హోం మంత్రిత్వ శాఖ
న్యూఢిల్లీలో ఢిల్లీ ప్రభుత్వం చేపట్టిన సుమారు రూ. 1816 కోట్ల విలువైన అభివృద్ధి ప్రాజెక్టుల ప్రారంభం, శంకుస్థాపనలు చేసిన కేంద్ర హోం, సహకార మంత్రి శ్రీ అమిత్ షా
దీపావళి, ఛఠ్ పూజ సందర్భంగా ఢిల్లీ ప్రజలకు ముందస్తు శుభాకాంక్షలు తెలిపిన కేంద్ర హోంమంత్రి
24 సంవత్సరాలుగా ముఖ్యమంత్రిగా, ప్రధానమంత్రిగా దేశానికి అవిశ్రాంతంగా సేవ చేస్తున్న ప్రధానమంత్రి శ్రీ నరేంద్ర మోదీ
స్వాతంత్య్ర సమరయోధుల కలలనూ నెరవేర్చారు.. సుపరిపాలనను సుసాధ్యం చేశారు..
యమునా నదిని శుభ్రం చేసి అందులో స్నానం చేస్తామని హామీ ఇచ్చి మాట తప్పిన మునుపటి ప్రభుత్వాన్ని ప్రజలే మునిగేలా చేశారు..
2029 నాటికి యమునా నది శుద్ధి చేసే పని పూర్తవుతుందని ప్రధానమంత్రి శ్రీ నరేంద్ర మోదీ హామీ ఇచ్చారు
యమునా నదిని శుద్ధి చేయాలనే ఆయన సంకల్పం రాజకీయమైనది కాదు.. ప్రజల హృదయాల్లో పవిత్ర స్థానం పొందిన యమునా నదికి అందించే గౌరవం..
గత ప్రభుత్వ హయాంలో ఢిల్లీలో 65 మీటర్ల ఎత్తు చెత్త పర్వతాలు కనిపించేవి.. 2028 జనవరి 1 నాటికి ఈ చెత్త కొండల నుంచి ఢిల్లీకి విముక్తి
ఢిల్లీలో మునుపటి ప్రభుత్వం మోదీ ప్రభుత్వ పథకాల అమలును నిలిపివేసింది.. మా ప్రభుత్వం అధికారంలోకి రాగానే వాటిని అమలు చేసింది
प्रविष्टि तिथि:
09 OCT 2025 8:37PM by PIB Hyderabad
కేంద్ర హోం, సహకార మంత్రి శ్రీ అమిత్ షా న్యూఢిల్లీలో ఢిల్లీ ప్రభుత్వం చేపట్టిన సుమారు రూ. 1816 కోట్ల విలువైన అభివృద్ధి ప్రాజెక్టులను ఈ రోజు ప్రారంభించి, శంకుస్థాపనలు చేశారు. ఢిల్లీ ముఖ్యమంత్రి శ్రీమతి రేఖా గుప్తా, అనేక మంది ప్రముఖులు ఈ కార్యక్రమానికి హాజరయ్యారు. దీపావళి, ఛఠ్ పూజ సందర్భంగా ఢిల్లీ ప్రజలకు కేంద్ర హోం, సహకార మంత్రి ముందస్తు శుభాకాంక్షలు తెలిపారు.
ఇటీవలే శ్రీ నరేంద్ర మోదీ ముఖ్యమంత్రిగా, ప్రధానమంత్రిగా 24 సంవత్సరాల నిరంతర ప్రజా సేవను పూర్తి చేసుకున్నారని కేంద్ర హోంమంత్రి తన ప్రసంగంలో తెలిపారు. ఒక ప్రధాన రాష్ట్రానికి ముఖ్యమంత్రిగా.. తరువాత గొప్పనైన భారతదేశానికి ప్రధానమంత్రిగా.. 24 సంవత్సరాల పాటు దేశానికి సేవ చేసిన దేశంలోనే తొలి వ్యక్తి మన ప్రధానమంత్రి శ్రీ మోదీ అని ఆయన కొనియాడారు. ఈ 24 సంవత్సరాల్లో ప్రధానమంత్రి మన స్వాతంత్య్ర సమరయోధుల కలలను నెరవేర్చడానికి అనేక కొత్త కార్యక్రమాలను ప్రారంభించారని ఆయన అన్నారు. ప్రధానమంత్రి శ్రీ నరేంద్ర మోదీ సుపరిపాలనను సుసాధ్యం చేశారని ఆయన స్పష్టం చేశారు. 2047లో భారత స్వాతంత్య్ర శతాబ్ది నాటికి దేశాన్ని సురక్షితంగా మార్చడం, ఆర్థిక వ్యవస్థను పురోగమనంలో నడిపించడం, ప్రతి రంగంలో దేశాన్ని అగ్రగామిగా చేసేందుకు ప్రధానమంత్రి సంకల్పించారని శ్రీ అమిత్ షా తెలిపారు. ప్రధానమంత్రి శ్రీ మోదీ పుట్టినరోజున సేవా పఖ్వాడా ప్రారంభమైందన్నారు. ఈ సందర్భంగా ఢిల్లీలో రూ. 1700 కోట్లకు పైగా విలువైన 17 ప్రాజెక్టుల ప్రారంభం, శంకుస్థాపనలు జరిగాయని ఆయన పేర్కొన్నారు. ఈరోజు సేవా పఖ్వాడ ముగింపు సందర్భంగానూ రూ. 1800 కోట్ల వ్యయంతో చేపట్టిన 11 ప్రాజెక్టులను ప్రారంభించి, 8 ప్రాజెక్టులకు శంకుస్థాపన చేస్తున్నట్లు తెలిపారు.
ప్రారంభించిన ప్రాజెక్టుల్లో దాదాపు 80 శాతం యమునా నదిని శుభ్రం చేసే ప్రయత్నాలతో ముడిపడి ఉన్నందున ఈ రోజు జరిగిన కార్యక్రమానికి ప్రత్యేక ప్రాముఖ్యత ఉందని శ్రీ అమిత్ షా స్పష్టం చేశారు. ఢిల్లీ ప్రజలు మార్పును ఎంచుకున్నప్పుడు.. తల్లి యమునా నదిని శుద్ధి చేయడం తమ ప్రభుత్వ ప్రధాన ప్రాధాన్యమని ప్రధానమంత్రి శ్రీ మోదీ ప్రకటించారని ఆయన గుర్తుచేశారు. 2029 నాటికి యమునా నదిని శుభ్రపరిచే పని పూర్తి చేస్తామని ప్రధానమంత్రి మోదీ హామీ ఇచ్చారన్నారు. కేవలం అవినీతిని తగ్గించడం, ప్రకటనలపై తక్కువ ఖర్చు చేయడం వంటి వాటి ద్వారా యమునా నది శుద్ధిని సాధించవచ్చని తెలిపారు. స్వచ్ఛ యమునా కల సాకారం కోసం మార్గం సుగమం అయిందని కేంద్ర హోంమంత్రి వ్యాఖ్యానించారు. ప్రధానమంత్రి శ్రీ మోదీ నాయకత్వంలో రాబోయే ఏడు నెలల్లో ప్రయాగ్‌రాజ్ వరకు యమునా నదిని శుభ్రం చేసే ప్రణాళికను సిద్ధం చేశామన్నారు. గత ప్రభుత్వం యమునా నదిని శుభ్రం చేసి అందులో స్నానం చేస్తామని హామీ ఇచ్చినప్పటికీ వారు ఆ పని చేయలేదని, అందుకే ఢిల్లీ ప్రజలు వారిని మునిగిపోయేలా చేశారని శ్రీ అమిత్ షా అన్నారు.
యమునా నదిని శుద్ధి చేయాలనే ప్రధానమంత్రి శ్రీ మోదీ సంకల్పం రాజకీయ చర్య కాదని.. మన ప్రజల హృదయాల్లో పవిత్ర స్థానంగా ఉన్న యమునా నదిని గౌరవించే కార్యక్రమం అని కేంద్ర హోంమంత్రి వ్యాఖ్యానించారు. ఢిల్లీలో వరుసగా 15 సంవత్సరాలు, 11 సంవత్సరాలు అధికారంలో ఉన్న మునుపటి ప్రభుత్వాల పాలనలో ఢిల్లీ ప్రజలు అభివృద్ధికి దూరమయ్యారని విమర్శించారు. ప్రస్తుతం మన ప్రభుత్వం ఐదు సంవత్సరాల్లోనే మన జాతీయ రాజధాని అభివృద్ధి పరంగా ప్రపంచ ప్రసిద్ధి చెందాలనే సంకల్పంతో పనిచేస్తోందని శ్రీ షా తెలిపారు.
నవరాత్రి మొదటి రోజునే ప్రధానమంత్రి శ్రీ మోదీ 395కు పైగా వస్తువులపై జీఎస్టీ రేట్లను తగ్గించారన్నారు. అనేక వస్తువులపై జీఎస్టీని సున్నాకు, కేవలం 5 శాతానికీ తగ్గించారని శ్రీ అమిత్ షా పేర్కొన్నారు. కేంద్ర బడ్జెట్‌లో రూ. 12 లక్షల వరకు ఆదాయాన్ని పన్ను రహితం చేశారనీ ఆయన గుర్తుచేశారు. ఈ రెండు కార్యక్రమాలను కలిపి చూస్తే ప్రజలకు దాదాపు రూ. 2.5 లక్షల కోట్లు ఆదా అయినట్లు కేంద్ర హోంమంత్రి తెలిపారు. దేశ ప్రజలు వరుసగా మూడోసారి శ్రీ నరేంద్ర మోదీని ప్రధానమంత్రిగా ఎన్నుకోవడం వల్లే ఈ పరివర్తన సాధ్యమైందన్నారు.
ఢిల్లీలో మా ప్రభుత్వం అధికారంలోకి వచ్చిన మొదటి వారంలోనే ఆయుష్మాన్ భారత్ పథకాన్ని అమలు చేశామని శ్రీ అమిత్ షా తెలిపారు. గత ప్రభుత్వం తెరిచిన 57 మొహల్లా క్లినిక్‌లలో గ్లూకోమీటర్లు కూడా లేవు.. 45 క్లినిక్‌లలో ఎక్స్-రే యంత్రాలూ లేవు.. 21 క్లినిక్‌లలో పల్స్ తనిఖీ చేసే సౌకర్యాలు లేవు.. 38 క్లినిక్‌లలో కనీసం థర్మామీటర్లు కూడా లేవని ఆయన విమర్శించారు. అటువంటి మొహల్లా క్లినిక్‌లలో చికిత్స సాధ్యం కాదన్నారు. 11 సంవత్సరాలు అధికారంలో ఉన్న గత ప్రభుత్వం మొహల్లా క్లినిక్‌లు, సీఎన్‌జీ, మద్యం, ప్రకటనలు, మందులు, తరగతి గదులు, ఢిల్లీ జల్ బోర్డు, షీష్ మహల్, సీసీటీవీ, పానిక్ బటన్‌లకు సంబంధించిన అనేక కుంభకోణాలకు పాల్పడిందని శ్రీ అమిత్ షా వ్యాఖ్యానించారు.
మునుపటి కేంద్ర ప్రభుత్వం కూడా రూ. 12 లక్షల కోట్ల విలువైన కుంభకోణాలకు పాల్పడిందన్నారు. ప్రధానమంత్రిగా శ్రీ మోదీ 11 సంవత్సరాల పాలనలో ఒక్క అవినీతి ఆరోపణ కూడా రాలేదని హోంమంత్రి తెలిపారు. మన ప్రభుత్వాలు నిజమైన ప్రజా సేవ పట్ల అంకితభావంతో ఉన్నాయని ఇది స్పష్టం చేస్తోందన్నారు.
కేంద్ర హోం, సహకార మంత్రి శ్రీ అమిత్ షా మాట్లాడుతూ.. గత ప్రభుత్వ హయాంలో ఢిల్లీలో చెత్త పర్వతాలు 65 మీటర్ల ఎత్తుకు పెరిగాయన్నారు. 2028, జనవరి 1 నాటికి ఢిల్లీ వాసులు ఇకపై ఈ చెత్త పర్వతాలను చూడరని.. బదులుగా ఆ ప్రదేశాల్లో అందమైన తోటల అభివృద్ధి జరుగుతుందని ఆయన ప్రకటించారు. 2015 నుంచి ప్రధానమంత్రి శ్రీ నరేంద్ర మోదీ ఢిల్లీ ప్రజల కోసం అందించిన అనేక పథకాల ప్రయోజనాలను మునుపటి ఢిల్లీ ప్రభుత్వం అడ్డుకుందని శ్రీ అమిత్ షా వ్యాఖ్యానించారు. రూ. 5 లక్షల వరకు ఉచిత చికిత్స అందించే ఆయుష్మాన్ భారత్ పథకాన్ని అమలు చేయడంలోనూ గత ప్రభుత్వం విఫలమవడంతో ఢిల్లీ ప్రజలకు దాని ప్రయోజనాలు అందకుండా పోయాయని కేంద్ర హోమంత్రి తెలిపారు.
(रिलीज़ आईडी: 2177506)
आगंतुक पटल : 18