Mysuru, Karnataka - Risaw 17, 2025:

Kum shi bynta ka press tour jong ka Press Information Bureau (PIB) Shillong ha kylleng ka jylla Karnataka, ka kynhun jong ki Nongthoh Khubor na Meghalaya bad Tripura ki la leit jngoh ïa ka Mysuru Palace kaba pawnam ha ka pyrthei ha ka sngi Palei.

Ka jingleit jngoh ka la ai ka jingtip kaba jylliew shaphang ka jingkhraw ka histori bad ka jingriewspah jong ka kolshor jong ka jinghiar pateng jong ki syiem ka Karnataka. La pdiang sngewbha ia ka kynhun ha ka jaka jong ka iing syiem, ha kaba u Nayak, u nongpeit ia ka Mysuru Palace, u la ialam hi dalade ia ki lyngba katei ka jingtei kaba pawnam. U Nayak u la ïasam ïa ki khana kiba sngewtynnad na ka por ba la leit noh jong ka ïing syiem, ka jingitynnad jong ka jingtei jong ka, ki riti dustur,bad ka pateng kaba neh.

Ka Mysuru Palace kaba mynta, kaba la tip ruh kum ka Amba Vilas Palace, kadei kaba la tei ha u snem 1912 hadien ba ka jingtei da ka dieng mynshuwa ka la jot noh na ka jingpluh ding ha u snem 1897. La phah shna da u Krishna Raja Wadiyar IV bad la saindur da u nongtei jong ka ri Bilat u Henry Irwin. , ka iing syiem kadei ka jingtei kaba la pynïasoh lang ïa ki rukom tei Indo-Saracenic, Dravidian bad Gothic, kiba don ia ki dome, ki phyllaw kiba heh, ki arch ba pynitynnad bad ki iit ba bun rong. Ar tylli ki jinglong ba kyrpang ha kaba tei ia kane ka Iing Syiem ki long kiba donkam ban buh jingkynmaw: ka jingpyndonkam ia ki tiar kiba na la ka jong ka jaka katba lah bad ka jingshim ia ki rukom shna kiba lah ban iada na ka ding kaba la dei kaba donkam eh jong ka jingpynwandur thymmai.

Ka jingtei kaba kongsan ka long kaba la shna da ka granite kaba heh bha, kaba don lai mala, bad la shna da ka tower kaba san mala kaba la tap da ka dome. Ka tower ka jrong kumba 145 phut na madan haduh ka lama rong ksiar ha tduh jong ka, kaba itynnad ka don hynriew tylli ki arch kiba heh bad ar tylli ki arch kiba rit kiba ker sawdong ia ka arch ba pdeng, ba la kyrshan da ki rishot kiba jrong.

Halor ki arch pdeng, kum ka bynta kaba halor ka don ka jingtei jong ka Gajalakshmi. Ia ka iing syiem, kum kaba rim, la tei sawdong ia kawei ka phyllaw, kaba ki khot ka Thotti, na kaba lah ban iohi beit beit ia ka suin bneng. Sha ka bynta mihngi jong kane ka Thotti ha ka mala ba shapoh, ka don ka khyrdop hati kaba itynnad bha.

Shaphang shathie ka don ka Kalyana Mantap kaba itynnad lane ka Marriage Pavilion. Ha ka mala kaba nyngkong, kaba dang phai shaphang mihngi, ka don ka iing Durbar kaba heh, ka Divan-E-Aam. Ha kajuh ka mala, shaphang shathie ka don ka iing Durbar kyrpang kaba la pynitynnad bha, kaba ki khot ka Ambavilasa, ka Diwan-E-Khas.

U Nayak u la pynpaw ia ka jingthmu jong ki nongsynshar Wadiyar, kiba la pawnam na ka bynta ka jingtbit jong ki ha ka synshar khadar bad kumjuh ruh ka jingkyrshan jong ki ia ki kam saindur, ka put ka tem, ka thoh ka tar bad ka jingtei.

Ha kane ka ïing syiem la buh ruh ïa ki katto katne ki jingtrei jong u Raja Ravi Varma, kiba ki jingdro ba pawnam jong ki khanatang jong ka ri India bad ki dur jong ki syiem ki dang long kiba khring bha. Ka jingdon jong u ha ka iingbishar Wadiyar ka pynpaw ia ka jingsngewtynnat kaba jur jong ka hima ia ki jingdro babha.

Sa kawei pat ka bynta ba kongsan ha kane ka jingleit jngoh ka long ka jingpeit ia ka Khet Ksiar (Suvarna Simhasana), ka dak ba pawnam jong ka bor ki syiem bad ka jingmut jong ka niam ka rukom. Ia ka khet la shna da ka ksiar bad la pyndait da ki mawkordor.

Ki Nongthoh Khubor ki la iaroh ia ka iing Mysuru Palace bad ia ka jingitynnad jong ka ha ka histori, ka jingsaindurt, bad ka riti dustur.

Ka jingleit jngoh ïa ka Mysuru Palace ka la ailad ïa ki nongthoh khubor ban ïohi lypa ïa ka jinghiar pateng ki syiem jong ka Karnataka bad ka lad ban ïohi ïa ka pateng jong ka kolshor. Da ka Khet Ksiar ba pawnam jong ka, ki kam ba iaineh jong u Raja Ravi Varma, bad ka histori kaba riewspah ha kaba iadei bad ki syiem, ka ïing syiem ka dang ïai bteng ban ieng kum ka dak kaba sngew sarong jong ka mynnor ba donburom jong ka India.

****

(रिलीज़ आईडी: 2189847) आगंतुक पटल : 23