Ka international prokram kaba saw sngi kaba don ia ka APEDA Buyer–Seller Meet, 1st Northeast India Organic Week, bad ka 4th IFOAM World Organic Youth Summit (28 Naiwieng – 1 Nohprah 2025) ka dei kaba la plie paidbah mynta ka sngi ha Courtyard by Marriott, Shillong.

La pynlong ia kane ka prokram da ka Tnat ka rep ka riang & ka bha ka miat jong ki nongrep, Sorkar Meghalaya, ha ka jingiatreilang bad ka MEGNOLIA, APEDA, IFOAM–Organics Asia, bad ka jingiarap jong ka NERAMAC, bad kane ka prokram ka la wanrah lang ia ki nongthied na kiwei kiwei ki ri, ki nongshalan mar nabar ri, ki riewshemphang ha ki kam organic, bad ki kynhun jong ki samla na ki ri bapher bapher.

Ha kane ka sngi nyngkong la wan iashim bynta lang da ki kynrem ki lyndan ba kynthup ia u Satinder Kumar Bhalla, Secretary, North Eastern Council, Dr. Vijay Kumar D, Commissioner & Secretary, Sorkar Meghalaya; Abhishek Dev, Chairman, APEDA; Dr. Shakil P. Ahammed, Chief Secretary, Sorkar Meghalaya; Saloni Verma, Deputy Secretary Sorkar Meghalaya, Brenden Hoare, Adviser, IFOAM Jennifer Chang, Executive Director, IFOAM Asia; Bhaskar Barua, Managing Director NERAMAC, Dr. Saswati Bose, General Manager APEDA, Mathew John, President, IFOAM Asia; bad ka Priyanka Uday, Associate Director, CRISIL.

Ha ka jingkren ha kane ka sngi, u Abhishek Dev, Chairman, APEDA, u la kdew sha ka jingdonkam ban pynkhlain ka jingpaw ki mar organic jong ka thain shatei lammihngi ha kylleng ka pyrthei. U la ong, “Ka bynta kaba nyngkong jong ka Northeast India Organic Meet ka la wanrah lang ia kito kiba don bynta ha kane ka kam na 22 tylli ki ri, kaba pyni ia ka jingpeit kiwei kiwei ki ri ia ki lad kiba don ha ki mar organic jong ka thain. Ngi la iatreilang bad ka Sorkar Jylla, ka Tnad Kam Rep jong ka Sorkar Pdeng, NEC bad IFOAM Asia, da ka jingthmu ban kyntiew shuh shuh ia ka jingpaw ki mar organic jong ka Meghalaya.”

U la ong shuh shuh, “Katba ngi dang iaid shakhmat, ngi thmu ban pynlong ia kane ka prokram man u snem, ban pynlong da ki jylla bapher bapher jong ka thain shatei lammihngi man u snem ban kyntiew ia ka kam pynpoi mar organic sha kylleng ka pyrthei. Ngi pynshlur ruh ia ki nongrep, ki FPO bad kito kiba don bynta ha kane ka kam na Meghalaya ba kin wan iashim bynta ha ka BIOFACH ka ban long, ha kaba ka India ka dei ka ri ba iatrei lang, ban pyni shuh shuh ia ki mar jong ki sha ka pyrthei.”

Kane ka prokram ka thmu ban pynkhlain ia ki jingiasoh bad ki iew na ka bynta ki mar organic jong ka thain shatei lammihngi ha kylleng ka pyrthei, kyntiew ia ka rukom rep kaba iaineh bad kaba khyllie im biang, bad wanrah ia ka jinglong nongialam ki samla lyngba ki jingiamir jingmut bad ki jingiatreilang hapdeng ki ri. Lyngba ki bynta B2B, ki prokram ban pyni ia ka kolshor, ki jingleit sha ki jaka bapher bapher, kane ka prokram ka long kum u mawmer ha ka jingpyni ia ki lad organic jong ka Meghalaya bad ka thain shatei lammihngi.

****

(रिलीज़ आईडी: 2196356) आगंतुक पटल : 3