زراعت اور کاشتکاروں کی بہبود اور دیہی ترقی کے مرکزی وزیر جناب شیوراج سنگھ چوہان نے خواتین اور بچوں کی ترقی کی مرکزی وزیر محترمہ ان پورنا دیوی کے ساتھ آج "نئی چیتنا - پہل قدمی برائے تبدیلی" کے چوتھے ایڈیشن کا افتتاح کیا۔ اس قومی مہم کا مقصد صنفی مساوات اور خواتین کو بااختیار بنانا ہے۔ اس موقع پر مرکزی وزیر مملکت جناب کملیش پاسوان، ڈاکٹر چندر شیکھر پیماسانی، اور دیہی ترقی کے سکریٹری جناب شیلیش کمار سنگھ بھی موجود تھے۔

پراواسی بھارتیہ کیندر، سشما سوراج بھون، چانکیہ پوری، نئی دہلی میں منعقدہ تقریب میں مرکزی وزیر جناب چوہان نے کہا کہ وزیر اعظم جناب نریندر مودی کی قیادت میں حکومت خواتین کی اقتصادی اور سماجی اختیاردہی کے لیے متعدد ٹھوس اقدامات کر رہی ہے۔ انہوں نے وضاحت کی کہ یہ مہم دیہی ہندوستان میں خواتین کی سلامتی، وقار اور اقتصادی شراکت داری کو بڑھانے کے لیے ایک عوامی تحریک میں تبدیل ہوئی ہے۔ جناب چوہان نے زور دے کر کہا کہ ’نئی چیتنا‘ مہم خواتین کے لیے عزت، تحفظ اور خود انحصاری کو فروغ دیتی ہے۔ یہ ہمارا فرض ہے کہ معاشرے اور حکمرانی کے ہر سطح پر خواتین کی آواز کو یقینی بنایا جائے۔

مرکزی وزیر شیوراج سنگھ نے بیٹیوں کے تئیں مروجہ امتیازی رویوں کو تبدیل کرنے کی فوری ضرورت پر زور دیا۔ انہوں نے کہا کہ وزیر اعظم جناب نریندر مودی جی کے تحت خواتین کی معاشی، سماجی اور تعلیمی بااختیار بنانے کے لیے اہم کام جاری ہے۔ حکومت "ناری شکتی وندن ادھینیم" جیسی پہل قدمیوں کو مسلسل چلا رہی ہے۔

فخر کا اظہار کرتے ہوئے، جناب شیوراج سنگھ نے اس بات پر روشنی ڈالی کہ ’لکھپتی دیدیاں‘ اب موقع ملنے پر اونچی اڑان بھرنے کے قابل ہیں، سیلف ہیلپ گروپس کی جانب سے کیے جانے والے مثالی کام کی بدولت۔ 20 ملین سے زیادہ خواتین ‘لکھپتی دیدی’ بن چکی ہیں۔ انہوں نے مزید کہا کہ وزیراعظم کی قیادت میں ملک میں کوئی خاتون غریب نہیں رہے گی۔ انہوں نے کہا، "ہماری کوشش اس بات کو یقینی بنانا ہے کہ کسی بھی عورت کی آنکھوں میں کبھی آنسو نہ آئیں۔ کسی کو بھیک نہیں مانگنی چاہئے؛ ہر عورت مسکرائے، اور ہم ہر عورت کو 'لکھ پتی دیدی' بنانے کے لیے کام کر رہے ہیں۔ کوئی بھی چیز خواتین کی ترقی کو نہیں روک سکتی، اور ہماری دیدی اس مقصد کے لیے مسلسل کام کر رہی ہیں"۔

جناب شیوراج سنگھ نے زور دے کر کہا کہ بیٹیوں کو منفی نظر سے دیکھنے والی ذہنیت کو بدلنا چاہیے، اور اگر ضروری ہو تو ایسے عناصر کو ختم کیا جانا چاہیے۔ انہوں نے کہا کہ تشدد سے مبرا دیہات کے قیام کے لیے ایک وسیع البنیاد عوامی مہم چلائی جائے گی اور خواتین کے خلاف تشدد کسی بھی صورت میں برداشت نہیں کیا جائے گا۔ آج کے دور میں تشدد واقعی تکلیف دہ ہے۔ انہوں نے کہا کہ "خواتین کا مقام اعلیٰ ہے، خواتین کے وقار کے احترام کے بغیر، نہ ملک اور نہ ہی معاشرہ ترقی کر سکتا ہے"۔

انہوں نے مزید کہا کہ تشدد کی ایک بڑی وجہ نشہ ہے۔ نشہ تمام برائیوں کی جڑ ہے۔ خواتین کو دیہاتوں میں منشیات کے استعمال کے خلاف بیداری پیدا کرنی چاہیے۔ حکومت، معاشرے اور خاص طور پر خواتین کے ساتھ مل کر اس کو ایک مہم بنانے کا عزم کرے۔

مہم کا مقصد کمیونٹی پر مبنی کارروائی کے ذریعے صنفی بنیاد پر تشدد کے خلاف بیداری پھیلانا، خواتین کے لیے محفوظ نقل و حرکت کی حوصلہ افزائی کرنا، خواتین کی اقتصادی شراکت کو تسلیم کرنا، اور گھریلو کام  کاج کے لیے مشترکہ ذمہ داری کو فروغ دینا ہے۔ خواتین کو بااختیار بنانا اس اقدام کا بنیادی حصہ ہے۔

یہ قومی مہم دیہی ترقی کی وزارت کے ڈی اے وائی – این آر ایل ایم (دین دیال انتودیہ یوجنا – قومی دیہی روزی روٹی مشن) کے تحت منعقد کی جا رہی ہے اور یہ تمام ریاستوں اور مرکز کے زیر انتظام علاقوں میں 23 دسمبر 2025 تک جاری رہے گی۔ ملک بھر میں سیلف ہیلپ گروپوں  کا وسیع نیٹ ورک اس مہم کی قیادت کر رہا ہے۔

پروگرام کے دوران، ایک مشترکہ ایڈوائزری جاری کی گئی، جس پر گیارہ وزارتوں/محکموں نے دستخط کیے۔ ان میں خواتین و اطفال کی ترقی کی وزارت، محکمہ اسکولی تعلیم اور خواندگی، وزارت داخلہ، وزارت برائے پنچایتی راج، زراعت اور کاشتکاروں کی فلاح و بہبود کی وزارت، سماجی انصاف اور تفویض اختیارات کی وزارت، نوجوانوں کے امور اور کھیل کود کی وزارت، صحت و خاندانی بہبود کی وزارت،  بہت چھوٹی ، چھوٹی اور درمیانہ درجے کی صنعتوں کی وزارت، اطلاعات و نشریات کی وزارت محکمہ انصاف شامل تھے۔

یہ پہل قدمی صنفی امتیاز اور تشدد کے خاتمے کے لیے تمام وزارتوں کی اجتماعی طاقت کو بروئے کار لاتے ہوئے 'مجموعی حکومت' کے نقطہ نظر کی مثال ہے۔

مختلف وزارتوں اور محکموں کے نمائندوں، دیہی روزی روٹی مشن کے ریاستی حکام، ملک بھر سے خواتین کے سیلف ہیلپ گروپ کے اراکین، آنگن واڑی کارکنان، اور سول سوسائٹی کی شراکت دار تنظیموں نے اس پروگرام میں شرکت کی، جس نے صنفی مساوات اور دیہی ترقی کے لیے حکومت کے مشترکہ عزم کا زبردست مظاہرہ کیا۔

******

 (ش ح –ا ب ن)

U.No:1814