نئی اور قابلِ تجدید توانائی کی وزارت (ایم این آر ای) نے نیشنل گرین ہائیڈروجن مشن (این جی ایچ ایم) کے تحت تین بڑے بندرگاہوں دین دیال پورٹ اتھارٹی (گجرات)، وی او چدمبرنار پورٹ اتھارٹی (تمل ناڈو)، اور پارادیپ پورٹ اتھارٹی (اڈیسہ) کو باضابطہ طور پر گرین ہائیڈروجن ہب کے طور پر تسلیم کر لیا ہے۔یہ منظوری بھارت میں ایک مربوط ہائیڈروجن نظام قائم کرنے اور صاف توانائی کی جانب ملک کی منتقلی کو فروغ دینے کی سمت میں ایک اہم قدم ہے۔

بھارت سرکار کی جانب سے شروع کیا گیا نیشنل گرین ہائیڈروجن مشن کا مقصد ملک کو گرین ہائیڈروجن اور اس کی مشتقات کی پیداوار، استعمال اور برآمدات کے لیے ایک عالمی مرکز کے طور پر قائم کرنا ہے۔یہ مشن بڑے پیمانے پر ہائیڈروجن مراکز کے قیام کو فروغ دیتا ہے، جو پیداوار اور استعمال کے مرکزی نکات کے طور پر کام کریں گے۔ اس سے ایک پائیدار اور مسابقتی ہائیڈروجن معیشت کے قیام میں مدد ملے گی۔

اس پیش رفت کا خیرمقدم کرتے ہوئے، بندرگاہوں، جہاز رانی اور آبی گزرگاہوں کے مرکزی وزیر، سربانند سونووال نے کہا کہ یہ منظوری بھارت کے سمندری سفر میں ایک اہم سنگ میل ہے، کیونکہ ہم ایک جدید، باصلاحیت اور عالمی سمندری شعبے میں قائد بننے کی جانب بڑھ رہے ہیں۔ وزیر اعظم نریندر مودی جی کی دوراندیش قیادت میں ہم ایک پائیدار ترقی کے نظام کی تعمیر کی سمت کام کر رہے ہیں، جو بھارت کو 2070 تک نیٹ زیرو کے ہدف کو حاصل کرنے میں مدد دے گا۔اس تبدیلی میں بندرگاہیں ایک اہم کردار ادا کر رہی ہیں۔ گرین ہائیڈروجن ہب کے طور پر ہماری بندرگاہیں صاف توانائی کی اختراعات کے محرک کے طور پر کام کریں گی۔ ایک سمندری قائد کی حیثیت سے بھارت کی بندرگاہیں نہ صرف اپنے ملک کو بااختیار بنائیں گی بلکہ مشرقی اور مغربی تجارتی راستوں پر اپنی حکمتِ عملی کی موجودگی کو استعمال کرتے ہوئے پورے خطے کو پائیدار لاجسٹکس کی جانب لے جانے میں اہم کردار ادا کریں گی۔

طویل فاصلے تک ہائیڈروجن کی ترسیل سے متعلق لاجسٹک اور تکنیکی چیلنجوں کو تسلیم کرتے ہوئے، نیشنل گرین ہائیڈروجن مشن نے کلسٹر پر مبنی ترقیاتی ماڈل کو اپنایا ہے۔یہ طریقہ کار ابتدائی مرحلے کے منصوبوں کی پائیداری کو بہتر بناتا ہے، انفراسٹرکچر کو ایک دوسرے سے ہم آہنگ کرنے میں مدد دیتا ہے، اور منتخب علاقوں میں بڑے پیمانے پر معیشتی فوائد حاصل کرنے میں معاون ثابت ہوتا ہے۔

ہائیڈروجن ویلی انوویشن کلسٹرز (ایچ وی آئی سی) اور گرین ہائیڈروجن ہبس کے قیام کے لیے 27 جون 2025 کو جاری کردہ نظر ثانی شدہ اسکیم کے رہنما خطوط ، بڑے پیمانے پر ہائیڈروجن سرگرمی کے قابل ممکنہ علاقوں کی شناخت اور مدد کے لیے فریم ورک فراہم کرتے ہیں ۔  ان رہنما خطوط کے جزو بی 2 کے تحت ، ایم این آر ای براہ راست مالی مدد کے بغیر مقامات کو گرین ہائیڈروجن ہب کے طور پر تسلیم کر سکتا ہے ، اس طرح مرکزی یا ریاستی حکومت کی دیگر اسکیموں کے تحت دستیاب ترغیبات اور فوائد تک رسائی کو آسان بنا سکتا ہے ۔

ان دفعات کے مطابق، متعلقہ مجاز اتھارٹی نے دین دیال، وی او چدمبرنار ، اور پرادیپ بندرگاہوں کو گرین ہائیڈروجن ہب کے طور پر تسلیم کرنے کی منظوری دی ہے۔ ان مخصوص علاقوں میں قائم کیے جانے والے منصوبے مرکزی اور ریاستی حکومتوں کی دیگر متعلقہ اسکیموں اور پالیسیوں کے تحت دستیاب فوائد کے اہل ہوں گے، جن میں نیشنل گرین ہائیڈروجن مشن سے منسلک اسکیمیں بھی شامل ہیں۔

ان بندرگاہوں کو تسلیم کرنے سے صنعتی شرکت کو فروغ ملنے، گرین سرمایہ کاری کی توجہ حاصل ہونے، اور صاف ایندھن کی ٹیکنالوجی میں اختراع کو بڑھاوا ملنے کی توقع ہے، جو بھارت کے وسیع تر وژن یعنی 2070 تک توانائی میں خود انحصاری اور نیٹ زیرو اخراج حاصل کرنے کے ہدف کی مددکرے گی۔

 

ش ح۔ ش آ ۔ م ش

U. No-7465

 

(Release ID: 2178380) Visitor Counter : 13