ಭಾರತದ ಪೆಟ್ರೋಲಿಯಂ ಮತ್ತು ಇಂಧನ ಕ್ಷೇತ್ರವು ಪರಿವರ್ತನಾತ್ಮಕ ವಿಸ್ತರಣೆಗೆ ಒಳಗಾಗುತ್ತಿದೆ. ಜಾಗತಿಕ ಇಂಧನ ಭವಿಷ್ಯವನ್ನು ರೂಪಿಸುವಲ್ಲಿ ನಿರ್ಣಾಯಕ ಪಾತ್ರ ವಹಿಸಲು ಸಜ್ಜಾಗಿದೆ ಎಂದು ಪೆಟ್ರೋಲಿಯಂ ಮತ್ತು ನೈಸರ್ಗಿಕ ಅನಿಲ ಸಚಿವ ಶ್ರೀ ಹರ್ದೀಪ್‌ ಸಿಂಗ್‌ ಪುರಿ ಅವರು ಇಂದು ಹೈದರಾಬಾದ್‌ನಲ್ಲಿ ನಡೆದ ಇಂಧನ ತಂತ್ರಜ್ಞಾನ ಸಭೆಯ ಉದ್ಘಾಟನಾ ಅಧಿವೇಶನವನ್ನು ಉದ್ದೇಶಿಸಿ ಮಾತನಾಡಿದರು. ಭಾರತದ ಇಂಧನ ಪ್ರಯಾಣವು ದೂರದೃಷ್ಟಿಯ ನೀತಿ ಚೌಕಟ್ಟುಗಳು, ತ್ವರಿತ ನಾವೀನ್ಯತೆ ಮತ್ತು ಸಂಸ್ಕರಣೆ, ಜೈವಿಕ ಇಂಧನಗಳು ಮತ್ತು ಹಸಿರು ಇಂಧನ ವಿಭಾಗಗಳಲ್ಲಿ ನಿರಂತರ ಹೂಡಿಕೆಯಿಂದ ಪ್ರೇರಿತವಾದ ಗಮನಾರ್ಹ ಪ್ರಗತಿಯನ್ನು ಪ್ರತಿಬಿಂಬಿಸುತ್ತದೆ ಎಂದು ಅವರು ಹೇಳಿದರು.

ಜಾಗತಿಕ ಇಂಧನ ಮಾರುಕಟ್ಟೆಯು ನಿಧಾನಗತಿಯಲ್ಲಿ ಬೆಳೆಯುವ ನಿರೀಕ್ಷೆಯಿದ್ದರೂ ವಿಶ್ವಾದ್ಯಂತ ಹಲವಾರು ಸಂಸ್ಕರಣಾಗಾರಗಳು ಮುಚ್ಚುವಿಕೆಯನ್ನು ಎದುರಿಸುತ್ತಿವೆ. ಭಾರತವು ಪ್ರಕಾಶಮಾನವಾದ ತಾಣವಾಗಿ ಎದ್ದು ಕಾಣುತ್ತಿದ್ದು, ಮುಂಬರುವ ದಶಕಗಳಲ್ಲಿ ಜಾಗತಿಕ ಇಂಧನ ಬೇಡಿಕೆಯ ಬೆಳವಣಿಗೆಗೆ ಸುಮಾರು ಶೇ.30-33 ರಷ್ಟು ಕೊಡುಗೆ ನೀಡುವ ನಿರೀಕ್ಷೆಯಿದೆ ಎಂದು ಸಚಿವರು ಹೇಳಿದರು. ಭಾರತದ ಸಂಸ್ಕರಣಾ ಸಾಮರ್ಥ್ಯ‌ವು ಪ್ರಸ್ತುತ ವಾರ್ಷಿಕ ಸುಮಾರು 258 ದಶಲಕ್ಷ  ಮೆಟ್ರಿಕ್‌ ಟನ್‌ (ಎಂಎಂಟಿಪಿಎ) ಆಗಿದೆ ಮತ್ತು 2030ರ ವೇಳೆಗೆ ಸುಮಾರು 310 ಎಂಎಂಟಿಪಿಎ ತಲುಪುವ ಹಾದಿಯಲ್ಲಿದೆ. ದೀರ್ಘಾವಧಿಯ ಯೋಜನೆಗಳು 400-450 ಎಂಎಂಟಿಪಿಎಗೆ ಹೆಚ್ಚಿಸುವ ದೀರ್ಘಾವಧಿಯ ಯೋಜನೆಗಳೊಂದಿಗೆ ಈ ವಿಸ್ತರಣೆಯು ಜಾಗತಿಕವಾಗಿ ಅಗ್ರ ಮೂರು ಸಂಸ್ಕರಣಾ ಕೇಂದ್ರಗಳಲ್ಲಿ ಭಾರತದ ಸ್ಥಾನವನ್ನು ಗಟ್ಟಿಗೊಳಿಸುತ್ತದೆ. ಏಕೆಂದರೆ ಅಸ್ತಿತ್ವದಲ್ಲಿರುವ ಜಾಗತಿಕ ಸಂಸ್ಕರಣಾ ಸಾಮರ್ಥ್ಯ‌ದ ಸುಮಾರು ಶೇ.20 ರಷ್ಟು - 100 ಕ್ಕೂ ಹೆಚ್ಚು ಸಂಸ್ಕರಣಾಗಾರಗಳು - 2035 ರ ವೇಳೆಗೆ ಸಂಭಾವ್ಯ ಮುಚ್ಚುವಿಕೆಯನ್ನು ಎದುರಿಸುತ್ತಿವೆ ಎಂದು ಅವರು ಹೇಳಿದರು.

ಜೈವಿಕ ಇಂಧನ ಮಿಶ್ರಣದಲ್ಲಿ ಭಾರತದ ಸಾಧನೆಗಳನ್ನು ಬಿಂಬಿಸಿದ ಶ್ರೀ ಹರ್ದೀಪ್‌ ಪುರಿ ಅವರು, 2006 ರಲ್ಲಿದ್ದ ಶೇ.5 ರ ಗುರಿಯಿಂದ 2022ರಲ್ಲಿ ನಿಗದಿತ ಸಮಯಕ್ಕಿಂತ ಐದು ತಿಂಗಳ ಮುಂಚಿತವಾಗಿ ಶೇ.10 ಎಥೆನಾಲ್‌ ಮಿಶ್ರಣವನ್ನು ಸಾಧಿಸುವತ್ತ ದೇಶವು ಪ್ರಗತಿ ಸಾಧಿಸಿದೆ ಎಂದು ಹೇಳಿದರು. ಈ ಯಶಸ್ಸಿನ ಆಧಾರದ ಮೇಲೆ, ಸರ್ಕಾರವು 2030 ರಿಂದ 2025-26 ರವರೆಗೆ ಶೇ.20 ರಷ್ಟು ಮಿಶ್ರಣದ ಗುರಿಯನ್ನು ಮುಂದೂಡಿತು. ಉತ್ತಮವಾಗಿ ವಿನ್ಯಾಸಗೊಳಿಸಲಾದ ನೀತಿಗಳು ಮತ್ತು ದೃಢವಾದ ಬೆಂಬಲ ವ್ಯವಸ್ಥೆಗಳು ಅಂತಹ ವೇಗದ ಸಾಧನೆಗಳನ್ನು ಸಕ್ರಿಯಗೊಳಿಸಿವೆ. ಮಹತ್ವಾಕಾಂಕ್ಷೆಯ ಇಂಧನ ಗುರಿಗಳನ್ನು ನಿಗದಿಪಡಿಸುವ ಮತ್ತು ಪೂರೈಸುವ ಭಾರತದ ಸಾಮರ್ಥ್ಯ‌ವನ್ನು ಪ್ರದರ್ಶಿಸಿವೆ ಎಂದು ಸಚಿವರು ಒತ್ತಿ ಹೇಳಿದರು.

ಭಾರತದ ಸಂಸ್ಕರಣಾಗಾರಗಳು ವಿಶ್ವದರ್ಜೆಯ ಜಾಗತಿಕವಾಗಿ ಸಂಯೋಜಿತ ಮತ್ತು ರಫ್ತು ಸಿದ್ಧವಾಗಿವೆ ಎಂದು ಶ್ರೀ ಹರ್ದೀಪ್‌ ಪುರಿ ಅವರು ಹೇಳಿದರು. ಭಾರತವು ಈಗಾಗಲೇ ನಾಲ್ಕನೇ ಅತಿದೊಡ್ಡ ಸಂಸ್ಕರಣಾ ರಾಷ್ಟ್ರವಾಗಿದೆ ಮತ್ತು ಪೆಟ್ರೋಲಿಯಂ ಉತ್ಪನ್ನಗಳ ಅಗ್ರ ಏಳು ರಫ್ತುದಾರರಲ್ಲಿ ಒಂದಾಗಿದೆ. 2024-25ರ ಹಣಕಾಸು ವರ್ಷದಲ್ಲಿ45 ಶತಕೋಟಿ ಡಾಲರ್‌ ಮೌಲ್ಯದ 50ಕ್ಕೂ ಹೆಚ್ಚು ದೇಶಗಳಿಗೆ ರಫ್ತು ಮಾಡಿದೆ. ಸಂಸ್ಕರಣಾ ವಲಯವು ದೇಶದ ಆದಾಯದ ಐದನೇ ಒಂದು ಭಾಗವನ್ನು ನೀಡುತ್ತದೆ. ಸಾರ್ವಜನಿಕ ಮತ್ತು ಖಾಸಗಿ ಸಂಸ್ಥೆಗಳು ಬಲವಾದ ಆರ್ಥಿಕ ಮತ್ತು ಕಾರ್ಯಾಚರಣೆಯ ಕಾರ್ಯಕ್ಷಮತೆಯನ್ನು ತೋರಿಸುತ್ತವೆ ಎಂದು ಅವರು ಹೇಳಿದರು. ದೇಶೀಯ ಪೆಟ್ರೋಲಿಯಂ ಬಳಕೆಯು 2021ರಲ್ಲಿ ದಿನಕ್ಕೆ ಸುಮಾರು 5 ದಶಲಕ್ಷ  ಬ್ಯಾರೆಲ್‌ಗಳಿಂದ ಪ್ರಸ್ತುತ ದಿನಕ್ಕೆ ಸುಮಾರು 5.6 ದಶಲಕ್ಷ  ಬ್ಯಾರೆಲ್‌ಗಳಿಗೆ ಏರಿದೆ ಮತ್ತು ಶೀಘ್ರದಲ್ಲೇ ದಿನಕ್ಕೆ 6 ದಶಲಕ್ಷ  ಬ್ಯಾರೆಲ್‌ಗಳನ್ನು ಮುಟ್ಟುವ ನಿರೀಕ್ಷೆಯಿದೆ. ಇದು ಭಾರತದ ದೃಢವಾದ ಆರ್ಥಿಕ ಬೆಳವಣಿಗೆ ಮತ್ತು ಹೆಚ್ಚುತ್ತಿರುವ ತಲಾ ಆದಾಯದಿಂದ ಬೆಂಬಲಿತವಾಗಿದೆ.

ಸಂಸ್ಕರಣೆಯೊಂದಿಗೆ ಪೆಟ್ರೋಕೆಮಿಕಲ್ಸ್‌ನ ಹೆಚ್ಚುತ್ತಿರುವ ಏಕೀಕರಣವನ್ನು ಉಲ್ಲೇಖಿಸಿದ ಶ್ರೀ ಹರ್ದೀಪ್‌ ಪುರಿ, ಭಾರತದ ಪೆಟ್ರೋಕೆಮಿಕಲ್‌ ಬಳಕೆಯು ಇನ್ನೂ ಜಾಗತಿಕ ಸರಾಸರಿಯ ಮೂರನೇ ಒಂದು ಭಾಗದಷ್ಟು ಮಾತ್ರ ಇದೆ. ಇದು ಬೆಳವಣಿಗೆಗೆ ಗಮನಾರ್ಹ ಸಾಮರ್ಥ್ಯ‌ವನ್ನು ನೀಡುತ್ತದೆ ಎಂದು ಹೇಳಿದರು. ಪೆಟ್ರೋಕೆಮಿಕಲ್‌ ತೀವ್ರತೆಯ ಸೂಚ್ಯಂಕವು ಈಗಾಗಲೇ ಶೇ.7.7 ರಿಂದ ಶೇ.13ಕ್ಕೆ ಏರಿದೆ. ಇದು ವಲಯದ ಮೇಲ್ಮುಖ ಪಥವನ್ನು ಪ್ರತಿಬಿಂಬಿಸುತ್ತದೆ. ದಕ್ಷತೆ, ಮೌಲ್ಯವರ್ಧನೆ ಮತ್ತು ರಫ್ತು ಸ್ಪರ್ಧಾತ್ಮಕತೆಯನ್ನು ಹೆಚ್ಚಿಸಲು ಹೊಸ ಸಂಸ್ಕರಣಾಗಾರ ವಿಸ್ತರಣೆಗಳನ್ನು ಸಮಗ್ರ ಪೆಟ್ರೋಕೆಮಿಕಲ್‌ ಸಂಕೀರ್ಣಗಳಾಗಿ ಯೋಜಿಸಲಾಗುತ್ತಿದೆ ಎಂದು ಅವರು ಒತ್ತಿ ಹೇಳಿದರು.

ಇಂಧನ ಪರಿಸರ ವ್ಯವಸ್ಥೆಯಲ್ಲಿ ನಾವೀನ್ಯತೆ ಮತ್ತು ಸ್ವದೇಶೀಕರಣದ ಮಹತ್ವವನ್ನು ಸಚಿವರು ಇದೇ ವೇಳೆ ಒತ್ತಿ ಹೇಳಿದರು. ಇಂಧನ ಮೌಲ್ಯ ಸರಪಳಿಯಲ್ಲಿ ಭಾರತವು ಸುಮಾರು ಶೇ.80 ರಷ್ಟು ಆಮದು ಪರ್ಯಾಯವನ್ನು ಸಾಧಿಸಿದೆ ಎಂದು ಅವರು ಹೇಳಿದರು. ವೇಗದ್ರವ್ಯಗಳು ಮತ್ತು ವಿಶೇಷ ಉಪಕರಣಗಳಂತಹ ಕೆಲವು ನಿರ್ಣಾಯಕ ಘಟಕಗಳನ್ನು ಆಮದು ಮಾಡಿಕೊಳ್ಳುವುದನ್ನು ಮುಂದುವರಿಸಲಾಗಿದೆ ಎಂದು ಒಪ್ಪಿಕೊಂಡ ಅವರು, ಸಂಪೂರ್ಣ ಸ್ವಯಂ-ನಿಯಂತ್ರಣಕ್ಕಿಂತ ದಕ್ಷತೆ ಮತ್ತು ಜಾಗತಿಕ ಸ್ಪರ್ಧಾತ್ಮಕತೆಯ ಮೇಲೆ ಕೇಂದ್ರೀಕರಿಸುವ ಮೂಲಕ ಆತ್ಮನಿರ್ಭರತೆಗೆ ಸಮತೋಲಿತ ವಿಧಾನದ ಅಗತ್ಯವನ್ನು ಒತ್ತಿ ಹೇಳಿದರು. ಪ್ರಮುಖ ಇಂಧನ ತಂತ್ರಜ್ಞಾನಗಳಲ್ಲಿ ಸಂಶೋಧನೆ ಮತ್ತು ಅಭಿವೃದ್ಧಿ ಮತ್ತು ದೇಶೀಯ ಉತ್ಪಾದನೆಯನ್ನು ಉತ್ತೇಜಿಸಲು ಸರ್ಕಾರವು ಉತ್ಪಾದನೆ ಆಧಾರಿತ ಪ್ರೋತ್ಸಾಹಕ (ಪಿಎಲ್‌ಐ) ಯೋಜನೆಯನ್ನು ಪ್ರಾರಂಭಿಸಿದೆ ಮತ್ತು ವೇಗವರ್ಧಕ ಸಂಶೋಧನೆಗಾಗಿ ರಾಷ್ಟ್ರೀಯ ಕೇಂದ್ರವನ್ನು ಸ್ಥಾಪಿಸಿದೆ ಎಂದು ಅವರು ಹೇಳಿದರು.

ಹಸಿರು ಇಂಧನದ ಬಗ್ಗೆ ಮಾತನಾಡಿದ ಶ್ರೀ ಹರ್ದೀಪ್‌ ಪುರಿ, ಹಸಿರು ಜಲಜನಕದಲ್ಲಿ ಭಾರತದ ಪ್ರಗತಿಯು ವಿಶೇಷವಾಗಿ ಭರವಸೆದಾಯಕವಾಗಿದೆ ಎಂದು ಹೇಳಿದರು. ಐಒಸಿಎಲ್‌ ಮತ್ತು ಎಚ್‌ಪಿಸಿಎಲ್‌ನ ಇತ್ತೀಚಿನ ಟೆಂಡರ್‌ಗಳು ಹಸಿರು ಹೈಡ್ರೋಜನ್‌ ಬೆಲೆಯನ್ನು ಸುಮಾರು 5.5 ಡಾಲರ್‌ / ಕೆಜಿಯಿಂದ ಸುಮಾರು 4 ಡಾಲರ್‌ಗೆ ಇಳಿಸಿವೆ. ಇದು ವಾಣಿಜ್ಯ ಕಾರ್ಯಸಾಧ್ಯತೆಯ ಕಡೆಗೆ ಪ್ರಮುಖ ಹೆಜ್ಜೆಯಾಗಿದೆ. ಹಸಿರು ಜಲಜನಕ, ನೈಸರ್ಗಿಕ ಅನಿಲ ಮತ್ತು ಜೈವಿಕ ಇಂಧನಗಳು ಭಾರತದ ಇಂಧನ ಪರಿವರ್ತನೆಗೆ ಕೇಂದ್ರ ಬಿಂದುವಾಗಲಿವೆ. ಜಾಗತಿಕ ಜೈವಿಕ ಇಂಧನಗಳ ಒಕ್ಕೂಟವು ಅಂತಾರಾಷ್ಟ್ರೀಯ ವ್ಯಾಪಾರವನ್ನು ವೇಗವರ್ಧಿಸುವ ನಿರೀಕ್ಷೆಯಿದೆ ಮತ್ತು ಸುಸ್ಥಿರ ವಾಯುಯಾನ ಇಂಧನ (ಎಸ್‌ಎಎಫ್‌) ಸೇರಿದಂತೆ ಜೈವಿಕ ಇಂಧನಗಳ ಅಳವಡಿಕೆಯನ್ನು ಹೆಚ್ಚಿಸುವ ನಿರೀಕ್ಷೆಯಿದೆ ಎಂದು ಅವರು ಹೇಳಿದರು.

ಭಾರತದ ಇಂಧನ ಕಾರ್ಯತಂತ್ರವು ಸುಸ್ಥಿರತೆಯ ಕಡೆಗೆ ಮಾಪನಾಂಕ ನಿರ್ಣಯದ ಪರಿವರ್ತನೆಯ ಭಾಗವಾಗಿ ಇಂಧನ ಮತ್ತು ಪೆಟ್ರೋಕೆಮಿಕಲ್‌ ಬೆಳವಣಿಗೆ ಎರಡನ್ನೂ ಒಳಗೊಂಡಿದೆ ಎಂದು ಶ್ರೀ ಹರ್ದೀಪ್‌ ಪುರಿ ಒತ್ತಿ ಹೇಳಿದರು. ಸಾಂಪ್ರದಾಯಿಕ ಇಂಧನಗಳ ಪಾಲು ಕ್ರಮೇಣ ಕಡಿಮೆಯಾಗುತ್ತಿದ್ದರೂ ಭಾರತವು ತನ್ನ 2047ರ ಗುರಿಗಳತ್ತ ಸಾಗುತ್ತಿರುವಾಗ ಅವು ದಶಕಗಳವರೆಗೆ ಪ್ರಮುಖ ಪಾತ್ರವನ್ನು ವಹಿಸುತ್ತವೆ ಎಂದು ಅವರು ಹೇಳಿದರು. ಅದೇ ಸಮಯದಲ್ಲಿ, ಇಂಧನ ಮಿಶ್ರಣದಲ್ಲಿ ನೈಸರ್ಗಿಕ ಅನಿಲದ ಪಾಲನ್ನು ಶೇ.6 ರಿಂದ ಶೇ.15ಕ್ಕೆ ಹೆಚ್ಚಿಸಲಾಗುತ್ತಿದೆ. ಹಸಿರು ಜಲಜನಕವನ್ನು ಹೆಚ್ಚಿಸಲಾಗುತ್ತಿದೆ ಮತ್ತು ನವೀಕರಿಸಬಹುದಾದ ಇಂಧನಗಳು ವೇಗವಾಗಿ ವಿಸ್ತರಿಸುತ್ತಿವೆ - ಇವೆಲ್ಲವೂ ಇಂಧನ ಭದ್ರತೆಗೆ ಧಕ್ಕೆಯಾಗದಂತೆ ತನ್ನ ಹವಾಮಾನ ಗುರಿಗಳನ್ನು ಪೂರೈಸುವ ಭಾರತದ ಬದ್ಧತೆಯನ್ನು ಒತ್ತಿಹೇಳುತ್ತವೆ.

1901ರಲ್ಲಿ ದಿಗ್ಬೋಯ್‌ನಲ್ಲಿ ಮೊದಲ ಸಂಸ್ಕರಣಾಗಾರದಿಂದ ಇಂದಿನ ಜಾಗತಿಕ ಮಟ್ಟದ ಸೌಲಭ್ಯಗಳವರೆಗೆ ಭಾರತದ ಐತಿಹಾಸಿಕ ಸಂಸ್ಕರಣಾ ಪರಂಪರೆಯನ್ನು ಸ್ಮರಿಸಿದ ಸಚಿವರು, 2014 ರ ನಂತರದ ಸುಧಾರಣೆಗಳು ಮತ್ತು ಪರಿಸರ ವ್ಯವಸ್ಥೆಯನ್ನು ಬಲಪಡಿಸುವುದು ಬೆಳವಣಿಗೆ ಮತ್ತು ನಾವೀನ್ಯತೆಯ ಹೊಸ ಯುಗವನ್ನು ತೆರೆದಿಟ್ಟಿದೆ ಎಂದು ಹೇಳಿದರು. ಬಾಮರರ ಸಂಸ್ಕರಣಾಗಾರ ಮತ್ತು ಆಂಧ್ರ ಸಂಸ್ಕರಣಾಗಾರದಂತಹ ಪ್ರಗತಿಯಲ್ಲಿರುವ ಯೋಜನೆಗಳು ಈ ವಲಯದ ಪ್ರಗತಿಯ ವೇಗಕ್ಕೆ ಪ್ರಮುಖ ಉದಾಹರಣೆಗಳಾಗಿವೆ ಎಂದು ಅವರು ಒತ್ತಿ ಹೇಳಿದರು. 100ಕ್ಕೂ ಹೆಚ್ಚು ಜೈವಿಕ ಅನಿಲ ಸ್ಥಾವರಗಳು ಕಾರ್ಯನಿರ್ವಹಿಸುತ್ತಿವೆ ಮತ್ತು ಇನ್ನೂ 70 ಯೋಜನೆಗಳು ಪ್ರಗತಿಯಲ್ಲಿವೆ. ಭಾರತವು ತಂತ್ರಜ್ಞಾನ, ಹೂಡಿಕೆ ಮತ್ತು ಸುಸ್ಥಿರತೆಯನ್ನು ಸಂಪರ್ಕಿಸುವ ಪರಿಸರ ವ್ಯವಸ್ಥೆಯನ್ನು ನಿರ್ಮಿಸುತ್ತಿದೆ ಎಂದು ಅವರು ಹೇಳಿದರು.

ಭಾರತವು 10 ಟ್ರಿಲಿಯನ್‌ ಡಾಲರ್‌ ಆರ್ಥಿಕತೆಯತ್ತ ಸಾಗುತ್ತಿದ್ದಂತೆ. ಅದರ ಇಂಧನ ಕ್ಷೇತ್ರವು ದೇಶೀಯ ಅಗತ್ಯಗಳನ್ನು ಪೂರೈಸುವುದು ಮಾತ್ರವಲ್ಲದೆ ಜಾಗತಿಕ ಮಾರುಕಟ್ಟೆಗಳಿಗೂ ಸೇವೆ ಸಲ್ಲಿಸುತ್ತದೆ ಎಂದು ಶ್ರೀ ಹರ್ದೀಪ್‌ ಪುರಿ ಅವರು ಹೇಳಿದರು. 2035ರ ವೇಳೆಗೆ ಭಾರತವು ವಿಶ್ವದ ನಾಲ್ಕನೇ ಅತಿದೊಡ್ಡ ಸಂಸ್ಕರಣಾ ಶಕ್ತಿಯಿಂದ ಬಹುಶಃ ಎರಡನೇ ಅತಿದೊಡ್ಡ ಸಂಸ್ಕರಣಾ ಶಕ್ತಿಯಾಗಿ ಸಾಗಲಿದೆ ಎಂದು ಸಚಿವರು ವಿಶ್ವಾಸ ವ್ಯಕ್ತಪಡಿಸಿದರು. ಭಾರತದ ಯುವ ಜನಸಂಖ್ಯೆ, ಹೆಚ್ಚುತ್ತಿರುವ ಇಂಧನ ಬೇಡಿಕೆ ಮತ್ತು ಪೂರ್ವಭಾವಿ ನೀತಿ ವಾತಾವರಣವು ದೇಶವು ಜಾಗತಿಕ ಇಂಧನ ಭವಿಷ್ಯದಲ್ಲಿ ಭಾಗವಹಿಸುವುದು ಮಾತ್ರವಲ್ಲದೆ ಸಕ್ರಿಯವಾಗಿ ರೂಪಿಸುವುದನ್ನು ಖಚಿತಪಡಿಸುತ್ತದೆ ಎಂದು ಅವರು ಒತ್ತಿ ಹೇಳಿದರು.

****