व्हाइस अ‍ॅडमिरल अनिल जग्गी यांनी ०१ नोव्हेंबर २५ रोजी व्हाइस अ‍ॅडमिरल गुरचरण सिंग, एव्हीएसएम, एनएम यांच्याकडून राष्ट्रीय संरक्षण अकादमीचे कमांडंट म्हणून नियुक्ती स्वीकारली.

अ‍ॅडमिरल अनिल जग्गी हे भारतीय नौदल अकादमीचे माजी विद्यार्थी आहेत आणि १ जानेवारी १९९३ रोजी भारतीय नौदलात त्यांची नियुक्ती करण्यात आली. ध्वज अधिकारी हे नेव्हिगेशन आणि डायरेक्शन तज्ञ आहेत आणि तीन दशकांहून अधिक काळाच्या कारकीर्दीत त्यांनी विविध ऑपरेशनल, स्टाफ, डिप्लोमॅटिक आणि इंस्ट्रक्शनल जबाबदाऱ्या सांभाळल्या आहेत. त्यांनी क्षेपणास्त्र जहाज आयएनएस वीर आणि स्वदेशी शिवालिक श्रेणीतील स्टेल्थ गाईडेड मिसाइल फ्रिगेट आयएनएस सह्याद्रीचे नेतृत्व केले आहे.

वेलिंग्टन येथील डिफेन्स सर्व्हिसेस स्टाफ कॉलेज आणि गोव्यातील प्रतिष्ठित नेव्हल वॉर कॉलेजमधून त्यांनी पदवीचे शिक्षण घेतले आहे. करिअर अभ्यासक्रमांव्यतिरिक्त, अ‍ॅडमिरल यांनी स्वीडनमधील SWEDINT येथून संयुक्त राष्ट्र निरीक्षक अभ्यासक्रम यशस्वीरित्या पूर्ण केला. त्यांच्या शैक्षणिक नियुक्त्यांमध्ये, इंडियन नेव्हल अकादमी येथील विभागीय अधिकारी आणि वेलिंग्टन येथील डीएसएससी येथील प्रशिक्षक या कामांचा समावेश आहे.

कमोडोर पदावर, या वरिष्ठ अधिकाऱ्याने लंडन येथील भारतीय उच्चायुक्तालयात नौदल सल्लागार आणि नवी दिल्ली येथील एनएचक्यू येथे कमोडोर (परदेशी सहकार्य) म्हणून काम करताना परराष्ट्र सहकार्य आणि आंतरराष्ट्रीय संबंधांच्या बाबतीत समृद्ध आणि मौलिक अनुभव प्राप्त केला. रियर अ‍ॅडमिरल पदावर बढती झाल्यानंतर, त्यांना गुजरात, दमण आणि दीव नौदल क्षेत्राचे ध्वज अधिकारी कमांडिंग म्हणून नियुक्त करण्यात आले.

एनडीएच्या कमांडंट पदाची सूत्रे हाती घेण्यापूर्वी, ते महाराष्ट्र नौदल क्षेत्राचे फ्लॅग ऑफिसर कमांडिंग होते. तिथे त्यांनी महाराष्ट्र राज्याच्या तटवर्ती भागाच्या संरक्षणाची जबाबदारी सांभाळली आणि पश्चिम नौदल कमांडच्या अखत्यारीत प्रशासन, पायाभूत सुविधा प्रकल्प, नौदल समुदायाचे कल्याण यासंबंधी विविध उपक्रम राबवले. त्यांच्या कार्यकाळात, ते फ्लॅग ऑफिसर महाराष्ट्र राज्य आणि नागरी संस्थांशी समन्वय साधून सामुदायिक सहभाग, पोहोच कार्यक्रम आणि नागरी-लष्करी संपर्क उपक्रमांमध्ये सक्रियपणे सहभागी झाले.

व्हाइस अ‍ॅडमिरल अनिल जग्गी यांच्या नेतृत्वाखाली, राष्ट्रीय संरक्षण अकादमी भारतीय सशस्त्र दलांच्या भावी नेत्यांना उत्तमरीत्या प्रशिक्षित करण्याचा प्रतिष्ठित वारसा कायम ठेवेल. या प्रमुख त्रिसेवा प्रशिक्षण संस्थेत त्यांच्या प्रभावी नेतृत्वाखाली मजबूत संयुक्त प्रशिक्षण नीतिमत्ता जपण्यावर लक्ष केंद्रित केले जाईल.

***

जयदेवी पुजारी-स्वामी/पर्णिका हेदवकर/परशुराम कोर

*** 

 

सोशल मिडियावर आम्हाला फॉलो करा:@PIBMumbai    /PIBMumbai    /pibmumbai  pibmumbai[at]gmail[dot]com  /PIBMumbai    /pibmumbai

(रिलीज़ आईडी: 2188009) आगंतुक पटल : 47