دستیاب معلومات کے مطابق گنگا کی پانچ مرکزی ریاستوں میں پیدا ہونے والا کل سیوریج تقریباً 10,160 ایم ایل ڈی ہے، جس کے مقابلے میں 7,820 ایم ایل ڈی کی فعال ایس ٹی پی صلاحیت موجود ہے۔ اس خلا کو پُر کرنے کے لیے 1,996 ایم ایل ڈی کی اضافی گنجائش والے منصوبے مختلف مراحلِ تکمیل میں ہیں۔

منصوبوں کے آغاز اور تکمیل میں تاخیر کی اہم وجوہات درج ذیل ہیں:

• نئے سیوریج ٹریٹمنٹ پلانٹس (ایس ٹی پیز) کے قیام کے لیے موزوں اراضی کی نشاندہی۔
• سیوریج نیٹ ورک بچھانے کے لیے راستۂ حق، سڑک کاٹنے کی اجازت اور جنگلات و محصولات کے محکموں جیسے متعلقہ حکام سے نو آبجیکشن سرٹیفکیٹ (این او سی) کے حصول سمیت قانونی منظوریوں کا اجرا۔

ان چیلنجوں سے نمٹنے کے لیے نیشنل مشن فار کلین گنگا (این ایم سی جی) منصوبوں کی بروقت تکمیل کو یقینی بنانے کے لیے تازہ ڈی پی آر کی تیاری سمیت ان کی پیش رفت کی قریب سے نگرانی کرتا ہے۔ این ایم سی جی باقاعدگی سے مجاز اتھارٹی کی صدارت میں اور مرکزی نگرانی کمیٹی (سی ایم سی) کے ذریعے پیش رفت کا جائزہ لینے، رکاوٹوں کی بروقت نشاندہی کرنے اور مؤثر حل کے لیے جامع جائزہ اجلاس منعقد کرتا ہے۔

سنٹرل پولیوشن کنٹرول بورڈ (سی پی سی بی) گنگا کے پانچ مرکزی دھارے والی ریاستوں—
اتراکھنڈ (19 مقامات)، اتر پردیش (41)، بہار (33)، جھارکھنڈ (04) اور مغربی بنگال (15)—میں مجموعی طور پر 112 مقامات پر دریائے گنگا کے پانی کے معیار کی دستی نگرانی کرتا ہے۔

آلودہ دریا کے حصوں (پی آر ایس) 2025 پر سی پی سی بی کی رپورٹ کے مطابق، گنگا کے مرکزی دھارے میں آلودگی سے متعلق درج ذیل معلومات دستیاب ہیں:

 

 

گنگا کے مرکزی دھارے کا ریاست وار تقابلی جائزہ (2018 بمقابلہ 2025)

 

 

 

 

 

 

 

 

 

 

 

 

 

 

 

 

 

 

 

سال 2025 (جنوری تا اگست) کے لیے دریائے گنگا کے پانی کے معیار کے اعداد و شمار (درمیانی اقدار) کی بنیاد پر درج ذیل مشاہدات سامنے آئے ہیں:

• پی ایچ اور تحلیل شدہ آکسیجن (ڈی او) دریا کی صحت کے نہایت اہم پیرامیٹرز ہیں۔ دریائے گنگا میں پی ایچ اور ڈی او کی سطح تمام مقامات پر نہانے کے معیار کے لیے مقررہ معیارات پر پورا اترتی ہے۔
• دریائے گنگا کے پانی کا معیار اتراکھنڈ، جھارکھنڈ، بہار اور مغربی بنگال میں مکمل طور پر نہانے کے معیار کے مطابق پایا گیا، سوائے چند مقامات کے جہاں بائیوکیمیکل آکسیجن ڈیمانڈ (بی او ڈی) معیارات سے زیادہ ریکارڈ کی گئی۔ ان میں شامل ہیں:
  • فرخ آباد تا پرانا راجا پور، کانپور
  • ڈلماؤ، رائے بریلی
  • ڈی/ایس مرزا پور تا تاری گھاٹ، غازی پور (دو مقامات یعنی یو/ایس وارانسی—سنگم کے بعد گومتی—اور یو/ایس غازی پور کے علاوہ

2024-25 کے دوران دریائے گنگا اور اس کی معاون ندیوں کے ساتھ 50 مقامات اور دریائے جمنا اور اس کی معاون ندیوں کے ساتھ 26 مقامات پر کی گئی بائیو مانیٹرنگ کے مطابق حیاتیاتی پانی کا معیار (بی ڈبلیو کیو) عمومی طور پر ’اچھے‘ سے ’معتدل‘ درجے تک رہا۔ متنوع بنتھک میکرو-اِنورٹیبریٹ انواع کی موجودگی دریاؤں کی ماحولیاتی صحت اور آبی حیات کو برقرار رکھنے کی صلاحیت کو ظاہر کرتی ہے۔

دریائے گنگا میں ڈولفنوں کی آبادی گزشتہ دہائی میں نمایاں طور پر بڑھی ہے۔ 2009 میں 2500–3000 کی تخمینہ بنیاد سے یہ تعداد 2015 میں بڑھ کر تقریباً 3500 ہو گئی، جبکہ 2021–2023 کے ملک گیر سروے کے مطابق ڈولفنوں کی کل آبادی 6327 تک پہنچ گئی۔ یہ 2009 کے بعد سے دو گنا سے زیادہ اضافے کی نمائندگی کرتا ہے۔
2021–2023 کی تشخیص میں گنگا کے طاس کی 17 معاون ندیوں میں ڈولفنوں کی موجودگی کی تصدیق بھی ہوئی، جن میں کئی ایسی ندیاں شامل ہیں جہاں پہلے یہ ریکارڈ نہیں تھیں، جیسے: روپ نارائن، گروا، کوریالا، بابا، راپتی، باگمتی، مہانندا، کین، بیتوا اور سندھ۔

دریائے گنگا اور اس کی معاون ندیوں کے ساتھ پانی کے معیار کو بہتر بنانے کے لیے نیشنل مشن فار کلین گنگا (این ایم سی جی) کے ذریعے اٹھائے گئے اہم اقدامات درج ذیل ہیں:

آلودہ دریا کے علاقوں کی بحالی کے لیے 34,809 کروڑ روپے کی لاگت سے مجموعی طور پر 216 سیوریج انفراسٹرکچر پروجیکٹس (ایس ٹی پیز) شروع کیے گئے ہیں، جن کی مجموعی ٹریٹمنٹ صلاحیت 6,561 ملین لیٹر یومیہ (ایم ایل ڈی) ہے۔ ان میں سے 138 ایس ٹی پیز، جن کی مشترکہ صلاحیت 3,806 ایم ایل ڈی ہے، مکمل ہوچکے ہیں اور فعال ہیں۔
اس کے علاوہ کامن ایفلوئنٹ ٹریٹمنٹ پلانٹس (سی ای ٹی پیز) کی منظوری دی گئی ہے، جن میں جاجماؤ سی ای ٹی پی (20 ایم ایل ڈی)، بنتھر سی ای ٹی پی (4.5 ایم ایل ڈی) اور متھرا سی ای ٹی پی (6.25 ایم ایل ڈی) شامل ہیں۔ متھرا اور جاجماؤ کے دونوں سی ای ٹی پیز مکمل کیے جا چکے ہیں۔

مجموعی طور پر آلودگی پھیلانے والی صنعتوں (جی پی آئی) کا سالانہ معائنہ 2017 میں شروع کیا گیا تھا۔ سال 2025 میں معائنہ کے آٹھویں دور کے دوران 3,726 جی پی آئی شناخت کیے گئے۔ ان میں سے 3,023 جی پی آئی کا ٹی پی اے کے ذریعے معائنہ کیا جا چکا ہے، جن میں 204 یونٹس خود بند پائے گئے اور 1,347 کام کر رہے تھے۔
آپریشنل یونٹس میں سے 966 ماحولیاتی معیارات کی تعمیل کرتے ہوئے پائے گئے، جبکہ 381 غیر تعمیل کرنے والے تھے۔ غیر تعمیل یونٹس میں سے 379 کو شوکاز نوٹس جاری کیے گئے اور 2 یونٹس کو بندش کے احکامات دیے گئے۔

این ایم سی جی میں دریاؤں کے پانی کے معیار کی مسلسل نگرانی اور سیوریج ٹریٹمنٹ پلانٹس کی کارکردگی پر نظر رکھنے کے لیے ایک آن لائن ڈیش بورڈ "پراگ" فعال کیا گیا ہے۔ اسی طرح دریائے گنگا اور جمنا کے لیے کم از کم ماحولیاتی بہاؤ (ای-فلو) کے اصول، جو اکتوبر 2018 میں نوٹیفائی کیے گئے تھے، کامیابی سے نافذ کیے گئے ہیں۔ ان اصولوں کی تعمیل کی نگرانی سنٹرل واٹر کمیشن (سی ڈبلیو سی) کے ذریعے باقاعدگی سے کی جا رہی ہے۔

حیاتیاتی تنوع کے تحفظ کے تحت اتر پردیش کے سات اضلاع (مرزا پور، بلند شہر، ہاپور، بدایوں، ایودھیا، بجنور اور پرتاپ گڑھ) میں سات بائیو ڈائیورسٹی پارک اور پانچ ترجیحی ویٹ لینڈ—تین اتر پردیش میں، ایک بہار میں اور ایک جھارکھنڈ میں—منظور کیے گئے ہیں۔
ریاستی محکمۂ جنگلات کے ذریعے گنگا کے مرکزی بہاؤ کے ساتھ جنگلات کاری کا منصوبہ نافذ کیا گیا، جس کے تحت 33,024 ہیکٹر رقبے پر تقریباً 414 کروڑ روپے کی لاگت سے شجرکاری کی گئی۔

سنٹرل ان لینڈ فشریز ریسرچ انسٹی ٹیوٹ (سی آئی ایف آر آئی) کے خصوصی پروجیکٹ کے تحت 2017 سے گنگا میں 160 لاکھ سے زائد انڈین میجر کارپ (آئی ایم سی) فنگرلنگ چھوڑے گئے، تاکہ ڈولفن کے لیے شکار کی بنیاد برقرار رہے اور گنگا طاس میں ماہی گیروں کی روزی روٹی کو سہارا مل سکے۔
مزید برآں، وائلڈ لائف انسٹی ٹیوٹ آف انڈیا (ڈبلیو آئی آئی) دہرادون اور ریاستی جنگلاتی محکموں کے اشتراک سے ڈولفن، اوٹر، ہلسا، کچھوے اور گھڑیال جیسی انواع کے لیے سائنس پر مبنی بحالی، بچاؤ اور تحفظ کے پروگرام کامیابی سے جاری ہیں، جن کی بدولت ان انواع کی موجودگی میں نمایاں اضافہ ہوا ہے۔

گنگا نالج پورٹل نیشنل مشن فار کلین گنگا کی اندرونِ ملک تیار کردہ ایک اہم پہل ہے، جو آبی وسائل کے انتظام سے متعلق 1,295 سے زائد دستاویزات پر مشتمل ایک مرکزی ذخیرے کے طور پر کام کرتی ہے۔ اس میں جرائد، اشاعتیں، کتابیں، تحقیقی رپورٹس، تکنیکی مضامین، ڈیٹا سیٹ (ضلع وار دریائی نقشے، ایس ٹی پی کارکردگی، ریور اٹلس) اور کافی ٹیبل بکس شامل ہیں۔ اس کا مقصد آبی وسائل کے پیچیدہ مسائل کے بارے میں بیداری میں اضافہ اور فیصلہ سازی میں بہتری لانا ہے۔

کل 139 ضلعی گنگا کمیٹیاں (ڈی جی سی) تشکیل دی گئی ہیں، جو باقاعدگی سے 4 ایم میٹنگیں—ماہانہ، مینڈیٹڈ، منیوٹڈ اور مانیٹرڈ—منعقد کر رہی ہیں۔ اکتوبر 2025 تک 4,632 سے زائد میٹنگیں ہو چکی ہیں۔
اتر پردیش میں گنگا ٹاسک فورس (جی ٹی ایف) قائم کی گئی ہے، جو این ایم سی جی کی معاونت کرتی ہے، بشمول درخت لگانا، عوامی بیداری مہمات، حساس دریائی علاقوں میں گشت، اور گھاٹوں پر نگرانی وغیرہ۔

دریائے گنگا کی صفائی اور تحفظ کے سلسلے میں جامع عوامی بیداری مہمات بھی چلائی گئی ہیں، جن میں گنگا اتسو، ندی اتسو، شجرکاری مہمات، گھاٹوں کی صفائی، یوگا سیشنز، گنگا آرتی وغیرہ شامل ہیں۔ اس عمل میں گنگا پرہری اور گنگا وچار منچ جیسے رضاکار گروہوں نے بھی اہم کردار ادا کیا ہے۔

دریا کی صفائی ایک مسلسل عمل ہے، اور حکومتِ ہند نمامی گنگا پروگرام کے تحت ریاستی حکومتوں کو مالی و تکنیکی معاونت فراہم کرتے ہوئے دریائے گنگا اور اس کی معاون ندیوں میں آلودگی کے چیلنجوں سے نمٹنے کے لیے بھرپور کوششیں کر رہی ہے۔

یہ معلومات ریاست کے وزیرِ جل شکتی جناب راج بھوشن چودھری نے آج لوک سبھا میں ایک تحریری جواب میں فراہم کیں۔

 

***

(ش ح۔اس ک  )

UR-2421

(रिलीज़ आईडी: 2199103) आगंतुक पटल : 5