലാം വികസിപ്പിക്കുന്നതിനായി 5,500 കോടിയിലധികം രൂപ ചെലവഴിച്ചു. വൈദ്യുതി ബില്ലുമായി ബന്ധപ്പെട്ട ഒരു സംവിധാനമായാലും LED ഉപയോഗിച്ച് തെരുവ് വിളക്കുകൾ പ്രകാശിപ്പിക്കുന്നതായാലും, ഈ പ്രദേശം വേഗത്തിൽ മാറിക്കൊണ്ടിരിക്കുന്നു. വീടുതോറുമുള്ള മാലിന്യ ശേഖരണ സൗകര്യമായാലും 100% മാലിന്യ സംസ്കരണമായാലും, ഈ കേന്ദ്രഭരണ പ്രദേശം എല്ലാ സംസ്ഥാനങ്ങൾക്കും പ്രചോദനം നൽകുന്നു. ഇവിടെ അവതരിപ്പിച്ചിരിക്കുന്ന പുതിയ വ്യാവസായിക നയം വ്യാവസായിക വികസനത്തിന് ഒരു പ്രോത്സാഹനം നൽകുകയും പുതിയ തൊഴിലവസരങ്ങൾ സൃഷ്ടിക്കുകയും ചെയ്യുന്നു. ഏകദേശം 5,000 കോടി രൂപയുടെ പുതിയ പദ്ധതികൾ ഉദ്ഘാടനം ചെയ്യാൻ ഇന്ന് വീണ്ടും എനിക്ക് അവസരം ലഭിച്ചു. ഈ പദ്ധതികൾ ആരോഗ്യം, ഭവനം, ടൂറിസം, വിദ്യാഭ്യാസം, നഗരവികസനം എന്നിവയുമായി ബന്ധപ്പെട്ടതാണ്. ഇത് ജീവിത സൗകര്യം വർദ്ധിപ്പിക്കും. ഇത് സു​ഗമമായ ടൂറിസം വർദ്ധിപ്പിക്കും. ഇതിലൂടെ സു​ഗമമായ ഗതാഗത സൗകര്യം വികസിക്കും. കൂടാതെ ഇത് സു​ഗമമായ ബിസിനസിനേയും വളർത്തും.

സുഹൃത്തുക്കളേ,

ഇന്ന് ഒരു കാര്യത്തിൽ കൂടി ഞാൻ വളരെ സന്തുഷ്ടനാണ്. ഇന്ന് ഉദ്ഘാടനം ചെയ്യപ്പെട്ട നിരവധി പദ്ധതികളുടെ ശിലാസ്ഥാപനം നടത്താനുള്ള  സവിശേഷ ഭാ​ഗ്യവും നിങ്ങൾ  എനിക്ക് നൽകി. വളരെക്കാലമായി, നമ്മുടെ രാജ്യത്തെ ​ഗവൺമെന്റ് പദ്ധതികൾ വർഷങ്ങളോളം തകരുകയോ, തടസ്സപ്പെടുകയോ, വഴിതെറ്റുകയോ ചെയ്യാറുണ്ടായിരുന്നു. പദ്ധതികൾ പൂർത്തിയാകാതെ പോവുകയും, പലപ്പോഴും, അടിസ്ഥാന ശിലകൾ പോലും പഴയതും ജീർണിച്ചതുമായി മാറുന്നതിനാൽ തകർന്നുവീഴുകയും ചെയ്യുമായിരുന്നു.  എന്നാൽ കഴിഞ്ഞ ഒമ്പത് വർഷത്തിനുള്ളിൽ രാജ്യത്ത് ഒരു പുതിയ തൊഴിൽ സംസ്കാരം വികസിപ്പിച്ചെടുത്തിട്ടുണ്ട്. ഇപ്പോൾ അടിത്തറ പാകിയ ജോലി വേഗത്തിൽ പൂർത്തിയാക്കാൻ എല്ലാ ശ്രമങ്ങളും നടക്കുന്നുണ്ട്. ഒരു ജോലി പൂർത്തിയാക്കിയാലുടൻ നമ്മൾ മറ്റൊന്ന് ആരംഭിക്കുന്നു. സിൽവാസ്സയിലെ ഈ പരിപാടി ഇതിന് നേരിട്ടുള്ള തെളിവാണ്. ഇതിന് നിങ്ങളെയെല്ലാം ഞാൻ വളരെയധികം അഭിനന്ദിക്കുന്നു.

സുഹൃത്തുക്കളേ,

'സബ്കാ സാത്ത്, സബ്കാ വികാസ്, സബ്കാ വിശ്വാസ്, സബ്കാ പ്രയാസ്' എന്ന മന്ത്രത്തിലാണ് കേന്ദ്രത്തിലെ ബിജെപി ​ഗവൺമെന്റ് പ്രവർത്തിക്കുന്നത്. രാജ്യത്തിന്റെ ഓരോ പ്രദേശത്തിന്റെയും വികസനത്തിനും, രാജ്യത്തിന്റെ ഓരോ പ്രദേശത്തിന്റെയും സന്തുലിത വികസനത്തിനും ഞങ്ങൾ വളരെയധികം ഊന്നൽ നൽകുന്നു. പക്ഷേ, പതിറ്റാണ്ടുകളായി വികസനത്തെ രാഷ്ട്രീയത്തിന്റെയും വോട്ട് ബാങ്കിന്റെയും കണ്ണിലൂടെ കണ്ടിരുന്നത്  രാജ്യത്തിന്റെ ദൗർഭാഗ്യമായിരുന്നു. സ്കീമുകളുടേയും പദ്ധതികളുടെയും പ്രഖ്യാപനങ്ങൾക്ക് പിന്നിൽ നിരവധി പരിഗണനകളുണ്ടായിരുന്നു. എന്നിരുന്നാലും, വോട്ടുകളും ഏത് വിഭാഗത്തെ പ്രീണിപ്പിച്ച് വോട്ട് നേടാമെന്നതും മനസ്സിൽ വെച്ചാണ് ആ പ്രഖ്യാപനങ്ങളെല്ലാം നടത്തിയത്. പ്രവേശനം ലഭിക്കാത്തവരും, ശബ്ദം ദുർബലരായവരും ദാരിദ്ര്യത്തിൽ തന്നെ തുടർന്നു, വികസന യാത്രയിൽ അവർ പിന്നോട്ട് പോയി. നമ്മുടെ ഗോത്ര, അതിർത്തി പ്രദേശങ്ങൾ വികസനം നിഷേധിക്കപ്പെട്ടതിന്റെ കാരണം ഇതാണ്. നമ്മുടെ മത്സ്യത്തൊഴിലാളികൾ സ്വയം സംരക്ഷിക്കേണ്ടിവന്നു. ദാമൻ, ദിയു, ദാദ്ര, നാഗർ ഹവേലി എന്നിവയ്ക്കും ഈ മനോഭാവത്തിന് വലിയ വില നൽകേണ്ടിവന്നു.

ഞാൻ ഗുജറാത്തിലായിരുന്നപ്പോൾ (മുഖ്യമന്ത്രി എന്ന നിലയിൽ) ഈ ആളുകൾ എന്താണ് ചെയ്യുന്നതെന്ന് ഞാൻ നിരീക്ഷിച്ചിരുന്നു. ഇന്ന് സ്വന്തമായി ഒരു കാമ്പസ് ഉള്ള മെഡിക്കൽ കോളേജും ഈ അനീതിക്ക് സാക്ഷ്യം വഹിച്ചിട്ടുണ്ട്. സുഹൃത്തുക്കളേ, നിങ്ങൾ ഇതിനെക്കുറിച്ച് ചിന്തിക്കൂ. സ്വാതന്ത്ര്യം ലഭിച്ച് പതിറ്റാണ്ടുകൾ പിന്നിട്ടിരിക്കുന്നു, പക്ഷേ ദാമൻ, ദിയു, ദാദ്ര, നാഗർ ഹവേലി എന്നിവിടങ്ങളിൽ ഒരു മെഡിക്കൽ കോളേജ് നിർമ്മിച്ചിട്ടില്ല. ഇവിടുത്തെ യുവാക്കളിൽ ചുരുക്കം പേർക്ക് മാത്രമേ എങ്ങനെയെങ്കിലും വൈദ്യശാസ്ത്രം പഠിക്കാൻ അവസരം ലഭിക്കുമായിരുന്നു, അതും മറ്റൊരിടത്ത്. ആദിവാസി കുടുംബങ്ങളിലെ പുത്രന്മാരുടെയും പുത്രിമാരുടെയും പങ്കാളിത്തം തുച്ഛമായിരുന്നു. പതിറ്റാണ്ടുകളായി രാജ്യം ഭരിച്ചവർ ഇവിടുത്തെ യുവാക്കൾക്കെതിരെ ഈ ​ഗുരുതരമായ അനീതി കാണിക്കുന്നതിനെക്കുറിച്ച് ഒരിക്കലും ആശങ്കാകുലരായിരുന്നില്ല. ഈ ചെറിയ കേന്ദ്രഭരണ പ്രദേശം വികസിപ്പിച്ചുകൊണ്ട് തങ്ങൾക്ക് ഒന്നും നേടാനാവില്ലെന്ന് അവർ കരുതി. നിങ്ങളുടെ അനുഗ്രഹങ്ങളെ അവർക്ക് ഒരിക്കലും വിലമതിക്കാൻ കഴിയില്ല. 2014 ൽ നിങ്ങൾ ഞങ്ങൾക്ക് രാജ്യത്തെ സേവിക്കാൻ അവസരം നൽകിയപ്പോൾ, സമർപ്പണത്തോടെ സേവിക്കാനുള്ള മനസ്സോടെ ഞങ്ങൾ പ്രവർത്തിക്കാൻ തുടങ്ങി. അതിന്റെ ഫലമായി, ദാമൻ, ദിയു, ദാദ്ര, നാഗർ ഹവേലിക്ക് ആദ്യത്തെ നാഷണൽ അക്കാദമിക് മെഡിക്കൽ ഓർഗനൈസേഷൻ (NAMO) മെഡിക്കൽ കോളേജ് ലഭിച്ചു. ഇപ്പോൾ ഏകദേശം 150 പ്രാദേശിക യുവാക്കൾക്ക് എല്ലാ വർഷവും വൈദ്യശാസ്ത്രം പഠിക്കാൻ അവസരം ലഭിക്കുന്നു. ഏതാനും വർഷങ്ങൾക്കുള്ളിൽ, വളരെ അടുത്ത ഭാവിയിൽ, ഇവിടെ 1,000 ഡോക്ടർമാർ വരെ തയ്യാറാകും. ഇത്രയും ചെറിയ ഒരു പ്രദേശത്ത് 1,000 ഡോക്ടർമാരെ നിങ്ങൾ സങ്കൽപ്പിക്കൂ. പ്രധാനമായി, ഈ മേഖലയിൽ ഞങ്ങളുടെ ആദിവാസി കുടുംബങ്ങളിൽ നിന്നുള്ള യുവാക്കളുടെ എണ്ണം തുടർച്ചയായി വർദ്ധിച്ചുകൊണ്ടിരിക്കുകയാണ്. ഞാൻ ഇവിടെ വരുന്നതിനുമുമ്പ് ഒരു മകളെക്കുറിച്ചുള്ള ഒരു വാർത്താ റിപ്പോർട്ടും ഞാൻ വായിച്ചിരുന്നു. ഒരു ആദിവാസി കുടുംബത്തിൽ നിന്നുള്ള ഈ പെൺകുട്ടി ഇപ്പോൾ ഇവിടെ ഒന്നാം വർഷ മെഡിക്കൽ പഠനം നടത്തുന്നു. തന്റെ മുഴുവൻ ഗ്രാമത്തിലും തന്റെ കുടുംബത്തെ മാറ്റിനിർത്തി ആർക്കും ഒരിക്കലും ഡോക്ടറാകാൻ കഴിയില്ലെന്ന് ആ മകൾ മാധ്യമങ്ങളോട് പറഞ്ഞു. ദാദ്ര, നാഗർ ഹവേലിയിൽ ഈ മെഡിക്കൽ കോളേജ് സ്ഥാപിതമായതും അവൾ അവിടുത്തെ വിദ്യാർത്ഥിനിയായതും തന്റെ ഭാഗ്യമായി ആ മകൾ കരുതുന്നു.

സുഹൃത്തുക്കളേ,

സേവിക്കാനുള്ള മനസ്സാണ് ഇവിടുത്തെ ജനങ്ങളുടെ സവിശേഷ വ്യക്തിത്വം. കൊറോണ മഹാമാരിയുടെ സമയത്ത് ഇവിടുത്തെ മെഡിക്കൽ വിദ്യാർത്ഥികൾ മുന്നോട്ട് പോയി ജനങ്ങളെ സഹായിച്ചത് ഞാൻ ഓർക്കുന്നു. കൊറോണയുടെ സമയത്ത്, കുടുംബത്തിലെ ആർക്കും പരസ്പരം സഹായിക്കാൻ കഴിഞ്ഞില്ല. ആ സമയത്ത്, ഗ്രാമങ്ങളെ സഹായിക്കാൻ വിദ്യാർത്ഥികൾ മുന്നോട്ട് വന്നു. 'മൻ കി ബാത്ത്' എന്ന പരിപാടിയിൽ നിങ്ങൾ നടത്തുന്ന ഗ്രാമ ദത്തെടുക്കൽ പരിപാടിയെക്കുറിച്ചും ഞാൻ പരാമർശിച്ചതായി ആ വിദ്യാർത്ഥി സുഹൃത്തുക്കളോട് പറയാൻ ഞാൻ ആഗ്രഹിക്കുന്നു. ഇവിടുത്തെ ഡോക്ടർമാരും മെഡിക്കൽ വിദ്യാർത്ഥികളും അവരുടെ കർത്തവ്യങ്ങൾ നിർവഹിച്ച രീതി എല്ലാവർക്കും വലിയ പ്രചോദനമാണ്. ഇന്ന്, ഇവിടുത്തെ മെഡിക്കൽ സൗകര്യവുമായി ബന്ധപ്പെട്ട എല്ലാവരെയും അവർ ചെയ്യുന്ന പ്രവർത്തനത്തിന് ഞാൻ അഭിനന്ദിക്കുന്നു.

സഹോദരീ സഹോദരന്മാരേ,

സിൽവാസ്സയിലെ ഈ പുതിയ മെഡിക്കൽ കോളേജ് ഇവിടുത്തെ ആരോഗ്യ സൗകര്യങ്ങളുടെ മേലുള്ള സമ്മർദ്ദം കുറയ്ക്കും. സമീപത്തുള്ള സിവിൽ ആശുപത്രിയിലും വളരെയധികം സമ്മർദ്ദമുണ്ടായിരുന്നുവെന്ന് നിങ്ങൾക്കറിയാം. ഇപ്പോൾ ദാമനിൽ 300 കിടക്കകളുള്ള മറ്റൊരു പുതിയ ആശുപത്രി കൂടി നിർമ്മിക്കുന്നു. ഒരു ആയുർവേദ ആശുപത്രി നിർമ്മിക്കുന്നതിനും ​ഗവൺമെന്റ് അനുമതി നൽകിയിട്ടുണ്ട്. സിൽവാസ്സയും ഈ പ്രദേശം മുഴുവൻ സമീപഭാവിയിൽ ആരോഗ്യ സൗകര്യങ്ങളുടെ കാര്യത്തിൽ വളരെ പ്രാപ്തമാകും.

സുഹൃത്തുക്കളേ,

ഗുജറാത്ത് മുഖ്യമന്ത്രിയായിരിക്കെ ഞാൻ പലതവണ നിങ്ങൾക്കൊപ്പം വന്നതായി നിങ്ങൾ ഓർക്കുന്നുണ്ടാകും. ഞാൻ ഗുജറാത്ത് ​ഗവൺമെന്റ് ഭരിക്കവേ​, അംബാജി മുതൽ ഉമർഗാം വരെയുള്ള ആദിവാസി മേഖലയിലെ ഒരു സ്കൂളിലും ശാസ്ത്രം പഠിപ്പിക്കുന്നില്ലെന്ന് ഞാൻ കണ്ടെത്തി. ശാസ്ത്ര പഠനം ഇല്ലെങ്കിൽ കുട്ടികൾ എങ്ങനെ ഡോക്ടർമാരും എഞ്ചിനീയർമാരുമാകും? അതിനാൽ, അവിടെയുള്ള സ്കൂളുകളിലും കോളേജുകളിലും ഞാൻ ശാസ്ത്രം അവതരിപ്പിച്ചു. മറ്റ് ഭാഷകളിൽ പഠിക്കുമ്പോൾ നമ്മുടെ ഗോത്ര കുട്ടികൾ ഒരു വലിയ പ്രശ്നം നേരിടുന്നു. ഏതൊരു കുട്ടിയും ഈ പ്രശ്നം നേരിടുന്നു. ഇംഗ്ലീഷ് മീഡിയം കാരണം ഗ്രാമങ്ങളിലെയും ദരിദ്രരുടെയും ദളിതരുടെയും പിന്നാക്കക്കാരുടെയും ആദിവാസി കുടുംബങ്ങളിലെയും നിരവധി കഴിവുള്ള ആൺമക്കൾക്കും പെൺമക്കൾക്കും ഡോക്ടർമാരും എഞ്ചിനീയർമാരുമാകാൻ കഴിഞ്ഞില്ല. നമ്മുടെ ​ഗവൺമെന്റ് ഇപ്പോൾ ഈ പ്രശ്‌നവും പരിഹരിച്ചു. ഇപ്പോൾ ഇന്ത്യൻ ഭാഷകളിൽ, നിങ്ങളുടെ സ്വന്തം ഭാഷയിൽ വൈദ്യശാസ്ത്രവും എഞ്ചിനീയറിംഗും പഠിക്കാനുള്ള മാർ​ഗമുണ്ട്. ഇത് ഈ പ്രദേശത്തെ കുട്ടികൾക്കും ഗുണം ചെയ്യും. ഇപ്പോൾ ഒരു ദരിദ്ര അമ്മയുടെ കുട്ടിക്കും ഡോക്ടറാകാൻ സ്വപ്നം കാണാൻ കഴിയും.

സുഹൃത്തുക്കളേ,

ഇന്ന്, മെഡിക്കൽ കോളേജിനൊപ്പം, എഞ്ചിനീയറിംഗ് കോളേജും ഇവിടെ ഉദ്ഘാടനം ചെയ്യപ്പെട്ടു. തൽഫലമായി, ഇവിടെ നിന്നുള്ള ഏകദേശം 300 യുവാക്കൾക്ക് എല്ലാ വർഷവും എഞ്ചിനീയറിംഗ് പഠിക്കാൻ അവസരം ലഭിക്കും. രാജ്യത്തെ പ്രധാന വിദ്യാഭ്യാസ സ്ഥാപനങ്ങൾ ദാമൻ, ദിയു, ദാദ്ര, നാഗർ ഹവേലി എന്നിവിടങ്ങളിൽ അവരുടെ കാമ്പസുകൾ തുറക്കുന്നതിലും ഞാൻ സന്തോഷിക്കുന്നു. എൻഐഎഫ്ടിയുടെ സാറ്റലൈറ്റ് കാമ്പസ് ദാമനിൽ വന്നിരിക്കുന്നു, ഗുജറാത്ത് നാഷണൽ ലോ യൂണിവേഴ്സിറ്റിയുടെ കാമ്പസ് സിൽവാസ്സയിലാണ്, ഐഐഐടി വഡോദര അതിന്റെ കാമ്പസ് ദിയുവിൽ തുറന്നു. ഈ പുതിയ മെഡിക്കൽ കോളേജ് സിൽവാസ്സയുടെ സൗകര്യങ്ങളെ ഒരു പുതിയ തലത്തിലേക്ക് കൊണ്ടുപോകും. ഈ മേഖലയിലെ ഓരോ വിദ്യാർത്ഥിയുടെയും ശോഭനമായ ഭാവി ഉറപ്പാക്കാൻ നമ്മുടെ ഗവൺമെന്റ് സാധ്യമായ എല്ലാ ശ്രമങ്ങളും നടത്തുമെന്ന് ഞാൻ ഉറപ്പ് നൽകുന്നു.

സഹോദരീ സഹോദരന്മാരേ,

കഴിഞ്ഞ തവണ ഞാൻ സിൽവാസയിൽ വന്നപ്പോൾ, വികസനത്തിന്റെ 'പഞ്ച്ധാര' (അഞ്ച് മാനദണ്ഡങ്ങൾ) യെക്കുറിച്ച് സംസാരിച്ചിരുന്നു. വികസനത്തിന്റെ 'പഞ്ച്ധാര' എന്നാൽ കുട്ടികളുടെ വിദ്യാഭ്യാസം, യുവാക്കൾക്ക് വരുമാന സ്രോതസ്സ്, മുതിർന്നവർക്ക് ആരോഗ്യ സംരക്ഷണം, കർഷകർക്ക് ജലസേചന സൗകര്യങ്ങൾ, സാധാരണ പൗരന്മാർക്ക് പരിഹാരം എന്നിവയാണ്. ഇന്ന് ഞാൻ അതിലേക്ക് ഒരു മാനദണ്ഡം കൂടി ചേർക്കാൻ ആഗ്രഹിക്കുന്നു. സ്ത്രീകൾക്ക് വീടുകളുടെ ഉടമസ്ഥാവകാശം എന്നതാണ് അത്. അവർക്ക് നിരവധി അഭിനന്ദനങ്ങൾ. കഴിഞ്ഞ കുറച്ച് വർഷങ്ങളായി രാജ്യത്തെ മൂന്ന് കോടിയിലധികം ദരിദ്ര കുടുംബങ്ങൾക്ക് നമ്മുടെ ​ഗവൺമെന്റ് പക്കാ വീടുകൾ നൽകിയിട്ടുണ്ട്. ഇവിടെയും, ദരിദ്രർക്കായി 15,000-ത്തിലധികം വീടുകൾ നിർമ്മിക്കാൻ നമ്മുടെ ​ഗവൺമെന്റ് പ്രതിജ്ഞാബദ്ധമാണ്. ഈ വീടുകളിൽ ഭൂരിഭാഗവും തയ്യാറായിക്കഴിഞ്ഞു. ഇന്ന്, 1200-ലധികം കുടുംബങ്ങൾക്ക് ഇവിടെ സ്വന്തമായി വീടുകൾ ഉണ്ട്. പ്രധാനമന്ത്രി ആവാസ് യോജനയ്ക്ക് കീഴിൽ നൽകുന്ന വീടുകളിൽ സ്ത്രീകൾക്കും തുല്യ പങ്ക് നൽകുന്നുണ്ടെന്ന് നിങ്ങൾ അറിഞ്ഞിരിക്കണം. മറ്റൊരു വിധത്തിൽ പറഞ്ഞാൽ, ദാമൻ, ദിയു, ദാദ്ര, നാഗർ ഹവേലി എന്നിവിടങ്ങളിൽ നിന്നുള്ള ആയിരക്കണക്കിന് സ്ത്രീകളെ അവരുടെ വീടുകളുടെ ഉടമകളാക്കി നമ്മുടെ ​ഗവൺമെന്റ് മാറ്റിയിരിക്കുന്നു. അല്ലാത്തപക്ഷം, നമ്മുടെ രാജ്യത്തെ വ്യവസ്ഥ നമുക്കറിയാം. വീടിന്റെയും, കൃഷിയിടത്തിന്റെയും, കടയുടെയും, കാറിന്റെയും ഉടമ പുരുഷനാണ്. സ്കൂട്ടർ ഉണ്ടെങ്കിൽ പോലും, ഉടമയും പുരുഷനാണ്. സ്ത്രീയുടെ പേരിൽ ഒന്നുമില്ല. ഈ വീടുകളുടെ ഉടമസ്ഥാവകാശം ഞങ്ങൾ സ്ത്രീകൾക്ക് നൽകിയിട്ടുണ്ട്. പ്രധാനമന്ത്രി ആവാസ് യോജന പ്രകാരം നിർമ്മിക്കുന്ന ഓരോ വീടിന്റെയും വില നിരവധി ലക്ഷം രൂപയാണെന്ന് നിങ്ങൾക്കറിയാം. അതിനാൽ, വീട് ലഭിച്ച സ്ത്രീകൾ ലക്ഷക്കണക്കിന് രൂപയുടെ മൂല്യമുള്ളവരാണ്. തൽഫലമായി, നമ്മുടെ ദരിദ്ര കുടുംബങ്ങളിലെ ഈ അമ്മമാരും സഹോദരിമാരും 'ലഖ്പതി ദീദി'കളായി മാറിയിരിക്കുന്നു. ഇപ്പോൾ അവർ 'ലഖ്പതി ദീദി' എന്ന് അറിയപ്പെടും, കാരണം അവർ ഒരു ലക്ഷം രൂപയിൽ കൂടുതൽ വിലയുള്ള വീടിന്റെ ഉടമയായി. ഈ 'ലഖ്പതി ദീദി'കളെ ഞാൻ പ്രത്യേകം അഭിനന്ദിക്കുന്നു.

സുഹൃത്തുക്കളേ,

ഇന്ത്യയുടെ പരിശ്രമം കാരണം ഇന്ന് ലോകം മുഴുവൻ ഈ വർഷം അന്താരാഷ്ട്ര മില്ലറ്റ് വർഷമായി ആഘോഷിക്കുകയാണ്. മില്ലറ്റുകൾക്ക് അതായത് ചെറുധാന്യങ്ങൾക്ക് നമ്മുടെ ​ഗവൺമെന്റ് 'ശ്രീ അന്ന' എന്ന സവിശേഷ നാമം നൽകിയിട്ടുണ്ട്. റാഗി അല്ലെങ്കിൽ പ്രാദേശിക ഭാഷയായ നാഗ്ലി അല്ലെങ്കിൽ നാച്ച്നി പോലുള്ള ഇവിടുത്തെ കർഷകർ വളർത്തുന്ന മില്ലറ്റുകളെ നമ്മുടെ ​ഗവൺമെന്റ് പ്രോത്സാഹിപ്പിക്കുന്നു. ഇന്ന്, റാഗിയിൽ നിന്ന് ഉണ്ടാക്കുന്ന മാവ്, കുക്കികൾ, ഇഡ്ഡലി അല്ലെങ്കിൽ ലഡ്ഡു എന്നിവയുടെ ഉപഭോഗം വർദ്ധിച്ചുകൊണ്ടിരിക്കുകയാണ്, കർഷകരും ഇതിൽ നിന്ന് പ്രയോജനം നേടുന്നു. 'മൻ കി ബാത്ത്' പരിപാടിയിൽ ഞാൻ ഇത് പലപ്പോഴും പരാമർശിക്കാറുണ്ട്. അടുത്ത ഞായറാഴ്ച, 'മൻ കി ബാത്തിന്റെ' നൂറാം എപ്പിസോഡ് സംപ്രേഷണം ചെയ്യുമെന്ന് നിങ്ങൾക്കറിയാം. ഇന്ത്യയിലെ ജനങ്ങളുടെ പരിശ്രമങ്ങൾ എടുത്തുകാണിക്കുന്നതിനും ഇന്ത്യയുടെ പ്രത്യേകതകളെ മഹത്വവൽക്കരിക്കുന്നതിനും 'മാൻ കി ബാത്ത്' വളരെ നല്ല വേദിയായി മാറിയിരിക്കുന്നു. നിങ്ങളെപ്പോലെ, ഞായറാഴ്ചത്തെ നൂറാം എപ്പിസോഡിനായി ഞാനും ആകാംക്ഷയോടെ കാത്തിരിക്കുകയാണ്.

സുഹൃത്തുക്കളേ,

വളർന്നുവരുന്ന ഈ സൗകര്യങ്ങൾക്കിടയിൽ, ഇന്ത്യയിലെ തീരദേശ ടൂറിസത്തിന്റെ തിളക്കമുള്ള സ്ഥലങ്ങളായി ദാമൻ, ദിയു, ദാദ്ര, നാഗർ ഹവേലി എന്നിവയും ഞാൻ കാണുന്നു. ദാമൻ, ദിയു, ദാദ്ര-നാഗർ ഹവേലി എന്നിവയ്ക്ക് രാജ്യത്തെ പ്രധാന വിനോദസഞ്ചാര കേന്ദ്രങ്ങളായി ഉയർന്നുവരാനുള്ള കഴിവുണ്ട്. ഇന്ത്യയെ ലോകത്തിലെ ഏറ്റവും ആകർഷകമായ ടൂറിസം കേന്ദ്രമാക്കി മാറ്റാൻ നമ്മൾ പ്രവർത്തിക്കുമ്പോൾ, അതിന്റെ പ്രാധാന്യം കൂടുതൽ വർദ്ധിച്ചു. ദാമനിൽ നിർമ്മിച്ച രണ്ട് കടൽത്തീരങ്ങളായ രാം സേതു, നാനി ദാമൻ മറൈൻ ഓവർവ്യൂ (നമോ) പാത എന്നിവയും ഇവിടെ ടൂറിസം വികസിപ്പിക്കുന്നതിൽ ഒരു പ്രധാന പങ്ക് വഹിക്കും. വാരാന്ത്യങ്ങളിൽ ഇവിടെയെത്തുന്ന വിനോദസഞ്ചാരികൾക്ക് ഇത് പ്രിയപ്പെട്ട സ്ഥലമായി മാറാൻ പോകുന്നു. വിനോദസഞ്ചാരികളുടെ സൗകര്യാർത്ഥം ബീച്ചുകളിൽ പുതിയ ടെന്റ് സിറ്റികൾ നിർമ്മിക്കുന്നുണ്ടെന്ന് എന്നോട് പറഞ്ഞു. കുറച്ച് സമയത്തിന് ശേഷം, ഞാൻ തന്നെ നാനി ദാമൻ മറൈൻ ഓവർവ്യൂ (നമോ) പാത സന്ദർശിക്കാൻ പോകുന്നു. ഈ കടൽത്തീരം തീർച്ചയായും രാജ്യത്തുനിന്നും ലോകമെമ്പാടുമുള്ള വിനോദസഞ്ചാരികളെ ആകർഷിക്കും. ഇതോടൊപ്പം, ഖാൻവേൽ നദീതീരത്തിന്റെ നിർമ്മാണം, ദുധാനി ജെട്ടി, ഇക്കോ റിസോർട്ട് മുതലായവയും ഇവിടെ ടൂറിസത്തെ പ്രോത്സാഹിപ്പിക്കും. തീരദേശ സഞ്ചാരപാതയും, ബീച്ച് വികസന പദ്ധതികളും പൂർത്തിയാകുമ്പോൾ, ഈ സ്ഥലത്തിന്റെ ആകർഷണം കൂടുതൽ വർദ്ധിക്കും. ഇത് പുതിയ തൊഴിലവസരങ്ങളും സ്വയം തൊഴിൽ അവസരങ്ങളും സൃഷ്ടിക്കുന്നതിലേക്ക് നയിക്കും.

സഹോദരീ സഹോദരന്മാരേ,

ഇന്ന് രാജ്യത്ത് പ്രീതിപ്പെടുത്തലിലല്ല, സംതൃപ്തിയിലാണ് ഊന്നൽ നൽകുന്നത്. കഴിഞ്ഞ ഒമ്പത് വർഷമായി പിന്നോക്ക വിഭാഗങ്ങൾക്ക് മുൻഗണന നൽകുന്നത് സദ്ഭരണത്തിന്റെ മുഖമുദ്രയായി മാറിയിരിക്കുന്നു. രാജ്യത്തെ എല്ലാ ദരിദ്രർക്കും, പിന്നാക്ക വിഭാഗങ്ങൾക്കും, പിന്നാക്ക പ്രദേശങ്ങൾക്കും സൗകര്യങ്ങൾ നൽകുന്നതിന് കേന്ദ്ര ​ഗവൺമെന്റ് വേഗത്തിൽ പ്രവർത്തിക്കുന്നു. പദ്ധതികളുടെ പൂർത്തീകരണം ഉണ്ടാകുമ്പോൾ, ​ഗവൺമെന്റ് തന്നെ ജനങ്ങളുടെ വീട്ടുപടിക്കൽ എത്തുമ്പോൾ, വിവേചനത്തിനും, അഴിമതിക്കും, സ്വജനപക്ഷപാതത്തിനും അറുതി വരുന്നു. കേന്ദ്ര ​ഗവൺമെന്റിന്റെ വിവിധ പദ്ധതികളെ സംബന്ധിച്ചിടത്തോളം, ദാമൻ, ദിയു, ദാദ്ര നാഗർ ഹവേലി എന്നിവ പരിപൂർണതയുടെ അടുത്തെത്തിയതിൽ ഞാൻ സന്തോഷിക്കുന്നു. നിങ്ങളുടെ പരിശ്രമത്തിലൂടെ അഭിവൃദ്ധി ഉണ്ടാകും, വികസിത ഇന്ത്യ എന്ന ദൃഢനിശ്ചയം കൈവരിക്കും. വികസന പദ്ധതികൾക്ക് നിങ്ങൾക്കെല്ലാവർക്കും വീണ്ടും നിരവധി അഭിനന്ദനങ്ങൾ.

ഭാരത് മാതാ കി - ജയ്!

ഭാരത് മാതാ കി - ജയ്!

വളരെ നന്ദി.

-NK-