وفاقی وزیر برائے امورِ نوجوانان و کھیل اور محنت و روزگار، ڈاکٹر منسکھ  مانڈویہ نے آج سونی پت میں اسپورٹس اتھارٹی آف انڈیا (ایس اے آئی) کے نیشنل سینٹر آف ایکسیلینس (این سی او ای) کا دورہ کیا، جہاں انہوں نے جاری تربیتی سرگرمیوں اور بنیادی ڈھانچے کا جائزہ لیا اور کوچز، کھلاڑیوں اور معاون عملے سے ملاقات کی۔

دوپہر کے وقت مرکز پہنچنے پر ڈاکٹر منسکھ  مانڈویہ کا استقبال اسپورٹس اتھارٹی آف انڈیا (ایس اے آئی) کے سینئر عہدیداران نے کیا اور انہیں سونی پت کیمپس میں جاری سرگرمیوں، کامیابیوں اور آئندہ منصوبوں کے بارے میں تفصیلی جائزہ پیش کیا گیا۔

وفاقی وزیر نے اپنے دورے کا آغاز آرچری (یعنی تیر اندازی) سینٹر آف ایکسیلینس کے معائنہ سے کیا، جہاں انہوں نے کوچز اور کھلاڑیوں سے گفتگو کی۔ انہوں نے ان کی محنت اور عزم کی تعریف کرتے ہوئے اس بات پر زور دیا کہ حکومت بنیادی سطح پر کھیلوں کی صلاحیتوں کو اُجاگر کرنے کے لیے سائنسی تربیتی طریقوں کے فروغ کے لیے پرعزم ہے۔

ڈاکٹر منسکھ  مانڈویہ نے ’ایک پیڑ ماں کے نام‘ مہم کے تحت شجرکاری کی سرگرمی میں بھی حصہ لیا۔

اس کے بعد وزیر موصوف نے آرچری رینج، کبڈی کورٹ، طبی مرکز، کشتی ہال، اسپورٹس سائنس ڈیپارٹمنٹ اور اسٹرینگتھ اینڈ کنڈیشنگ ہال کا دورہ کیا، جہاں انہوں نے دستیاب تربیتی اور اسپورٹس سائنس سہولیات کا جائزہ لیا۔ انہوں نے کھلاڑیوں کی تیاری میں ٹیکنالوجی اور اسپورٹس سائنس کے امتزاج کی تعریف کی اور صحت و کارکردگی کے باقاعدہ جائزے کی اہمیت پر زور دیا۔

ڈاکٹر منسکھ  مانڈویہ نے کثیر المقاصد ہال (ایم پی ایچ)، زیرِ تعمیر ہائی پرفارمنس سینٹر (ایچ پی سی) اور انڈور کبڈی ہال کا بھی معائنہ کیا، جہاں انہوں نے بھارت کے کھلاڑیوں کو عالمی معیار کی سہولیات فراہم کرنے کے لیے کی جانے والی نمایاں بنیادی ڈھانچے کی ترقی کو سراہا۔

دورے کا اختتام کوچز اور عملے کے ارکان سے ملاقات پر ہوا، جہاں وزیر موصوف نے بھارت کے اسپورٹس ایکو سسٹم میں ان کی خدمات کو سراہا اور اس بات کو دہرایا کہ حکومت وِکست بھارت 2047 کے ویژن کو حقیقت بنانے کے لیے مضبوط کھیلوں کی ثقافت کے قیام کے لیے پرعزم ہے۔

******

ش ح۔ ش ا ر۔ ول

Uno- 7453