U Myntri Rangbahduh jong ka Ri u Narendra Modi u la plie ïa ka 4G stack ba pura jong ka ri India bad shi lak tylli ki tower 4G jong ka BSNL na Jharsuguda, Odisha mynta ka sngi. Haba kren ha ka jingïalang, u Myntri Rangbahduh u la ban jur ba ka jingpyniar ïa ka teknoloji 4G kan ai jingmyntoi ïa palat ar klur ngut ki briew ha baroh kawei ka ri. U Myntri Rangbahduh u la pynpaw ka jingsngew sarong ba ka BSNL ka la lah ban pynmih ïa ka 4G technology kaba pura hapoh ka ri India. U la iaroh ia ka jingaiti, jingminot, bad jingtbit jong ka BSNL ha kaba poi sha une u mawmer. U la ong shuh shuh ba ki kompeni jong ka India mynta ki la kyntiew ia ka India hapdeng ki san tylli ki ri ha ka pyrthei kiba don pura ia ka teknoloji ba shna hi hapoh ka ri ban ai ia ki jingshakri 4G. U Myntri Rangbahduh u la bynrap ba kumba laiphew hajar tylli ki shnong, kiba mynshwa kim don ia ka internet kaba stet, mynta kin ioh ia ka jingpyniasoh lyngba kane ka sienjam.

U Myntri Sorkar Pdeng ba dei peit ia ka Tnad Communications bad Development of North Eastern Region u Jyotiraditya M. Scindia u la iadonlang ha kane ka prokram lyngba ki lad digital na Assam ha ryngkat u Myntri Rangbah ka jylla u Himanta Biswa Sarma bad u la pynpaw ba kane ka dei ka sngi ka ban sah jingkynmaw ha ka histori. Haba ai khublei ïa kane ka jingjop kaba kongsan, u Myntri ka Sorkar Pdeng u la pynpaw ba, da ka jingïalam jong ka jingthmu jong u Myntri Rangbahduh ka ri u Modi na ka bynta ka Aatmanirbhar Bharat, ka BSNL ka la kular ban pynmih ïa la ka jong ka 4G stack bad kaba phylla ka long ba tang hapoh 22 bnai, ka India ka la poi sha ka kyrdan jong ki san tylli ki ri ha ka pyrthei kiba la lah ban leh ia kane ka kam. Kane ka dei ka khyllipmat jong ka jingsarong na ka bynta ka ri baroh kawei katba ka India ka nang kiew shaphrang ban long ka nongïalam ha ka pyrthei ha ka liang ka kam telecommunication, u la ong.

U Scindia u la ïaroh ïa ka jingïohi jngai jong u Myntri Rangbahduh Modi na ka bynta ka Atmanirbhar Bharat, da kaba ong, “Ha ka por ba ka 2G, 3G, bad 4G ka la mih ha ka pyrthei, ka India ka la shaniah ha ka buit stad jong ki bar ri. Mynta ka sngi, ka jingtbit jong ka BSNL ka la pynkylla ïa kane, da kaba pynlong ïa ka India kum ka jaka pdeng ban shna ia ki mar telecom ha ka pyrthei.” Ka swadeshi stack kaba lah ban kyntiew sha ka 5G kaba pyndonkam da ka cloud ka shakri ïa palat 2 klur ngut ki nongshong shnong bad ka pynïasoh ïa jan 30,000 tylli ki shnong ki bym shym la ioh jingshakri mynshuwa.

Ka sienjam jong ka BSNL kaba T.37,000 klur ka la pyntreikam ïa 97,500 tylli ki tower, ha kaba 92,633 tylli ki la treikam, kaba pynkylla ïa ka jingïasoh ha kylleng ki jaka ba jngai, ki rilum, bad ki jaka lum. Kine ki tower, kiba la pynkhreh na ka bynta ka 5G, ki ai jingmyntoi ia ki samla pule, ki nongrep, ki nongpang, bad ki shipai. Ka jingdon ki nongpyndonkam ka la kiew na ka 78 lak ha u bnai Iaiong 2024 sha ka 2.2 klur, ha kaba ka jingïohnong ka long T.280 klur (Kyllalyngkot – Lber Snem Mang Tyngka 25) bad T.261 klur (Ha ki lai bnai ha u snem mang tyngka 25), ba la ïarap da ka T.25,000 klur ha ka jingtheh pisa. “Kane ka dei ka por jong ka India ban paw kum ka ri kaba khlain ha ka jingpynmih mar,” la ong u Scindia.

Ka Digital Bharat Nidhi (DBN) ka la pyntreikam ia 19,823 tylli na ki 27,106 tylli ki tower ba la buh thong, kiba pyniasoh ia ki 26,327 tylli ki shnong bad jan 20 lak tylli ki iing ha kylleng ki aspirational distrik, ki thain shatei lammihngi, ki thain khappud, bad ki thain LWE. Ha u Nailar 2025, kine ki tower ki la plié lad ban pyndonkam ïa ka data haduh 42,773 TB, kaba long 21 GB na ka bynta man u nongpyndonkam. “Naduh ka Odisha kaba jngai haduh ka Assam kaba don lum, ka DBN ka pynthikna ba ka pule puthi, ka koit ka khiah, bad ka jingsynshar kin poi sha man la ki iing da kaba ai bor ïa baroh ki nongshong shnong”, la ong u Scindia .

U Scindia u la kdew sha ka bynta jong ka BSNL ha kaba buh ia ka India ha ka kyrdan nongialam ha ka kam 5G bad 6G, ha kaba ka stack ba shna hi hapoh ka ri ka long kaba la khreh ban shalan sha kylleng ka pyrthei, kaba pyni ia ka jinglong Vasudhaiva Kutumbakam. “Ka jingthmu jong u Myntri Rangbahduh Modi ka la pynlong ïa ka India kum ka digital vishwa-guru, ha kaba 50% na ki jingsiew digital ha ka pyrthei baroh kawei la pynïaid da ka UPI,” u la ong. Da ka jingiatreilang hapdeng ki jylla bad ka Sorkar pdeng, kane ka jingthmu ka plie lad ia ka Bharat kaba shngain, kaba tbit bad ka Viksit Bharat shuwa u snem 2047.

U Myntri Rangbah ka Jylla Assam u Himanta Biswa Sarma, ha ka jingai jingkren jong u, u la ong ba ka long ka kam kaba sngew sarong ba u Myntri Rangbahduh ka ri u Narendra Modi u aiti ïa ka Swadeshi 4G Network sha ka ri mynta ka sngi. Ha kine ki sngi ban wan, ka BSNL kan sa kyntiew ia kane ka Swadeshi 4G Network sha ka 5G, bad ha u snem 2030, kan sa pyntreikam noh ia ka 6G Network, u la bynrap. U Sarma u la pyntip shuh shuh ba kawei na ki san tylli ki data centre jong ka BSNL ha India yn buh ha Guwahati bad kane kan iarap ruh ha ka jingpynmih ia ki kam ki jam ia ki samla.

La plie paidbah ia ki Swadeshi 4G tower ha ki jylla bapher bapher ha kaba la iashim bynta lang da ki Myntri ba kongsan jong ka Sorkar Pdeng bad ki Myntri Rangbah. Ha Odisha, u Myntri Rangbah Mohan Charan Majhi u la iashim bynta lang; ha Andhra Pradesh, ki Myntri ka sorkar pdeng u Ram Mohan Naidu bad u Chandrashekhar Pemmasani ryngkat u Myntri Rangbah N. Chandrababu Naidu ki la iashim bynta; ha Uttar Pradesh, u Myntri ka Sorkar Pdeng u Pankaj Chaudhary bad u Myntri Rangbah u Yogi Adityanath ki la iadon lang; ha Maharashtra, u Myntri Sorkar Pdeng Raosaheb Nikhil Khadse, u Myntri Rangbah Devendra Fadnavis, bad ki Symbud Myntri Rangbah Eknath Shinde bad u Ajit Pawar ki la iadon lang; ha Rajasthan, u Myntri ka Sorkar Pdeng u Arjun Ram Meghwal bad u Myntri Rangbah Bhajanlal Sharma ki la iashim bynta lang; ha Assam, u Myntri Rangbah Himanta Biswa Sarma u la ïashim bynta; ha Gujarat, u Myntri ka Sorkar Pdeng u Mansukh Mandaviya bad u Myntri Rangbah Bhupendra Patel ki la iashim bynta lang; bad ha Bihar u Myntri Sorkar Pdeng u Giriraj Singh bad u Myntri Sorkar Pdeng u Dharmendra Pradhan ki la iashim bynta lang.

(रिलीज़ आईडी: 2189492) आगंतुक पटल : 14