ڈائریکٹوریٹ آف ریونیو انٹیلی جنس (ڈی آر آئی) نے 21 سے 23 اکتوبر 2025 تک اپنے کثیر روز اور ایک مربوط آپریشن میں قومی خطہ راجدھانی میں منشیات کی تیاری اور تقسیم کے ایک بڑے نیٹ ورک کو کامیابی کے ساتھ ختم کر دیا ہے ۔

ڈی آر آئی کو موصول ہونے والی مخصوص خفیہ معلومات کی بنیاد پر حکام نے گریٹر نوئیڈا میں کثیر منزلہ رہائشی عمارتوں کے قریب ایک ویران کھیت میں واقع میتھامفیٹامائن کی تیاری کے خفیہ کارخانے پر چھاپہ مارا۔ تلاشی کے دوران 11.40 کلو گرام ایمفیٹامائن اور اس کی تیاری میں استعمال ہونے والے 110.923 کلو گرام پری کرسر کیمیکل قبضے میں لے لیے گئے۔

اسی کے ساتھ، اس گروہ کے مرکزی آپریٹر کو اس کے گڑگاؤں میں واقع رہائش گاہ سے گرفتار کر لیا گیا اور اس کے قبضے سے 1.33 کلو گرام ایمفیٹامائن برآمد ہوا۔

ایک فوری فالو اپ (بعد)کارروائی میں ڈی آر آئی کے حکام نے مغربی دہلی میں ایک اور مقام کی نشاندہی کی، جو ممنوعہ مادوں کے ذخیرہ اور تقسیم کے لیے استعمال ہو رہا تھا۔ یہ مقام گنجان آباد اور بھیڑ والے علاقے میں واقع تھا، جو تنگ گلیوں سے گھرا ہوا تھا، جس کی وجہ سے رسد اور سیکورٹی کے حوالے سے کافی چیلنجز پیدا ہو رہے تھے۔

کارروائی کے دوران، حکام کو بڑی تعداد میں افراد کا سامنا کرنا پڑا، جنہوں نے سرکاری کارروائی کو روکنے کی کوشش کی۔ دشمن عناصر کی موجودگی اور شواہد کے ضائع ہونے کے خطرے کے باوجودڈی آر آئی کی ٹیم نے دہلی پولیس کے ساتھ مل کر صبر و تحمل اور حکمت عملی کا مظاہرہ کرتے ہوئے مقام کو محفوظ بنایا اور تلاشی مکمل کی۔

تلاشی کے دوران متعدد افراد کو گرفتار کیا گیا اور 7.79 کلو گرام کوکین، 1.87 کلو گرام ہیروئن، 3.54 کلو گرام ایمفیٹامائن، 2 کلو گرام بھانگ، 0.15 کلو گرام میتھا کوالون اور منشیات کی تیاری میں استعمال ہونے والے 4.50 کلو گرام پری کرسر کیمیکلز کے ساتھ ساتھ 37 لاکھ روپے نقد بھی ضبط کیے گئے، جن پر شبہ ہے کہ یہ منشیات کی خرید و فروخت سے حاصل شدہ رقم ہے۔

مجموعی طور پر آپریشن کے دوران 16.27 کلو گرام ایمفیٹامائن، 7.9 کلو گرام کوکین، 1.8 کلو گرام ہیروئن، 2.13 کلو گرام بھانگ اور 115.42 کلو گرام پری کرسر کیمیکلز ضبط کیے گئے، جن کی غیر قانونی بین الاقوامی مارکیٹ میں قیمت تقریباً108.81 کروڑ روپے ہے۔ مجموعی طور پر اس کارروائی کے دوران 26 غیر ملکی شہری گرفتار کیے گئے ہیں۔

مختلف دائرہ اختیار میں اور چیلنجنگ زمینی حالات میں انجام دیا جانے والا یہ پیچیدہ آپریشن ، ڈی آر آئی کے انٹیلی جنس پر مبنی نفاذ ، بین ایجنسی تال میل اور منشیات کی اسمگلنگ اور نقلی ادویات کی تیاری کے خطرے سے نمٹنے کے غیر متزلزل عزم کی مثال ہے ۔

*******

(ش ح۔ م ع ن)

UR-256

(Release ID: 2182237) Visitor Counter : 9