युवा व्यवहार आणि क्रीडा मंत्रालय
सरदारांचा वारसा युवाशक्तीला देतो ऊर्जा जेव्हा राष्ट्रीय एकता मार्चच्या चौथ्या दिवशी हजारो लोक होतात सहभागी
देशव्यापी पदयात्रा पोहोचल्या 451 लोकसभा मतदारसंघांमधील 1,524 जिल्ह्यांमध्ये
प्रविष्टि तिथि:
29 NOV 2025 6:22PM by PIB Mumbai
युवा व्यवहार आणि क्रीडा मंत्रालयाच्या अंतर्गत MY Bharat द्वारे आयोजित Sardar@150 राष्ट्रीय एकता मार्च आज चौथ्या दिवशी अतूट उत्साह आणि लोकसहभागासह सुरू झाला. सरदार वल्लभभाई पटेल यांच्या 150 व्या जयंतीनिमित्त 26 नोव्हेंबर 2025 रोजी आणंद येथे सुरू झालेली ही पदयात्रा देशभरातील तरुणांना एकत्रित करत आहे आणि भारताच्या एकतेच्या शिल्पकारांचा सन्मान करत आहे.
सुरुवातीपासूनच या पदयात्रेत असामान्य सहभाग दिसून आला आहे. आतापर्यंत देशभरातील 15.5 लाख नागरिक सहभागी झाले आहेत, ज्यात 640 जिल्हे, 1,524 पदयात्रा, 451 लोकसभा मतदारसंघ आणि 23,820 हून अधिक संस्थांचा समावेश आहे. करमसद ते केवडिया या राष्ट्रीय पदयात्रेने चौथ्या दिवसापर्यंत 57 किमी अंतर कापले आहे, जे समुदाय, युवा गट आणि माय भारत स्वयंसेवकांकडून मिळत असलेल्या मोठ्या प्रमाणावरील पाठिंब्याचे द्योतक आहे.
राष्ट्रीय पदयात्रेचा चौथा दिवस यश कॉम्प्लेक्स, इस्कॉन मंदिर (गोत्री रोड), बीपीसीएल चार्जिंग स्टेशन, ब्रह्मकुमारी अटलदरा आणि अटलदरा बीएपीएस मंदिर अशा उत्साही मार्गावरून सुरू झाला. केंद्रीय वाणिज्य आणि उद्योग मंत्री पीयूष गोयल देखील पदयात्रेत सामील झाले, त्यांनी सहभागींना उत्साही केले आणि त्यांच्या उपस्थितीने तरुणांना प्रेरणा मिळाली. मार्गावरील प्रत्येक थांब्याने सांस्कृतिक अभिव्यक्ती, सामुदायिक सहभाग आणि नागरिकांच्या उत्साही सहभागाद्वारे एकतेची भावना टिपली. अटलदरा बीएपीएस मंदिरात "सरदार - द डॅझलिंग कमांडर" या संकल्पनेवर आधारित "सरदार गाथा" हे एक विशेष कथाकथन सत्र आयोजित करण्यात आले होते. या कार्यक्रमात केंद्रीय युवा व्यवहार, क्रीडा, कामगार आणि रोजगार मंत्री डॉ. मनसुख मांडवीय; केंद्रीय आरोग्य , कुटुंब कल्याण, रसायने आणि खते मंत्री जे.पी. नड्डा; केंद्रीय सामाजिक न्याय आणि सक्षमीकरण मंत्री डॉ. वीरेंद्र कुमार; तसेच केंद्रीय रेल्वे आणि अन्न प्रक्रिया उद्योग राज्यमंत्री रवनीत सिंग बिट्टू यांचा समावेश होता. व्यासपीठावर उपस्थित आमदार, खासदार आणि वरिष्ठ स्थानिक प्रतिनिधींनी आपल्या सहभागाने कार्यक्रमाची शोभा वाढवली.
वडोदराच्या महापौर पिंकी निरजभाई सोनी यांनी नड्डा यांचे स्वागत केले. जे.पी. नड्डा यांनी आपल्या भाषणात सरदार पटेल यांच्या भव्य वारशावर सखोल चिंतन केले. त्यांनी सरदार पटेल हे खरे राष्ट्रपुरुष होते ज्यांच्या नेतृत्वाखाली एकसंध भारताचा पाया रचला गेला असे वर्णन केले. एक भारत, श्रेष्ठ भारत ही संकल्पना केवळ पटेल यांच्या दूरदृष्टीमुळेच शक्य झाली आहे यावर त्यांनी भर दिला. त्यांनी पटेल यांच्या लंडनमधील कायदे शिक्षणापासून ते अहमदाबादमधील त्यांच्या प्रारंभीच्या नागरी सुधारणांपर्यंतचा प्रवास उलगडून दाखवला. नड्डा यांनी बारडोली चळवळ, अहमदाबाद महानगरपालिकेच्या अध्यक्षपदाच्या सरदार पटेलांचा प्रभावी कार्यकाळ तसेच सत्य, न्याय आणि राष्ट्रीय कर्तव्याप्रति त्यांची अविचल बांधिलकी यांची आठवण करून दिली.
स्टॅच्यू ऑफ युनिटी केवळ एक स्मारक नाही तर 1.6 कोटी भारतीयांसाठी एकतेचे प्रतीक आहे, असे केंद्रीय मंत्री जे.पी. नड्डा यांनी सांगितले. सरदार पटेल यांच्या वारशाला योग्य अभिवादन करण्यासाठी आयोजित उपक्रम यशस्वी करण्यासाठी सहभागी झाल्याबद्दल त्यांनी सर्व पदयात्रींचे अभिनंदन केले.
डॉ. मनसुख मांडवीय यांनी आपल्या भाषणात भारतातील तरुणांच्या असामान्य सहभागाचे कौतुक केले. गुजरातमधील राष्ट्रीय पदयात्रेने राज्यातील प्रत्येक मतदारसंघाला स्पर्श केला असून ही पदयात्रा देशभरातील सहभागींना आकर्षित करत आहे, असे त्यांनी नमूद केले. युनिटी मार्च पंतप्रधान नरेंद्र मोदी यांच्या आत्मनिर्भर भारत आणि विकसित भारताच्या संकल्पाची प्रत्यक्ष पूर्तता असल्याचे त्यांनी सांगितले. "संपूर्ण देश या पदयात्रेकडे पाहत आहे तसेच पंतप्रधानांच्या एकता आणि सामूहिक प्रगतीच्या दृष्टिकोनाची फलश्रृती आहे," असे ते म्हणाले.
नागपूरहून सुरू झालेला नर्मदा प्रवाह काल या पदयात्रेत अधिकृतपणे सामील झाला तर मुंबईहून निघालेला गोदावरी प्रवाह देखील मार्गस्थ होत आहे. या दोन्ही प्रवाहांच्या सहभागामुळे भारताच्या नदी प्रदेशांचे एकात्मिक दर्शन सरदार पटेल यांच्या अभिवादनाच्या रूपाने घडत आहे. स्मृती वन येथे प्राथमिक शाळेतील विद्यार्थ्यांनी साकारलेल्या सरदार पटेल विषय चित्रकृतींचा गौरव करण्यात आला तसेच वृक्षारोपण मोहिमेद्वारे पर्यावरणाच्या जबाबदारीचा संदेश अधोरेखित करण्यात आला.
संध्याकाळपर्यंत, पदयात्रा वडोदरा येथील नवलखी मैदानावर पोहोचली, जिथे "युनिफायर ऑफ प्रिन्सली स्टेट्स - द नेशन्स सायलेंट रिव्होल्युशन" या प्रदर्शनाचे उद्घाटन करण्यात आले. या प्रदर्शनात सरदार पटेल यांनी केलेल्या संस्थानांच्या ऐतिहासिक विलीनीकरणाचे दर्शन घडत असून तरुण आणि नागरिक मोठ्या संख्येने हे प्रदर्शन पाहण्यासाठी येत आहेत.
दिवसाचा समारोप नवलखी मैदानावर ग्रामसभेने होणार आहे. यात डायरो सादरीकरणे, सामुदायिक चर्चा आणि सरदार पटेल यांच्या आदर्शांचे सामूहिक पुनरुज्जीवन केले जाईल. ग्रामसभेचे उद्दिष्ट नागरिकांच्या सहभागाला बळ देत पदयात्रेतून दिला जाणारा एकता, जबाबदारी आणि राष्ट्रीय अभिमानाचा संदेश अधिक दृढ करणे हा आहे.
सरदार@150 राष्ट्रीय एकता मार्च जसजसा स्टॅच्यू ऑफ युनिटीकडे पुढे सरकत आहे, तसा तो सरदार वल्लभभाई पटेल यांना वाहिलेली एक प्रभावशाली आणि भावपूर्ण आदरांजली ठरत आहे - जो सामायिक उद्देश, सामूहिक प्रयत्न आणि अमृत पीढीच्या अविचल बांधिलकीद्वारे संपूर्ण भारताला एकत्र करतो.
***
शैलेश पाटील/नंदिनी मथुरे/श्रद्धा मुखेडकर/परशुराम कोर
सोशल मिडियावर आम्हाला फॉलो करा: 
@PIBMumbai 
/PIBMumbai 
/pibmumbai 
pibmumbai[at]gmail[dot]com
(रिलीज़ आईडी: 2196456)
आगंतुक पटल : 4