Ka kynhun jong ki nongthoh khubor na Meghalaya bad Tripura, kum shi bynta ka Press tour kaba dang ïaid shakhmat, ba la pynlong da ka Press Information Bureau, Shillong, ki la leit jngoh ïa ka Karnataka Silk Industries Corporation Ltd. (KSIC) kaba don ha Mysuru. Ka jingleit jngoh ka la ai ïa ki nongthoh khubor ïa ka jingshem kaba jylliew shaphang ka jinghiar pateng, ka jingtrei kti bad ka jingpawnam jong ka Mysore Silk, kawei na ki rukom thain jaiñ ba pawnam bad ba itynnad bha jong ka India.

Ia Mysore Silk Weaving Factory la seng ha u snem 1912 da u Maharaja Sri Nalvadi Krishnaraja Wodeyar ban pynbiang ia ki jain silk kiba bha na ka bynta ka iing syiem. Da ka pateng kaba la neh palat 126 snem, kane ka karkhana mynta ka ieng kum ka dak kaba sngew sarong jong ka jingtbit jong ka India ha ka kam jain. Ha kaba sdang la buh tang da ki 10 tylli ki kor thain jain, suki suki ka unit ka la nang kiew sha ka 138 tylli ki kor thain jain katba nang mih ki sngi. Ki kor thain jain bad ki mashin pynkhreh, kiba la wanrah na Switzerland, ki long kiba nyngkong eh ha India. Hadien ka jinglaitluid jong ka ri India, katei ka karkhana ka la hap hapoh ka jingpyniaid jong ka Tnad Mysore State Sericulture, shwa ban pynkylla sha ka KSIC ha u snem 1980, ha kaba ka dang iai bteng ban treikam kum ka karkhana sorkar.

Ha kane ka jingleit jngoh ïa ka karkhana, la ai ka jingbatai kaba bniah ia ki nongthoh khubor da u Krishna Kumar, Dyeing Master ha KSIC, uba la batai ïa kawei pa kawei ka kyrdan jong ka jingpynmih silk. Naduh ka jingpynkhuid ia ki jingbitnah bad ka jingwieh rong ka bym ktah ia ka mariang jong ki ksai mulberry silk haduh ka rukom thain kti kaba jem bha kaba kynthup ïa ka zari ksiar bad rupa ba shisha, ki jingbatai jong u Kumar ki pyni ïa ka jingïasohlang ka jingtbit tynrai bad ka jinglong thikna jong ka teknoloji kaba don ha man la ka jain silk jong ka Mysore.

Ka unit jong ka KSIC ka pynmih kumba 350 tylli ki sari man ka sngi. Kawei pa kawei ka saree Mysore Silk ka long kaba pher ym tang da ka nongrim ba riewspah bad ki rong kiba itynnad hynrei da ka jingpyndonkam ruh ïa ka zari ksiar ba 22 karat. Katkum ka jinglong jingman jong ka jingsaindur bad ka jingdon jong ka zari, ki saree ki shong dor hapdeng T. 18,000 haduh T. 2.5 lak. Ka showroom jong ka karkhana ha Mysuru ka khring ïa ki paidbah kiba bun man ka sngi, ha kaba ki nongthied ki ju ïeng lain dang step, kaba pynlong ïa ki mar ban die noh tang hapoh khyndiat kynta. Kane ka jingdawa kaba jur kam dei kaba ju jia katkum ka aiom hynrei ka dei kaba ju jia man ka sngi, kaba pyni ïa ka jingpawnam bad jingshaniah jong ka brand kaba la tei ha ki phew snem.

Katba ki dang peit ïa ka riti dustur ba riewspah jong ka Mysore Silk, ki nongthoh khubor na Meghalaya ki la shim ruh ïa ka kabu ban pynpaw pyrthei ïa ka silk tynrai jong ka jylla jong ki, ka Eri Silk, kaba la tip ruh kum Peace Silk namar ka rukom pynmih jong ka ka bym ktah ia ka mariang. Ka la rung jylliew bha ha ka kolshor bad ka jinglong jong ka thain shatei lammihngi, ka Eri Silk ka pawnam na ka bynta ka jinglait lyer, ka jinglah ban neh bad ka jingjem.

Ki nongthoh khubor ki la iakren halor kumno ban pynpawnam shuh shuh ia ka Eri Silk bad ban lah ban kamai ha kylleng ka ri. Ki la kdew ruh ba katba ka Mysore Silk ka dei ka kyrteng kaba la pawnam bha bad kaba la ithuh ha ka pyrthei, ki silk tynrai kum ka Eri ki don kajuh ka lad lada ai ïa ka jingpynpaw kaba biang bad ka jingkyrshan jong ki tnat treikam.

Ki nongthoh khubor ki la pynpaw ba kum kine ki jingleit jngoh ki plie ka lad kaba kongsan na ka bynta ka jingïasam ia ki kolshor bad ki ïarap ïa ki nongthoh khubor ban ïoh ïa ka jingsngewthuh kaba kham jylliew ïa ki rukom shna jain kiba iar bad kiba pher jong ka India. U la bynrap ruh ba ka jingpyni ia kine ki karkhana tynrai kam dei tang ba ka pynneh pynsah ia ka kolshor hynrei ka plie lad ruh ia ka jingkiew ka ioh ka kot bad ka roi ka par kaba iaineh.

Ka jingleit ki lad pathai khubor kan bteng da ki jingïakren kiba kham bun ha kylleng ka Karnataka, kaba ai ïa ki nongthoh khubor ïa ka jingïohi kaba kham jylliew shaphang ki jingnoh synñiang jong ka jylla ha ka kam karkhana, ka kolshor bad ka histori.

****

(Release ID: 2189849) visitor counter : 18