نائب صدر جمہوریہ ہند کا سکریٹریٹ
نائب صدرِ جمہوریہ نے آندھرا پردیش کے پالاسمدرم میں واقع این اے سی آئی این (این اے سی آئی این) میں سول سروسز کے زیر تربیت افسران سے خطاب کیا
سول سرونٹس کا ’وِکست بھارت @2047‘ کی تعمیر میں نہایت اہم کردار ہے: نائب صدر
جی ایس ٹی ایک تاریخی اصلاح ہے جس نے بھارت کے بالواسطہ ٹیکس نظام کو سادہ اور منظم بنایا: نائب صدر جمہوریہ
ٹیکس چوروں پر قابو پانا ضروری ہے؛ قوانین معاشرے کی بہتری کے لیے بنائے گئے ہیں اور ان پر مؤثر عمل درآمد لازم ہے: نائب صدر جمہوریہ
نائب صدر نے افسران پر زور دیا کہ وہ صرف ’انفرادی بہترین کارکردگی‘ کے بجائے ’اجتماعی بہترین کارکردگی‘ کو اپنا مقصد بنائیں
آئی جی او ٹی کرم یوگی صلاحیت سازی کے لیے ایک بہترین پلیٹ فارم ہے: نائب صدر جمہوریہ
Posted On:
23 NOV 2025 2:51PM by PIB Delhi
نائب صدر جمہوریہ ہند جناب سی پی رادھا کرشنن نے آج آندھرا پردیش کے پالاسمدرم میں واقع نیشنل اکیڈمی آف کسٹمز، انڈائریکٹ ٹیکسز اینڈ نارکوٹکس (این اے سی آئی این) میں مختلف سول سروسز کے زیر تربیت افسران سے خطاب کیا۔
وزیرِ اعظم جناب نریندر مودی کے ذریعے 2024 میں پالاسمدرم میں تعمیر شدہ نئے این اے سی آئی این کی عمارت کے افتتاح کو یاد کرتے ہوئے، نائب صدر نے کہا کہ این اے سی آئی این نے بھارت کی کسٹمز اور جی ایس ٹی انتظامیہ کی استعداد سازی کے مرکز کے طور پر ایک ممتاز ادارے کی حیثیت اختیار کر لی ہے۔
زیرتربیت افسروں سے خطاب کرتے ہوئے انہوں نے اس سال کی خصوصی اہمیت کو اجاگر کیا، کیونکہ ملک سردار ولبھ بھائی پٹیل—جو آل انڈیا سروسز کے بانی ہیں—کا 150واں یوم پیدائش منا رہا ہے۔ انہوں نے کہا کہ سردار پٹیل کی بصیرت افروز قیادت نے نوآبادیاتی ہندوستان کو ایک مضبوط، وِکست اور آتم نربھر بھارت میں تبدیل کرنے کی بنیاد رکھی۔
نائب صدر نے یوپی ایس سی (یونین پبلک سروس کمیشن ) کی بھی تعریف کی، جو 2026 میں اپنی صد سالہ تقریبات منائے گی۔ انہوں نے اسے سول سروسز کی تقرری میں ’میرٹ، دیانت داری اور انصاف کا محافظ‘ قرار دیا۔
نائب صدر نے جامع ترقی کی ضرورت پر زور دیا۔ انہوں نے کہا کہ دولت کی تخلیق اور دولت کی تقسیم دونوں یکساں طور پر اہم ہیں۔ انہوں نے اجاگر کیا کہ وزیر اعظم نریندر مودی نے قومی ترقی کے لیے ان دونوں پہلوؤں پر خاص توجہ دی ہے۔
نائب صدر نے جی ایس ٹی کو ایک تاریخی اصلاح قرار دیا، جس نے ملک کے بالواسطہ ٹیکس نظام کو آسان اور ہم آہنگ بنایا ہے۔ انہوں نے زور دیا کہ ٹیکس چوروں پر قابو پانا اور انہیں سزا دینا ضروری ہے، کیونکہ قوانین سماج اور قوم کی بھلائی کے لیے بنائے جاتے ہیں۔ انہوں نے کہا کہ ملک کے قوانین پر صحیح عمل درآمد ہونا چاہیے اور یہ ذمہ داری افسروں کے ہاتھ میں ہے۔
وِکست بھارت @2047 کے وژن کو عملی جامہ پہنانے میں سول سرونٹس کے کردار پر بات کرتے ہوئے، نائب صدر نے کہا کہ ملک کی ترقی کا سفر ہمیشہ آخری فرد تک سہولیات کی فراہمی اور جامع ترقی کے اصول پر قائم رہا ہے۔
انہوں نے تربیتی افسروں کو مشورہ دیا کہ وہ انفرادی کارکردگی کے بجائے ٹیم کی مجموعی کارکردگی کو ترجیح دیں، کیونکہ ادارے اور قومیں اجتماعی کوششوں سے بنتی ہیں۔
انہوں نے اس بات کی طرف توجہ دلائی کہ دنیا تیزی سے بدل رہی ہے اور ٹیکنالوجی ہر روز ترقی کر رہی ہے، لہٰذا افسروں کو ابھرتی ہوئی ضروریات کے مطابق اپنی صلاحیتوں کو مسلسل بہتر بنانا چاہیے۔ انہوں نے افسروں کو جدید ٹیکنالوجیز، جیسے مصنوعی ذہانت (اے آئی)، نیچرل لینگویج پروسیسنگ (این ایل پی)، مشین لرننگ (ایم ایل) اور بلاک چین کو اپنانے کی ترغیب دی، تاکہ شفافیت اور بہتر طرزِ حکمرانی کو فروغ دیا جاسکے۔
انہوں نے آئی جی او ٹی کرم یوگی کو ایک ’عمدہ پلیٹ فارم‘ قرار دیا جو ہر وقت اور ہر جگہ صلاحیت سازی کا بہترین ذریعہ فراہم کرتا ہے۔
اپنے خطاب کے اختتام پر، نائب صدر نے زیر تربیت افسران کی محنت کو سراہتے ہوئے کہا کہ یوپی ایس سی کے تقریباً 12 لاکھ امیدواروں میں سے ہر سال صرف 1,000 کے لگ بھگ امیدوار منتخب ہوتے ہیں۔ انہوں نے کہا کہ 140 کروڑ آبادی میں سے ان افسروں کو اب یہ نایاب موقع حاصل ہے کہ وہ معاشرے میں بامعنی تبدیلی لا سکیں۔
انہوں نے یاد دہانی کرائی کہ “بڑی طاقت کے ساتھ بڑی ذمہ داری بھی آتی ہے”، اور انہیں مشورہ دیا کہ وہ اس موقع کو ملک کی خدمت کے لیے استعمال کریں۔
اس موقع پر آندھرا پردیش کے وزیر برائے تعلیم، آئی ٹی، الیکٹرانکس و کمیونیکیشن اور آر ٹی جی، جناب ناڑا لوکیش، سکریٹری برائے نائب صدرِ جمہوریہ، جناب امیت کھرے، ڈائریکٹر جنرل این اے سی آئی این، ڈاکٹر سبرامنیم اور دیگر معزز شخصیات بھی موجود تھیں۔
*****
ش ح۔م ع۔ ن م۔
U- 1675
(Release ID: 2193198)
Visitor Counter : 13