భద్రతను మెరుగుపరచడంతోపాటు జాతీయ రహదారులపై ఎలాంటి అవాంతరాలూ లేకుండా ప్రయాణ సదుపాయాన్ని అందించడం లక్ష్యంగా.. రిలయన్స్ జియోతో ఎన్‌హెచ్ఏఐ అవగాహన ఒప్పందాన్ని కుదుర్చుకుంది. దీనిద్వారా జాతీయ రహదారులపై టెలికాం ఆధారిత భద్రతా హెచ్చరిక వ్యవస్థను ప్రవేశపెట్టింది. ప్రస్తుత జియో 4జీ, 5జీ నెట్‌వర్కును ఉపయోగించి.. ప్రమాద అవకాశాలున్న ప్రాంతాలు, రోడ్లపై పశువులు ఎక్కువగా ఉండే ప్రదేశాలు, పొగమంచు ఆవరించి ఉన్న ప్రాంతాలు, అత్యవసర మళ్లింపుల వంటి ప్రదేశాలను సమీపించే సమయంలో ప్రయాణికులు మొబైల్ ఫోన్లలో ముందస్తు హెచ్చరికలను అందుకుంటారు.

జాతీయ రహదారిపై ప్రయాణించే వారికి సకాలంలో సమాచారాన్ని అందించడం ద్వారా రహదారి భద్రతను బలోపేతం చేయడం, అలాగే వేగాన్నీ, డ్రైవింగ్ విధానాన్నీ ముందుగానే సర్దుబాటు చేసుకోవడానికి వీలు కల్పించడం ఈ కార్యక్రమ లక్ష్యం. ప్రయాణికులకు ఎస్ఎంఎస్, వాట్సాప్, హై ప్రయారిటీ కాల్స్ ద్వారా హెచ్చరికలు అందుతాయి. ‘రాజ్‌మార్గ యాత్ర’ మొబైల్ యాప్, ఎమర్జెన్సీ హెల్ప్‌లైన్ నంబర్- 1033 సహా ఎన్‌హెచ్ఏఐ డిజిటల్ వేదికలతో దశలవారీగా ఈ వ్యవస్థను అనుసంధానిస్తారు.

జాతీయ రహదారులపై లేదా సమీపంలో ఉన్న జియో మొబైల్ వినియోగదారులందరికీ ఈ స్వయంచాలిత (ఆటొమేటెడ్) వ్యవస్థ సేవలందిస్తుంది. ప్రమాదకర ప్రాంతంలోకి ప్రవేశించడానికి ముందే.. జాతీయ రహదారి ప్రయాణికులకు ముందస్తు హెచ్చరికలను అందిస్తుంది. ఈ సాధనం ఇప్పటికే ఉన్న టెలికాం టవర్లను ఉపయోగించుకుంటుంది. రోడ్ల పక్కన మరే ఇతర అదనపు హార్డ్‌వేర్ లేకుండానే సత్వరమే అమర్చవచ్చు. దేశంలో 500 మిలియన్లకు పైగా వినియోగదారులకు సేవలందిస్తున్న జియో డిజిటల్ మౌలిక సదుపాయాలను ఈ వ్యూహాత్మక భాగస్వామ్యం వినియోగించుకుంటుంది.

ఈ కార్యక్రమంపై స్పందిస్తూ.. “ప్రయాణికులకు సకాలంలో నమ్మదగిన సమాచారాన్ని అందించడంలో ఇదొక ముఖ్యమైన ముందడుగు. తద్వారా వారు ముందుగానే తెలివైన నిర్ణయాలు తీసుకోవడానికి, సురక్షితమైన డ్రైవింగ్ పద్ధతులను అవలంబించడానికి అవకాశం ఉంటుంది. జాతీయ రహదారిపై సాంకేతిక ఆధారిత రహదారి భద్రతా నిర్వహణలో ఇది సరికొత్త ప్రమాణాలను నిర్దేశిస్తుందని నేను కచ్చితంగా చెప్పగలను” అని ఎన్‌హెచ్ఏఐ చైర్మన్ శ్రీ సంతోష్ కుమార్ యాదవ్ అన్నారు.

రిలయన్స్ జియో ప్రెసిడెంట్ శ్రీ జ్యోతీంద్ర ఠాకర్ మాట్లాడుతూ.. ఈ వ్యవస్థ జియో టెలికాం నెట్వర్క్ పరిధిని ఉపయోగించుకుని.. సకాలంలో భద్రతా హెచ్చరికలను అందించడానికి, అలాగే సురక్షితమైన, కచ్చితమైన సమాచారంతో కూడిన జాతీయ రహదారి ప్రయాణానికి దోహదపడుతుందన్నారు.

ఈ కార్యక్రమ తొలి ప్రయోగాత్మక అమలు.. ప్రమాద ప్రాంతాలను గుర్తించడం, ఎన్‌హెచ్ఏఐలోని కొన్ని ప్రాంతీయ కార్యాలయాల పరిధిలో నిర్దేశిత హెచ్చరికలను జారీ చేయడంలో దోహదపడుతుంది. వర్తించే అన్ని నియంత్రణా నిబంధనలు, డేటా రక్షణ అవసరాలకు ఇది పూర్తిగా అనుగుణంగా ఉంటుంది.

ఇతర టెలికాం సర్వీస్ ప్రొవైడర్లతో కూడా ఎన్‌హెచ్ఏఐ ఇలాంటి విధానాన్ని అనుసరిస్తుంది. బలమైన డిజిటల్ మౌలిక సదుపాయాలను రియల్ టైమ్ కమ్యూనికేషన్ సాధనాలతో కలపడం ద్వారా.. ప్రయాణికుల్లో విశేషంగా అవగాహన పెంపొందించేందుకు, నివారించదగిన రహదారి ప్రమాదలను తగ్గించేందుకు ఈ కార్యక్రమం సహాయపడుతుంది. దేశవ్యాప్తంగా సురక్షిత, ఆధునిక, సమర్థమైన జాతీయ రహదారి ప్రయాణానికి వీలు కల్పించేలా తగిన, వినూత్న మార్గాలను అవలంబించడానికి ఎన్‌హెచ్ఏఐ కట్టుబడి ఉంది.

***