لوک سبھا کے اسپیکر جناب اوم برلا نے دولت مشترکہ ممالک کے اراکین پارلیمنٹ پر زور دیا ہے کہ وہ ٹیکنالوجی کے استعمال کے ذریعے ڈیجیٹل تقسیم کو ختم کرتے ہوئے مصنوعی ذہانت (اے آئی) کے ذمہ دارانہ اور اخلاقی استعمال کو فروغ دیں۔ بارباڈوس میں 68ویں کامن ویلتھ پارلیمانی ایسوسی ایشن (سی پی اے) کانفرنس میں ‘ٹیکنالوجی سے فائدہ اٹھانا: ڈیجیٹل تبدیلیوں کے ذریعے جمہوریت میں اضافہ اور ڈیجیٹل تقسیم سے نمٹنا’ کے موضوع پر ایک ورکشاپ کی صدارت کرتے ہوئے، جناب برلا نے کہا کہ تعاون اور علم کے اشتراک کے ذریعے اس بات کو یقینی بنایا جا سکتا ہے کہ ٹیکنالوجی ایک پل بن جائے، نہ کہ رکاوٹ۔

اپنے خطاب میں، انہوں نے اس بات پر روشنی ڈالی کہ تکنیکی ترقی اور ای پارلیمنٹ کے اطلاق نے ہماری پارلیمانی جمہوریت کے کام کرنے کے طریقے میں بڑی تبدیلیاں لائی ہیں۔ انہوں نے زور دے کر کہا کہ ای پارلیمنٹ ای ڈیموکریسی کو فروغ دینے میں بہت زیادہ کردار ادا کر رہی ہے، اس کے نتیجے میں شہریوں کی زیادہ سے زیادہ شمولیت کو فروغ دیا جا رہا ہے۔

جناب برلا نے روشنی ڈالی کہ اے آئی پر مبنی ڈیجیٹل نظام ہندوستان کے پارلیمانی عمل کو زیادہ موثر اور جامع بنا رہے ہیں۔ انہوں نے مندوبین کو بتایا کہ اے آئی پر مبنی ترجمہ، اے آئی سے چلنے والی ای لائبریری، اور تقریر سے متن کی رپورٹنگ جیسے نظام پارلیمانی عمل کو مزید موثر اور جامع بنا رہے ہیں۔ آنے والے ڈیجیٹل اقدامات کے بارے میں بات کرتے ہوئے، شری برلا نے کہا کہ جلد ہی، "سنساد بھاشینی" جیسے حقیقی وقت کے اے آئی ترجمہ کے نظام سے ہر رکن پارلیمنٹ کو ان کی اپنی زبان میں بات چیت کرنے کی اجازت ملے گی جو کہ ہندوستان جیسے متنوع ملک میں جمہوریت کے لیے ایک نئی بلندی ہے۔

انہوں نے کہا کہ جمہوریت اس وقت مضبوط ہوتی ہے جب شہری اپنی پارلیمنٹ کے ساتھ گہرا تعلق رکھتے ہیں۔ انہوں نے اس بات پر زور دیا کہ ٹیکنالوجی اس رابطے کو مضبوط بنانے میں اہم کردار ادا کرتی ہے۔ اس تناظر میں، انہوں نے خاکہ پیش کیا کہ ہندوستانی پارلیمنٹ کا روایتی پارلیمانی نظام سے ای-پارلیمنٹ تک کا سفر اس کی رسائی، کام کاج اور عوام کی امنگوں کے جواب دینے کے لحاظ سے کافی غیر معمولی رہا ہے۔ انہوں نے اس بات پر زور دیا کہ یہ تبدیلی جمہوری طرز حکمرانی میں ایک بڑی پیشرفت کی نشاندہی کرتی ہے، قانون سازی کے عمل کو مضبوط بنانے اور شہریوں کی گہری شرکت کو فروغ دینے کے لیے ٹیکنالوجی کی صلاحیت کو بروئے کار لاتی ہے۔

جناب  برلا نے ہندوستان کی پارلیمنٹ میں کی گئی مختلف ڈیجیٹل اختراعات کا ذکر کیا۔ انہوں نے کہا کہ ‘‘ڈیجیٹل سنسد’’  پہل کے تحت، ہندوستان کی پارلیمنٹ نے ایک مربوط ڈیجیٹل ماحولیاتی نظام تیار کیا ہے جو اراکین پارلیمنٹ، وزارتوں اور شہریوں کو ایک ڈیجیٹل پلیٹ فارم کے ذریعے جوڑتا ہے۔

جناب برلا نے نوٹ کیا کہ وزیر اعظم جناب نریندر مودی کی متحرک قیادت میں ہندوستان نے ڈیجیٹل سیکٹر میں عالمی سطح کے سنگ میل حاصل کیے ہیں۔ انہوں نے مزید کہا کہ 1.4 بلین شہریوں کے لیے ایک کم لاگت اور کھلا ڈیجیٹل پبلک انفراسٹرکچر تیار کیا گیا ہے، جس سے گورننس اور معیشت دونوں میں تبدیلی آئی ہے۔

ہندوستان کے ‘‘اے آئی مشن’’ – اے آئی فار آل  اور اے آئی فار گڈ - کے بارے میں بات کرتے ہوئے انہوں نے کہا کہ یہ پہل وزیر اعظم جناب نریندر مودی کے بصیرت افروز نقطہ نظر کی عکاسی کرتی ہے، جس میں اے آئی کو محض ایک تکنیکی ترقی کے طور پر نہیں، بلکہ شہریوں کو بااختیار بنانے اور شفاف طرز حکمرانی کے لیے ایک طاقتور ٹول کے طور پر دیکھا جاتا ہے۔ ہندوستان کے ڈیجیٹل انفراسٹرکچر میں تیز رفتار ترقی کا خاکہ پیش کرتے ہوئے، انہوں نے کہا کہ 5جی  کی تیزی سے تعیناتی کے ساتھ، ہندوستان دنیا کی دوسری سب سے بڑی 5جی  مارکیٹ بن گیا ہے، اور 6 جی پر بھی فعال کوششیں جاری ہیں۔

ہندوستان کے ڈیجیٹل ادائیگیوں کے انقلاب کے بارے میں بات کرتے ہوئے، جناب برلا نے کہا کہ یونیفائیڈ پیمنٹس انٹرفیس (UPI) نے ڈیجیٹل ادائیگیوں کو ایک عوامی تحریک میں تبدیل کر دیا ہے۔ اس کے علاوہ ، حکومت 10 لاکھ شہریوں کو مفت اے آئی  تربیت فراہم کر رہی ہے، جس سے نچلی سطح پر اے آئی  آگاہی اور اختراع کو فروغ دیا جا رہا ہے۔ انہوں نے مزید کہا کہ ان اقدامات نے ڈیجیٹل کنیکٹیوٹی کو سستی، جامع اور لوگوں پر مرکوز بنا دیا ہے۔

****

(ش ح –ام،ع ر)

U. No. 7320