ਸਾਰੇ 36 ਰਾਜਾਂ ਅਤੇ ਕੇਂਦਰ ਸ਼ਾਸਤ ਪ੍ਰਦੇਸ਼ਾਂ ਦੇ 19.2 ਮਿਲੀਅਨ ਤੋਂ ਵੱਧ ਸਕੂਲੀ ਵਿਦਿਆਰਥੀਆਂ ਨੇ ਪ੍ਰੋਜੈਕਟ ਵੀਰ ਗਾਥਾ 5.0 ਵਿੱਚ ਉਤਸ਼ਾਹ ਨਾਲ ਹਿੱਸਾ ਲਿਆ। ਵਿਦਿਆਰਥੀਆਂ ਨੇ ਹਥਿਆਰਬੰਦ ਸੈਨਾਵਾਂ ਦੇ ਅਧਿਕਾਰੀਆਂ ਅਤੇ ਕਰਮਚਾਰੀਆਂ ਦੀ ਬਹਾਦਰੀ ਅਤੇ ਕੁਰਬਾਨੀ ਦਾ ਸਨਮਾਨ ਕਰਨ ਲਈ ਕਵਿਤਾਵਾਂ, ਪੇਂਟਿੰਗਾਂ, ਲੇਖ, ਵੀਡੀਓ ਆਦਿ ਪੇਸ਼ ਕੀਤੇ। ਵਿਦਿਆਰਥੀਆਂ ਨੂੰ ਭਾਰਤ ਦੇ ਮਹਾਨ ਯੋਧਿਆਂ, ਜਿਵੇਂ ਕਿ ਕਲਿੰਗਾ ਦੇ ਰਾਜਾ ਖਾਰਾਵੇਲ, ਪ੍ਰਿਥਵੀਰਾਜ ਚੌਹਾਨ, ਛਤਰਪਤੀ ਸ਼ਿਵਾਜੀ ਮਹਾਰਾਜ, 1857 ਦੇ ਪਹਿਲੇ ਆਜ਼ਾਦੀ ਯੁੱਧ ਦੇ ਯੋਧੇ, ਅਤੇ ਕਬਾਇਲੀ ਵਿਦਰੋਹ ਦੇ ਨੇਤਾਵਾਂ, ਦੀ ਅਜਿੱਤ ਭਾਵਨਾ ਅਤੇ ਫੌਜੀ ਰਣਨੀਤੀਆਂ ਬਾਰੇ ਜਾਣਨ ਲਈ ਵੀ ਉਤਸ਼ਾਹਿਤ ਕੀਤਾ ਗਿਆ।

2021 ਵਿੱਚ ਸ਼ੁਰੂ ਕੀਤਾ ਗਿਆ, "ਵੀਰ ਗਾਥਾ" ਪ੍ਰੋਜੈਕਟ ਦਾ ਉਦੇਸ਼ ਬਹਾਦਰੀ ਪੁਰਸਕਾਰ ਜੇਤੂਆਂ ਦੀਆਂ ਪ੍ਰੇਰਨਾਦਾਇਕ ਜੀਵਨ ਕਹਾਣੀਆਂ ਦਾ ਪ੍ਰਸਾਰ ਕਰਨਾ ਅਤੇ ਵਿਦਿਆਰਥੀਆਂ ਵਿੱਚ ਦੇਸ਼ ਭਗਤੀ ਦੀ ਭਾਵਨਾ ਪੈਦਾ ਕਰਨਾ ਹੈ। ਇਹ ਪਹਿਲ ਵਿਦਿਆਰਥੀਆਂ ਨੂੰ ਬਹਾਦਰੀ ਪੁਰਸਕਾਰ ਜੇਤੂਆਂ ਦੇ ਬਹਾਦਰੀ ਭਰੇ ਕੰਮਾਂ ਨੂੰ ਪ੍ਰਦਰਸ਼ਿਤ ਕਰਨ ਲਈ ਇੱਕ ਰਚਨਾਤਮਕ ਪਲੈਟਫਾਰਮ ਪ੍ਰਦਾਨ ਕਰਦੀ ਹੈ, ਜੋ ਕਿ ਰਾਸ਼ਟਰੀ ਸਿੱਖਿਆ ਨੀਤੀ 2020 ਦੇ ਦ੍ਰਿਸ਼ਟੀਕੋਣ ਦੇ ਅਨੁਸਾਰ ਹੈ। ਇਹ ਨੀਤੀ ਰਟਣ ਦੀ ਬਜਾਏ ਅਨੁਭਵੀ ਅਤੇ ਪ੍ਰੋਜੈਕਟ-ਅਧਾਰਿਤ  ਸਿਖਲਾਈ 'ਤੇ ਜ਼ੋਰ ਦਿੰਦੀ ਹੈ।

ਇਸ ਪ੍ਰੋਜੈਕਟ ਦੇ ਚਾਰ ਐਡੀਸ਼ਨ ਕ੍ਰਮਵਾਰ 2021, 2022, 2023 ਅਤੇ 2024 ਵਿੱਚ ਸਫਲਤਾਪੂਰਵਕ ਸੰਚਾਲਿਤ ਕੀਤੇ ਜਾ ਚੁੱਕੇ ਹਨ। ਪ੍ਰੋਜੈਕਟ ਵੀਰ ਗਾਥਾ 5.0 ਦੇ ਤਹਿਤ ਹੇਠ ਲਿਖੀਆਂ ਗਤੀਵਿਧੀਆਂ ਚਲਾਈਆਂ ਗਈਆਂ ਹਨ :

ਸਕੂਲ-ਪੱਧਰੀ ਗਤੀਵਿਧੀਆਂ:

ਸਕੂਲਾਂ ਨੇ 08.09.2025 ਤੋਂ 10.11.2025 ਤੱਕ ਵੱਖ-ਵੱਖ ਪ੍ਰੋਜੈਕਟ ਅਤੇ ਗਤੀਵਿਧੀਆਂ ਆਯੋਜਿਤ ਕੀਤੀਆਂ ਅਤੇ ਹਰੇਕ ਸਕੂਲ ਤੋਂ ਚਾਰ ਸਭ ਤੋਂ ਵਧੀਆ ਐਂਟਰੀਆਂ MyGov ਪੋਰਟਲ 'ਤੇ ਅਪਲੋਡ ਕੀਤੀਆਂ।

ਇਸ ਤੋਂ ਇਲਾਵਾ, ਬਹਾਦਰੀ ਵਾਲੇ ਨਾਇਕਾਂ ਅਤੇ ਗੁੰਮਨਾਮ ਕਹਾਣੀਆਂ ਬਾਰੇ ਵਿਦਿਆਰਥੀਆਂ ਦੇ ਗਿਆਨ ਨੂੰ ਵਧਾਉਣ ਲਈ, ਰੱਖਿਆ ਮੰਤਰਾਲੇ ਨੇ, ਫੌਜ, ਜਲ ਸੈਨਾ ਅਤੇ ਹਵਾਈ ਸੈਨਾ ਦੇ ਆਪਣੇ ਖੇਤਰੀ ਸੰਗਠਨਾਂ ਰਾਹੀਂ, ਦੇਸ਼ ਭਰ ਦੇ ਸਕੂਲਾਂ ਲਈ ਵਰਚੁਅਲ ਮੀਟਿੰਗਾਂ ਅਤੇ ਆਹਮੋ-ਸਾਹਮਣੇ ਜਾਗਰੂਕਤਾ ਸੈਸ਼ਨਾਂ ਦਾ ਆਯੋਜਨ ਕੀਤਾ।

ਇਸ ਪ੍ਰੋਜੈਕਟ ਦੀ ਸ਼ੁਰੂਆਤ ਤੋਂ ਹੀ ਭਾਗੀਦਾਰੀ ਵਿੱਚ ਲਗਾਤਾਰ ਵਾਧਾ ਹੋਇਆ ਹੈ :

• ਐਡੀਸ਼ਨ 1 ਵਿੱਚ 8.03 ਲੱਖ ਵਿਦਿਆਰਥੀ

• ਐਡੀਸ਼ਨ 2 ਵਿੱਚ 19.5 ਲੱਖ ਵਿਦਿਆਰਥੀ

• ਐਡੀਸ਼ਨ 3 ਵਿੱਚ 1.36 ਕਰੋੜ ਵਿਦਿਆਰਥੀ

• ਐਡੀਸ਼ਨ 4 ਵਿੱਚ 1.76 ਕਰੋੜ ਵਿਦਿਆਰਥੀ

• ਐਡੀਸ਼ਨ 5 ਵਿੱਚ 1.92 ਕਰੋੜ ਵਿਦਿਆਰਥੀ

ਇੱਕ ਮਹੱਤਵਪੂਰਨ ਪ੍ਰਾਪਤੀ ਵਿੱਚ, ਪ੍ਰੋਜੈਕਟ ਵੀਰ ਗਾਥਾ 5.0 ਰਾਸ਼ਟਰੀ ਸੀਮਾਵਾਂ ਤੋਂ ਪਰੇ ਫੈਲ ਗਿਆ ਹੈ। ਵਿਦੇਸ਼ਾਂ ਵਿੱਚ ਭਾਰਤੀ ਸਕੂਲਾਂ ਦੇ ਵਿਦਿਆਰਥੀਆਂ ਵੱਲੋਂ ਉਤਸ਼ਾਹਪੂਰਣ ਭਾਗੀਦਾਰੀ ਦੇਖੀ ਜਾ ਰਹੀ ਹੈ। ਇਹ ਅੰਤਰਰਾਸ਼ਟਰੀ ਸ਼ਮੂਲੀਅਤ ਵਿਸ਼ਵਵਿਆਪੀ ਭਾਰਤੀ ਪ੍ਰਵਾਸੀਆਂ ਨੂੰ ਭਾਰਤ ਦੇ ਬਹਾਦਰੀ ਪੁਰਸਕਾਰ ਜੇਤੂਆਂ ਦੀਆਂ ਪ੍ਰੇਰਨਾਦਾਇਕ ਕਹਾਣੀਆਂ ਨਾਲ ਜੋੜਨ ਵਿੱਚ ਪ੍ਰੋਜੈਕਟ ਦੇ ਵਧ ਰਹੇ ਪ੍ਰਭਾਵ ਨੂੰ ਦਰਸਾਉਂਦੀ ਹੈ, ਜਿਸ ਨਾਲ ਰਾਸ਼ਟਰ ਦੇ ਸਾਹਸ, ਕੁਰਬਾਨੀ ਅਤੇ ਦੇਸ਼ ਭਗਤੀ ਦੇ ਮੁੱਲਾਂ ਨਾਲ ਉਨ੍ਹਾਂ ਦਾ ਸਬੰਧ ਹੋਰ ਮਜ਼ਬੂਤ ​​ਹੁੰਦਾ ਹੈ।

ਇਸ ਸਾਲ ਦੇ ਆਯੌਜਨ ਵਿੱਚ ਹੋਰ ਵੀ ਪ੍ਰੇਰਨਾ ਜੋੜਦੇ ਹੋਏ, ਭਾਰਤੀ ਹਵਾਈ ਸੈਨਾ (ਆਈਏਐੱਫ) ਦੇ ਟੈਸਟ ਪਾਇਲਟ, ਗਰੁੱਪ ਕੈਪਟਨ ਸ਼ੁਭਾਂਸ਼ੂ ਸ਼ੁਕਲਾ ਨੇ ਇੱਕ ਪ੍ਰੇਰਨਾਦਾਇਕ ਭਾਸ਼ਣ ਦਿੱਤਾ ਅਤੇ ਵਿਦਿਆਰਥੀਆਂ ਲਈ ਇੱਕ ਵਿਸ਼ੇਸ਼ ਵੀਡੀਓ ਸੰਦੇਸ਼ ਸਾਂਝਾ ਕੀਤਾ। ਉਨ੍ਹਾਂ ਦੇ ਸੰਦੇਸ਼ ਨੇ ਨੌਜਵਾਨ ਭਾਗੀਦਾਰਾਂ ਨੂੰ ਉੱਤਮਤਾ ਲਈ ਯਤਨ ਕਰਨ, ਸਮਰਪਣ ਨਾਲ ਰਾਸ਼ਟਰ ਦੀ ਸੇਵਾ ਕਰਨ ਅਤੇ ਵੀਰ ਗਾਥਾ ਪਹਿਲਕਦਮੀ ਵਿੱਚ ਸ਼ਾਮਲ ਬਹਾਦਰੀ ਅਤੇ ਲਚਕੀਲੇਪਣ ਦੇ ਮੁੱਲਾਂ ਨੂੰ ਬਰਕਰਾਰ ਰੱਖਣ ਲਈ ਉਤਸ਼ਾਹਿਤ ਕੀਤਾ।

ਐਡੀਸ਼ਨ 1 ਅਤੇ 2 ਦੌਰਾਨ, 25 ਰਾਸ਼ਟਰੀ ਜੇਤੂਆਂ (ਸੁਪਰ 25) ਨੂੰ ਨਵੀਂ ਦਿੱਲੀ ਵਿੱਚ ਸਿੱਖਿਆ ਮੰਤਰਾਲੇ ਅਤੇ ਰੱਖਿਆ ਮੰਤਰਾਲੇ ਦੁਆਰਾ ਸਾਂਝੇ ਤੌਰ 'ਤੇ ਚੁਣਿਆ ਗਿਆ ਅਤੇ ਸਨਮਾਨਿਤ ਕੀਤਾ ਗਿਆ। ਐਡੀਸ਼ਨ 3.0 ਅਤੇ 4.0 ਵਿੱਚ, 100 ਰਾਸ਼ਟਰੀ ਜੇਤੂਆਂ (ਸੁਪਰ 100) ਦੀ ਚੋਣ ਕੀਤੀ ਗਈ। ਇਸ ਸਾਲ ਵੀ, ਪ੍ਰੋਜੈਕਟ ਵੀਰ ਗਾਥਾ 5.0 ਦੇ ਤਹਿਤ, ਐੱਨਈਪੀ 2020 ਦੇ 5+3+3+4 ਪਾਠਕ੍ਰਮ ਅਤੇ ਸਿੱਖਿਆ ਸ਼ਾਸਤਰੀ ਢਾਂਚੇ ਦੇ ਅਨੁਸਾਰ 100 ਰਾਸ਼ਟਰੀ ਜੇਤੂਆਂ ਦੀ ਚੋਣ ਕੀਤੀ ਜਾਵੇਗੀ:

• ਐਲੀਮੈਂਟਰੀ ਪੜਾਅ - 25 ਜੇਤੂ

• ਮਿਡਲ ਪੜਾਅ - 25 ਜੇਤੂ

• ਸੈਕੰਡਰੀ ਪੜਾਅ - 9ਵੀਂ-10ਵੀਂ ਜਮਾਤ ਅਤੇ 11ਵੀਂ ਜਮਾਤ ਤੋਂ ਹਰੇਕ ਦੇ 25 ਜੇਤੂ

ਉਨ੍ਹਾਂ ਦੇ ਸਨਮਾਨ ਸਮਾਰੋਹ ਦਾ ਆਯੋਜਨ ਸਿੱਖਿਆ ਮੰਤਰਾਲੇ ਅਤੇ ਰੱਖਿਆ ਮੰਤਰਾਲੇ ਵੱਲੋਂ ਨਵੀਂ ਦਿੱਲੀ ਵਿੱਚ ਸਾਂਝੇ ਤੌਰ 'ਤੇ ਕੀਤਾ ਜਾਵੇਗਾ। ਹਰੇਕ ਰਾਸ਼ਟਰੀ ਜੇਤੂ ਨੂੰ ₹10,000 ਦਾ ਨਕਦ ਇਨਾਮ ਮਿਲੇਗਾ।

ਇਸ ਤੋਂ ਇਲਾਵਾ, 739 ਜ਼ਿਲ੍ਹਿਆਂ (ਪ੍ਰਤੀ ਭਾਗੀਦਾਰ ਜ਼ਿਲ੍ਹੇ ਵਿੱਚ ਚਾਰ ਜੇਤੂ) ਤੋਂ 2,956 ਜੇਤੂ ਅਤੇ ਰਾਜਾਂ/ਕੇਂਦਰ ਸ਼ਾਸਿਤ ਪ੍ਰਦੇਸ਼ਾਂ (ਪ੍ਰਤੀ ਰਾਜ/ਕੇਂਦਰ ਸ਼ਾਸਿਤ ਪ੍ਰਦੇਸ਼ ਵਿੱਚ ਅੱਠ ਜੇਤੂ) ਤੋਂ 288 ਜੇਤੂ ਹੋਣਗੇ। ਅਜਿਹੇ ਸਾਰੇ ਜੇਤੂਆਂ ਨੂੰ ਉਨ੍ਹਾਂ ਦੇ ਸਬੰਧਤ ਜ਼ਿਲ੍ਹਾ ਅਤੇ ਰਾਜ/ਕੇਂਦਰ ਸ਼ਾਸਿਤ ਪ੍ਰਦੇਸ਼ ਪ੍ਰਸ਼ਾਸਨ ਵੱਲੋਂ ਸਨਮਾਨਿਤ ਕੀਤਾ ਜਾਵੇਗਾ।

*****

ਏਕੇ/ਐੱਸਜੇ

(Release ID: 2195426) ਵਿਜ਼ੀਟਰ ਕਾਊਂਟਰ : 27