ആരോഗ്യ, കുടുംബക്ഷേമ മന്ത്രാലയം
ലോകാരോഗ്യ സംഘടനയുടെ തെക്കുകിഴക്ക് ഏഷ്യൻ മേഖലാ സമിതിയുടെ 78-ാ൦ സെഷനിൽ ആരോഗ്യകരമായ വാർദ്ധക്യത്തിനായുള്ള പ്രതിബദ്ധത പുതുക്കി ഇന്ത്യ
प्रविष्टि तिथि:
16 OCT 2025 5:14PM by PIB Thiruvananthpuram
2025 ഒക്ടോബർ 13 മുതൽ 15 വരെ കൊളംബോയിൽ നടന്ന ലോകാരോഗ്യ സംഘടനയുടെ ദക്ഷിണ-പൂര്‍വേഷ്യ
മേഖലാ സമിതിയുടെ 78-ാ൦ സമ്മേളനത്തിലെ മന്ത്രിതല വട്ടമേശ സമ്മേളനത്തിൽ ഇന്ത്യയെ പ്രതിനിധീകരിച്ച് കേന്ദ്ര ആരോഗ്യ-കുടുംബക്ഷേമ സഹമന്ത്രി ശ്രീമതി അനുപ്രിയ സിംഗ് പട്ടേൽ പങ്കെടുത്തു ."ശാക്തീകരിക്കപ്പെട്ട പ്രാഥമികാരോഗ്യ പരിചരണത്തിലൂടെ ആരോഗ്യകരമായ വാർദ്ധക്യം" എന്ന വിഷയത്തെ ആസ്പദമാക്കിയായിരുന്നു യോഗത്തിൽ ചർച്ചകൾ നടന്നത്.
വയോജനങ്ങൾക്കായി ,സമഗ്രവും ജനകേന്ദ്രീകൃതവുമായ ആരോഗ്യ സംവിധാനത്തിൻ്റെ അടിസ്ഥാനത്തിൽ , ശക്തിമത്തായ പ്രാഥമിക ആരോഗ്യ പരിചരണത്തിലൂടെ ആരോഗ്യകരമായ വാർദ്ധക്യത്തെ പ്രോത്സാഹിപ്പിക്കുന്നതിനുള്ള തുടർച്ചയായ പ്രതിബദ്ധത ഇന്ത്യ ആവർത്തിച്ച് ഉറപ്പിച്ചു.
60 വയസ്സിന് മുകളിൽ 153 ദശലക്ഷം പൗരന്മാരുള്ള ഇന്ത്യ, ജനസംഖ്യാപരമായ വലിയ പരിവർത്തനത്തിന് സാക്ഷ്യം വഹിക്കുന്നുണ്ടെന്നും, പ്രായമായവർക്ക് അവരുടെ ആവശ്യങ്ങൾക്കനുസൃതമായി തുല്യവും പ്രാപ്യവും താങ്ങാനാവുന്നതുമായ ആരോഗ്യ പരിരക്ഷാ സേവനങ്ങൾ ലഭ്യമാക്കാൻ, കേന്ദ്ര സർക്കാർ നിരവധി സുപ്രധാന നടപടികൾ സ്വീകരിച്ചിട്ടുണ്ടെന്നും ശ്രീമതി പട്ടേൽ ആവർത്തിച്ച് വ്യക്തമാക്കി .
92 ശതമാനം ജില്ലകളിലും ഇപ്പോൾ കാര്യക്ഷമമായി പ്രവർത്തിക്കുന്ന,മുതിർന്നവർ ക്കുള്ള ദേശീയ ആരോഗ്യപരിചരണ പരിപാടി (എൻ പി എച്ച് സി ഇ ), പ്രാഥമിക ആരോഗ്യ സംരക്ഷണ സമീപനങ്ങളിലൂടെ മുതിർന്ന പൗരന്മാർക്ക് പ്രതിരോധം , പ്രോത്സാഹനം , ചികിത്സ, പുനരധിവാസം തുടങ്ങിയ സേവനങ്ങൾ നൽകുന്നതിനുള്ള ഇന്ത്യയുടെ ശ്രമങ്ങളുടെ ആണിക്കല്ലായി പ്രവർത്തിക്കുന്നു. കുടുംബത്തിലും സമൂഹത്തിലും വാർദ്ധക്യത്തിന് മാന്യത ലഭ്യമാക്കുന്നതിനായി ഘടനാപരമായ പരിചരണ പരിശീലനത്തോടൊപ്പം വീട്, സമൂഹം, സൗകര്യങ്ങൾ എന്നിവ അടിസ്ഥാനമാക്കിയുള്ള ഇടപെടലുകളും ഈ പരിപാടി സംയോജിപ്പിക്കുന്നു.
വയോജനങ്ങളുടെ സാമ്പത്തിക സുരക്ഷാ മാനദണ്ഡങ്ങൾ കൂടുതൽ ശക്തിപ്പെടുത്തുന്നതിൻ്റെ ഭാഗമായി, ആയുഷ്‌മാൻ ഭാരത് പ്രധാൻ മന്ത്രി ജൻ ആരോഗ്യ യോജന (എ ബി -പി എം ജെ എ വൈ ),വരുമാനം പരിഗണിക്കാതെ 70 വയസ്സും അതിനുമുകളിലുമുള്ള എല്ലാ പൗരന്മാരെയും ഉൾപ്പെടുത്തി വിപുലീകരിച്ചു . 45 ദശലക്ഷം കുടുംബങ്ങളിലെ ഏകദേശം 60 ദശലക്ഷം വയോജനങ്ങൾക്ക് ഇതി ൻ്റെ പ്രയോജനം ലഭിക്കും.സർക്കാർ ആശുപത്രികൽ വഴിയോ ,അംഗീകൃത സ്വകാര്യ ആശുപത്രികൽ വഴിയോ ഒരു കുടുംബത്തിന് പ്രതിവർഷം 5 ലക്ഷം രൂപ വരെ പണരഹിത ആശുപത്രി പരിചരണം ഇതിലൂടെ ലഭ്യമാകും.
ന്യൂഡൽഹിയിലെ ഓൾ ഇന്ത്യ ഇൻസ്റ്റിറ്റ്യൂട്ട് ഓഫ് മെഡിക്കൽ സയൻസസിലും ചെന്നൈയിലെ മദ്രാസ് മെഡിക്കൽ കോളേജിലും, രാജ്യത്തുടനീളം സ്ഥാപിതമായ 17 റീജിയണൽ ജെറിയാട്രിക് സെൻ്ററുകളിലും സ്ഥാപിച്ചിട്ടുള്ള ദേശീയ പ്രായാഭിവൃദ്ധി കേന്ദ്രങ്ങൾ അഥവാ നാഷണൽ സെൻ്റെർ ഓഫ് ഏജിംഗ് (എൻ‌സി‌എ) കളെക്കുറിച്ചും കേന്ദ്രമന്ത്രി എടുത്തുപറഞ്ഞു. ക്ലിനിക്കൽ മികവ്, ശേഷി വർദ്ധിപ്പിക്കൽ, ഗവേഷണം, നയപരമായ മാർഗ്ഗനിർദ്ദേശം എന്നിവയ്ക്കുള്ള കേന്ദ്രങ്ങളായി ഇവ പ്രവർത്തിക്കുന്നു. കൂടാതെ, "ആരോഗ്യമുള്ള സ്ത്രീകൾ, ശാക്തീകരിക്കപ്പെട്ട കുടുംബങ്ങൾ" എന്നർത്ഥം വരുന്ന 'സ്വസ്ത് നാരി, സശക്ത് പരിവാർ അഭിയാൻ' എന്ന സമീപകാല കാമ്പെയിനിലൂടെ ദശലക്ഷക്കണക്കിന് വൃദ്ധരുടെ' പ്രത്യേകിച്ച് പ്രായമായ സ്ത്രീകളുടെ , രക്താതിമർദ്ദം, പ്രമേഹം, അർബുദം തുടങ്ങി പകർച്ചവ്യാധിയില്ലാത്തതും പ്രായവുമായി ബന്ധപ്പെട്ടതുമായ അവസ്ഥകളെ പരിശോധിച്ചു.
പ്രാഥമികാരോഗ്യ സംരക്ഷണത്തിൻ്റെയും ദീർഘകാല പരിചരണത്തിൻ്റെ യും (PHC–LTC) സംയോജനം കൂടുതൽ ശക്തിപ്പെടുത്തുന്നതിന് ഡബ്ള്യു എച്ച് ഒ (WHO) തെക്കുകിഴക്ക് ഏഷ്യൻ അംഗരാജ്യങ്ങൾക്കിടയിൽ പ്രാദേശിക സഹകരണം വർദ്ധിപ്പിക്കണമെന്ന് മേഖലാ വട്ടമേശ സമ്മേളനത്തിൽ ഇന്ത്യ ആവശ്യപ്പെട്ടു. ഇന്ത്യ മൂന്നു പ്രധാന സഹകരണ മേഖലകള്‍ മുന്നോട്ടുവെച്ചു:
1. പ്രാഥമിക ആരോഗ്യപരിചരണവും ദീർഘകാലപരിചരണവും (PHC–LTC) ഏകീകരിക്കുന്നതുമായി ബന്ധപ്പെട്ട അറിവ് പങ്കിടലിനും നവീകരണത്തിനും പ്രാദേശിക വേദി സ്ഥാപിക്കൽ;
2. രാജ്യങ്ങളിലുടനീളം വയോജന-പരിചരണ തൊഴിലാളികൾക്കായി ശേഷി വർദ്ധിപ്പിക്കൽ, പരിശീലന പരിപാടികൾ എന്നിവയിൽ നിക്ഷേപം നടത്തൽ;
3.വയോജനങ്ങൾക്ക് സ്വതന്ത്രവും മാന്യവുമായ ജീവിതം ഉറപ്പാക്കുന്ന സാങ്കേതിക നവീകരണങ്ങളും ആരോഗ്യ പരിഹാരങ്ങളും പ്രോത്സാഹിപ്പിക്കൽ.
ആരോഗ്യകരമായ വാർദ്ധക്യത്തിനായുള്ള ഐക്യരാഷ്ട്രസഭയുടെ ദശാബ്ദവുമായി (2021–2030) ഇന്ത്യയുടെ നിലപാട് പുനഃസ്ഥാപിച്ചുകൊണ്ട് , മുഴുവൻ വയോജനങ്ങളെയും ഉൾക്കൊള്ളുന്ന വളർച്ചയ്ക്കും സാമൂഹിക പരിവർത്തനത്തിനുമുള്ള അവസരമായി ഇതിനെ കാണണമെന്ന് കേന്ദ്രമന്ത്രി ഊന്നിപ്പറഞ്ഞു. “ബഹുമാനപ്പെട്ട പ്രധാനമന്ത്രിയുടെ ‘സബ്കാ സാത്ത്, സബ്കാ വികാസ്, സബ്കാ വിശ്വാസ്, സബ്കാ പ്രയാസ്’ എന്ന ദർശനത്തിൻ്റെ പ്രചോദനത്താൽ,വാർദ്ധക്യം ഉൾപ്പെടെയുള്ള ജീവിതത്തിൻ്റെ ഓരോ ഘട്ടവും മാന്യതയോടും സുരക്ഷയോടും കരുതലോടും കൂടി ജീവിക്കുന്നുവെന്ന് ഉറപ്പാക്കുന്ന കാര്യത്തിൽ രാജ്യം പ്രതിജ്ഞാബദ്ധമാണ്”.ശ്രീമതി അനുപ്രിയ സിംഗ് പട്ടേൽ പറഞ്ഞു.
********************************
(रिलीज़ आईडी: 2180149)
आगंतुक पटल : 20