ਇਲੈਕਟ੍ਰੌਨਿਕਸ  ਅਤੇ ਸੂਚਨਾ ਟੈਕਨੋਲੋਜੀ ਮੰਤਰਾਲੇ, ਸੀ-ਡੈਕ, ਭਾਰਤੀ ਖਿਡੌਣਾ ਉਦਯੋਗ ਅਤੇ ਲੀਗੋ ਸਮੂਹ ਨੇ ਇੰਜੀਨੀਅਰਿੰਗ ਗ੍ਰੈਜੂਏਟਾਂ ਦੇ ਦੂਜੇ ਬੈਚ ਦੇ ਕਨਵੋਕੇਸ਼ਨ ਸਮਾਰੋਹ ਦਾ ਆਯੋਜਨ ਕੀਤਾ, ਜਿਨ੍ਹਾਂ ਨੇ 'ਡਿਵੈਲਪਮੈਂਟ ਆਫ਼ ਇਲੈਕਟ੍ਰੌਨਿਕਸ  ਐਂਡ ਆਈਟੀ ਬੇਸਡ ਕੰਟਰੋਲ ਐਂਡ ਆਟੋਮੇਸ਼ਨ ਸਲਿਊਸ਼ਨਜ਼ ਫਾਰ ਕੰਜ਼ਿਊਮਰ ਇਲੈਕਟ੍ਰੌਨਿਕ  ਗੁੱਡਜ਼ (ਟੌਏ ਇੰਡਸਟਰੀ)' ਪ੍ਰੋਜੈਕਟ ਦੇ ਤਹਿਤ ਇੱਕ ਸਾਲ ਦੀ ਸਿਖਲਾਈ ਪੂਰੀ ਕੀਤੀ। ਇਹ ਪ੍ਰੋਜੈਕਟ ਮੰਤਰਾਲੇ ਦੇ ਖੋਜ ਅਤੇ ਵਿਕਾਸ ਸਮੂਹ ਦੀ ਇੱਕ ਵਿਸ਼ੇਸ਼ ਪਹਿਲਕਦਮੀ ਹੈ ਜਿਸਦਾ ਉਦੇਸ਼ ਪ੍ਰੋਟੋਟਾਈਪ ਵਿਕਸਤ ਕਰਕੇ ਅਤੇ ਘੱਟ ਪ੍ਰਤੀਨਿਧਤਾ ਵਾਲੇ ਭਾਈਚਾਰਿਆਂ ਦੇ ਇੰਜੀਨੀਅਰਾਂ ਸਮੇਤ ਨੌਜਵਾਨ ਇੰਜੀਨੀਅਰਾਂ ਨੂੰ ਅਜਿਹੇ ਖਿਡੌਣਿਆਂ ਨੂੰ ਡਿਜ਼ਾਈਨ ਕਰਨ ਲਈ ਜ਼ਰੂਰੀ ਹੁਨਰਾਂ ਨਾਲ ਲੈਸ ਕਰਕੇ ਭਾਰਤੀ ਇਲੈਕਟ੍ਰੌਨਿਕ  ਖਿਡੌਣਾ ਉਦਯੋਗ ਦੇ ਵਿਕਾਸ ਨੂੰ ਉਤਸ਼ਾਹਿਤ ਕਰਨਾ ਹੈ।

ਇਲੈਕਟ੍ਰੌਨਿਕਸ  ਅਤੇ ਸੂਚਨਾ ਟੈਕਨੋਲੋਜੀ ਮੰਤਰਾਲੇ ਦੀ ਇਸ ਪਹਿਲਕਦਮੀ ਦੇ ਤਹਿਤ, ਭਾਰਤ ਭਰ ਤੋਂ ਅਨੁਸੂਚਿਤ ਜਾਤੀ/ਅਨੁਸੂਚਿਤ ਜਨਜਾਤੀ ਅਤੇ ਉੱਤਰ-ਪੂਰਬੀ ਪਿਛੋਕੜ ਵਾਲੇ ਨੌਜਵਾਨ ਇੰਜੀਨੀਅਰਾਂ ਨੂੰ ਚੁਣਿਆ ਗਿਆ ਅਤੇ ਇੱਕ ਸਾਲ ਲਈ ਖੋਜ ਅਤੇ ਵਿਕਾਸ ਵਿੱਚ ਸ਼ਾਮਲ ਕੀਤਾ ਗਿਆ। ਪਹਿਲੇ ਛੇ ਮਹੀਨਿਆਂ ਲਈ, ਉਨ੍ਹਾਂ ਨੇ ਸੀ-ਡੀਏਸੀ, ਨੋਇਡਾ ਵਿਖੇ ਈ-ਟੌਇਜ਼ ਪ੍ਰਯੋਗਸ਼ਾਲਾ ਵਿੱਚ ਕੰਮ ਕਰਨ ਅਤੇ ਸਿੱਖਣ ਦਾ ਵਿਹਾਰਕ ਤਜਰਬਾ ਪ੍ਰਾਪਤ ਕੀਤਾ। ਇਸ ਤੋਂ ਬਾਅਦ, ਉਨ੍ਹਾਂ ਨੇ ਉਦਯੋਗ ਦੀਆਂ ਜ਼ਰੂਰਤਾਂ ਦੇ ਅਨੁਸਾਰ ਖਿਡੌਣੇ ਪ੍ਰੋਟੋਟਾਈਪ ਬਣਾਉਣ ਲਈ ਛੇ ਮਹੀਨਿਆਂ ਦੀ ਸਿਖਲਾਈ ਲਈ। ਭਾਗੀਦਾਰਾਂ ਨੂੰ ਇੱਕ ਸਾਲ ਲਈ ₹25,000 ਦਾ ਮਹੀਨਾਵਾਰ ਵਜ਼ੀਫ਼ਾ ਦਿੱਤਾ ਗਿਆ।

ਇਸ ਸਮਾਗਮ ਦੌਰਾਨ, ਇਲੈਕਟ੍ਰੌਨਿਕਸ  ਅਤੇ ਸੂਚਨਾ ਟੈਕਨੋਲੋਜੀ ਮੰਤਰਾਲੇ ਦੇ ਵਧੀਕ ਸਕੱਤਰ ਸ਼੍ਰੀ ਅਮਿਤੇਸ਼ ਕੁਮਾਰ ਸਿਨਹਾ ਨੇ ਸੀ-ਡੀਏਸੀ, ਨੋਇਡਾ ਵਿਖੇ ਸਥਾਪਿਤ ਇਲੈਕਟ੍ਰੌਨਿਕ  ਖਿਡੌਣਾ ਪ੍ਰਯੋਗਸ਼ਾਲਾ ਦਾ ਉਦਘਾਟਨ ਕੀਤਾ। ਇਸ ਮੌਕੇ 'ਤੇ ਬੋਲਦਿਆਂ, ਉਨ੍ਹਾਂ ਕਿਹਾ, "ਭਾਰਤ ਇਲੈਕਟ੍ਰੌਨਿਕ  ਖਿਡੌਣਿਆਂ ਲਈ ਇੱਕ ਵਧਦਾ ਬਾਜ਼ਾਰ ਹੈ, ਅਤੇ ਇਲੈਕਟ੍ਰੌਨਿਕਸ  ਅਤੇ ਆਈਟੀ ਭਾਰਤੀ ਖਿਡੌਣਾ ਉਦਯੋਗ ਦੇ ਈਕੋਸਿਸਟਮ ਨੂੰ ਬਣਾਉਣ ਵਿੱਚ ਮਹੱਤਵਪੂਰਨ ਭੂਮਿਕਾ ਨਿਭਾ ਸਕਦੇ ਹਨ। ਮੈਨੂੰ ਬਹੁਤ ਖੁਸ਼ੀ ਹੈ ਕਿ ਇਸ ਦੇ ਲਈ ਨੀਂਹ ਤਿਆਰ ਹੋ ਰਹੀ ਹੈ ਅਤੇ ਇੰਜੀਨੀਅਰਾਂ ਦੀ ਅਗਲੀ ਪੀੜ੍ਹੀ ਇਸ ਦਿਸ਼ਾ ਵਿੱਚ ਕੰਮ ਕਰ ਰਹੀ ਹੈ। ਇਸ ਪ੍ਰੋਗਰਾਮ ਨੂੰ ਵੱਡੇ ਪੱਧਰ 'ਤੇ ਰਸਮੀ ਬਣਾਇਆ ਜਾ ਸਕਦਾ ਹੈ ਤਾਂ ਜੋ ਵਧੇਰੇ ਵਿਦਿਆਰਥੀਆਂ ਨੂੰ ਲਾਭ ਪਹੁੰਚਾਇਆ ਜਾ ਸਕੇ ਅਤੇ ਪੂਰੇ ਖਿਡੌਣਾ ਉਦਯੋਗ ਨੂੰ ਉਤਸ਼ਾਹਿਤ ਕਰਨ ਵਿੱਚ ਵਧੇਰੇ ਪ੍ਰਭਾਵਸ਼ਾਲੀ ਹੋ ਸਕੇ। ਸੀ-ਡੀਏਸੀ, ਨੋਇਡਾ ਵਿਖੇ ਸਥਾਪਿਤ ਈ-ਖਿਡੌਣਿਆਂ ਲਈ ਉੱਤਮਤਾ ਕੇਂਦਰ ਵਿੱਚ ਨੈਸ਼ਨਲ ਇੰਸਟੀਚਿਊਟ ਆਫ਼ ਇਲੈਕਟ੍ਰੌਨਿਕਸ  ਐਂਡ ਇਨਫਰਮੇਸ਼ਨ ਟੈਕਨੋਲੋਜੀ, ਐਮਐਸਐਚ, ਅਤੇ ਇਲੈਕਟ੍ਰੌਨਿਕ  ਖਿਡੌਣਿਆਂ 'ਤੇ ਕੇਂਦ੍ਰਿਤ ਹੋਰ ਸੰਸਥਾਵਾਂ ਸ਼ਾਮਲ ਹੋਣਗੀਆਂ। ਇਹ ਉੱਦਮਤਾ/ਸਟਾਰਟਅੱਪ ਸ਼ੁਰੂ ਕਰਨ ਵਿੱਚ ਮਦਦ ਕਰੇਗਾ। ਮੈਂ ਗ੍ਰੈਜੂਏਟ ਵਿਦਿਆਰਥੀਆਂ ਨੂੰ ਉਨ੍ਹਾਂ ਦੇ ਭਵਿੱਖ ਲਈ ਸ਼ੁਭਕਾਮਨਾਵਾਂ ਦਿੰਦਾ ਹਾਂ।"

29 ਨਵੰਬਰ 2025 ਨੂੰ ਇਲੈਕਟ੍ਰੌਨਿਕਸ ਅਤੇ ਸੂਚਨਾ ਟੈਕਨੋਲੋਜੀ ਮੰਤਰਾਲੇ ਵਿਖੇ ਇਹ ਕਨਵੋਕੇਸ਼ਨ ਸਮਾਰੋਹ ਸ਼੍ਰੀ ਅਮਿਤੇਸ਼ ਕੁਮਾਰ ਸਿਨਹਾ, ਵਧੀਕ ਸਕੱਤਰ, ਇਲੈਕਟ੍ਰੌਨਿਕਸ  ਅਤੇ ਸੂਚਨਾ ਟੈਕਨੋਲੋਜੀ ਮੰਤਰਾਲੇ, ਸ਼੍ਰੀਮਤੀ ਸੁਨੀਤਾ ਵਰਮਾ, ਜੀਸੀ ਆਰ ਐਂਡ ਡੀ, ਇਲੈਕਟ੍ਰੌਨਿਕਸ  ਅਤੇ ਸੂਚਨਾ ਟੈਕਨੋਲੋਜੀ ਮੰਤਰਾਲੇ, ਸ਼੍ਰੀ ਵਿਵੇਕ ਖਾਨੇਜਾ, ਈਡੀ, ਸੀ-ਡੀਏਸੀ, ਨੋਇਡਾ, ਸ਼੍ਰੀ ਅਨਿਰਬਾਨ ਗੁਪਤਾ, ਡਾਇਰੈਕਟਰ, ਟੌਇਜ਼ ਐਸੋਸੀਏਸ਼ਨ ਆਫ ਇੰਡੀਆ, ਜੀਪੀਏ, ਲੀਗੋ ਗਰੁੱਪ, ਭਾਰਤ ਵਿੱਚ ਇਲੈਕਟ੍ਰੌਨਿਕਸ ਟੌਇਜ਼ ਇੰਡਸਟਰੀ ਦੇ ਮੈਂਬਰ, ਦੀ ਮੌਜੂਦਗੀ ਵਿੱਚ ਆਯੋਜਿਤ ਕੀਤਾ ਗਿਆ ਸੀ।

************

ਐਮਐੱਸਜੈੱਡ/ਬਲਜੀਤ