केंद्रीय कृषी आणि कृषक कल्याण मंत्री शिवराज सिंह चौहान यांनी आज कृषी भवन येथे रशियाचे उपपंतप्रधान दिमित्री पात्रुशेव यांच्या बरोबर बैठक घेतली.

बैठकीदरम्यान, दोन्ही नेत्यांनी परस्पर हिताच्या विविध मुद्द्यांवर फलदायी चर्चा केली. चर्चे दरम्यान विशेषतः द्विपक्षीय व्यापार आणि कृषी क्षेत्रातील सहकार्य वाढवण्यावर भर देण्यात आला. दोन्ही देशांमध्ये, विशेषत: भारताच्या कृषी उत्पादनांच्या निर्यातीच्या विस्ताराद्वारे कृषी व्यापार वाढवणे, या मुद्द्यावर यावेळी विशेष भर देण्यात आला.

कृषी मंत्री शिवराज सिंह चौहान यांनी रशियाच्या उपपंतप्रधानांचे स्वागत केले. यावेळी त्यांनी भारत आणि रशियामधील दीर्घकालीन भागीदारीचे वैशिष्ट्य असलेला परस्पर विश्वास आणि सामंजस्य अनुकरणीय असल्याचे अधोरेखित केले. त्यांनी कृषी क्षेत्रातील भारताच्या प्रमुख प्राधान्यक्रमांविषयी सांगितले.यामध्ये अन्न सुरक्षा सुनिश्चित करणे, शेतकऱ्यांचे उत्पन्न वाढवणे आणि सर्वांना सुरक्षित आणि पौष्टिक आहार सहज उपलब्ध करून देणे, याचा समावेश आहे.

दिमित्री पात्रुशेव यांनी कृषी क्षेत्रासह अनेक क्षेत्रांमधील भारत आणि रशिया यांच्यातील दीर्घकालीन आणि मजबूत सहकार्यावर प्रकाश टाकला. दोन्ही देशांमधील कृषी व्यापार संबंध अधिक दृढ करण्यात, तसेच या भागीदारीला औपचारिक स्वरूप देण्यासाठी त्याबाबतच्या सामंजस्य करारावर स्वाक्षरी करण्यामध्ये रशियाला स्वारस्य असल्याचे त्यांनी सांगितले.

चर्चे दरम्यान, कृषी क्षेत्रात परस्पर सहकार्य वाढवण्यावर, दोन्ही देशांमधील द्विपक्षीय व्यापार संतुलित करण्यावर आणि तांत्रिक भागीदारी मजबूत करण्यावर लक्ष केंद्रित करण्यात आले. भारताने रशियन महासंघातील प्रमुख कृषी उत्पादनांसाठी सुधारित बाजारपेठ उपलब्ध करून देण्याचे महत्त्व अधोरेखित केले, आणि प्रलंबित समस्यांचे वेळेवर निराकरण होईल अशी आशा व्यक्त केली.

शैक्षणिक आदान-प्रदान आणि विद्यार्थ्यांसाठी शिष्यवृत्तीच्या संधींमध्ये सहकार्य वाढवण्यावर तसेच कृषी क्षेत्रात नवोन्मेशाला प्रोत्साहन देण्यासाठी आणि तंत्रज्ञान-आधारित उपायांना चालना देण्यासाठी सीड ट्रेसेबिलिटी सिस्टममध्ये संयुक्त उपक्रमांची शक्यता शोधण्यावर दोन्ही देशांनी सहमती दर्शविली.

कृषी क्षेत्रातील शाश्वत आणि समावेशक विकासाला चालना देण्यासाठी, कृषी व्यापार, शिक्षण, संशोधन आणि विकास या क्षेत्रातील सहकार्य मजबूत करण्याच्या सामायिक वचनबद्धतेचा दोन्ही देशांनी पुनरुच्चार केला.

***

निलिमा चितळे / राजश्री आगाशे / परशुराम कोर

*** 

 

सोशल मिडियावर आम्हाला फॉलो करा:@PIBMumbai    /PIBMumbai    /pibmumbai  pibmumbai[at]gmail[dot]com  /PIBMumbai    /pibmumbai

(Release ID: 2172007) Visitor Counter : 24